Daily Murli for Wednesday 9 October 2024

09-10-2024 praatahmurli om shanti "baapdaada"' madhuban

“meethe bachche - vishwa ka raajya baahubal se nahin liya ja sakta, uske liye yogbal chaahiye, yeh bhi ek law hai''

prashn:- shivbaaba svayan hi svayan par kaun-sa wonder khaate hain?

uttar:- baba kehte dekho kaisa wonder hai - main tumhein padhaata hoon, yeh mainne kisi se kabhi padha nahin। mera koi baap nahin, mera koi teacher nahin, guru nahin। main srishti chakra mein punarjanma leta nahin phir bhi tumhein sabhi janmon ki kahaani suna deta hoon। khud 84 ke chakra mein nahin aata lekin chakra ka gyaan bilkul accurate deta hoon।

om shanti। roohaani baap tum bachchon ko svadarshan chakradhaari banaate hain arthaat tum is 84 ke chakra ko jaan jaate ho। aage nahin jaante the। abhi baap dvaara tumne jaana hai। 84 janmon ke chakra mein tum aate ho zaroor। tum bachchon ko 84 ke chakra ka knowledge deta hoon। main svadarshan chakradhaari hoon parantu practical mein 84 janmon ke chakra mein aata nahin hoon। to isse samajh jaana chaahiye shiv baap mein saara gyaan hai। tum jaante ho ham brahman abhi svadarshan chakradhaari bante hain। baba nahin bante hain। phir unmein anubhav kahaan se aaya? hamko to anubhav praapta hota hai। baba kahaan se anubhav laate hain jo tumko sunaate hain? practical anubhav hona chaahiye na। baap kehte hain mujhe gyaan ka saagar kehte hain parantu main to 84 janmon ke chakra mein aata nahin hoon। phir mere mein yeh gyaan kahaan se aaya? teacher padhaate hain to zaroor khud padha hua hai na। yeh shivbaaba kaise padha? inko kaise 84 ke chakra ka maaloom pada, jabki khud 84 janmon mein nahin aata hai। baap beejroop hone kaaran jaante hain। khud 84 ke chakra mein nahin aate hain। parantu tumko sab samjhaate hain, yeh bhi kitna wonder hai। aise bhi nahin, baap koi shaastra aadi padha hua hai। kaha jaata hai drama anusaar usmein yeh knowledge noondhi hui hai jo tumko sunaate hain। to wonderful teacher hua na। wonder khaana chaahiye na isliye inko bade-bade naam diye hain। eeshvar, prabhu, antaryaami aadi-aadi। tum wonder khaate ho eeshvar mein kaise saari knowledge bhari hui hai। unmein aai kahaan se jo tumko samjhaate hain? unko to koi baap bhi nahin, jisse janma liya ho va samjha ho। tum sab bhaai-bhaai ho। woh ek kaise tumhaara baap hai, beejroop hai। kitni knowledge baith bachchon ko sunaate hain। kehte hain 84 janma main nahin leta hoon, tum lete ho। to zaroor prashn uthega na - baba aapko kaise maaloom pada। baba kehte hain - bachche, anaadi drama anusaar mere mein pahle se yeh knowledge hai, jo tumko padhaata hoon isliye hi mujhe oonch te oonch bhagwan kaha jaata hai। khud chakra mein nahin aate parantu unmein saari srishti ke aadi-madhya-ant ki knowledge hai। to tum bachchon ko kitni khushi honi chaahiye। unko 84 ke chakra ki knowledge kahaan se mili? tumko to mili baap se। baap mein originally knowledge hai। unko kaha hi jaata hai knowledgeful। koi se padha bhi nahin hai। to bhi unko originally maaloom hai isliye knowledgeful kaha jaata hai। yeh wonder hai na isliye yeh oonch te oonch padhaai gaai jaati hai। bachchon ko wonder lagta