Daily Murli for Friday 20 December 2024

20-12-2024 praatahmurli om shanti "baapdaada"' madhuban

“meethe bachche - yaad mein rahne ki practice karo to sada harshitmukh, khile hue rahenge, baap ki madad milti rahegi, kabhi murjhaayenge nahin''

prashn:- tum bachchon ko yeh godly student life kis nashe mein bitaani hai?

uttar:- sada nasha rahe ki ham is padhaai se prince-princess banenge। yeh life hansate-khelte, gyaan ka dance karte bitaani hai। sada vaaris ban phool banne ka purooshaartha karte raho। yeh hai prince-princess banne ka college। yahaan padhna bhi hai to padhaana bhi hai, praja bhi banaani hai tab raaja ban sakenge। baap to padha hua hi hai, use padhne ki jaroorat nahin।

geet:- bachpan ke din bhula na dena…

om shanti। yeh geet hai khaas bachchon ke liye। bhal hai geet philmi parantu kuchh geet hain hi tumhaare liye। jo sapoot bachche hain unhon ko geet sunte samay uska arth apne dil mein le aana padta hai। baap samjhaate hain mere laadle bachche, kyonki tum bachche bane ho। jab bachcha banen tab to baap ke varse ki bhi yaad rahe। bachche hi nahin banen to yaad karna padega। bachchon ko smriti rehti hai ham bhavishya mein baba ka varsa lenge। yeh hai hi raajayog, praja yog nahin। ham bhavishya mein prince-princess banenge। ham unke bachche hain baaki jo bhi mitra-sambandhi aadi hain un sabko bhulaana padta hai। ek bigar doosra koi yaad na pade। deh bhi yaad na pade। deh-abhimaan ko tod dehi-abhimaani banna hai। deh-abhimaan mein aane se hi anek prakaar ke sankalp-vikalpa ulte gira dete hain। yaad karne ki practice karte rahenge to sadaiv harshit mukh khile hue phool rahenge। yaad ko bhoolne se phool murjha jaata hai। himmate bachche madde baap। bachche hi nahin banen to baap madad kis baat ki karenge? kyonki unka maai baap phir hai raavan maaya, to unse madad milegi girne ki। to yeh geet saara tum bachchon par bana hua hai - bachpan ke din bhula na dena.....। baap ko yaad karna hai, yaad nahin kiya to jo aaj hanse kal phir rote rahenge। yaad karne se sadaiv harshit mukh rahenge। tum bachche jaante ho ek hi geeta shaastra hai, jismen kuchh-kuchh akshar theek hain। likha hai ki yuddha ke maidaan mein marenge to svarga mein jaayenge। parantu ismen hinsak yuddha ki to baat hi nahin hai। tum bachchon ko baap se shakti lekar maaya par jeet paani hai। to zaroor baap ko yaad karna pade tab hi tum svarga ke maalik banenge। unhonne phir sthool hathiyaar aadi baith dikhaaye hain। gyaan kataari, gyaan baan akshar suna hai to sthool roop mein hathiyaar de diye hain। vaastav mein hain yeh gyaan ki baaten। baaki itni bhujaayen aadi to koi ko hoti nahin। to yeh hai yuddha ka maidaan। yog mein rah shakti lekar vikaaron par jeet paani hai। baap ko yaad karne se varsa yaad aayega। vaaris hi varsa lete hain। vaaris nahin bante to phir praja ban padte hain। yeh hai hi raajayog, praja yog nahin। yeh samjhaani baap ke sivaae koi de na sake।

