Daily Murli for Thursday 21 November 2024

21-11-2024 praatahmurli om shanti "baapdaada"' madhuban

“meethe bachche - tumhein ab teacher ban sabko man vasheekran mantra sunaana hai, yeh tum sab bachchon ki duty hai''

prashn:- baba kin bachchon ka kuchh bhi sveekaar nahin karte hain?

uttar:- jinhen ahankaar hai main itna deta hoon, main itni madad kar sakta hoon, baba unka kuchh bhi sveekaar nahin karte। baba kehte mere haath mein chaabi hai। chaahe to main kisi ko gareeb banaaoon, chaahe kisko saahookaar banaaoon। yeh bhi drama mein raaz hai। jinhen aaj apni saahookaari ka ghamanda hai woh kal gareeb ban jaate aur gareeb bachche baap ke kaarya mein apni paai-paai saphal kar saahookaar ban jaate hain।

om shanti। yeh to roohaani bachche jaante hain ki baap aaye hain hamko nai duniya ka varsa dene। yeh to bachchon ko pakka hai na ki jitna ham baap ko yaad karenge utna pavitra banenge। jitna ham achha teacher banenge utna oonch pad paayenge। baap tumhein teacher ke roop mein padhaana sikhaate hain। tumko phir auron ko sikhaana hai। tum padhaane vaale teacher zaroor bante ho baaki tum koi ka guru nahin ban sakte ho, sirf teacher ban sakte ho। guru to ek satguru hi hai woh sikhlaate hain। sarva ka satguru ek hi hai। woh teacher banaate hain। tum sabko teach karke raasta bataate rehte ho manamnaabhav ka। baap ne tumhaare par yeh duty rakhi hai ki mujhe yaad karo aur phir teacher bhi bano। tum koi ko baap ka parichay dete ho to unka bhi farja hai baap ko yaad karna। teacher roop mein srishti chakra ki knowledge deni padti hai। baap ko zaroor yaad karna pade। baap ki yaad se hi paap mit jaane hain। bachche jaante hain ham paap aatma hain, isliye baap sabko kehte hain apne ko aatma samajh baap ko yaad karo to tumhaare paap mit jaayenge। baap hi patit-paavan hai। yukti bataate hain - meethe bachche, tumhaari aatma patit bani hai, jis kaaran shareer bhi patit bana hai। pahle tum pavitra the, abhi tum apvitra bane ho। ab patit se paavan hone ki yukti to bahut sahaj samjhaate hain। baap ko yaad karo to tum pavitra ban jaayenge। uthte, baithte, chalte baap ko yaad karo। vo log ganga snaan karte hain to ganga ko yaad karte hain। samajhte hain woh patit-paavni hai। ganga ko yaad karne se paavan ban jaana hai। parantu baap kehte hain koi bhi paavan ban nahin sakte hain। paani se kaise paavan banenge। baap kehte hain main patit-paavan hoon। he bachchon, deh sahit deh ke sab dharma chhod mujhe yaad karne se tum paavan ban phir se apne ghar mukti-dhaam pahunch jaayenge। saara kalpa ghar ko bhoole ho। baap ko saara kalpa koi jaanta hi nahin hai। ek hi baar baap khud aakar apna parichay dete hain - is mukh dvaara। is mukh ki kitni mahima hai। gaoomukh kehte hain na। woh gau to jaanvar hai, yeh hai manushya ki baat।

