Daily Murli for Sunday 19 May 2024

19-05-24 praatahmurli om shanti ''avyakt-baapdaada'' revise 15-12-99 madhuban

sankalp shakti ke mahatva ko jaan ise badhaao aur prayog mein laao

aaj oonche te ooncha baap apne chaaron or ke shreshtha bachchon ko dekh harshit ho rahe hain kyonki saare vishwa ki aatmaon se aap bachche shreshtha arthaat highest hain। duniya vaale kehte hain highest in di world aur woh bhi ek janma ke liye lekin aap bachche highest shreshtha in di kalpa hain। saare kalpa mein aap shreshtha rahe hain। jaante ho na? apna anaadi kaal dekho anaadi kaal mein bhi aap sabhi aatmaayen baap ke najdeek rahne vaale ho। dekh rahe ho, anaadi roop mein baap ke saath-saath sameep rahne vaale shreshtha aatmaayen ho। rehte sabhi hain lekin aapka sthaan bahut sameep hai। to anaadi roop mein bhi oonche te oonche ho। phir aao aadikaal mein sabhi bachche dev-paddhaari devta roop mein ho। yaad hai apna daivi swaroop? aadikaal mein sarva praapti swaroop ho। tan-man-dhan aur jan chaar hi swaroop mein shreshtha hain। sada sampanna ho, sarva praapti swaroop ho। aisa dev-pad aur kisi bhi aatmaon ko praapta nahin hota। chaahe dharma aatmaayen hain, mahaatmaayen hain lekin aisa sarva praaptiyon mein shreshtha, apraapti ka naam-nishaan nahin, koi bhi anubhav nahin kar sakta। phir aao madhyakaal mein, to madhyakaal mein bhi aap aatmaayen poojya bante ho। aapke jad chitra pooje jaate hain। koi bhi aatmaon ki aise vidhi-poorvak pooja nahin hoti। jaise poojya aatmaon ki vidhi poorvak pooja hoti hai to socho aise vidhi-poorvak aur kiski pooja hoti hai! har karma ki pooja hoti hai kyonki karmayogi bante ho। to pooja bhi har karma ki hoti hai। chaahe dharma aatmaayen ya mahaan aatmaon ko saath mein mandir mein bhi rakhte hain lekin vidhi-poorvak pooja nahin hoti। to madhyakaal mein bhi highest arthaat shreshtha ho। phir aao vartamaan antakaal mein, to ant-kaal mein bhi ab sangam par shreshtha aatmaayen ho। kya shreshthata hai? svayan baapdaada, parmaatma aatma aur aadi aatma arthaat baap-daada donon dvaara paalna bhi lete ho, padhaai bhi padhte ho, saath mein satguru dvaara shreemat lene ke adhikaari bane ho। to anaadikaal, aadikaal, madhyamkaal aur ab antakaal mein bhi highest ho, shreshtha ho। itna nasha rehta hai?

baapdaada kehte hain is smriti ko emerge karo। man mein, buddhi mein is praapti ko dohraao। jitna smriti ko emerge rakhenge utna smriti se roohaani nasha hoga। khushi hogi, shaktishaali banenge। itna highest aatma bane hain। yeh nishchay hai pakka? ki ham hi highest, shreshtha bane the, bane hain aur sada bante rahenge। nasha hai? pakka nishchay hai to haath uthaao। teachers ne bhi uthaaya।

