Daily Murli for Saturday 7 December 2024

07-12-2024 praatahmurli om shanti "baapdaada"' madhuban

“meethe bachche - saara madaar karmon par hai, sada dhyaan rahe ki maaya ke vasheebhoot koi ulta karma na ho jiski saja khaani pade''

prashn:- baap ki nazar mein sabse adhik buddhivaan kaun hain?

uttar:- jinmen pavitrata ki dhaarna hai vahi buddhivaan hain aur jo patit hain woh buddhiheen hain। lakshmi-naaraayan ko sabse adhik buddhivaan kahenge। tum bachche abhi buddhivaan ban rahe ho। pavitrata hi sabse mukhya hai isliye baap saavdhaan karte hain - bachche yeh aankhe dhokha na den, inse sambhaal karna। is puraani duniya ko dekhte hue bhi na dekho। nai duniya svarga ko yaad karo।

om shanti। meethe-meethe sikeeldhe bachche yeh to samajhte hain is puraani duniya mein ham abhi thode din ke musaaphir hain। duniya ke manushya samajhte hain ajun 40 hazaar varsha yahaan rahne ka hai। tum bachchon ko to nishchay hai na। yeh baaten bhoolo nahin। yahaan baithe ho to bhi tum bachchon ko andar mein gadgad hona chaahiye। in aankhon se jo kuchh dekhte ho sab kuchh vinaash hone vaala hai। aatma to avi-naashi hai। ham aatma ne 84 janma liye hain। abhi baba aaya hai ghar le jaane ke liye। puraani duniya jab poori hoti hai tab baap aate hain nai duniya banaane। nai so puraani, puraani so nai duniya kaise hoti hai yeh tumhaari buddhi mein hai। hamne anekon baar chakra lagaaya hai। abhi chakra poora hota hai। nai duniya mein ham thode hi devtaayen rehte hain। manushya nahin honge। baaki karmon par saara madaar hai। manushya ulta karma karte hain to woh khaata zaroor hai isliye baap poochhte hain ki is janma mein koi aise paap to nahin kiye hain? yeh hai patit chhi-chhi raavan raajya। yeh dhundhakaari duniya hai। abhi baap tum bachchon ko varsa de rahe hain। abhi tum bhakti nahin karte। bhakti ke andhiyaare mein dhakke khaakar aaye ho। abhi baap ka haath mila hai। baap ke sahaare bigar tum vishay vaitarni nadi mein gote khaate the। aadha-kalpa hai hi bhakti, gyaan milne se tum satayugi nai duniya mein chale jaate ho। abhi to yeh hai purooshottam sangamayug jabki tum patit chhi-chhi se gulgul, kaanton se phool ban rahe ho। yeh kaun banaate hain? behad ka baap। laukik baap ko behad ka baap nahin kahenge। tum brahma aur vishnu ke bhi occupation ko jaan gaye ho। to tumhein kitna shuddh nasha rehna chaahiye। mool vatan, sookshm vatan, sthool-vatan… yeh sab sangam par hi hota hai। baap baith abhi tum bachchon ko samjhaate hain puraani aur nai duniya ka yeh sangamayug hai। pukaarte bhi hain ki patiton ko paavan banaane aao। baap ka bhi is sangam par part chalta hai। creator, director hai na! to zaroor unki koi activity hogi na। sab jaante hain ki unko aadmi nahin kaha jaata, unko to apna shareer hi nahin। baaki sabko manushya va devta kahenge। shivbaaba ko na devta, na manushya kahenge। yeh to tempory shareer loan mein liya hua hai। garbha se thode hi paida hue hain। baap khud kehte hain - bachche, shareer bigar main raajayog kaise sikhlaaoonga! hamko manushya log bhal kah dete hain ki thikkar bhittar mein paramatma hai parantu abhi tum bachche samajhte ho ki main kaise aata hoon। abhi tum raajayog seekh rahe ho। koi manushya to sikhla na sake। devtaayen to raajayog seekh na saken। yahaan is purooshottam sangamayug par raajayog seekhkar devta bante hain।