hai baap par। unko kyon knowledgeful kaha jaata - ek to yeh samajhne ki baat hai, doosri phir kya baat hai? yeh chitra tum dikhaate ho to koi poochhenge ki brahma mein bhi apni aatma hogi aur yeh jo naaraayan bante hain unmein bhi apni aatma hogi। do aatmaayen hain na। ek brahma, ek naaraayan ki। parantu vichaar karenge to yeh koi do aatmaayen nahin hain। aatma ek hi hai। yeh ek sample dikhaaya jaata hai devta ka। yeh brahma so vishnu arthaat naaraayan bante hain, isko kaha jaata hai guhya baaten। baap bahut guhya knowledge sunaate hain jo aur koi padha na sake sivaae baap ke। to brahma aur vishnu ki koi do aatmaayen nahin hain। vaise hi sarasvati aur lakshmi - in donon ki do aatmaayen hain ya ek? aatma ek hai, shareer do hain। yeh sarasvati hi phir lakshmi banti hai isliye ek aatma gini jaayegi। 84 janma ek hi aatma leti hai। yeh badi samajh ki baat hai। brahman so devta, devta so kshatriy bante hain। aatma ek shareer chhod doosra leti hai। aatma ek hi hai, ek yeh sample dikhaaya jaata hai - kaise brahman so devta bante hain। ham so ka arth kitna achha hai। inko kaha jaata hai guhya-guhya baaten। ismen bhi pahle-pahle to yeh samajh chaahiye ki ham ek baap ke bachche hain। sabhi aatmaayen asul paramdham mein rahne vaali hain। yahaan part bajaane aai hain। yeh khel hai। baap tumko is khel ka samaachaar baith sunaate hain। baap to originally jaante hi hain। unko koi ne sikhlaaya nahin hai। is 84 ke chakra ko vahi jaante hain jo is samay tumko sunaate hain। phir tum bhool jaate ho। phir unka shaastra kaise ban sakta। baap to koi shaastra padha hua nahin hai। phir kaise aakar nai-nai baaten sunaate hain, aadhaakalpa hai bhakti maarga। yeh baat bhi shaastron mein nahin hai। yeh shaastra bhi drama anusaar bhakti maarga mein bane hain। tumhaari buddhi mein shuru se lekar ant tak is drama ki kitni badi knowledge hai। unko zaroor manushya tan ka aadhaar lena pade। shivbaaba is brahma tan mein baith is srishti chakra ki knowledge sunaate hain। manushyon ne to gapode lagaakar srishti ki aayu hi kitni lambi kar di hai। nai duniya so phir puraani duniya banti hai। nai duniya ko kaha jaata hai svarga, puraani ko kaha jaata hai narka। duniya to ek hi hai। nai duniya mein rehte hain devi-devta। vahaan apaar sukh hain। saari srishti nai hoti hai। abhi inko puraana kaha jaata hai। naam hi hai iron aged world। jaise old dehli aur new dehli kaha jaata hai। baap samjhaate hain - meethe-meethe bachchon, new world mein new dehli hogi। yeh to old world mein hi kah dete hain new dehli। inko new kaise kahenge! baap samjhaate hain nai duniya mein nai dilli hogi। unmein yeh lakshmi-naaraayan raajya karenge। usko kaha jaayega satayug। tum is saare bhaarat mein raajya karenge। tumhaari gaddi jamuna kinaare par hogi। pichhaadi mein raavan raajya ki gaddi bhi yahaan hi hai। raam raajya ki gaddi bhi yahaan hogi। naam dehli nahin hoga। usko paristaan kaha jaata hai। phir jo jaisa raaja hota hai woh apni gaddi ka aisa naam rakhte hain। is samay tum sab puraani duniya mein ho। nai duniya mein jaane ke liye tum padh rahe ho। phir se manushya se devta ban rahe ho। padhaane vaala hai baap।