tum jaante ho yeh badi maata hai। jis maata dvaara shivbaaba tum sabko adopt karte hain। tum abhi baba-baba kahne lage ho। baap bhi kehte hain is yaad ki yaatra se hi tumhaare paap katne hain। bachche ko baap yaad pad jaata hai na। uski shakla aadi dil mein baith jaati hai। tum bachche jaante ho jaise ham aatma hain vaise woh param aatma hai। shakla mein aur koi farka nahin hai। shareer ke sambandh mein to features aadi alag hain, baaki aatma to ek jaisi hi hai। jaise hamaari aatma vaise baap bhi param aatma hai। tum bachche jaante ho - baap paramdham mein rehte hain, ham bhi paramdham mein rehte hain। baap ki aatma aur hamaari aatma mein aur koi farka hai nahin। woh bhi bindi hai, ham bhi bindi hain। yeh gyaan aur koi ko hai nahin। tumko hi baap ne bataaya hai। baap ke liye bhi kya-kya kah dete hain। sarvavyaapi hai, patthar thikkar mein hai, jisko jo aata hai woh kah dete hain। drama plan anusaar bhakti maarga mein baap ke naam, roop, desh, kaal ko bhool jaate hain। tum bhi bhool jaate ho। aatma apne baap ko bhool jaati hai। bachcha baap ko bhool jaata hai to baaki kya jaanenge। goya nidhanke ho gaye। dhani ko yaad hi nahin karte hain। dhani ke part ko hi nahin jaante hain। apne ko bhi bhool jaate hain। tum achhi reeti jaante ho - barobar ham bhool gaye the। ham pahle aise devi-devta the, ab jaanvar se bhi badtar ho gaye hain। mukhya to ham apni aatma ko bhi bhoole hue hain। ab realise kaun karaave। koi bhi jeev aatma ko yeh pata nahin hoga ki ham aatma kya hain, kaise saara part bajaate hain? ham sab bhaai-bhaai hain - yeh gyaan aur koi mein nahin hai। is samay saari srishti hi tamopradhaan ban chuki hai। gyaan nahin hai। tumhaare mein ab gyaan hai, buddhi mein aaya ham aatma itna samay apne baap ki glaani karte aaye hain। glaani karne se baap se door hote jaate hain। seedhi neeche utarte gaye hain drama plan anusaar। mool baat ho jaati hai baap ko yaad karne ki। baap aur koi takleeph nahin dete hain। bachchon ko sirf baap ko yaad karne ki takleeph hai। baap kabhi bachchon ko koi tak-leeph de sakte hain kya! law nahin kehta। baap kehte hain main koi bhi takleeph nahin deta hoon। kuchh bhi prashn aadi poochhte hain, kehta hoon in baaton mein time vesta kyon karte ho? baap ko yaad karo। main aaya hi hoon tumko le jaane, isliye tum bachchon ko yaad ki yaatra se paavan banna hai। bas main hi patit-paavan baap hoon। baap yukti bataate hain - kahaan bhi jaao baap ko yaad karna hai। 84 ke chakra ka raaz bhi baap ne samjha diya hai। ab apni jaanch karni hai - kahaan tak ham baap ko yaad karte hain। bas aur koi taraph ka vichaar nahin karna hai। yeh to most easy hai। baap ko yaad karna hai। bachcha thoda bada hota hai to automatically maa-baap ko yaad karne lag padta hai। tum bhi samjho ham aatma baap ke bachche hain, yaad kyon karna padta hai! kyonki hamaare oopar jo paap chadhe hue hain, woh is yaad se hi khatma honge isliye gaayan bhi hai ek second mein jeevanmukti। jeevanmukti ka madaar padhaai par hai aur mukti ka madaar yaad par hai। jitna tum baap ko yaad karenge aur padhaai par dhyaan denge to oonch number mein martaba paayenge। dhandha aadi to bhal karte raho, baap koi mana nahin karte। dhandha aadi jo tum karte ho - woh bhi din-raat yaad rehta hai na। to ab baap yeh roohaani dhandha dete hain - apne ko aatma samajh mujhe yaad karo aur 84 ke chakra ko yaad karo। mujhe yaad karne se hi tum satopradhaan banenge। yeh bhi samajhte ho, abhi puraana chola hai phir satopradhaan naya chola milega। apne paas buddhi mein tanta rakhna hai, jisse bahut phaayda hona hai। jaise school mein subject to bahut hote hain phir bhi english par mark achhi hoti hain kyonki english hai mukhya bhaasha। unhon ka pahle raajya tha isliye woh jaasti chalti hai। abhi bhi bhaaratvaasi karjadaar hai। bhal koi kitne bhi dhanvaan hain parantu buddhi mein yeh to hai na ki hamaare raajya ke jo heads hain, woh karjadaar hain। goya ham bhaaratvaasi karzadaar hain। praja zaroor kahegi na ham karjadaar hain। yeh bhi samajh chaahiye na। jabki tum raajaai sthaapan kar rahe ho। tum jaante ho ham sabhi in sab karjon se chhootkar solvent bante hain phir aadhaakalpa ham koi se bhi karja uthaane vaale nahin hain। karjadaar patit duniya ke maalik hain। abhi ham karjadaar bhi hain, patit duniya ke maalik bhi hain। hamaara bhaarat aisa hai - gaate hain na।

