Daily Murli for Wednesday 2 October 2024

02-10-2024 praatahmurli om shanti "baapdaada"' madhuban

“meethe bachche - yaad mein rahkar har karma karo to anekon ko tumhaara saakshaatkaar hota rahega''

prashn:- sangamayug par kis vidhi se apne hriday ko shuddh (pavitra) bana sakte ho?

uttar:- yaad mein rahkar bhojan banaao aur yaad mein khaao to hriday shuddh ho jaayega। sangamayug par tum braahmanon dvaara banaaya hua pavitra brahma bhojan devtaaon ko bhi bahut pasanda hai। jinko brahma bhojan ka kadar rehta woh thaali dhokar bhi pi lete hain। mahima bhi bahut hai। yaad mein banaaya hua bhojan khaane se taakat milti hai, hriday shuddh ho jaata hai।

om shanti। sangam par hi baap aate hain। roz bachchon ko kehna padta hai ki roohaani baap roohaani bachchon ko samjha rahe hain। aisa kyon kehte hain ki bachche apne ko aatma samjho? bachchon ko yeh yaad pade barobar behad ka baap hai, aatmaon ko padhaate hain। service ke liye bhinna-bhinna points par samjhaate hain। bachche kehte hain service nahin hai, ham baahar mein service kaise karen? baap service ki yuktiyaan to bahut hi sahaj batlaate hain। chitra haath mein ho। raghunaath ka kaala chitra bhi ho, gora bhi ho। shreekrishna ka va shreenaaraayan ka chitra gora bhi ho, kaala bhi ho। bhal chhote chitra hi hon। shreekrishna ka itna chhota chitra bhi banaate hain। tum mandir ke pujaari se poochh sakte ho - inko kaala kyon banaaya hai jabki asul gora tha? vaastav mein to shareer kaala nahin hota hai na। tumhaare paas bahut achhe gore-gore bhi rehte hain, parantu inko kaala kyon banaaya hai? yeh to tum bachchon ko samjhaaya gaya hai aatma kaise bhinna-bhinna naam roop dhaaran karte neeche utarti hai। jabse kaam chita par chadhti hai tab se kaala banti hai। jagat naath va shreenaath dvaare mein dher yaatri hote hain, tumko nimantran bhi milte hain। bolo, ham shreenaath ke 84 janmon ki jeevan kahaani sunaate hain। bhaaiyon aur bahnon aakar suno। aisa bhaashan aur koi to kar na sake। tum samjha sakte ho yeh kaala kyon bane hain? har ek ko paavan se patit zaroor banna hai। devtaayen jab vaam maarga mein gaye hain tab unhein kaala banaaya hai। kaam chita par baithne se iron aged ban jaate hain। iron ka colour kaala hota hai, sone ka golden, unko kahenge gore। vahi phir 84 janmon ke baad kaale bante hain। seedhi ka chitra bhi zaroor haath mein ho। seedhi bhi badi ho to koi bhi door se dekh sakenge achhi reeti। aur tum samjhaayenge ki bhaarat ki yeh gati hai। likha hua bhi hai utthaan aur patan। bachchon ko service ka bahut shauk hona chaahiye। samjhaana hai yeh duniya ka chakra kaise phirta hai, golden ej, silver ej, copper ej… phir yeh purooshottam sangamayug bhi dikhaana hai। bhal bahut chitra nahin uthaao। seedhi ka chitra to mukhya hai bhaarat ke liye। tum samjha sakte ho ab phir se patit se paavan tum kaise ban sakte ho। patit-paavan to ek hi baap hai। unko yaad karne se second mein jeevanmukti milti hai। tum bachchon mein yeh saara gyaan hai। baaki to sab agyaan neend mein soye hue hain। bhaarat gyaan mein tha to bahut dhanvaan tha। abhi bhaarat agyaan mein hai to kitna kangaal hai। gyaani manushya aur agyaani manushya hote hain na। devi-devta aur manushya to naameegraami hain। devtaayen satayug-treta mein, manushya dvaapar-kaliyug mein। bachchon ki buddhi mein sadaiv rehna chaahiye service kaise karen? woh bhi baap samjhaate rehte hain। seedhi ka chitra samjhaane ke liye bahut achha hai। baap kehte hain grihastha vyavhaar mein raho। shareer nirvaah ke liye dhandha aadi to karna hi hai। jismaani vidya bhi padhni hai। baaki jo time mile to service ke liye khyaal karna chaahiye - ham auron ka kalyaan kaise karen? yahaan to tum bahuton ka kalyaan nahin kar sakte ho। yahaan to aate hi ho baap ki murli sunne। ismen hi jaadu hai। baap ko jaadoogar kehte hain na। gaate bhi hain murli teri mein hai jaadu..... tumhaare mukh se jo murli bajti hai usmein jaadu hai। manushya se devta ban jaate hain। aisa koi jaadoogar hota nahin sivaae baap ke। gaayan bhi hai manushya se devta kiye karat na laagi vaar। puraani duniya se nai duniya honi zaroor hai। puraani ka vinaash bhi zaroor hona hai। is samay tum raajayog seekhte ho to zaroor raaja bhi banna hai। abhi tum bachche samajhte ho 84 janmon ke baad phir pahla number janma chaahiye kyonki world ki history-geography repeat hoti hai। satayug-treta jo bhi hokar gaya hai so phir repeat hona hai zaroor।

