Daily Murli for Monday 20 May 2024

20-05-2024 praatahmurli om shanti "baapdaada"' madhuban

“meethe bachche - tum baap se bhakti ka phal lene aaye ho, jinhonne jaasti bhakti ki hogi vahi gyaan mein aage jaayenge''

prashn:- kaliyugi raajaai mein kin do cheezon ki jaroorat rehti hai jo satayugi raajaai mein nahin hogi?

uttar:- kaliyugi raajaai mein 1. vajeer aur 2. guru ki jaroorat rehti hai। satayug mein yeh donon hi nahin honge। vahaan kisi ki raay lene ki darkaar nahin kyonki satayugi raajaai sangam par baap ki shreemat se sthaapan hoti hai। aisi shreemat milti hai jo 21 peedhi tak chalti hai aur sab sadgati mein hain isliye guru ki bhi darkaar nahin hai।

om shanti। om shanti ka arth kya hai? svadharma mein baitho ya apne ko aatma samajh baitho to shant mein baithenge। isko kaha jaata hai svadharma mein baithna। bhagvaanuvaach - svadharma mein baitho। abhi tumhein behad ka baap behad ki padhaai padhaate hain kyonki baap behad ka sukh dene vaala hai। padhaai se sukh milta hai na। ab baap kehte hain apne ko aatma samajh baitho। behad ka baap aaya hai tumko heere jaisa banaane। heere jaise devi-devta hi hote hain। woh kab bante hain? itne oonch purushottam kaise banen? yeh koi bhi bata na sake sivaae baap ke। prajaapita brahma ke bachche tum brahman thahre। phir tumko devta banna hai। braahmanon ki hoti hai choti। tum shoodra se brahman bane ho। tum prajaapita brahma ke mukh vanshaavli ho, kukh vanshaavli to nahin ho। kaliyugi sab hain kukh vanshaavli। saadhu, santa, rishi, muni aadi sab dvaapar se lekar kukh vanshaavli bane hain। abhi sirf tum prajaapita brahmaakumaar-kumaariyaan hi mukh vanshaavli bane ho। yeh tumhaara hai sarvottam kul, devtaaon se bhi uttam kyonki tumko padhaane vaala, manushya se devta banaane vaala baap aaya hai। bachchon ko baith samjhaate hain kyonki bhakti maarga vaale yahaan aate hi nahin hain, yahaan aate hain gyaan maarga vaale। tum aate ho behad ke baap se bhakti ka phal lene। ab bhakti ka phal kaun lenge? jisne sabse jaasti bhakti ki hogi, vahi patthar se paarasbuddhi bante hain। vahi aakar gyaan lenge kyonki bhakti ka phal bhagwan ko hi aakar dena hai। yeh achhi reeti samajhne ki baaten hain। abhi tum kaliyugi se satayugi, vikaari se nirvikaari bante ho athva purushottam bante ho। tum aaye ho aisa lakshmi-naaraayan jaisa banne ke liye। yeh bhagwan bhagavti hain to zaroor inhon ko bhagwan hi padhaayenge। bhagvaanuvaach, parantu bhagwan kisko kaha jaata hai, bhagwan to ek hota hai। bhagwan koi saikdon-hazaaron nahin hote hain। mitti-patthar mein nahin hote hain। baap ko na jaanne kaaran bhaarat kitna kangaal ban pada hai। ab bachche jaante hain bhaarat mein inki (lakshmi-naaraayan ki) raajdhaani thi। inhon ke baal-bachche aadi jo bhi the, raajdhaani ke maalik the। tum yahaan aaye hi ho raajdhaani ke maalik banne liye। yeh abhi to nahin