tum bachche jaante ho ham bahut saahookaar the। pareejaade, pareejaadiyaan the। yeh yaad rehta hai। ham aise vishwa ke maalik the। abhi bilkul karjadaar aur patit ban pade hain। yeh khel ki result baap batla rahe hain। result kya hui hai। tum bachchon ko smriti aai hai। satayug mein ham kitne saahookaar the, kisne tumko saahookaar banaaya? bachche kahenge - baba, aapne hamko kitna saahookaar banaaya tha। ek baap hi saahookaar banaane vaala hai। duniya in baaton ko nahin jaanti। laakhon varsha kah dene se sab bhool gaye hain, kuchh nahin jaante hain। tum abhi sab kuchh jaan gaye ho। ham padmaapdam saahookaar the। bahut pavitra the, bahut sukhi the। vahaan jhooth paap aadi kuchh hota nahin। saare vishwa par tumhaari jeet thi। gaayan bhi hai shivbaaba aap jo dete ho woh aur koi de nahin sakta। koi ki taakat nahin jo aadhaakalpa ka sukh de sake। baap kehte hain bhakti maarga mein bhi tumko bahut sukh athaah dhan rehta hai। kitne heere javaahar the jo phir pichhaadi vaalon ke haath mein aate hain। abhi to woh cheez hi dekhne mein nahin aati hai। tum farka dekhte ho na। tum hi poojya devi-devta the phir tum hi pujaari bane ho। aapehi poojya, aapehi pujaari। baap koi pujaari nahin bante hain parantu pujaari duniya mein to aate hain na। baap to ever poojya hai। woh kabhi pujaari hote nahin, unka dhandha hai tumko pujaari se poojya banaana। raavan ka kaam hai tumko pujaari banaana। yeh duniya mein kisko pata nahin hai। tum bhi bhool jaate ho। roz-roz baap samjhaate rehte hain। baap ke haath mein hai - kisko chaahe saahookaar banaaye, chaahe gareeb banaaye। baap kehte hain jo saahookaar hain unhon ko gareeb zaroor banna hai, banenge hi। unhon ka part aisa hai। woh kabhi thahar na saken। dhanvaan ko ahankaar bhi bahut rehta hai na - main phalaana hoon, yeh-yeh hamko hai। ghamanda todne liye baba kehte hain - yeh jab aayenge dene ke liye to baba kahenge darkaar nahin hai। yeh apne paas rakho। jab jaroorat hogi to phir le lenge kyonki dekhte hain - kaam ka nahin hai, apna ghamanda hai। to yeh sab baba ke haath mein hai na - lena va na lena। baba paise kya karenge, darkaar nahin। yeh to tum bachchon ke liye makaan ban rahe hain, aakarke baba se milkar hi jaana hai। sadaiv to rehna nahin hai। paise ki kya darkaar rahegi। koi lashkar va tope aadi to nahin chaahiye। tum vishwa ke maalik bante ho। abhi yuddha ke maidaan mein ho, tum aur kuchh bhi nahin karte ho sivaae baap ko yaad karne ke। baap ne pharmaan kiya hai mujhe yaad karo to itni shakti milegi। yeh tumhaara dharma bahut sukh dene vaala hai। baap hai sarvashaktimaan। tum unke bante ho, saara madaar yaad ki yaatra par hai। yahaan tum sunte ho phir us par manthan chalta hai। jaise gaay khaana khaakar phir ugaarti hai, mukh chalta hi rehta hai। tum bachchon ko bhi kehte hain gyaan ki baaton par khoob vichaar karo। baba se ham kya poochhen। baap to kehte hain manamnaabhav, jisse hi tum satopradhaan bante ho। yeh em object saamne hai।