maataayen to sada khushi ke jhoole mein jhoolti hain, jhoolti hain na! maataaon ko bahut nasha rehta hai, kya nasha rehta hai? hamaare liye baap aaya hai। nasha hai na! dvaapar se sabhi ne neeche giraaya, isliye baap ko maataaon par bahut pyaar hai aur khaas maataaon ke liye baap aaye hain। khush ho rahe hain, lekin sada khush rehna। aise nahin abhi haath utha rahe hain aur train mein jaao to thoda-thoda nasha utarta jaae, sada ekras, avinaashi nasha ho। kabhi-kabhi ka nasha nahin, sada ka nasha sada hi khushi pradaan karta hai। aap maataaon ke chehre sada aise hone chaahiye jo door se roohaani gulaab dikhaai do kyonki is vishwa vidyaalay ki jo baat sabko achhi lagti hai, visheshta dikhaai deti hai woh yahi ki maataayen roohaani gulaab samaan sada khila hua pushpa hain aur maataayen hi jimmevaari uthaae, maataayen itna bada kaarya kar rahi hain। chaahe mahaamandaleshvar bhi hain lekin woh bhi samajhte hain ki maataayen nimitta bani hain aur aise shreshtha kaarya sahaj chala rahi hain। maataaon ke liye kahaavat hai - sach hai nahin, lekin kahaavat hai to do maataayen bhi ikattha koi kaarya karen, bada mushkil hai। lekin yahaan kaun nimitta hain? maataayen hi hain na! jab bhi milne aate hain to kya poochhte hain? maataayen chalaati hain, aapas mein ladti nahin hain? khitkhit nahin karti hain? lekin unhon ko kya pata ki yeh saadhaaran maataayen nahin hain, yeh paramatma dvaara bani hui aatmaayen, maataayen hain। parmaatma vardaan inhon ko chala raha hai। aise to nahin bhaai (paandav) samajhte hain ki maataaon ka maan hai, hamaara nahin hai kya। aap ka bhi gaayan hai 5 paandav gaaye hue hain। shaktiyon ke saath, 7 sheetlaayen dikhaate hain to ek paandav bhi dikhaate hain। aur paandavon ke bina maataayen nahin chala sakti, maataaon ke bina paandav nahin chala sakte। donon bhujaayen chaahiye lekin maataaon ko bahut gira diya tha na, isliye baap maataaon ko jo duniya asambhav samajhti hai, woh sambhav karke dikha rahe hain। aap khush ho na maataaon ko dekh karke? ya nahin? khush hain na! agar maataaon ko baap nimitta nahin banaata to naya gyaan, nai system hone kaaran paandavon ko dekhkar bahut hangaama hota। maataayen dhaal hain kyonki naya gyaan hai na। nai baaten hain। lekin bahinon ke saath bhaai sada hi saath hain। paandav apne kaarya mein aage hain aur bahinen apne kaarya mein aage hain। donon ki raay se har kaarya nirvighna ban chal raha hai।

