Daily Murli for Thursday 15 August 2024

15-08-2024 praatahmurli om shanti "baapdaada"' madhuban

“meethe bachche - baap aaya hai tumhein sachchi svatantrata dene, jamaghton ki sajaaon se mukta karne, raavan ki partantrata se chhudaane''

prashn:- baap aur tum bachchon ki samjhaani mein mukhya antar kaun-sa hai?

uttar:- baap jab samjhaate hain to ‘meethe bachche' kahkar samjhaate hain, jisse baap ki baat ka teer lagta hai। tum bachche aapas mein bhaaiyon ko samjhaate ho, ‘meethe bachche' nahin kah sakte। baap bada hai isliye unki baat ka asar hota hai। woh bachchon ko realise karaate hain - bachchon, tumhein lajja nahin aati, tum patit ban gaye, ab paavan bano।

om shanti। behad ka roohaani baap behad ke roohaani bachchon ko baith samjhaate hain, ab yeh behad ka baap aur behad ke bachche hi jaante hain। aur koi na behad ke baap ko jaante hain, na behad ke bachche apne ko maante hain। brahma mukh vanshaavli hi jaante aur maante hain। aur koi to maan bhi nahin sakenge। brahma bhi zaroor chaahiye, jisko aadi dev kehte hain, jismen baap ki praveshta hoti hai। baap aakar kya karte hain? kehte hain paavan banna hai। baap ki shreemat hai apne ko aatma nishchay karo। bachchon ko aatma ka parichay bhi diya hai। aatma bhrakuti ke beech mein nivaas karti hai। baba ne samjhaaya hai aatma avinaashi hai, inka takhta yeh vinaashi shareer hai। yeh baaten tum jaante ho ki ham sab aatmaayen aapas mein bhaai-bhaai ek baap ke bachche hain। eeshvar sarvavyaapi kehna yeh bhool hai। tum achhi reeti samjhaate ho, har ek mein 5 vikaaron ki praveshta hai to kai samajhte hain yeh theek bolte hain। ham bhaai-bhaai hain to zaroor baap se varsa milna chaahiye। parantu yahaan se baahar nikalte hain to maaya ke toofaanon mein chale jaate hain। koi virle thaharte hain। sab jagah yeh haal hota hai। koi thoda achha samajhte hain to jaasti samajhne ki koshish karte hain। abhi tum sabko samjha sakte ho। agar koi jaasti attention nahin dete hain to kahenge yeh puraane bhakta nahin hain। in baaton ko to samajhne vaale hi samjhen। koi nahin samajhte hain to phir samjha bhi nahin sakte hain। tumhaare paas bhi nambarvaar hain, koi achha aadmi hota hai to unko samjhaane ke liye aise achhe ko bheja jaata hai। shaayad kuchh samajh jaae। yeh to jaante hain, bade aadmi itna jaldi nahin samjhenge। haan, opinion dete hain - inki samjhaani bahut achhi hai। baap ka parichay poora dete hain parantu khud ko phursat hi kahaan hai। tum kehte ho behad ke baap ko yaad karo to vikarma vinaash hon।

