Daily Murli for Thursday 19 December 2024

19-12-2024 praatahmurli om shanti "baapdaada"' madhuban

“meethe bachche - yeh purooshottam sangamayug transfer hone ka yug hai, abhi tumhein kanishta se uttam puroosh banna hai''

prashn:- baap ke saath-saath kin bachchon ki bhi mahima gaai jaati hai?

uttar:- jo teacher ban bahuton ka kalyaan karne ke nimitta bante hain, unki mahima bhi baap ke saath-saath gaai jaati hai। karan-karaavanhaar baba bachchon se anekon ka kalyaan karaate hain to bachchon ki bhi mahima ho jaati hai। kehte hain - baba, phalaane ne hamaare par daya ki, jo ham kya se kya ban gaye! teacher banne bigar aasheervaad mil nahin sakti।

om shanti। roohaani baap roohaani bachchon se poochhte hain। samjhaate bhi hain phir poochhte bhi hain। ab baap ko bachchon ne jaana hai। bhal koi sarvavyaapi bhi kehte hain parantu unke pahle baap ko pahchaanna to chaahiye na - baap kaun hai? pahchaan kar phir kehna chaahiye, baap ka nivaas sthaan kahaan hai? baap ko jaante hi nahin to unke nivaas sthaan ka pata kaise pade। kah dete woh to naam-roop se nyaara hai, goya hai nahin। to jo cheez hai nahin unke rahne ke sthaan ka bhi kaise vichaar kiya jaae? yeh abhi tum bachche jaante ho। baap ne pahle-pahle to apni pahchaan di hai, phir rahne ka sthaan samjhaaya jaata hai। baap kehte hain main tumko is rath dvaara pahchaan dene aaya hoon। main tum sabka baap hoon, jisko parampita kaha jaata hai। aatma ko bhi koi nahin jaante hain। baap ka naam, roop, desh, kaal nahin hai to bachchon ka phir kahaan se aaye? baap hi naam-roop se nyaara hai to bachche phir kahaan se aaye? bachche hain to zaroor baap bhi hai। siddha hota hai woh naam-roop se nyaara nahin hai। bachchon ka bhi naam-roop hai। bhal kitna bhi sookshm ho। aakaash sookshm hai to bhi naam to hai na aakaash। jaise yeh polaar sookshm hai, vaise baap bhi bahut sookshm hai। bachche varnan karte hain wonderful sitaara hai, jo inmen pravesh karte hain, jisko aatma kehte hain। baap to rehte hi hain paramdham mein, woh rahne ka sthaan hai। oopar nazar jaati hai na। oopar anguli se ishaara kar yaad karte hain। to zaroor jisko yaad karte hain, koi vastu hogi। parampita paramatma kehte to hain na। phir bhi naam-roop se nyaara kehna - ise agyaan kaha jaata hai। baap ko jaanna, ise gyaan kaha jaata hai। yeh bhi tum samajhte ho ham pahle agyaani the। baap ko bhi nahin jaante the, apne ko bhi nahin jaante the। ab samajhte ho ham aatma hain, na ki shareer। aatma ko avinaashi kaha jaata hai to zaroor koi cheez hai na। avinaashi koi naam nahin। avinaashi arthaat jo vinaash ko nahin paati। to zaroor koi vastu hai। bachchon ko achhi reeti samjhaaya gaya hai, meethe-meethe bachchon, jinko bachche-bachche kehte hain woh aatmaayen avinaashi hain। yeh aatmaon ka baap parampita paramatma baith samjhaate hain। yeh khel ek hi baar hota hai jabki baap aakar bachchon ko apna parichay dete hain। main bhi paartadhaari hoon। kaise part bajaata hoon, yeh bhi tumhaari buddhi mein hai। puraani arthaat patit aatma ko naya paavan banaate hain to phir shareer bhi tumhaare vahaan gul-gul hote hain। yeh to buddhi mein hai na।