tum jaante ho oonche te oonche baap ne neeche aakar raajayog sikhaaya hai। abhi tum ho sangam par jabki kaliyugi puraani duniya khatma honi hai। baap ne inka hisaab bhi bataaya hai, main aata hoon brahma tan mein। manushyon ko to pata hi nahin hai ki brahma kaun-sa? suna hai prajaapita brahma। tum praja ho na brahma ki isliye apne ko bi.ke. kahlaate ho। vaastav mein shivbaaba ke bachche shivvanshi ho jab niraakaar aatmaayen ho, phir saakaar mein prajaapita brahma ke bachche bhaai-behen ho aur koi bhi sambandh nahin hai। is samay tum us kaliyugi sambandh ko bhoolte ho kyonki unmein bandhan hai। tum jaate ho nai duniya mein। braahmanon ki choti hoti hai। choti braahmanon ki nishaani hai। tum braahmanon ka yeh kul hai। woh hain kaliyugi brahman। brahman aksar karke pande hote hain। ek dhaama khaate hain, doosre brahman geeta sunaate hain। abhi tum brahman yeh geeta sunaate ho, woh bhi geeta sunaate hain, tum bhi geeta sunaate ho। pharka dekho kitna hai! tum kehte ho krishna ko bhagwan nahin kah sakte। krishna ko to devta kaha jaata hai। unmein daiveegun hain। unko to in aankhon se dekha ja sakta hai। shiv ke mandir mein dekhenge shiv ko apna shareer hai nahin। woh hai param aatma arthaat paramatma। eeshvar, prabhu, bhagwan aadi akshar ka koi arth nahin nikalta। paramatma hi supreme aatma hai। tum non supreme ho। pharka dekho kitna hai, tumhaari aatma aur us aatma mein। tum aatmaayen abhi paramatma se seekh rahi ho। woh koi se seekha nahin hai। yeh to father hai na। us parampita paramatma ko tum father bhi kehte, teacher bhi kehte aur guru bhi kehte। hai ek hi। aur koi bhi aatma baap teacher guru nahin ban sakti hai। ek hi param aatma hai unko kaha jaata hai supreme। har ek ko pahle father chaahiye, phir teacher chaahiye phir pichhaadi mein chaahiye guru। baap bhi kehte hain - main tumhaara baap bhi banta hoon phir teacher banta hoon aur phir main hi tumhaara sadgati daata satguru bhi banta hoon। sadgati dene vaala guru hai hi ek। baaki to guru anek hain। baap kehte hain main tum sabko sadgati deta hoon, tum sab satayug mein jaayenge baaki sab chale jaayenge shantidham, jisko paramdham kehte hain। satayug mein aadi sanaatan devi-devta dharma tha। baaki koi dharma hai nahin aur sabhi aatmaayen chali jaati hai muktidhaam। sadgati kaha jaata hai satayug ko, part bajaate-bajaate phir durgati mein aa jaate hain। tum hi sadgati se phir durgati mein aate ho। tum hi poore 84 janma lete ho। yatha raaja-raani tatha praja jo us samay honge। 9 laakh to pahle aayenge। 84 janma 9 laakh to lenge na phir doosre aate rahenge - yeh hisaab kiya jaata hai। jo baap samjhaate hain। sab 84 janma nahin lete hain, pahle-pahle aane vaale hi 84 janma lete hain phir kam-kam lete aate hain। maximum hain 84, yeh jo baaten hain aur koi manushya nahin jaante। baap hi baith samjhaate hain। geeta mein hai bhagvaanuvaach। abhi tum samajh gaye ho - aadi sanaatan devi-devta dharma koi krishna ne nahin racha। yeh to baap hi sthaapan karte hain। krishna ki aatma ne 84 janmon ke ant mein yeh gyaan suna hai jo pahle number mein aaya। yeh baaten samajhne ki hain। roz padhna hai, tum student ho bhagwan ke। bhagvaanuvaach hai na। main tumko raajaaon ka raaja banaata hoon। yeh hai puraani duniya, nai duniya maana satayug। abhi hai kaliyug। baap aakar kaliyugi patit