baap kehte hain mujhe is saadhaaran tan ka aadhaar le aana padta hai। prakriti ka aadhaar lene bigar tum bachchon ko raajayog kaise sikhlaaoon? aatma shareer ko chhod deti hai to phir koi baatcheet ho nahin sakti। phir jab shareer dhaaran kare, bachcha thoda bada ho tab baahar nikle aur buddhi khule। chhote bachche to hote hi pavitra hain, unmein vikaar hote nahin। sannyaasi log seedhi chadhkar phir neeche utarte hain। apne jeevan ko samajh sakte hain। bachche to hote hi pavitra hain, isliye hi bachche aur mahaatma ek samaan gaaye jaate hain। to tum bachche jaante ho yeh shareer chhodkar ham prince-princess banenge। aage bhi ham bane the, ab phir bante hain। aise-aise khyaalaat students ko rehte hain। yeh bhi unki buddhi mein aayega jo bachche honge aur phir vaphaadaar, pharmaanbardaar ho shreemat par chalte honge। nahin to shreshtha pad pa na saken। teacher to padha hua hi hai। aise nahin ki woh padhte hain phir padhaate hain। nahin, teacher to padha hua hi hai। unko knowledgeful kaha jaata hai। srishti ke aadi-madhya-ant ki knowledge aur koi nahin jaante। pahle to nishchay chaahiye woh baap hai। agar kisi ki takdeer mein nahin hai to phir andar mein khitkhit chalti rahegi। pata nahin chal sakega। baba ne samjhaaya hai jab tum baap ki god mein aayenge to yeh vikaaron ki beemaari aur hi zor se baahar niklegi। vaidya log bhi kehte hain - beemaari uthal khaayegi। baap bhi kehte hain tum bachche banenge to deh-abhimaan ki aur kaam-krodh aadi ki beemaari badhegi। nahin to pareeksha kaise ho? kahaan bhi moonjho to poochhte raho। jab tum roostam bante ho tab maaya khoob pachhaadti hai। tum boxing mein ho। bachcha nahin bane hain to boxing ki baat hi nahin। vo to apne hi sankalpon-vikalpon mein gote khaate hain, na koi madad hi milti hai। baba samajhte hain - mama-baba kehte hain to baap ka bachcha banna pade, phir woh dil mein pakka ho jaata hai ki yeh hamaara roohaani baap hai। baaki yeh yuddha ka maidaan hai, ismen darna nahin hai ki pata nahin toofaan mein thahar sakenge va nahin? isko kamjor kaha jaata hai। ismen sher banna pade। purooshaartha ke liye achhi mat leni chaahiye। baap se poochhna chaahiye। bahut bachche apni avastha likhkar bhejte hain। baap ko hi certificate dena hai। inse bhal chhipaayen parantu shivbaaba se to chhip na sake। bahut hain jo chhipaate hain parantu unse kuchh bhi chhip nahin sakta। achhe ka phal achha, bure ka phal bura hota hai। satayug-treta mein to sab achha hi achha hota hai। achha-bura, paap-punya yahaan hota hai। vahaan daan-punya bhi nahin kiya jaata। hai hi praalabdha। yahaan ham total surrender hote hain to baba 21 janmon ke liye return mein de dete hain। follow father karna hai। agar ulta kaam karenge to naam bhi baap ka badnaam karenge isliye shiksha bhi deni padti hai। roop-basanta bhi sabko banna hai। ham aatmaon ko baba ne padhaaya hai phir humein doosron ko padhaana bhi hai। sachche braahmanon ko sachchi geeta sunaani hai। aur koi shaastron ki baat nahin। mukhya hai geeta। baaki hain unke baal bachche। unse koi ka kalyaan nahin hota। mere ko koi bhi nahin milta। main hi aakar phir se sahaj gyaan, sahaj yog sikhlaata hoon। sarva shaastramai shiromni geeta hai, us sachchi geeta dvaara varsa milta hai। shreekrishna ko bhi geeta se varsa mila, geeta ka bhi baap jo rachayita hai, woh baith varsa dete hain। baaki geeta shaastra se varsa nahin milta। rachayita hai ek, baaki hain unki rachna। pahla number shaastra hai geeta to peechhe jo shaastra bante hain unse bhi varsa mil na sake। varsa milta hi sammukh hai। mukti ka varsa to sabko milna hai, sabko vaapis jaana hai। baaki svarga ka varsa milta hai padhaai se। phir jo jitna padhega। baap sammukh padhaate hain। jab tak nishchay nahin ki kaun padhaate hain to samjhenge kya? praapti kya kar sakenge? phir bhi baap se sunte rehte hain to gyaan ka vinaash nahin hota। jitna sukh milega phir auron ko bhi sukh denge। praja banaayenge to phir khud raaja ban jaayenge।