baapdaada har roz bachchon ke bhinna-bhinna kaarya dekhte rehte hain। naye-naye plan bante hi rehte hain। samay to sabko yaad hai। yaad hai? 99 ka chakkar bhi poora ho gaya na! kya sochte the, 99 aa gaya, 99 aa gaya। lekin aap sabke liye seva karne ka varsha, nirvighna rahne ka varsha mila। dekho 99 mein hi maun bhatthiyaan kar rahe ho na! duniya ghabraati hai aur aap, jitna woh ghabraate hain utna hi aap sabhi yaad ki gahraai mein ja rahe ho। man ka maun hai hi, gyaan saagar ke tale mein jaana aur naye-naye anubhvon ke ratna laana। jo baapdaada ne pahle bhi ishaara diya hai - sabse bada khajaana hai jo vartamaan aur bhavishya banaata hai, woh hai shreshtha sankalp ka khajaana। sankalp shakti bahut badi shakti hai jo aap bachchon ke paas hai - shreshtha sankalp ki shakti। sankalp to sabke paas hain lekin shreshtha shakti, shubh bhaavna shubh kaamna ki sankalp shakti, man-buddhi ekaagra karne ki shakti - yeh aapke paas hi hai। aur jitna aage badhte jaayenge is sankalp shakti ko jama karte jaayenge, vyartha nahin ganvaayenge, vyartha ganvaane ka mukhya kaaran hai vyartha sankalp। vyartha sankalp, baapdaada ne dekha hai majority bachchon ke saare din mein vyartha abhi bhi hai। jaise sthool dhan ko economy se use karne vaale sada hi sampanna rehte hain aur vyartha ganvaane vaale kahaan na kahaan dhokha kha lete hain। aise shreshtha shuddh sankalp mein itni taakat hai jo aapke catching power, vibration catch karne ki power, bahut badh sakti hai। yeh wireless, yeh telephone… jaise yeh science ka saadhan kaarya karta hai vaise yeh shuddh sankalp ka khajaana, aisa hi kaarya karega jo london mein baithe hue koi bhi aatma ka vibration aapko aise hi spashta catch hoga jaise yeh wireless ya telephone, T.vi. yeh jo bhi saadhan hain.... kitne saadhan nikal gaye hain, isse bhi spashta aapki catching power, ekaagrata ki shakti se badhegi। yeh aadhaar to khatma hone hi hain। yeh sab saadhan kis aadhaar par hain? light ke aadhaar par। jo bhi sukh ke saadhan hain majority light ke aadhaar par hain। to kya aapki aadhyaatmik light, aatma light yeh kaarya nahin kar sakti! jo chaaho vibration najdeek ke, door ke catch kar sakenge। abhi kya hai, ekaagrata ki shakti man-buddhi donon hi ekaagra ho tab catching power hogi। bahut anubhav karenge। sankalp kiya - nihsvaartha, svachchha, spashta woh bahut quick anubhav karaayega। silence ki shakti ke aage yeh science jhukegi। abhi bhi samajhte jaate hain ki science mein bhi koi missing hain jo bharni chaahiye isliye baapdaada phir se underline kara raha hai ki antim stage, antim seva - yeh sankalp shakti bahut fast seva karaayegi iseelie sankalp shakti ke oopar aur attention do। bachaao, jama karo। bahut kaam mein aayegi। prayogi is sankalp ki shakti se banenge। science ka mahatva kyon hai? prayog mein aati hai tab sab samajhte hain haan science achha kaam karti hai। to silence ki power ka prayog karne ke liye ekaagrata ki shakti chaahiye aur ekaagrata ka mool aadhaar hai - man ki controlling power, jisse manobal badhta hai। manobal ki badi mahima hai, yeh ridhi siddhi vaale bhi manobal dvaara alpakaal ke chamatkaar dikhaate hain। aap to vidhi poorvak, ridhi siddhi nahin, vidhi poorvak kalyaan ke chamatkaar dikhaayenge jo vardaan ho jaayenge, aatmaon ke liye yeh sankalp shakti ka prayog vardaan siddha ho jaayega। to pahle yeh check karo ki man ko control karne ki controlling power hai? second mein jaise science ki shakti, switch ke aadhaar se, switch on karo, switch oph karo - aise second mein man ko jahaan chaaho, jaise chaaho, jitna samay chaaho, utna control kar sakte hain? bahut achhe-achhe svayan prati bhi aur seva prati bhi siddhi roop dikhaai denge। lekin baapdaada dekhte hain ki sankalp shakti ke jama ka khaata abhi saadhaaran attention hai। jitna hona chaahiye utna nahin hai। sankalp ke aadhaar par bol aur karma automatic chalte hain। alag-alag mehnat karne ki jaroorat hi nahin hai, aaj bol ko control karo, aaj drishti ko attention mein laao, mehnat karo, aaj vritti ko attention se change karo। agar sankalp shakti powerful hai to yeh sab svatah hi control mein aa jaate hain। mehnat se bach jaayenge। to sankalp shakti ka mahatva jaano।

yeh bhatthiyaan vishesh iseelie karaai jaati hain, aadat pad jaae। yahaan ki aadat bhavishya mein bhi attention de karte rahen tab avinaashi ho। samjha। kya mahatva hai? aapke paas bada oonche te ooncha khajaana baap ne diya hai। yeh shreshtha sankalp, shubh bhaavna, shubh kaamna ke sankalp ka khajaana hai? sabko baap ne diya hai lekin jama nambarvaar karte hain aur prayog mein laane ki shakti bhi nambarvaar hai। abhi bhi shubh bhaavna va shubh kaamna iska prayog kiya hai? vidhi poorvak karne se siddhi ka anubhav hota hai? abhi thoda-thoda hota hai। aakhir aapke sankalp ki shakti itni mahaan ho jaayegi - jo seva mein mukh dvaara sandesh dene mein samay bhi lagaate ho, sampatti bhi lagaate ho, halchal mein bhi aate ho, thakte bhi ho..lekin shreshtha sankalp ki seva mein yeh sab bach jaayega। badhaao। is sankalp shakti ko badhaane se pratyakshata bhi jaldi hogi। abhi 62-63 varsha ho gaye hain, itne samay mein kitni aatmaayen banaai hain? 9 laakh bhi poore nahin hue hain। aur saare vishwa ko sandesh pahunchaana hai to kitni karod aatmaayen hain? abhi tak bhi bhagwan inhon ka teacher hai, bhagwan inhon ko chala raha hai, karaavanhaar paramatma kara raha hai... yeh spashta nahin hua hai। achha kaarya hai aur shreshtha kaarya kar rahe hain yeh aavaaj to hai lekin karaavanhaar abhi bhi gupta hai। to yeh sankalp shakti se har ek ke buddhi ko parivartit kar sakte ho। chaahe aho prabhu kahke pratyaksha ho, chaahe baap ke roop mein pratyaksha ho। to baapdaada abhi bhi phir se attention dilaata hai ki sankalp shakti ko badhaao aur prayog mein laate raho। samjha।