se satayugi paavan devta banaate hain isliye kaliyugi manushya pukaarte hain - baba aakar hamko paavan banaao। kaliyugi patit se satayugi paavan banaao। farka dekho kitna hai। kaliyug mein hain apaar duhkh। bachcha janma sukh hua, kal mar gaya - duhkhi ho jaayega। saari aayu kitna duhkh hota hai। yeh hai hi duhkh ki duniya। abhi baap sukh ki duniya sthaapan kar rahe hain। tumko svargavaasi devta banaate hain। abhi tum purooshottam sangamayug par ho। uttam te uttam puroosh va naari bante ho। tum aate hi ho yeh lakshmi-naaraayan banne ke liye। student teacher se yog rakhte hain kyonki samajhte hain in dvaara ham padhkar phalaana banenge। yahaan tum yog lagaate ho parampita paramatma shiv se, jo tumhein devta banaate hain। kehte hain mujh apne baap ko yaad karo, jiske tum saaligraam bachche ho। apne ko aatma samajh baap ko yaad karo vahi knowledgeful hai। baap tumhein sachchi geeta sunaate hain parantu khud padha hua nahin hai। kehte hain main kiska bachcha nahin, koi se padha hua nahin hoon। mera koi guru nahin। main phir tum bachchon ka baap, teacher, guru hoon। unko kaha jaata hai param aatma। is saare srishti ke aadi, madhya, ant ko jaante hain, jab tak woh na sunaaven, tab tak tum aadi, madhya, ant ko samajh na sako। is chakra ko jaanne se tum chakravarti raaja bante ho। tumko yeh baba nahin padhaate hain, ismen shivbaaba pravesh kar aatmaon ko padhaate hain। yeh nai baat hai na। yeh hote hi hain sangam par। puraani duniya khatma ho jaayegi, kiski dabi rahi dhool mein, kiski raaja khaae…। bachchon ko kehte hain bahuton ka kalyaan karne liye, phir se devta banaane ke liye yeh paathshaala museum kholo। jahaan bahut aakar sukh ka varsa paayenge। abhi raavan raajya hai na। raam raajya mein tha sukh, raavan raajya mein hai duhkh kyonki sab vikaari ban gaye hain। woh hai hi nirvikaari duniya। bachche to in lakshmi-naaraayan aadi ko bhi hain na। parantu vahaan hai yogbal। baap tumko yogbal sikhlaate hain। yogbal se tum vishwa ke maalik bante ho, baahubal se koi vishwa ka maalik ban na sake। law nahin kehta। tum bachche yaad ke bal se saare vishwa ki baadshaahi le rahe ho। kitni oonchi padhaai hai। baap kehte hain - pahle-pahle pavitrata ki pratigya karo। pavitra banne se hi phir tum pavitra duniya ke maalik banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kaliyugi sambandh jo ki is samay bandhan hai, unhein bhool svayan ko sangamayugi brahman samajhna hai। sachchi geeta sunni aur sunaani hai।

2) puraani duniya khatma honi hai isliye apna sab kuchh saphal karna hai। bahuton ke kalyaan liye, manushyon ko devta banaane ke liye yeh paathshaala va museum kholne hain।

vardaan:- baap ki aagya samajh mohabbat se har baat ko sahan karne vaale sahansheel bhav

kai bachche kehte hain ki ham right hain phir bhi humein hi sahan karna padta hai, marna padta hai lekin yeh sahan karna va marna hi dhaarna ki subject mein number lena hai, isliye sahan karne mein ghabraao nahin। kai bachche sahan karte hain lekin majboori se sahan karna aur mohabbat mein sahan karna - ismen antar hai। baaton ke kaaran sahan nahin karte ho lekin baap ki aagya hai sahansheel bano। to aagya samajh mohabbat mein sahan karna arthaat svayan ko parivartan kar lena iski hi marks hain।

slogan:- jo sada khushi ki khuraak khaate hain, woh tandarusta rehte hain।