hamaari hai student life। hansate-khelte, gyaan ki dance karte ham jaakar prince banenge। student jaante hain hamko prince banna hai to khushi ka paara chadhega। yeh to prince-princess ka college hai। vahaan prince-princess ka alag college hota hai। vimaanon mein chadhkar jaate hain। vimaan bhi vahaan ke full proof hote hain, kabhi toot na saken। kabhi accident hona hi nahin hai, koi bhi kisma ka। yeh sab samajhne ki baaten hain। ek to baap se poora buddhiyog rakhna pade, doosra baap ko sabhi samaachaar dena pade ki kaun-kaun kaanton se kaliyaan bane hain? baap se poora connection rakhna pade, jo phir teacher bhi direction dete rahen। kaun vaaris ban phool banne ka purooshaartha karte hain? kaanton se kali to banen phir phool tab banen jab bachcha banen। nahin to kali ke kali rahenge arthaat praja mein aa jaayenge। ab jo jaisa purooshaartha karega, aisa pad paayega। aise nahin, ek ke daudne se ham unka poonchh pakad lenge। bhaaratvaasi aise samajhte hain। parantu poonchh pakadne ki to baat hi nahin, jo karega so paayega। jo purooshaartha karega, 21 peedhi unki praalabdha banegi। boodhe to zaroor honge। parantu akaale mrityu nahin hoti hai। kitna bhaari pad hai। baap samajh jaate hain inki takdeer khuli hai, vaaris bana hai। abhi purooshaarthi hain phir report bhi karte hain, baba yeh-yeh vighna aate hain, yeh hota hai। har ek ko potaamel dena hota hai। itni mehnat aur koi satsang mein nahin hoti hai। baba to chhote-chhote bachchon ko bhi sandeshi bana dete hain। ladaai mein message le jaane vaale bhi chaahiye na। ladaai ka yeh maidaan hai। yahaan tum sammukh sunte ho to bahut achha lagta hai, dil khush hoti hai। baahar gaye aur bagulon ka sang mila to khushi ud jaati hai। vahaan maaya ki dhool hai na isliye pakka banna pade।