abhi tum bachchon ko athaah khushi honi chaahiye - hamne abhi 84 ka chakra poora kiya hai। baap kalpa-kalpa aate hain, baap khud kehte hain yeh bahut janmon ke ant ka janma hai। shreekrishna to satayug ka prince tha vahi phir 84 ka chakra lagaate hain। shivbaaba to 84 ke chakra mein nahin aayenge। shreekrishna ki aatma hi sundar se shyaam banti hai, yeh baaten kisko pata nahin hain। tumhaare mein bhi nambarvaar hi jaante hain। maaya bahut kadi hai। kisko bhi chhodti nahin hai। baap ko sab maaloom padta hai। maaya graah ekdam hap kar leti hai। yeh baap achhi reeti jaante hain। aise nahin samjho baap koi antaryaami hai। nahin, baap sabhi ki activity ko jaante hain। samaachaar to aate hain na। maaya ekdam kachcha hi pet mein daal deti hai। aisi bahut baaten tum bachchon ko maaloom nahin padti hain। baap ko to sab maaloom padta hai। manushya phir samajh lete paramatma antaryaami hai। baap kehte hain main antaryaami nahin hoon। har ek ki chalan se maaloom to padta hai na। bahut hi chhi-chhi chalan chalte hain isliye baap ghadi-ghadi bachchon ko khabardaar karte hain। maaya se sambhaalna hai। phir bhal baap samjhaate hain to bhi buddhi mein nahin baithta, kaam mahaashatru hai, maaloom bhi na pade ki ham vikaar mein gaye hain, aise bhi hota hai isliye baap kehte hain kuchh bhi bhool aadi hoti hai to saaph bata do, chhipaao mat। nahin to sauguna paap ho jaayega। woh andar khaata rahega। vriddhi hoti rahegi। ekdam gir padenge। bachchon ko baap ke saath bilkul hi sachcha rehna hai। nahin to bahut-bahut ghaata pad jaayega। yeh to raavan ki duniya hai। raavan ki duniya ko ham yaad kyon karen। humein to nai duniya mein jaana hai। baap naya makaan aadi banaate hain to bachche samajhte hain hamaare liye naya makaan ban raha hai। khushi rehti hai। yeh to behad ki baat hai। hamaare liye nai duniya svarga ban raha hai। abhi ham nai duniya mein jaane vaale hain phir jitna baap ko yaad karenge utna gul-gul banenge। ham vikaaron ke vash ho kaante ban pade hain। tum bachche jaante ho - jo nahin aate hain woh to maaya ke vash ho gaye hain। baap ke paas hain hi nahin। traitor ban gaye hain। puraane dushman paas chale gaye hain। aise-aise bahuton ko maaya hap kar leti hai। kitne khatma ho jaate hain। bahut achhe-achhe hain jo kahkar jaate hain ham aise karenge, yeh karenge। ham to yagya ke liye praan bhi dene ke liye taiyaar hain। aaj woh hain nahin। tumhaari ladaai hai hi maaya ke saath। duniya mein yeh koi nahin jaante ki maaya se ladaai kaise hoti hai। shaastron mein phir dikhaaya hai devtaaon aur asuron mein ladaai hui। phir kaurvon aur paandavon ki ladaai hui। koi se poochho yeh do baaten shaastron mein kaisi hain? devtaayen to ahinsak hote hain। woh hote hi hain satayug mein। woh phir kya kaliyug mein ladne aayenge। kaurav aur paandav ka bhi arth nahin samajhte। shaastron mein jo likha hai vahi padhkar sunaate rehte hain। baba ki to saari geeta padhi hui hai। jab yeh gyaan mila to vichaar chala ki geeta mein yeh ladaai aadi ki baaten kya likhi hain? shreekrishna to geeta ka bhagwan nahin hai। inke andar baap baitha tha to in dvaara us geeta ko bhi chhudva diya। abhi baap dvaara kitna sojhra mila hai। aatma ko hi sojhra hota hai tab baap kehte hain apne ko aatma samjho, behad ke baap ko yaad karo। bhakti mein tum yaad karte the, kehte the aap aayenge to balihaar jaayenge। parantu woh kaise aayenge, kaise balihaar jaayenge, yeh thode hi samajhte the।

abhi tum bachche samajhte ho jaise baap hai vaise ham aatma bhi hain। baap ka hai alaukik janma, tum bachchon ko kaise achhi reeti padhaate hain। tum khud kehte ho yeh to vahi hamaara baap hai। jo kalpa-kalpa hamaara baap bante hain। ham sabhi baba-baba kehte hain। baba bhi bachche-bachche kehte hain, vahi teacher roop mein raajayog sikhlaate hain। vishwa ka tumko maalik banaate hain। to aise baap ka bankar phir usi teacher se shiksha bhi leni chaahiye। sun-sun kar gad-gad hona chaahiye। agar chhi-chhi banen to woh khushi aayegi hi nahin। bhal kitna maatha maaren, woh phir hamaare jaati bhaai nahin। yahaan manushyon ke kitne surname hote hain। woh sabhi hain had ki baaten। tumhaara surname dekho kitna bada hai। bade te bada great-great grand father brahma। unko koi jaanta hi nahin। shivbaaba ko to sarva-vyaapi kah diya hai। brahma ka bhi kisko pata nahin hai। chitra bhi hain - brahma, vishnu, shankar। phir brahma ko sookshm vatan mein le gaye hain। biography kuchh bhi nahin jaante। sookshm vatan mein phir brahma kahaan se aaya? vahaan kaise adopt karenge। baap ne samjhaaya hai yeh hamaara rath hai। bahut janmon ke ant mein mainne ismen pravesh kiya hai। yeh purooshottam sangamayug geeta ka episode hai, jismen pavitrata mukhya hai। patit se paavan kaise banna hai, yeh kisko bhi pata nahin hai। saadhu-santa aadi kabhi bhi aise nahin kahenge ki deh sahit deh ke sabhi sambandhon ko bhool ek mujh baap ko yaad karo to maaya ke paap karma bhasma ho jaayenge। woh to baap ko hi nahin jaante hain। geeta mein baap ne kaha hai in saadhuon aadi ka bhi main aakar uddhaar karta hoon।