tum yahaan baithe ho to bhi buddhi mein yeh yaad karna hai ki ham vaapis jaate hain phir satopradhaan devi-devta bante hain। unko devta kaha jaata hai। abhi manushyon mein daiveegun nahin hain। to service tum kahaan bhi kar sakte ho। kitna bhi dhandha aadi ho, grihastha vyavhaar mein rehte bhi kamaai karte rehna hai। ismen mukhya baat hai pavitrata ki। purity hai to pees-prosperity hai। complete pure ban gaye to phir yahaan nahin rah sakte kyonki hamko shantidham zaroor jaana hai। aatma pure ban gai to phir aatma ko is puraane shareer ke saath nahin rehna hai। yeh to impure hai na। 5 tatva hi impure hain। shareer bhi inse hi banta hai। inko mitti ka putla kaha jaata hai। 5 tatva ka shareer ek khatma hota hai, doosra banta hai। aatma to hai hi। aatma koi banne ki cheez nahin। shareer pahle kitna chhota phir kitna bada hota hai। kitne organs milte hain jisse aatma saara part bajaati hai। yeh duniya hi wonderful hai। sabse wonderful hai baap, jo aatmaon ka parichay dete hain। ham aatma kitni chhoti hain। aatma pravesh karti hai। har ek cheez wonderful hai। jaanavron ke shareer aadi kaise bante hain, wonder hai na। aatma to sabmen vahi chhoti hai। haathi kitna bada hai, unmein itni chhoti aatma jaakar baithti hai। baap to manushya janma ki baat samjhaate hain। manushya kitne janma lete hain? 84 laakh janma to hain nahin। samjhaaya hai jitne dharma hain utni variety banti hai। har ek aatma kitne features ka shareer leti hai, wonder hai na। phir jab chakra repeat hota hai, har janma mein features, naam, roop aadi badal jaate hain। aise nahin kahenge krishna kaala, krishna gora। nahin, unki aatma pahle gori thi phir 84 janma lete-lete kaali banti hai। tumhaari bhi aatma bhinna-bhinna features, bhinna-bhinna shareer lekar part bajaati hai। yeh bhi drama hai।