hain na। bhaarat mein inhon ka raajya tha। bachchon ko samjhaaya jaata hai, jab in devi-devtaaon ki raajdhaani thi, sooryavanshi aur chandravanshi the tab aur koi dharma nahin tha। is samay phir aur sab dharma hain। yeh dharma hai nahin। yeh jo foundation hai, jisko thur kaha jaata hai। is samay manushya srishti roopi jhaad ka thur saara sad gaya hai। baaki sab khade hain। ab un sabki aayu poori hoti hai। yeh manushya srishti roopi variety jhaad hai। bhinna naam, roop, desh, kaal, anekaanek hain na। kitna bada jhaad hai। baap samjhaate hain kalpa-kalpa yeh jhaad jadajdeebhoot tamopradhaan ho jaata hai tab phir main aata hoon। tum mujhe pukaarte ho - baba aao, ham patiton ko aakar paavan banaao। he patit-paavan kehte hain to niraakaar baap hi yaad aata hai। saakaari to kabhi yaad nahin aayega। patit-paavan sadgati daata hai hi ek। jab satayug tha to tumhaari sadgati thi। abhi tum purushottam sangamayug par baithe ho, baaki aur sab kaliyug mein hain। tum ho purushottam sangamayug par। uttam te uttam purush va oonch te oonch gaaya jaata hai ek bhagwan। ooncha tera naam ooncha tera dhaam। oonche te oonch rehte hain na paramdham mein। yeh bada sahaj samajhne ka hai। satayug, treta, dvaapar, kaliyug phir hai sangamayug। iska kisko pata nahin। drama mein yeh bhakti maarga bhi bana hua hai। aise nahin kah sakte ki baba phir yeh bhakti maarga kyon banaaya hai! yeh to anaadi hai। main baith tumko is drama ka raaz samjhaata hoon। mainne banaaya ho to phir kahenge kab banaaya! baap kehte hain yeh anaadi hai hi। shuru kab hua, yeh savaal nahin aa sakta। agar kahenge phalaane samay shuru hua to kahenge banda kab hoga! parantu nahin, yeh to chakra chalta hi rehta hai। tum chitra bhi banaate ho brahma, vishnu, shankar ka। yeh hain devtaayen। trimoorti dikhaate hain, usmein oonch te oonch shiv ko dikhaate nahin hain। unko alag kar dete hain। brahma dvaara sthaapna, so to ab ho rahi hai। tum apni raajdhaani sthaapan kar rahe ho। raajdhaani mein to sab prakaar ke pad hote hain। president hai, prime minister hai, chief minister hai। yeh sab hote hain raay dene vaale। satayug mein raay dene vaale koi chaahiye nahin। abhi jo tumko raay athva shreemat milti hai, woh avinaashi ban jaati hai। abhi dekho kitni raay dene vaale hain। dher ke dher hain। paise kharcha kar minister aadi bante hain - raay dene ke liye। khud government bhi kehti hai yeh corruptive hain, bahut khaate hain। yeh to hai hi kaliyug। vahaan to aise hote nahin। vazeer aadi ki darkaar nahin rehti। yeh mat 21 janma chalti hai। tumhaari sadgati ho jaati hai। vahaan to guru ki bhi darkaar nahin rehti। satayug mein na guru, na vazeer rehta hai। abhi tumko shreemat milti hai avinaashi 21 peedhi ke liye, 21 budhaape ke liye। boodha ban phir shareer chhod jaae bachcha banenge। jaise sarpa ek khaal chhod phir doosri lete hain।