tum jaante ho - sarvagun sampanna, 16 kala sampanna banna hai। yeh automatically andar mein aana chaahiye। koi ki glaani va paap karma aadi kuchh bhi na ho। koi bhi tumko ulta karma nahin karna chaahiye। number one hain yeh devi-devtaayen। purooshaartha se oonch pad paaya hai na। unhon ke liye gaaya jaata hai ahinsa parmo devi-devta dharma। kisko maarna yeh hinsa hui na। baap samjhaate hain to phir bachchon ko antarmukh ho apne ko dekhna hai - ham kaise bane hain? baba ko ham yaad karte hain? kitna samay ham yaad karte hain? itni dil lag jaae jo yeh yaad kabhi bhoole hi nahin। ab behad ka baap kehte hain tum aatmaayen meri santaan ho। so bhi tum anaadi santaan ho। woh jo aashik-maashook hote hain unhon ki hai jismaani yaad। jaise saakshaatkaar hota hai phir gum ho jaate hain vaise woh bhi saamne aa jaate hain। us khushi mein hi khaate peete yaad karte rehte hain। tumhaare is yaad mein to bahut bal hai। ek baap ko hi yaad karte rahenge। aur tumko phir apna bhavishya yaad aayega। vinaash ka saakshaatkaar bhi hoga। aage chal jaldi-jaldi vinaash ka saakshaatkaar hoga। phir tum kah sakenge ki abhi vinaash hona hai। baap ko yaad karo। baba ne yeh sab kuchh chhod diya na। kuchh bhi pichhaadi mein yaad na aaye। abhi to ham apni raajdhaani mein chalen। nai duniya mein zaroor jaana hai। yogbal se sab paapon ko bhasma karna hai, ismen hi badi mehnat karni hai। ghadi-ghadi baap ko bhool jaate hain kyonki yeh badi maheen cheez hai। misaal jo dete hain sarpa ka, bhramri ka, woh sab is samay ke hain। bhramri kamaal karti hai na। unse tumhaari kamaal jaasti hai। baba likhte hain na - gyaan ki bhoon-bhoon karte raho। aakhreen jaag padenge। jaayenge kahaan। tumhaare paas hi aate jaayenge। add hote jaayenge। tumhaara naama-chaar hota jaayega। abhi to tum thode ho na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ka khoob vichaar saagar manthan karna hai। jo suna hai use ugaarna hai। antarmukh ho dekhna hai ki baap se aisi dil lagi hui hai jo woh kabhi bhoole hi nahin।

2) koi bhi prashn aadi poochhne mein apna time vesta na kar yaad ki yaatra se svayan ko paavan banaana hai। ant samay mein ek baap ki yaad ke sivaae aur koi bhi vichaar na aaye - yeh abhyaas abhi se karna hai।

vardaan:- dridh sankalp roopi vrat dvaara vrittiyon ka parivartan karne vaale mahaan aatma bhav

mahaan banne ka mukhya aadhaar hai “pavitrata''। is pavitrata ke vrat ko pratigya ke roop mein dhaaran karna arthaat mahaan aatma banna। koi bhi dridh sankalp roopi vrat vritti ko badal deta hai। pavitrata ka vrat lena arthaat apni vritti ko shreshtha banaana। vrat rakhna arthaat sthool reeti se parhej karna, man mein pakka sankalp lena। to paavan banne ka vrat liya aur ham aatma bhaai-bhaai hain - yeh brotherhood ki vritti banaai। isi vritti se brahman mahaan aatma ban gaye।

slogan:- vyartha se bachna hai to mukh par dridh sankalp ka button laga do।