tum bachchon ko kabhi bhi koi phikraat nahin honi chaahiye। sab actors hain। ek shareer chhod doosra lekar phir part bajaana hi hai। har janma mein sambandh aadi badal jaata hai। to baap samjhaate hain yeh bana-banaaya drama hai। aatma hi 84 janma lete-lete tamopradhaan bani hai, ab phir aatma ko satopradhaan banna hai। paavan to zaroor banna hai। paavan srishti thi, ab patit hai phir paavan honi hai। satopradhaan, tamopradhaan akshar to hai na। satopradhaan srishti phir sato, rajo, tamo srishti। abhi jo tamopradhaan bane hain vahi phir satopradhaan kaise banen? patit se paavan kaise banen, barsaat ke paani se to paavan nahin banenge। barsaat se to manushyon ka maut bhi ho jaata hai। floods ho jaati hain to kitne doob jaate hain। abhi baap samjhaate rehte hain yeh sab khanda nahin rahenge। natural calamities bhi madad dengi, kitne dher manushya, jaanvar aadi bah jaate hain। aise nahin ki paani se paavan ban jaate hain, woh to shareer chala jaata hai। shareeron ko to patit se paavan nahin banna hai। paavan banna hai aatma ko। so patit-paavan to ek baap hai। bhal woh jagat guru kahlaate hain parantu guru ka to kaam hai sadgati dena, woh to ek hi baap sadgati daata hai। baap satguru hi sadgati dete hain। baap samjhaate to bahut rehte hain, yeh bhi sunte hain na। guru log bhi baaju mein shishya ko bithaate hain sikhlaane ke liye। yeh bhi unke baaju mein baithta hai। baap samjhaate hain to yeh bhi samjhaate honge na isliye guru brahma number one mein jaata hai। shankar ke liye to kehte hain aankh kholne se bhasma kar dete hain phir unko to guru nahin kaha jaae। phir bhi baap kehte hain bachchon maamekam yaad karo। kai bachche kehte hain - itne dhandhedhori ki phikraat mein rehte, ham apne ko aatma samajh baap ko kaise yaad karen? baap samjhaate hain bhakti maarga mein bhi tum - he eeshvar, he bhagwan kah yaad karte ho na। yaad tab karte ho jab koi duhkh hota hai। marne samay bhi kehte hain raam-raam bolo। bahut sansthaayen hain jo raam naam ka daan deti hain। jaise tum gyaan ka daan dete ho woh phir kehte raam bolo, raam bolo। tum bhi kehte ho shivbaaba ko yaad karo। woh to shiv ko jaante hi nahin। aise raam-raam kah dete hain। ab yeh bhi kyon kehte hain ki raam kaho, jabki paramatma sabmen hai? baap baith samjhaate hain raam va krishna ko paramatma nahin kaha jaata, unhein devta kaha jaata hai, unki bhi kalaayen kam hoti jaati hain। har ek cheez ki kala kam to hoti hi hai। kapda bhi pahle naya, phir puraana hota hai।