abhi tum baba-baba kehte ho, yeh part chal raha hai na। aatma kehti hai baba aaya hua hai - ham bachchon ko shantidham ghar le jaane ke liye। shantidham ke baad hai hi sukhdhaam। shantidham ke baad duhkhadhaam ho na sake। nai duniya mein sukh hi kaha jaata hai। yeh devi-devtaayen agar chaitanya hon aur inse koi poochhe aap kahaan ke rahne vaale ho, to kahenge ham svarga ke rahne vaale hain। ab yeh jad moorti to nahin kah sakti। tum to kah sakte ho na, ham asul svarga mein rahne vaale devi-devtaayen the phir 84 ka chakra lagaae ab sangam par aaye hain। yeh transfer hone ka purooshottam sangamayug hai। bachche jaante hain ham bahut uttam puroosh bante hain। ham har 5 hazaar varsha baad satopradhaan bante hain। satopradhaan bhi nambarvaar kahenge। to yeh saara part aatma ko mila hua hai। aise nahin kahenge ki manushya ko part mila hua hai। aham aatma ko part mila hua hai। main aatma 84 janma leti hoon। ham aatma vaaris hain, vaaris hamesha mel hote hain, female nahin। to abhi tum bachchon ko yeh pakka samajhna hai ham sab aatmaayen mel hain। sabko behad ke baap se varsa milta hai। had ke laukik baap se sirf bachchon ko varsa milta hai, bachchi ko nahin। aise bhi nahin, aatma sadaiv female banti hai। baap samjhaate hain tum aatma kabhi mel ka, kabhi female ka shareer leti ho। is samay tum sab males ho। sab aatmaon ko ek baap se varsa milta hai। sab bachche hi bachche hain। sabka baap ek hai। baap bhi kehte hain - he bachchon, tum sab aatmaayen males ho। hamaare roohaani bachche ho। phir part bajaane liye mel-female donon chaahiye। tab to manushya srishti ki vriddhi ho। in baaton ko tumhaare sivaae koi bhi nahin jaante hain। bhal kehte to hain ham sabhi brothers hain parantu samajhte nahin।

