Daily Murli for Wednesday 20 November 2024

20-11-2024 praatahmurli om shanti "baapdaada"' madhuban

“meethe bachche - manamnaabhav ke vasheekran mantra se hi tum maaya par jeet pa sakte ho, yahi mantra sabko yaad dilaao''

prashn:- is behad ke drama mein sabse jabardasta labours (naukar) kaun-kaun hain aur kaise?

uttar:- is puraani duniya ki saphaai karne vaale sabse jabardasta labours hain natural calamities। dharti hilti hai, baadh aati hai, saphaai ho jaati hai। iske liye bhagwan kisi ko direction nahin dete। baap kaise bachchon ko destroy karenge। yeh to drama mein part hai। raavan ka raajya hai na, ise godly calamities nahin kahenge।

om shanti। baap hi bachchon ko samjhaate hain - bachche, manamnaabhav। aise nahin ki bachche baith baap ko samjha sakte। bachche nahin kahenge shivbaaba, manamnaabhav। nahin। yoon to bhal bachche aapas mein baith chit-chat karte hain, raay nikaalte hain parantu jo mool mahaamantra hai, woh to baap hi dete hain। guru log mantra dete hain। yeh rivaaj kahaan se nikla? yeh baap jo nai srishti rachne vaala hai, vahi pahle-pahle mantra dete hain manamnaabhav। iska naam hi hai vasheekran mantra arthaat maaya par jeet paane ka mantra। yeh koi andar mein japna nahin hai। yeh to samjhaana hota hai। baap arth sahit samjhaate hain। bhal geeta mein hai parantu arth koi nahin samajhte hain। yeh geeta ka episode bhi hai। parantu sirf naam badli kar diya hai। kitni badi-badi pustak aadi bhakti-maarga mein banti hain। vaastav mein yeh to orally baap baith bachchon ko samjhaate hain। baap ki aatma mein gyaan hai। bachchon ki bhi aatma hi gyaan dhaaran karti hai। baaki sirf sahaj kar samjhaane ke liye yeh chitra aadi banaaye jaate hain। tum bachchon ki to buddhi mein yeh saara knowledge hai। tum jaante ho barobar aadi sanaatan devi-devta dharma tha aur koi khanda nahin tha। phir baad mein yeh khanda add hue hain। to woh bhi chitra ek kone mein rakh dena chaahiye। jahaan tum dikhlaate ho bhaarat mein inka raajya tha to aur koi dharma nahin tha। abhi to kitne dher dharma hain phir yeh sab nahin rahenge। yeh hai baba ka plan। un bichaaron ko kitni chinta lagi hui hai। tum bachche samajhte ho yeh to bilkul theek hai। likha hua bhi hai baap aakar brahma dvaara sthaapna karte hain। kiski? nai duniya ki। jamuna ka kantha yeh hai capital। vahaan ek hi dharma hota hai। jhaad bilkul chhota hai, is jhaad ka gyaan bhi baap hi dete hain। chakra ka gyaan dete hain, satayug mein ek hi bhaasha hoti hai, aur koi bhaasha nahin hogi। tum siddha kar sakte ho ek hi bhaarat tha, ek hi raajya tha, ek hi bhaasha thi। paradise mein sukh-shanti thi। duhkh ka naam-nishaan nahin tha। health, wealth, happiness sab tha। bhaarat naya tha to aayu bhi bahut badi thi kyonki pavitrata thi। pavitrata mein manushya tandaroosta rehte hain। apvitrata mein dekho manushyon ka kya haal ho jaata hai। baithe-baithe akaale mrityu ho jaati hai। javaan bhi mar padte hain। duhkh kitna hota hai। vahaan akaale mrityu hoti nahin। full ej hoti hai। peedhi tak arthaat budhaape tak koi marte nahin hain।

