Daily Murli for Monday 23 December 2024

23-12-2024 praatahmurli om shanti "baapdaada"' madhuban

“meethe bachche - tum baap ke paas aate ho refresh hone, baap ke milne se bhakti maarga ki sab thakaan door ho jaati hai''

prashn:- tum bachchon ko baba kis vidhi se refresh karte hain?

uttar:- 1- baba gyaan suna-suna kar tumhein refresh kar dete hain। 2- yaad se bhi tum bachche refresh ho jaate ho। vaastav mein satayug hai sachchi vishraam puri। vahaan koi apraapta vastu nahin, jisko praapta karne ke liye parishram karna pade। 3- shiv-baba ki god mein aate hi tum bachchon ko vishraam mil jaata hai। saari thakaan door ho jaati hai।

om shanti। baap baith samjhaate hain, saath mein yeh daada bhi samajhte hain kyonki baap in daada dvaara baith samjhaate hain। jaise tum samajhte ho, vaise yeh daada bhi samajhte hain। daada ko bhagwan nahin kaha jaata, yeh hai bhagvaanuvaach। baap kya samjhaate hain? dehi-abhimaani bhav kyonki apne ko aatma samajhne bigar parampita paramatma ko yaad kar na saken। is samay to sabhi aatmaayen patit hain। patit ko hi manushya kaha jaata hai, paavan ko devta kaha jaata hai। yeh bahut sahaj samajhne aur samjhaane ki baaten hain। manushya hi pukaarte hain - he patiton ko paavan banaane vaale aao। devi-devtaayen aise kabhi nahin kahenge। patit-paavan baap patiton ke bulaave par aate hain। aatmaon ko paavan banaakar phir nai paavan duniya bhi sthaapan karte hain। aatma hi baap ko pukaarti hai। shareer to nahin pukaarega। paarlaukik baap jo sada paavan hai, use hi sab yaad karte hain। yeh hai puraani duniya। baap nai paavan duniya banaate hain। kai to aise bhi hain jo kehte hain hamko to yahaan hi apaar sukh hain, dhan maal bahut hai। woh samajhte hain hamaare liye svarga yahi hain। woh tumhaari baaten kaise maanenge? kaliyugi duniya ko svarga samajhna - yeh bhi besamjhi hai। kitni jadajdeebhoot avastha ho gai hai। to bhi manushya kehte hain ham to svarga mein baithe hain। bachche nahin samjhaate hain to baap kahenge na - tum kya pattharbuddhi ho? doosre ko nahin samjha sakte ho? jab khud paarasbuddhi banen tab to doosron ko bhi banaaven। purooshaartha achha karna chaahiye, ismen lajja ki baat nahin। parantu manushyon ki buddhi mein aadhaakalpa ki jo ulti maten bhari hui hain woh koi jaldi bhoolte nahin। jab tak baap ko yathaartha reeti nahin pahchaana hai tab tak woh taakat aa nahin sakti। baap kehte hain in vedon-shaastron aadi se manushya kuchh bhi sudharte nahin hain। din-pratidin aur hi bigadte aaye hain। satopradhaan se tamopradhaan hi bane hain। yeh kiski bhi buddhi mein nahin hai ki ham hi satopradhaan devi-devta the, kaise neeche gire hain। kisko zara bhi pata nahin hai aur phir 84 janma ke badle 84 laakh janma kah diya hai to phir pata bhi kaise pade। baap bigar gyaan ki roshni dene vaala koi nahin। sabhi ek-do ke pichhaadi dar-dar dhakke khaate rehte hain। neeche girte-girte pat pad gaye hain, sab taakat khatma ho gai hai। buddhi mein bhi taakat nahin jo baap ko yathaartha jaan saken। baap hi aakar sabki buddhi ka taala kholte hain। to kitne refresh hote hain। baap ke paas bachche refresh hone aate hain। ghar mein vishraam milta hai na। baap ke milne se bhakti maarga ki sab thakaan hi door ho jaati hai। satayug ko bhi vishraampuri kaha jaata hai। vahaan tumhein kitna