jo baapdaada ne abhyaas sunaaya ki man second mein ekaagra ho jaae, kyonki samasya achaanak aati hai aur usi samay agar manobal hai, to samasya samaapta ho jaati hai lekin samasya ek padhaai padhaane vaali ban jaati hai isliye sabhi man buddhi ko abhi-abhi ekaagra karo। dekho hota hai। (drill) aise saare din mein abhyaas karte raho। achha।

chaaron or ki shreshtha aatmaon ko, aadi madhya aur ant mein shreshtha part bajaane vaali aatmaon ko, sada apne shreshtha sankalp ki vidhi ko anubhav karne vaale, sada sahaj yogi ke saath-saath prayogi banne vaale, sada sankalp ki shakti dvaara sarva shaktiyon ko badhaane vaale, man aur buddhi par nitantran rakhne vaale, sada prayogi bachchon ko baapdaada ka yaadapyaar aur namaste।

desh videsh ke bachchon ko bhi baapdaada dekh rahe hain। sankalp dvaara jo yaadapyaar ya roohrihaan karte hain woh baapdaada ke paas pahunch jaata hai। abhi bhi jo science ke bal dvaara sun rahe hain, un sabhi bachchon ko har desh ke ek ek bachche ko yaadapyaar। janak bachchi ko bhi vishesh baapdaada yaadapyaar de rahe hain kyonki man se yahaan hai, tan se vahaan hai। to sabhi ko, ek-ek ko vishesh yaadapyaar। achha, yog bhatti ka programme bahut achha chal raha hai।

(daadiyon se) sada apne ko baapdaada ke naynon ke noor samajhte ho na? naynon mein sada samaaye hue, naynon mein samaane se sada hi drishti mein samaaye rahenge। yeh bhi baap aur bachchon ka sangamayug ke suhej hain। milna, sunna, khaana peena, yeh sangam ke suhej hain। aise hi suhej manaate-manaate apne ghar chale jaayenge। phir raajya mein aayenge। brahma baap ke saath raajya karna। achha hai। duniya vaale sochte rehte aur aap sada manaate rehte। koi soch nahin hai, kya hoga, kaise hoga। kisi prakaar ka soch nahin hai। achha।

vardaan:- is antim janma mein mili hui sarva powers ko use karne vaale will power sampanna bhav

yeh sweet drama bahut achha bana-banaaya hai, ise koi badal nahin sakta। lekin drama mein is shreshtha brahman janma ko bahut hi powers mili hui hain। baap ne will kiya hai iseelie will power hai। is power ko use karo - jab chaaho is shareer ke bandhan se nyaare karmaateet sthiti mein sthit ho jaao। nyaara hoon, maalik hoon, baap dvaara nimitta aatma hoon - is smriti se man buddhi ko ekaagra kar lo tab kahenge will power sampanna।

slogan:- dil se seva karo to duaaon ka darvaaja khul jaayega।

soochna:- aaj maas ka teesra ravivaar antarraashtreey yog divas hai, sabhi brahma vatsa sangathit roop mein saayan 6.30 se 7.30 baje tak vishesh apne poorvaj swaroop mein sthit ho, poore vriksha ko shaktiyon ka daan karen। har ek aatma ko apne sammukh emerge karte hue sneh bhari drishti den, apne pan ki anubhooti karaayen।