baap samjhaate hain meethe-meethe bachchon, tum brahman-braahmaniyaan ho। granth mein bhi padhte sunte to sab hain moot paleeti kapad dhoe… bhagwan ko bulaate hain aakar moot paleeti kapda ham aatmaon ka dhulaai karo। ham sab aatmaon ke baba, aakar hamaara kapda saaph karo। shareer to nahin dhona hai, aatmaon ko dhona hai kyonki aatma hi patit bani hai। patit aatmaon ko aakar paavan banaao। to baap bachchon ko samjhaate hain meethe-meethe bachchon, mujhe yahaan aana padta hai। main hi gyaan ka saagar hoon, pavitrata ka saagar hoon। tum behad ke baap se behad ka varsa lete ho। had ke baap se had ka varsa milta hai। had ke varse mein duhkh bahut hai isliye baap ko yaad karte hain। athaah duhkh hain। baap ne kaha hai yeh 5 vikaaron roopi raavan tumhaara sabse bada dushman hai। yeh aadi-madhya-ant duhkh dete hain। he meethe bachchon, agar is janma mein brahman bankar kaam par jeet pahni to jagat jeet banenge। tum pavitrata dhaaran karte ho devta banne ke liye। tum aaye ho aadi sanaatan devi-devta dharma ki sthaapna karne। yeh hai purushottam sangamayug। ismen purushaartha kar paavan banna hai। kalpa pahle jitne paavan bane the, sooryavanshi-chandravanshi gharaane ke, woh zaroor banenge। time to lagta hai na। baap yukti bahut sahaj bataate hain। ab baap ke bachche to bane ho। yahaan tum kiske paas aaye ho? woh to hai niraakaar। usne is shareer ka loan liya hai। woh khud bataate hain, yeh hai bahut janmon ke ant ke bhi ant ka janma। to yeh hua sabse jaasti puraana tan। main aata hi hoon puraani raavan ki aasuri duniya mein aur phir unke shareer mein jo apne janmon ko nahin jaante hain। yeh hai bahut janmon ke ant ka janma। jabki inki vaanaprastha avastha hai, tab main pravesh karta hoon। guru bhi hamesha vaanaprastha avastha mein kiya jaata hai। kehte hain na 60 to lagi laath। ghar mein rahenge to bachchon ki laath lagegi isliye bhaago ghar se। bachche aise hote hain jo baap ko laathi maarne mein bhi deri nahin karte hain। kahenge kahaan mare to dhan hamko mile। vaanaprasthiyon ke bahut satsang hote hain। tum jaante ho - sarva ka sadgati daata ek hai, woh sangamayug par hi aate hain। satayug mein jab tum sadgati paate ho to baaki sab shantidham mein rehte hain। isko kaha jaata hai sarva ki sadgati। baap ke sivaae aur to koi bhi sadgati daata ho nahin sakta। na kisko shri kah sakte hain, na shri shri। shri arthaat shreshtha hote hain devtaayen। shri lakshmi, shri naaraayan unko kaha jaata hai। unhon ko banaane vaala kaun? shri shri shivbaaba ko hi kehna chaahiye। to baap bhoolen siddha kar bataate hain tumne itne guru kiye phir bhi aisa hi hoga। tum phir vahi guru aadi karenge। chakra phir vahi repeat hoga। jab tum svarga mein rehte ho to vahaan ho sukhdhaam mein। pavitrata sukh-shanti sab vahaan hai। vahaan jhagda aadi hota nahin। baaki itne sab shantidham mein chale jaate hain। bhal satayug ko laakhon varsha kah dete hain। baap kehte hain laakhon varsha ki baat hai hi nahin। yeh to 5 hazaar varsha ki baat hai। kehte bhi hain manushya ke 84 janma। din-pratidin seedhi neeche utarte tamopradhaan bante jaate hain। to baap samjhaate hain - yeh bhi drama bana hua hai। actors hokar drama ke creator, director, mukhya actor ko na jaanen to kya kahenge! baap kehte hain is behad ke drama ko koi bhi manushya maatra nahin jaante hain। yeh baap aakar samjhaate hain। kehte bhi hain shareer lekar part bajaate hain, to naatak hua na। naatak ke mukhya actors kaun hain? koi bata nahin sakenge। abhi tum bachche jaante ho yeh behad ka drama kaise joon misal chalta hai। tik-tik hoti rehti hai। mukhya hai oonch te oonch baba, jo aakar samjhaate bhi hain aur sarva ki sadgati bhi karte hain। satayug mein doosre koi hote nahin। bahut thode hain। woh thode jo honge unhonne sabse jaasti bhakti ki hogi। tumhaare paas pradarshani va museum mein aayenge woh jinhonne bahut bhakti ki hai। ek shiv ki bhakti karna - isko kaha jaata hai avyabhichaari bhakti। phir bahuton ki bhakti karte vyabhichaari ban padte hain। abhi to bilkul hi tamopradhaan bhakti hai। pahle satopradhaan bhakti thi। phir seedhi utarte tamopradhaan bane hain। aisi haalat jab hoti hai tab baap aate hain sabko satopradhaan banaane। is behad ke drama ko bhi tum abhi jaante ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) behad baap se behad ka varsa lene ke liye paavan zaroor banna hai। jab abhi pavitrata ka varsa lo arthaat kaam jeet bano tab jagatjeet ban sakenge।

2) behad baap se padhaai padhkar svayan ko kaudi se heere jaisa banaana hai। behad ka sukh lena hai। nasha rahe - manushya se devta banaane vaala baap abhi hamaare sammukh hai, abhi hai hamaara yeh sarvottam brahman kul।

vardaan:- gyaan sampanna daata ban sarva aatmaon ke prati shubhchintak banne vaale shreshtha sevaadhaari bhav

shubh-chintak banne ka vishesh aadhaar shubh chintan hai। jo vyartha chintan va parchintan karte hain woh shubh chintak nahin ban sakte। shubhchintak maniyon ke paas shubh-chintan ka shaktishaali khajaana sada bharpoor hoga। bharpoorta ke kaaran hi auron ke prati shubhchintak ban sakte hain। shubhchintak arthaat sarva gyaan ratnon se bharpoor, aise gyaan sampanna daata hi chalte-phirte har ek ki seva karte shreshtha sevaadhaari ban jaate hain।

slogan:- vishwa raajya adhikaari banna hai to vishwa parivartan ke kaarya mein nimitta bano।