vishraam milta hai। koi apraapta vastu nahin jiske liye parishram karna pade। yahaan refresh baap bhi karte hain to yeh daada bhi karte hain। shivbaaba ki god mein aate kitna vishraam milta hai। vishraam maana hi shant। manushya bhi thakkar vishraami ho jaate hain। koi kahaan, koi kahaan vishraam ke liye jaate hain na। lekin us vishraam mein refreshment nahin। yahaan to baap tumhein kitna gyaan sunaakar refresh karte hain। baap ki yaad se bhi kitne refresh hote aur tamopradhaan se satopradhaan bhi bante jaate ho। satopradhaan banne ke liye yahaan baap ke paas aate ho। baap kehte hain meethe-meethe bachchon, baap ko yaad karo। baap ne samjhaaya hai ki saare srishti ka chakra kaise phirta hai, sarva aatmaon ko vishraam kaise aur kahaan milta hai। tum bachchon ka farja hai - sabko baap ka paigaam dena। baap kehte hain mujhe yaad karo to is varse ke tum maalik ban jaayenge। baap is sangamayug par nai svarga ki duniya rachte hain। jahaan tum jaakar maalik bante ho। phir dvaapar mein maaya raavan ke dvaara tumhein shraap milta hai, to pavitrata, sukh, shanti, dhan aadi sab khatma ho jaata hai। kaise dheere-dheere khatma hota hai woh bhi baap ne samjhaaya hai। duhkhadhaam mein koi vishraam thode hi hota hai। sukhdhaam mein vishraam hi vishraam hai। manushyon ko bhakti kitna thakaati hai। janma-janmaantar bhakti se kitne thak jaate hain। kaise ekdam kangaal ban gaye ho, yeh saara raaz baap baith samjhaate hain। naye-naye aate hain to unhein kitna samjhaana hota hai। har ek baat par manushya kitna sochte hain। samajhte hain kahaan jaadu na ho। are, tum hi kehte ho bhagwan jaadoogar hai। to baap kehte hain haan, main barobar jaadoogar hoon। parantu woh jaadu nahin, jisse manushya bhed-bakri ban jaayen। yeh buddhi se samjha jaata hai, yeh to jaise ridh misal hai। gaayan bhi to hai surmandal ke saaz se… is samay to jaise sabhi manushya ridh-bakriyaan hain। yeh baaten saari yahaan ki hain। is samay ka hi gaayan hai। kalpa ke pichhaadi ko bhi manushya samajh nahin sakte। chandika ka kitna bada mela lagta hai। woh kaun thi? kehte hain woh ek devi thi। aisa naam to vahaan koi hota hi nahin। satayug mein kitne achhe sundar naam hote hain। satayugi sampradaay ko shreshthaachaari kaha jaata hai। kaliyugi sampradaay ko to kitna chhi-chhi title dete hain। abhi ke manushyon ko shreshtha nahin kahenge। devtaaon ko shreshtha kaha jaata hai। gaayan bhi hai manushya se devta kiye, karat na laagi vaar। manushya se devta, devta se manushya kaise bante hain, yeh raaz baap ne tumhein samjhaaya hai। unko deity world, inko human world kaha jaata hai। din ko sojhra, raat ko andhiyaara kaha jaata hai। gyaan hai sojhra, bhakti hai andhiyaara। agyaan neend kaha jaata hai na। tum bhi samajhte ho ki aage ham kuchh bhi nahin jaante the to neti-neti kehte the arthaat ham nahin jaante। abhi tum samajhte ho - ham bhi to pahle naastik the। behad ke baap ko hi nahin jaante the। woh hai asli avinaashi baba। use sarva aatmaon ka baap kaha jaata hai। tum bachche jaante ho - abhi ham us behad ke baap ke bane hain। baap bachchon ko gupta gyaan dete hain। yeh gyaan manushyon ke paas kahaan mil na sake। aatma bhi gupta hai, gupta gyaan aatma dhaaran karti hai। aatma hi mukh dvaara gyaan sunaati hai। aatma hi gupta baap ko gupta yaad karti hai।