abhi tum samajhte ho baap direct ham aatmaon se baat karte hain। direct sunne se teer achha lagta hai। woh bi.ke. dvaara sunte hain। yahaan parampita paramatma brahma dvaara direct samjhaate hain - he bachchon, tum baap ka kehna nahin maante ho। tum sab to koi ko aise nahin kah sakenge na। vahaan to baap nahin hai। yahaan baap baithe hain, baap baat karte hain। bachche, tum baap ki bhi nahin maanenge! agyaan kaal mein bhi baap ki samjhaani aur bhaai ki samjhaani mein pharka padta hai। bhaai ka itna asar nahin padega jitna baap ka asar padega। baap phir bhi bada hua na, to dar rahega। tumko bhi baap samjhaate hain - mujh apne baap ko yaad karo। tumko sharma nahin aati, tum ghadi-ghadi mujhe bhool jaate ho। baap direct kehte hain to woh asar jaldi padta hai। are, baap ka kehna nahin maante ho। behad ka baap kehte hain yeh janma nirvikaari bano to 21 janma nirvikaari ban pavitra duniya ka maalik banenge। yeh nahin maante ho। baap ke kahne ka teer kada lagta hai। pharka to rehta hai। aise bhi nahin hai ki sadaiv naye-naye se baba milte rahenge। ulte-sulte prashn karte hain। buddhi mein nahin baithta kyonki yeh hai bilkul nai baat। geeta mein shreekrishna ka naam likh diya hai। woh to ho nahin sakta। abhi drama anusaar tumhaari buddhi mein baitha hai। tum bachche bhaagte ho ham baba ke paas jaayen, direct murli sunen। vahaan to bhaaiyon dvaara sunte the, ab baba se sunen। baap ka asar hota hai। bachche-bachche kah baat karte hain। bachche, tumhein lajja nahin aati! baap ko yaad nahin karte ho! baap ke saath tumhaara pyaar nahin hai! kitna yaad karte ho? baba ek ghanta। are, nirantar yaad karenge to tumhaare paap kat jaayenge। janma-janmaantar ke paapon ka bojha sir par hai। baap sammukh samjhaate hain - tumne baap ki kitni glaani ki hai। tumhaare oopar to case chalna chaahiye। akhbaar mein koi ke liye glaani likhte hain to us par case karte hain na। ab baap smriti dilaate hain - tum kya-kya karte the। baap samjhaate hain drama anusaar raavan ke sang mein yeh hua hai। ab bhakti maarga sab poora hua, past ho gaya, beech mein koi rokne vaala to hota nahin। din-pratidin utarte-utarte tamopradhaan buddhi buddhu ho jaate hain। jiski pooja karte hain, unko thikkar-bhittar mein kah dete hain। isko kaha jaata hai behad ki besamjhi। behad ke bachchon ki behad ki besamjhi। ek taraph shivbaaba ki pooja karte hain, doosre taraph us baap ko hi sarvavyaapi kehte hain। abhi tumko smriti aai hai itni besamjhi ki jo baap ki glaani kar di hai। ab tum bachchon ne samjha hai to ab purooshaartha kar rahe ho beggar tu prince banne ka। shreekrishna satayug ka prince, unke liye phir kehte 16108 raaniyaan thi, bachche the! abhi tumko to lajja aayegi। koi paap karte hain to bhagwan ke aage kaan pakadkar kehte hain - he bhagwan, badi bhool hui, raham karo, kshama karo। tumne kitni badi bhool ki hai। baap samjhaate hain - drama mein aisa hai। jab aise bano tab to main aaoon।