baba kitna pyaar se padhaate hain, kitni facilities dete hain। aise bhi bahut hain jo achha-achha kah phir gum ho jaate hain, koi virla hi khada ho sakta hai। yahaan to gyaan ka nasha chaahiye। sharaab ka bhi nasha hota hai na। koi devaala maara ho aur sharaab piya, jor se nasha chadha to samjhega ham raajaaon ka raaja hain। yahaan tum bachchon ko roz gyaan amrit ka pyaala milta hai। dhaaran karne liye din-pratidin points aisi milti rehti hain jo buddhi ka taala hi khulta jaata hai isliye murli to kaise bhi padhni hai। jaise geeta ka roz paath karte hain na। yahaan bhi roz baap se padhna pade। poochhna chaahiye meri unnati nahin hoti hai, kya kaaran hai? aakar samajhna chaahiye। aayenge bhi woh jinko poora nishchay hai ki woh hamaara baap hai। aisa nahin, purooshaartha kar raha hoon - nishchay buddhi hone ke liye। nishchay to ek hi hota hai, usmein percentage nahin hoti। baap ek hai, unse varsa milta hai। yahaan hazaaron padhte hain phir bhi kahen nishchay kaise karun? unko kambakhta kaha jaata hai। bakhtaavar woh jo baap ko pahchaan aur maan le। koi raaja kahe hamaari god ka bachcha aakar bano to unki god mein jaane se hi nishchay ho jaata hai na। aise nahin kahenge ki nishchay kaise ho? yeh hai hi raajayog। baap to svarga ka rachayita hai to svarga ka maalik banaate hain। nishchay nahin hota hai to tumhaari takdeer mein nahin hai, aur koi kya kar sakte hain? nahin maante to phir tadbeer kaise ho sake? woh langadaata hi chalega। behad ke baap se bhaaratvaasiyon ko kalpa-kalpa svarga ka varsa milta hai। devta hote hi svarga mein hain। kaliyug mein to raajaai hai nahin। praja ka praja par raajya hai। patit duniya hai to usko paavan duniya baap nahin karega to kaun karega? takdeer mein nahin hai to phir samajhte nahin। yeh to bilkul sahaj samajhne ki baat hai। lakshmi-naaraayan ne yeh raajaai ki praalabdha kab paai? zaroor aage janma ke karma hain tab hi praalabdha paai hai। lakshmi-naaraayan svarga ke maalik the, abhi narka hai to aisa shreshtha karma athva raajayog sivaae baap ke aur koi sikhla na sake। abhi sabka antim janma hai। baap raajayog sikhla rahe hain। dvaapar mein thode hi raajayog sikhlaayenge। dvaapar ke baad satayug thode hi aayega। yahaan to bahut achhi reeti samajhkar jaate hain। baahar jaane se hi khaali ho jaate hain jaise dibbi mein thikri rah jaati hain, ratna nikal jaate। gyaan sunte-sunte phir vikaar mein gira to khalaas। buddhi se gyaan ratnon ki saphaai ho jaati hai। aise bhi bahut likhte hain - baba, mehnat karte-karte phir aaj gir gaya। gire goya apne ko aur kul ko kalank lagaaya, takdeer ko lakeer laga di। ghar mein bhi bachche agar aisa koi akartavya karte hain to kehte hain aisa bachcha mua (mara) bhala। to yeh behad ka baap kehte hain kul kalankit mat bano। yadi vikaaron ka daan dekar phir vaapis liya to pad bhrashta ho jaayega। purooshaartha karna hai, jeet paani hai। chot lagti hai to phir khade ho jaao। ghadi-ghadi chot khaate rahenge to haar khaakar behosh ho padenge। baap samjhaate to bahut hain parantu koi thahre bhi। maaya badi teekhi hai। pavitrata ka pran kar liya, agar phir girte hain to chot bade zor se lag padti hai। beda paar hota hi hai pavitrata se। purity thi to bhaarat ka sitaara chamakta tha। ab to ghor andhiyaara hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is yuddha ke maidaan mein maaya se darna nahin hai, baap se purooshaartha ke liye achhi mat le leni hai। vaphaadaar, pharmaanbar-daar ban shreemat par chalte rehna hai।

2) roohaani nashe mein rahne ke liye gyaan amrit ka pyaala roz peena hai। murli roz padhni hai। takdeervaan (bakhtaavar) banne ke liye baap mein kabhi sanshay na aaye।

vardaan:- brahma baap samaan jeevanmukta sthiti ka anubhav karne vaale karma ke bandhanon se mukta bhav

brahma baap karma karte bhi karmo ke bandhan mein nahin phanse। sambandh nibhaate bhi sambandhon ke bandhan mein nahin bandhe। ve dhan aur saadhnon ke bandhan se bhi mukta rahe, jimmevaariyaan sambhaalte hue bhi jeevanmukta sthiti ka anubhav kiya। aise follow father karo। kisi bhi pichhle hisaab-kitaab ke bandhan mein bandhana nahin। sanskaar, svabhaav, prabhaav aur dabaav ke bandhan mein bhi nahin aana tab kahenge karmabandhan mukta, jeevanmukta।

slogan:- tamoguni vaayumandal mein svayan ko safe rakhna hai to saakshi hokar khel dekhne ka abhyaas karo।