baap kehte hain bachchon, deh-abhimaani nahin bano। deh-abhimaan se aatma ki taakat khatma hoti hai। aatma-abhimaani banne se aatma mein taakat jama hoti hai। baap kehte hain drama ke raaz ko achhi reeti samajhkar chalna hai। is avinaashi drama ke raaz ko jo theek reeti jaante hain, woh sada harshit rehte hain। is samay manushya oopar jaane ki kitni koshish karte hain, samajhte hain oopar mein duniya hai। shaastron mein sun rakha hai oopar mein duniya hai to vahaan jaakar dekhen। vahaan duniya basaane ki koshish karte hain। duniya to bahut basaai hai na। bhaarat mein sirf ek hi aadi sanaatan devi-devta dharma tha aur koi khanda aadi nahin tha। phir kitna basaaya hai। tum vichaar karo bhaarat ke kitne thode tukde mein devtaayen hote hain। jamuna ke kinaare par hi paristaan tha jahaan yeh lakshmi-naaraayan raajya karte the। kitni sundar shobhaaymaan, satopradhaan duniya thi। natural beauty thi। aatma mein hi saara chamatkaar rehta hai। bachchon ko dikhaaya tha shreekrishna ka janma kaise hota hai। saare kamre mein jaise roshni ho jaati hai। to baap baith kar bachchon ko samjhaate hain, abhi tum paristaan mein jaane ke liye purooshaartha kar rahe ho। baaki aise nahin - taalaab mein dubki lagaane se pariyaan ban jaayenge। yeh sabhi jhoothe naam rakh diye hain। laakhon varsha kah dene se bilkul hi sab-kuchh bhool gaye hain। abhi tum abhul ban rahe ho nambarvaar purooshaartha anusaar। vichaar kiya jaata hai - itni chhoti-si aatma kitna bada part shareer se bajaati hai, phir shareer se aatma nikal jaati hai to shareer ka dekho kya haal ho jaata hai। aatma hi part bajaati hai। kitni badi vichaar ki baat hai। saari duniya ke actors (aatmaayen) apni act anusaar hi part bajaate hain। kuchh bhi pharka nahin pad sakta। hoobhu saari act phir se repeat ho rahi hai। ismen sanshay kar nahin sakte। har ek ki buddhi mein pharka pad sakta hai kyonki aatma to man-buddhi sahit hai na। bachchon ko maaloom hai ki hamko scholarship leni hai to dil andar khushi hoti hai। yahaan bhi andar aane se hi em object saamne dekhte hain to khushi to zaroor hogi। abhi tum jaante ho ham yeh (devi-devta) banne ke liye yahaan padhte hain। aisa koi school nahin jahaan doosre janma ki em object ko dekh saken। tum dekhte ho ki ham lakshmi-naaraayan jaise ban rahe hain। abhi ham sangamayug par hain jo bhavishya mein in jaisa lakshmi-naaraayan banne ki padhaai padh rahe hain। kitni gupta padhaai hai। em object ko dekh kitni khushi honi chaahiye। khushi ka paaraavaar nahin। school va paathshaala ho to aisi। hai kitni gupta, parantu jabardasta paathshaala hai। jitni badi padhaai utni hi facilities rehti hain। parantu yahaan tum pat par baith padhte ho। aatma ko padhna hota hai phir chaahe pat par baithe, chaahe takhta par, parantu khushi se khaggiyaan maarte raho ki is padhaai ko paas karne baad jaakar yeh banenge। abhi tum bachchon ko baap ne aakar apna parichay diya hai ki main inmen kaise pravesh kar tumhein padhaata hoon। baap devtaaon ko to nahin padhaayenge। devtaaon ko yeh gyaan kahaan। manushya to moonjhate hain kya devtaaon mein gyaan nahin hai। devtaayen hi is gyaan se devta bante hain। devta banne ke baad phir gyaan ki kya darkaar hai। laukik padhaai se barrister ban gaya, kamaai mein lag gaya phir bairistari padhenge kya? achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) avinaashi drama ke raaz ko yathaartha samajh harshit rehna hai। is drama mein har ek actor ka part apna-apna hai, jo hoobhu baja rahe hain।

2) em object ko saamne rakh khushi mein khaggiyaan maarni hai। buddhi mein rahe ham is padhaai se aisa lakshmi-naaraayan banenge।

vardaan:- yaad aur seva ke shaktishaali aadhaar dvaara teevragti se aage badhne vaale maayaajeet bhav

brahman jeevan ka aadhaar yaad aur seva hai, yeh donon aadhaar sada shaktishaali hon to teevragti se aage badhte rahenge। agar seva bahut hai, yaad kamjor hai va yaad bahut achhi hai, seva kamjor hai to bhi teevragti nahin ho sakti। yaad aur seva donon mein teevragti chaahiye। yaad aur nihsvaartha seva saath-saath hon to maayaajeet banna sahaj hai। har karma mein, karma ki samaapti ke pahle sada vijay dikhaai degi।

slogan:- is sansaar ko alaukik khel aur paristhatiyon ko alaukik khilaune ke samaan samajhkar chalo।