ab baap kehte hain - tumko sab dharma vaalon ka kalyaan karna hai। baap jo sabki sadgati karte hain, unke liye sab dharma vaale kah dete hain sarvavyaapi hai। yeh kahaan se seekhe। bhagvaanuvaach, mai sarvavyaapi nahin hoon। tumhaare kaaran auron ka bhi aisa haal ho gaya hai। pukaarte hain - he patit-paavan… parantu samajhte nahin hain। ham jab pahle-pahle ghar se aaye to patit the kya? deh-abhimaani banne ke kaaran patit bane। koi bhi dharma vaala aaye, unse poochhna hai parampita paramatma ka tumko parichay hai, woh kaun hai? kahaan nivaas karte hain? to kahenge oopar mein ya kahenge sarvavyaapi hai। baap kehte hain tumhaare khaatir saari duniya chat khaate mein aa gai hai। nimitta tum bane ho। sabko samjhaana padta hai। bhal drama anusaar hota hai parantu tum patit to ban gaye na। sabhi paap aatmaayen hain। ab punya aatma banne ke liye pukaarte hain। sab dharma vaalon ko muktidhaam ghar mein jaana hai। vahaan pavitra hain। yeh bhi drama bana hua hai, jo baap aakar samjhaate hain। yeh gyaan sab dharmon ke liye hai। baba ke paas samaachaar aaya tha, kisi aachaarya ne kaha aap sabko aatma mein paramatma samajh namaskaar karta hoon। ab itne sab paramatma hain kya? kuchh bhi samajh nahin। jinhonne bhakti jaasti nahin ki hai, woh thaharte nahin hain। centres mein bhi koi kitna samay, koi kitna samay thaharte hain। isse samajhna chaahiye ki bhakti kam ki hai isliye thaharte nahin hain। phir bhi jaayenge kahaan। doosri koi hatti to hai nahin। aisi kya yukti rachen jo manushya jaldi samajh len। abhi to sabko paigaam dena hai। yeh kehna hai ki baap ko yaad karo। tum hi poora yaad nahin kar sakte ho to tumhaara teer kaise lagega isliye baba kehte hain chart rakho। mukhya baat hai hi paavan banne ki। jitna paavan banenge utna knowledge dhaaran hogi। khushi bhi hogi। bachchon ko to bahut khushi honi chaahiye - ham sabka uddhaar karen। baap hi aakar sadgati karte hain। baap ko to gam aur khushi ki baat hi nahin। yeh drama bana hua hai। tumko to koi gam nahin hona chaahiye। baap mila hai aur kya, sirf baap ki mat par chalna hai। yeh samjhaani bhi ab milti hai, satayug mein nahin milegi। vahaan to gyaan ki baat hi nahin। yahaan tumko behad ka baap mila hai to tumko svarga se bhi jaasti khushi honi chaahiye।

baap kehte hain vilaayat mein bhi jaakar tumko yeh samjhaana hai। sabhi dharma vaalon par tumko taras padta hai। sabhi kehte hain - he bhagwan raham karo, bliss karo, duhkh se liberate karo। parantu samajhte kuchh nahin। baap anek prakaar ki yuktiyaan batlaate hain। sabko yeh batlaana hai ki tum raavan ki jel mein pade ho। kehte hain svatantrata mile, parantu vaastav mein svatantrata kaha kisko jaata hai, yeh koi jaanta nahin hai। raavan ki jel mein to sab phanse hue hain। abhi sachchi svatantrata dene ke liye baap aaye hain। phir bhi raavan ki jel mein partantra hokar paap karte rehte hain। sachchi svatantrata kaun-si hai? yeh manushyon ko batlaana hai। tum akhbaar mein bhi daal sakte ho - yahaan raavan ke raajya mein svatantrata thode hi hai। bahut short mein likhna chaahiye। jaasti teek-teek koi samajh na sake। bolo, tumko svatantrata hai kahaan, tum to raavan ki jel mein pade ho। tumhaara vilaayat mein aavaaz hoga to phir yahaan jhat samajh jaayenge। ek-do par gheraav karte rehte hain। to yeh svatantrata hui kya? svatantrata to tumko baap de rahe hain। raavan ki jel se svatantra kar rahe hain। tum jaante ho vahaan ham bade svatantra, bade dhanvaan hote hain। kiski nazar bhi nahin padti। peechhe jab kamjor banen tab sabki nazar padi tumhaare dhan par। muhammad gazanvi ne aakar mandir ko loota to tumhaari svatantrata poori ho gai। raavan ke raajya mein partantra ban gaye। abhi tum purooshottam sangamayug par ho। abhi sachchi svatantrata ko pa rahe ho। woh to svatantrata ko samajhte hi nahin। to yeh baat bhi yukti se samjhaani hai। jinhonne kalpa pahle svatantrata paai hai, vahi maanenge। tum samjhaate ho to kitna argue karte hain, jaise buddhu। time vesta karte hain to dil nahin hoti hai baat karen।