to baap itni baaten samjhaate hain phir bhi kehte hain - mere meethe-meethe roohaani bachchon, apne ko aatma samjho। simar-simar sukh paao। yahaan to duhkhadhaam hai। baap ko aur varse ko yaad karo। yaad karte-karte athaah sukh paayenge। kal-klesh, beemaari aadi jo bhi hain sab chhoot jaayenge। tum 21 janmon ke liye nirogi ban jaate ho। kal-klesh miten sab tan ke, jeevanmukti pad paao। gaate hain parantu act mein nahin aate hain। tumko baap practical mein samjhaate hain - baap ko simro to tumhaari sab manokaamnaayen poori ho jaayengi, sukhi ho jaayenge। mochra khaakar maani tukad khaana (saza khaakar roti ka tukda khaana) achha nahin hai। sabko taaji roti pasanda aati hai। aajkal to tel hi chalta hai। vahaan to ghi ki nadiyaan bahti hain। to bachchon ko baap ka simran karna hai। baba aise bhi nahin kehte yahaan baithkar baap ko yaad karo। nahin, chalte, phirte, ghoomte shivbaaba ko yaad karna hai। naukri aadi bhi karni hai। baap ki yaad buddhi mein rahni chaahiye। laukik baap ke bachche naukri aadi karte hain to yaad rehta hi hai na। koi bhi poochhega to jhat bataayenge ham kiske bachche hain। buddhi mein baap ki property bhi yaad rehti hai। tum bhi baap ke bachche bane ho to property bhi yaad hai। baap ko bhi yaad karna hai aur koi se sambandh nahin। aatma mein hi saara part noondha hua hai jo emerge hota hai। is brahman kul mein tumhaara jo kalpa-kalpa part chala hai vahi emerge hota rehta hai। baap samjhaate hain khaana banaao, mithaai banaao, shivbaaba ko yaad karte raho। shivbaaba ko yaad kar banaayenge to mithaai khaane vaale ka bhi kalyaan hoga। kahaan saakshaatkaar bhi ho sakta hai। brahma ka bhi saakshaatkaar ho sakta hai। shuddh anna padta hai to brahma ka, shreekrishna ka, shiv ka saakshaatkaar kar sakte hain। brahma hai yahaan। brahmaakumaar-kumaariyon ka naam to hota hai na। bahuton ko saakshaatkaar hote rahenge kyonki baap ko yaad karte ho na। baap yuktiyaan to bahut hi bataate hain। woh mukh se raam-raam bolte hain, tumko mukh se kuchh bolna nahin hai। jaise woh log samajhte hain guroonaanak ko bhog laga rahe hain, tum bhi samajhte ho ham shivbaaba ko bhog lagaane ke liye banaate hain। shivbaaba ko yaad karte banaayenge to bahuton ka kalyaan ho sakta hai। us bhojan mein taakat ho jaati hai, isliye baba bhojan banaane vaalon ko bhi kehte hain shivbaaba ko yaad kar banaate ho? likha hua bhi hai shivbaaba yaad hai? yaad mein rahkar banaayenge to khaane vaalon ko bhi taakat milegi, hriday shuddh hoga। brahma bhojan ka gaayan bhi hai na। braahmanon ka banaaya hua bhojan devtaayen bhi pasanda karte hain। yeh bhi shaastron mein hai। braahmanon ka bhojan banaaya hua khaane se buddhi shuddh ho jaati hai, taakat rehti hai। brahma bhojan ki bahut mahima hai। brahma bhojan ka jinko kadar rehta hai, thaali dhokar bhi pi lete hain। bahut oonch samajhte hain। bhojan bigar to rah na sake। famine mein bhojan bigar mar jaate hain। aatma hi bhojan khaati hai, in organs dvaara svaad woh leti hai, achha-bura aatma ne kaha na। yeh bahut svaadishta hai, taakat vaala hai। aage chal jaise tum unnati ko paate rahenge vaise bhojan bhi tumko aisa milta rahega, isliye bachchon ko kehte hain shivbaaba ko yaad kar bhojan banaao। baap jo samjhaate hain usko amal mein laana chaahiye na।

tum ho piyarghar vaale, jaate ho sasurghar। sookshm vatan mein bhi aapas mein milte hain। bhog le jaate hain। devtaaon ko bhog lagaate hain na। devtaayen aate hain tum brahman vahaan jaate ho। vahaan mahphil lagti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi baat ki phikraat nahin karni hai kyonki yeh drama bilkul accurate bana hua hai। sabhi actors ismen apna-apna part baja rahe hain।

2) jeevanmukta pad paane va sada sukhi banne ke liye andar mein ek baap ka hi simran karna hai। mukh se kuchh bhi bolna nahin hai। bhojan banaate va khaate samay baap ki yaad mein zaroor rehna hai।

vardaan:- svaartha, eershya aur chidchidapne se mukta rahne vaale krodhmukta bhav

koi bhi vichaar bhale do, seva ke liye svayan ko offer karo। lekin vichaar ke peechhe us vichaar ko ichchha ke roop mein badli nahin karo। jab sankalp ichchha ke roop mein badalta hai tab chidchidaapan aata hai। lekin nisvaartha hokar vichaar do, svaartha rakhkar nahin। maine kaha to hona hi chaahiye - yeh nahin socho, offer karo, kyon kya mein nahin aao, nahin to eershya-ghrina ek ek saathi aate hain। svaartha ya eershya ke kaaran bhi krodh paida hota hai, ab isse bhi mukta bano।

slogan:- shanti doot ban sabko shanti dena - yahi aapka occupation hai।