kisko bhi samjhaao to yeh buddhi mein bithaana hai - behad ke baap ko yaad karo, vahi patit-paavan hai, vahi sadgati daata hai। tumhaare paas woh naksha bhi hona chaahiye to siddha kar samjha sakenge। aaj ka naksha yeh hai, kal ka naksha yeh hai। koi to achhi reeti se sunte bhi hain। yeh poora samjhaana hota hai। yeh bhaarat avinaashi khanda hai। jab yeh devi-devta dharma tha to aur koi dharma the nahin। abhi woh aadi sanaatan devi-devta dharma hai nahin। yeh lakshmi-naaraayan kahaan gaye, koi bata nahin sakenge। koi mein taakat nahin bataane ki। tum bachche achhi reeti rahasyayukta samjha sakte ho। ismen moonjhane ki darkaar nahin। tum sab kuchh jaante ho aur phir repeat bhi kar sakte ho। tum koi se bhi poochh sakte ho - yeh kahaan gaye? tumhaara prashn sunkar chakrit ho jaayenge। tum to nishchay se bataate ho, kaise yeh bhi 84 janma lete hain। buddhi mein to hai na। tum jhat kahenge satayug nai duniya mein hamaara raajya tha। ek hi aadi sanaatan devi-devta dharma tha। doosra koi dharma nahin tha। everything new। har ek cheez satopradhaan hoti hai। sona bhi kitna athaah hota hai। kitna sahaj nikalta hoga, jo phir eeten makaan aadi bante honge। vahaan to sab kuchh sone ka hota hai। khaaniyaan sab nai hongi na। imitation to nikaalenge nahin jabki real bahut hai। yahaan real ka naam nahin। imitation ka kitna jor hai isliye kaha jaata hai jhoothi maaya, jhoothi kaaya…। sampatti bhi jhoothi hai। heere moti aise-aise kisma ke nikalte hain jo pata bhi nahin pad sakta ki sachcha hai ya jhootha hai? show itna hota hai jo parakh nahin sakte hain - jhootha hai va sachcha? vahaan to yeh jhoothi cheejen aadi hoti nahin। vinaash hota hai to sab dharti mein chale jaate hain। itne bade-bade patthar, heere aadi makaanon mein lagaate honge। woh sab kahaan se aaya hoga, kaun kat karte honge? India mein bhi expert bahut hain, hoshiyaar hote jaayenge। phir vahaan yeh hoshiyaari lekar aayenge na। taaj aadi sirf heeron ke thode hi banenge। woh to bilkul refine sachche heere hote hain। yeh bijli, telephone, motor aadi pahle kuchh nahin tha। baba ke is life ke andar hi kya-kya nikla hai! 100 varsha hue hain jo yeh sab nikle hain। vahaan to bade expert hote hain। abhi tak seekhte rehte hain। hoshiyaar hote rehte hain। yeh bhi bachchon ko saakshaatkaar karaaya jaata hai। vahaan helicopters bhi full proof hote hain। bachche bhi bade satopradhaan shrewd buddhi vaale hote hain। aage thoda chalo, tumko sab saakshaatkaar hote rahenge। jaise apne desh ke najdeek aate hain to jhaad dikhaai padte hain na। andar mein khushi hoti rehti hai, ab ghar aaya ki aaya। abhi aakar pahunche hain। pichhaadi mein tumko bhi aise saakshaatkaar hote rahenge। bachche samajhte hain most beloved baba hai। woh hai hi supreme aatma। unko sab yaad bhi karte hain। bhakti maarga mein tum bhi yaad karte the na paramatma ko। parantu yeh maaloom nahin tha ki woh chhota hai va bada hai। gaate bhi hain chamakta hai ajab sitaara bhrakuti ke beech mein..... to zaroor bindi misal hoga na। unko hi kaha jaata hai supreme aatma maana paramatma। unmein khoobiyaan to sab hain hi। gyaan ka saagar hai, kya gyaan sunaayenge। woh to jab sunaave tab to maaloom pade na। tum bhi pahle jaante the kya, sirf bhakti hi jaante the। abhi to samajhte ho wonder hai, aatma ko bhi in aankhon se dekh nahin sakte hain to baap ko bhi bhool jaate hain। drama mein part hi aisa hai jisko vishwa ka maalik banaate hain unka naam daal dete hain aur banaane vaale ka naam gum kar dete hain। shreekrishna ko trilokeenaath, vaikuntha naath kah diya hai, arth kuchh nahin samajhte hain। sirf badaai de dete hain। bhakti maarga mein anek baaten baith banaai hain। kehte hain bhagwan mein itni taakat hai, woh hazaaron soorya se tej hai, sabko bhasma kar sakte hain। aisi-aisi baaten bana di hain। baap kehte hain main bachchon ko jalaaoonga kaise! yeh to ho nahin sakta। bachchon ko baap destroy karenge kya? nahin। yeh to drama mein part hai। puraani duniya khatma honi hai। puraani duniya ke vinaash ke liye yeh natural calamities sab labours hain। kitne jabardasta labours hain। aise nahin ki unhon ko baap ka direction hai ki vinaash karo। nahin, toofaan lagte hain, famine hota hai। bhagwan kehte hain kya, yeh karo? kabhi nahin। yeh to drama mein part hai। baap nahin kehte hain bombs banaao। yeh sab raavan ki mat kahenge। yeh bana-banaaya drama hai। raavan ka raajya hai to aasuri buddhi ban jaate hain। kitne marte hain। aakhreen mein sab jala denge। yeh bana-banaaya khel hai, jo repeat hota hai। baaki aise nahin ki shankar ke aankh kholne se vinaash ho jaata hai, inko godly calamities bhi nahin kahenge। yeh natural hi hai।