baap aakar svatantrata dete hain। raavan ki partantrata mein duhkh bahut hai। aparmaapaar duhkh hai। baap ke raajya mein ham kitna svatantra hote hain। svatantrata usko kaha jaata hai - jab ham pavitra devta bante hain to raavan raajya se chhoot jaate hain। sachchi svatantrata baap hi aakar dete hain। abhi to paraaye raajya mein sab duhkhi hain। svatantrata milne ka yeh purooshottam sangamayug hai। woh to kehte foreign government gai to ham svatantra banen। ab tum jaante ho jab tak paavan nahin bane hain tab tak svatantra nahin kahenge। phir jamaghton ki sajaayen khaani padengi। pad bhi bhrashta ho jaayega। baap aate hain ghar le jaane। vahaan sab svatantra hote hain। tum sab dharma vaalon ko samjha sakte ho - tum aatma ho, muktidhaam se aaye ho part bajaane। sukhdhaam se phir duhkhadhaam mein tamopradhaan duniya mein aa gaye ho। baap kehte hain tum meri santaan ho, raavan ki thode hi ho। main tumko raajya-bhaagya dekar gaya tha। tum apne raajya mein kitne svatantra the। ab phir vahaan jaane ke liye paavan banna hai। tum kitne dhanvaan bante ho। vahaan to paise ki chinta nahi hoti hai। bhal gareeb ho phir bhi paise ki chinta nahin। sukhi rehte hain। chinta yahaan hoti hai। baaki raajdhaani mein nambarvaar pad hote hain। sooryavanshi raajaaon jaise sab thode hi banenge। jitni mehnat utna pad। tum sab dharma vaalon ki service karne vaale ho। vilaayat vaalon ko bhi samjhaana hai - tum sab bhaai-bhaai ho na। sab shantidham mein rehte hain। ab raavan raajya mein ho। ab ghar jaane ka raasta aapko bataate hain, apne ko aatma samajh mujhe yaad karo। kehte bhi hain bhagwan sabko liberate karte hain। parantu yeh nahin samajhte ki kaise liberate karte hain। bachche kahaan moonjh padte hain to kahenge baba hamko liberate kar apne ghar le chalo। jaise tum log foggy mein jangal mein moonjh gaye the। raaste ka maaloom nahin padta tha। phir liberator mila, raasta bataaya। behad ke baap ko bhi kehte hain - baba, hamko liberate karo। aap chalo, ham bhi aapke peechhe chalenge। sivaae baap ke aur koi raasta nahin bataate hain। kitne shaastra padhte the, teerthon par dhakke khaate the parantu bhagwan ko nahin jaante to dhoondhenge phir kahaan se। sarvavyaapi hai phir milenge kaise। kitna agyaan andhiyaare mein hain। sarva ka sadgati daata ek baap hai, vahi aakar tum bachchon ko agyaan andhere se nikaalte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ek baap mila hai isliye kisi bhi baat ka gam (chinta) nahin karna hai। unki mat par chalkar, behad ka samajhdaar ban khushi-khushi sabka uddhaar karne ke nimitta banna hai।

2) jamaghton ki sajaaon se bachne va sachchi svatantrata paane ke liye paavan zaroor banna hai। knowledge source aaph income hai, ise dhaaran kar dhanvaan banna hai।

vardaan:- knowledge ki light might se wrong ko right mein parivartan karne vaale gyaani tu aatma bhav

kaha jaata hai knowledge is light, might। jahaan light arthaat roshni hai ki ye wrong hai, ye right hai, ye andhakaar hai, ye prakaash hai, ye vyartha hai, yeh samartha hai - to wrong samajhne vaale wrong karmo va sankalpon ke vasheebhoot ho nahin sakte। gyaani tu aatma arthaat samajhdaar, gyaan swaroop, kabhi yeh nahin kah sakte ki aisa hona to chaahiye...lekin unke paas wrong ko right mein parivartan karne ki shakti hoti hai।

slogan:- jo sada shubh-chintak aur shubh-chintan mein rehte hain woh vyartha chintan se chhoot jaate hain।