abhi tum kehte ho baba aapse hamne anek baar varsa liya hai। aatma ko yeh pakka ho jaata hai। aatma baap ko zaroor yaad karti hai - O baba raham karo। baba ab aap aao, ham aapke sab bachche banenge। deh sahit deh ke sab sambandh chhod ham aatma aapko hi yaad karenge। baap ne samjhaaya hai apne ko aatma samajh mujh baap ko yaad karo। baap se ham varsa kaise paate hain, har 5 hazaar varsha baad ham yeh devta kaise bante hain, yeh bhi jaanna chaahiye na। svarga ka varsa kisse milta hai, yeh abhi tum samajhte ho। baap to svargavaasi nahin hai, bachchon ko banaate hain। khud to narka mein hi aate hain, tum baap ko bulaate bhi narka mein ho, jabki tum tamopradhaan bante ho। yeh tamopradhaan duniya hai na। satopradhaan duniya thi, 5 hazaar varsha pahle inka raajya tha। in baaton ko, is padhaai ko abhi tum hi jaante ho। yeh hai manushya se devta banne ki padhaai। manushya se devta kiye karat na laagi vaar… bachcha bana aur vaaris bana, baap kehte hain tum sab aatmaayen mere bachche ho। tumko varsa deta hoon। tum bhaai-bhaai ho, rahne ka sthaan mool vatan athva nirvaandhaam hai, jisko niraakaari duniya bhi kehte hain। sab aatmaayen vahaan rehti hain। is soorya chaand se bhi us paar woh tumhaara sweet silence ghar hai parantu vahaan baith to nahin jaana hai। baithkar kya karenge। woh to jaise jad avastha ho gai। aatma jab part bajaaye tab hi chaitanya kahlaaye। hai chaitanya parantu part na bajaaye to jad hui na। tum yahaan khade ho jaao, haath paanv na chalaao to jaise jad hue। vahaan to natural shanti rehti hai, aatmaayen jaise ki jad hain। part kuchh bhi nahin bajaati। shobha to part mein hai na। shantidham mein kya shobha hogi? aatmaayen sukh-duhkh ki bhaasna se pare rehti hain। kuchh part hi nahin bajaati to vahaan rahne se kya phaayda? pahle-pahle sukh ka part bajaana hai। har ek ko pahle se hi part mila hua hai। koi kehte hain hamko to moksha chaahiye। budbuda paani mein mil gaya bas, aatma jaise ki hai nahin। kuchh bhi part na bajaave to jaise jad kahenge। chaitanya hote hue jad hokar pada rahe to kya phaayda? part to sabko bajaana hi hai। mukhya hero-heroine ka part kaha jaata hai। tum bachchon ko hero-heroine ka title milta hai। aatma yahaan part bajaati hai। pahle sukh ka raajya karti hai phir raavan ke duhkh ke raajya mein jaati hai। ab baap kehte hain tum bachche sabko yeh paigaam do। teacher ban auron ko samjhaao। jo teacher nahin bante unka pad kam hoga। teacher banne bigar kisko aasheervaad kaise milegi? kisko paisa denge to unko khushi hogi na। andar mein samajhte hain bi.ke. hamaare oopar bahut daya karti hain, jo hamko kya se kya bana deti hain! yoon to mahima ek baap ki hi karte hain - vaah baba, aap in bachchon dvaara hamaara kitna kalyaan karte ho! koi dvaara to hota hai na। baap karnakraavanhaar hai, tumhaare dvaara karaate hain। tumhaara kalyaan hota hai। to tum phir auron ko kalam lagaate ho। jaise-jaise jo service karte hain, utna oonch pad paate hain। raaja banna hai to praja bhi banaani hai। phir jo achhe number mein aate hain woh bhi raaja bante hain। maala banti hai na। apne se poochhna chaahiye ham maala mein kaun-sa number banenge? 9 ratna mukhya hain na। beech mein hai heera banaane vaala। heere ko beech mein rakhte hain। maala mein oopar phool bhi hai na। ant mein tumko pata padega - kaun-se mukhya daane bante hain, jo dynasty mein aayenge। pichhaadi mein tumko sab saakshaatkaar hoga zaroor। dekhenge, kaise yeh sab sajaayen khaate hain। shuru mein divya drishti mein tum sookshm vatan mein dekhte the। yeh bhi gupta hai। aatma sajaayen kahaan khaati hai - yeh bhi drama mein part hai। garbha jel mein sajaayen milti hain। jel mein dharmaraaj ko dekhte hain phir kehte hain baahar nikaalo। beemaariyaan aadi hoti hain, woh bhi karma ka hisaab hai na। yeh sab samajhne ki baaten hain। baap to zaroor right hi sunaayenge na। abhi tum righteous bante ho। righteous unko kaha jaata hai jo baap se bahut taakat lete hain।