ab baap tum bachchon ko shreemat de rahe hain। koi ko duhkh aadi dene ki baat hi nahin। baap to hai hi sukh ka raasta bataane vaala। drama plan anusaar makaan puraana hota hi jaayega। baap bhi kehte hain yeh saari duniya puraani ho gai hai। yeh khalaas honi chaahiye। aapas mein ladte dekho kaise hain! aasuri buddhi hain na। jab eeshvareey buddhi hain to koi bhi maarne aadi ki baat nahin। baap kehte hain main to sabka baap hoon। hamaara sab par pyaar hai। baba dekhte yahaan hain phir ananya bachchon taraph hi nazar jaati hai, jo baap ko bahut prem se yaad karte hain। service bhi karte hain। yahaan baithe baap ki nazar serviceable bachchon taraph chali jaati hai। kabhi dehraadoon, kabhi mer", kabhi dehli...... jo bachche mujhe yaad karte hain main bhi unhon ko yaad karta hoon। jo mujhe nahin bhi yaad karte hain to bhi main sabko yaad karta hoon kyonki mujhe to sabko le jaana hai na। haan, jo mere dvaara srishti chakra ki knowledge ko samajhte hain nambarvaar woh phir oonch pad paayenge। yeh behad ki baaten hain। woh teacher aadi hote hain had ke। yeh hai behad ka। to bachchon ke andar mein kitni khushi honi chaahiye। baap kehte hain sabka part ek jaisa nahin ho sakta hai, inka to part tha। parantu follow karne vaale koto mein koi nikle। kehte hain - baba, ham 7 din ka bachcha hoon, ek din ka bachcha hoon। to poongare thahre na। to baap har baat samjhaate rehte hain। nadi bhi barobar paar kar aaye the। baba ke aane se hi gyaan shuru hua hai। unki kitni mahima hai। woh geeta ke adhyaay to tumne janma-janmaantar kitne baar padhe honge। pharka dekho kitna hai। kahaan shreekrishna bhagvaanuvaach, kahaan shiv paramatma vaach। raat-din ka pharka hai। tumhaari buddhi mein ab hai ham sachkhanda mein the, sukh bhi bahut dekha। 3/4 sukh dekhte ho। baap ne drama sukh ke liye banaaya hai, na ki duhkh ke liye। yeh to baad mein tumko duhkh mila hai। ladaai to itni jaldi lag nahin sakti। tumko bahut sukh milta hai। aadha-aadha ho to bhi itna maja na rahe। saadhe teen hazaar varsha to koi ladaai nahin। beemaari aadi nahin। yahaan to dekho beemaari pichhaadi beemaariyaan lagi hui hain। satayug mein thode hi aise keede aadi honge jo anaaj kha leven isliye unka to naam hi hai svarga। to world ka naksha bhi tumko dikhaana chaahiye tab samajh sakenge। asul mein bhaarat yeh tha, aur koi dharma tha nahin। phir nambarvaar dharma sthaapan karne vaale aate hain। abhi tum bachchon ko world ki history-geography ka maaloom hai। tumhaare sivaae baaki sab to kah denge neti-neti, ham baap ko nahin jaante hain। kah dete hain unka koi naam, roop, desh, kaal hai nahin। naam roop nahin to phir koi desh bhi nahin ho sakta hai। kuchh bhi samajhte nahin। ab baap apna yathaartha parichay tum bachchon ko dete hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada apaar khushi mein rahne ke liye behad ka baap jo behad ki baaten sunaate hain, unka simran karna hai aur baap ko follow karte chalna hai।

2) sada tandaroosta rahne ke liye ‘pavitrata' ko apnaana hai। pavitrata ke aadhaar se health, wealth aur happiness ka varsa baap se lena hai।

vardaan:- sarva praaptiyon ko smriti mein emerge rakh sada sampanna rahne vaali santushta aatma bhav

sangamayug par baapdaada dvaara jo bhi praaptiyaan hui hain unki smriti emerge roop mein rahe। to praaptiyon ki khushi kabhi neeche halchal mein nahin laayegi। sada achal rahenge। sampannata achal banaati hai, halchal se chhuda deti hai। jo sarva praaptiyon se sampanna hain ve sada raazi, sada santushta rehte hain। santushtata sabse bada khajaana hai। jiske paas santushtata hai uske paas sab kuchh hai। woh yahi geet gaate rehte ki paana tha vo pa liya।

slogan:- muhabbat ke jhoole mein baith jaao to mehnat aapehi chhoot jaayegi।