baap samjhaate hain shuru se lekar ab tak jo bhi aatmaayen part baja rahi hain - sabhi ka yeh antim janma hai। iska bhi yeh antim janma hai। yahi phir brahma bana hai। chhotepan mein gaanvade ka chhora tha। 84 janma isne poore kiye, first se last tak। abhi tum bachchon ki buddhi ka taala khula hua hai। abhi tum buddhivaan bante ho। aage buddhiheen the। yeh lakshmi-naaraayan hain buddhivaan। buddhiheen patit ko kaha jaata hai। mukhya hai pavitrata। likhte bhi hain maaya ne humein gira diya। aankhen criminal ban gai। baap to ghadi-ghadi saavdhaan karte rehte hain - bachche, kabhi maaya se haar nahin khaana। abhi ghar jaana hai। apne ko aatma samajh baap ko yaad karo। yeh puraani duniya khatma hui ki hui। ham paavan bante hain to humein paavan duniya bhi to chaahiye na! tum bachchon ko hi patit se paavan banna hai। baap to yog nahin lagaayenge। baba patit thode hi banta hai jo yog lagaave। baba to kehte hain main tumhaari seva mein upasthit hota hoon। tumne hi maangani ki hai ki aakar ham patiton ko paavan banaao। tumhaare hi kahne se main aaya hoon। tumhein bahut sahaj raasta bataata hoon sirf manamnaabhav। bhagvaanuvaach hai na। sirf shreekrishna ka naam dene se baap ko sab bhool gaye hain। baap hai first, shreekrishna hai second। woh paramdham ka maalik, woh hai vaikuntha ka maalik। sookshm vatan mein to kuchh hota hi nahin। sabhi mein number one hai shreekrishna, jisko sab pyaar karte hain। baaki to sab peechhe-peechhe aate hain। svarga mein to sab ja bhi na saken।

to tum meethe-meethe bachchon ko haddi (zigri) khushi honi chaahiye। kai bachche baba ke paas aate hain jo kabhi pavitra nahin rehte hain। baba samjhaate hain vikaar mein jaate ho phir baba ke paas kyon aate ho? kehte kya karoon, rah nahin sakta hoon। parantu yahaan aata hoon shaayad kabhi teer lag jaae। aap bigar hamaari sadgati kaun karega isliye aakar baith jaata hoon। maaya kitni prabal hai। nishchay bhi hota hai - baba hamko patit se paavan gul-gul banaate hain। parantu kya karen phir bhi sach bolne se kabhi sudhar jaaoonga। hamko yeh nishchay hai ki aapse hi humein sudharna hai। baba ko aise bachchon par taras padta hai phir bhi aise hoga। nothing new। baba to roz-roz shreemat dete hain। koi amal mein laate bhi hain, ismen baba kya kar sakta hai। baba kahe shaayad inka part hi aisa hai। sab to raaje-raaniyaan nahin bante hain। raajdhaani sthaapan ho rahi hai। raajdhaani mein sab chaahiye। phir bhi baba kehte hain bachche himmat nahin chhodo। aage ja sakte ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke saath sada sachcha rehna hai। abhi koi bhi bhool ho jaae to chhipaana nahin hai। aankhe kabhi criminal na ho - iski sambhaal karni hai।

2) sada shuddh nasha rahe ki behad ka baap humein patit chhi-chhi se gulgul, kaanton se phool bana rahe hain। abhi humein baap ka haath mila hai, jiske sahaare ham vishay vaitarni nadi paar ho jaayenge।

vardaan:- powerful brake dvaara second mein negative ko positive mein parivartan karne vaale sva parivartak bhav

jab negative athva vyartha sankalp chalte hain, to uski gati bahut fast hoti hai। fast gati ke samay powerful brake lagaakar parivartan karne ka abhyaas chaahiye। vaise bhi jab pahaadi par chadhte hain to pahle brake ko check karte hain। aap apni oonchi sthiti banaane ke liye sankalpon ko second mein brake dene ka abhyaas badhaao। jab apne sankalp va sanskaar ek second mein negative se positive mein parivartan kar lenge tab sva parivartan se vishwa parivartan ka kaarya sampanna hoga।

slogan:- svayan prati aur sarva aatmaon ke prati shreshtha parivartan ki shakti ko kaarya mein laane vaale hi sachche karmayogi hain।