tum vishwa ke maalik bante ho na। kitni taakat rehti hai। hangaamen aadi ki koi baat nahin। taakat kam hai to kitne hangaame ho jaate hain। tum bachchon ko taakat milti hai - aadhaakalpa ke liye। phir bhi nambarvaar purooshaartha anusaar। ek jaisi taakat nahin pa sakte, na ek jaisa pad pa sakte hain। yeh bhi pahle se noondh hai। drama mein anaadi noondh hai। koi pichhaadi mein aate hain, ek-do janma liya aur shareer chhoda। jaise deevaali par machchhar hote hain, raat ko janma lete hain, subah ko mar jaate hain। woh to anginat hote hain। manushya ki to phir bhi ginti hoti hai। pahle-pahle jo aatmaayen aati hain unki aayu kitni badi hoti hai! tum bachchon ko khushi honi chaahiye - ham bahut badi aayu vaale banenge। tum full part bajaate ho। baap tumko hi samjhaate hain, tum kaise full part bajaate ho। padhaai anusaar oopar se aate ho part bajaane। tumhaari yeh padhaai hai hi nai duniya ke liye। baap kehte hain anek baar tumko padhaata hoon। yeh padhaai avinaashi ho jaati hai। aadhaakalpa tum praalabdha paate ho। us vinaashi padhaai se sukh bhi alpakaal liye milta hai। abhi koi barrister banta hai phir kalpa baad barrister banega। yeh bhi tum jaante ho - jo bhi sabka part hai, vahi part kalpa-kalpa bajta rahega। devta ho ya shoodra ho, har ek ka part vahi bajta hai, jo kalpa-kalpa bajta hai। unmein koi pharka nahin ho sakta। har ek apna part bajaate rehte hain। yeh saara bana-banaaya khel hai। poochhte hain purooshaartha bada ya praalabdha badi? ab purooshaartha bigar to praalabdha milti nahin। purooshaartha se praalabdha milti hai drama anusaar। to saara bojh drama par aa jaata hai। purooshaartha koi karte hain, koi nahin karte hain। aate bhi hain phir bhi purooshaartha nahin karte to praalabdha nahin milti। saari duniya mein jo bhi act chalti hai, saara bana-banaaya drama hai। aatma mein pahle se hi part noondha hua hai aadi se ant tak। jaise tumhaari aatma mein 84 ka part hai, heera bhi banti hai to kaudi jaisa bhi banti hai। yeh sab baaten tum abhi sunte ho। school mein agar koi naapaas ho padta hai to kahenge yeh buddhiheen hai। dhaarna nahin hoti, isko kaha jaata hai variety jhaad, variety features। yeh variety jhaad ka knowledge baap hi samjhaate hain। kalpa vriksha par bhi samjhaate hain। bad ke jhaad ka misaal bhi is par hai। unki shaakhaayen bahut phailti hain।

bachche samajhte hain hamaari aatma avinaashi hai, shareer to vinaash ho jaayega। aatma hi dhaarna karti hai, aatma 84 janma leti hai, shareer to badalte jaate hain। aatma vahi hai, aatma hi bhinna-bhinna shareer lekar part bajaati hai। yeh nai baat hai na। tum bachchon ko bhi abhi yeh samajh mili hai। kalpa pahle bhi aise samjha tha। baap aate bhi hain bhaarat mein। tum sabko paigaam dete rehte ho, koi bhi aisa nahin rahega jisko paigaam na mile। paigaam sunna sabhi ka hak hai। phir baap se varsa bhi lenge। kuchh to sunenge na phir bhi baap ke bachche hain na। baap samjhaate hain - main tum aatmaon ka baap hoon। mere dvaara is rachna ke aadi-madhya-ant ko jaanne se tum yeh pad paate ho। baaki sab mukti mein chale jaate hain। baap to sabki sadgati karte hain। gaate hain aho baba, teri leela... kya leela? kaisi leela? yeh puraani duniya ko badalne ki leela hai। maaloom hona chaahiye na। manushya hi jaanenge na। baap tum bachchon ko hi aakar sab baaten samjhaate hain। baap knowledgeful hai। tumko bhi knowledgeful banaate hain। nambarvaar tum bante ho। scholarship lene vaale knowledgeful kahlaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada isi smriti mein rehna hai ki ham aatma mel hain, humein baap se poora varsa lena hai। manushya se devta banne ki padhaai padhni aur padhaani hai।

2) saari duniya mein jo bhi act chalti hai, yeh sab bana-banaaya drama hai, ismen purooshaartha aur praalabdha donon ki noondh hai। purooshaartha ke bina praalabdha nahin mil sakti, is baat ko achhi tarah samajhna hai।

vardaan:- koi bhi seva sachche man se va lagan se karne vaale sachche roohaani sevaadhaari bhav

seva koi bhi ho lekin woh sachche man se, lagan se ki jaae to uski 100 marks milti hain। seva mein chidchida-pan na ho, seva kaam utaarne ke liye na ki jaae। aapki seva hai hi bigdi ko banaana, sabko sukh dena, aatmaon ko yogya aur yogi banaana, apkaariyon par upkaar karna, samay par har ek ko saath va sahayog dena, aisi seva karne vaale hi sachche roohaani sevaadhaari hain।

slogan:- pavitrata hi brahman jeevan ki naveenta hai, yahi gyaan ka foundation hai।