Daily Murli for Friday 27 December 2024

27-12-2024 praatahmurli om shanti "baapdaada"' madhuban

“meethe bachche - maaya badi jabardasta hai, isse khabardaar rehna, kabhi yeh khyaal na aaye ki ham brahma ko nahin maante, hamaara to direct shivbaaba se connection hai''

prashn:- kin bachchon par sabhi ka pyaar svatah jaata hai?

uttar:- jo pahle har baat ko svayan practical mein laate phir doosron ko kehte hain - un par sabka pyaar svatah jaata hai। gyaan ko svayan mein dhaaran kar phir bahuton ki seva karni hai, tab sabka pyaar milega। agar khud nahin karte sirf doosron ko kehte to unhein kaun maanega? woh to jaise pandit ho jaate।

om shanti। bachchon se baap poochhte hain, aatmaon se paramatma poochhte hain - yeh to jaante ho ki ham parampita paramatma ke saamne baithe hain। baba ko apna rath nahin hai, yeh to nishchay hai na? is bhrikuti ke beech mein baap ka nivaas sthaan hai। baap ne khud kaha hai - main inki bhrikuti ke beech mein baithta hoon। inka shareer loan par leta hoon। aatma bhrikuti ke beech mein baithti hai to baap bhi yahaan hi aakar baithte hain। brahma bhi hai to shivbaaba bhi hai। agar yeh brahma nahin hota to shivbaaba bhi nahin hota। agar koi kahe ki ham to shivbaaba ko hi yaad karte hain, brahma ko nahin, parantu shivbaaba bolenge kaise? oopar mein to sadaiv shivbaaba ko yaad karte aaye। abhi tum bachchon ko pata hai ham baap ke paas yahaan baithe hain। aise to nahin samjhenge ki shivbaaba oopar mein hai। jaise bhaktimaarga mein kehte the shivbaaba oopar mein hai, unki pratima yahaan pooji jaati hai। yeh baaten bahut samajhne ki hain। jaante ho baap gyaan ka saagar, knowledgeful hai to kahaan se knowledge sunaate hain? brahma ke tan se sunaate hain। kai kehte hain ham brahma ko nahin maante, parantu shivbaaba kehte hain main is mukh dvaara hi tumhein kehta hoon, mujhe yaad karo। yeh samajh ki baat hai na। brahma to khud kehte hain - shivbaaba ko yaad karo। yeh kahaan kehte mujhe yaad karo? inke dvaara shivbaaba kehte hain mujhe yaad karo। yeh mantra main inke mukh se deta hoon। brahma nahin hota to main mantra kaise deta? brahma nahin hota to tum shivbaaba se kaise milte? kaise mere paas baithte? achhe-achhe mahaarthiyon ko bhi aise-aise khyaalaat aa jaate hain jo maaya mere se mukh mod deti hai। kehte hain ham brahma ko nahin maante to unki kya gati hogi? maaya kitni badi jabardasta hai jo ekdam munh hi phira deti hai। abhi tumhaara munh shivbaaba ne saamne kiya hai। tum sammukh baithe ho। phir jo aise samajhte hain brahma to kuchh nahin, to unki kya gati hogi? durgati ko pa lete hain। manushya to pukaarte hain - O god father! phir god father sunta hai kya? kehte hain - O liberator aao। kya vahaan se hi liberate karenge? kalpa-kalpa ke purooshottam sangamayug par hi baap aate hain। jismen aate hain unko hi uda den to kya kahenge? maaya mein itna bal hai jo number one worth not A penny bana deti hai। aise-aise bhi koi-koi centres par hain, tab to baap kehte hain khabardaar rehna। bhal baba ke sunaaye hue gyaan ko doosron ko sunaate bhi rehte hain parantu jaise pandit misal। jaise baba pandit ki kahaani sunaate hain… is samay tum baap ki yaad se vishay saagar ko paar kar ksheersaagar mein jaate ho na! bhakti maarga mein dher kathaayen bana di hain। pandit auron ko kehta tha raam naam kahne se paar ho jaayenge, lekin khud bilkul chat khaate mein tha। khud vikaaron mein jaate rehna aur doosron ko kehna nirvikaari bano। unka kya asar hoga? yahaan bhi kahaan-kahaan sunaane vaalon se sunne vaale teekhe chale jaate hain। jo bahuton ki seva karte hain woh zaroor sabko pyaare lagte hain। pandit jhootha nikal pada to use kaun pyaar karega? phir pyaar un par chala jaayega jo practical mein yaad karte hain। achhe-achhe mahaarthiyon ko bhi maaya hap kar jaati hai।

baba samjhaate hain - abhi to karmaateet avastha nahin bani hai, jab tak ladaai ki taiyaari na ho। ek taraph ladaai ki taiyaari hogi, doosre taraph karmaateet avastha hogi। poora connection hai phir ladaai poori ho jaati hai, transfer ho jaayenge। pahle roodra maala banti hai। yeh baaten aur koi nahin jaante। tum samajhte ho is duniya ko badalna hai। woh samajhte hain duniya ke ajun 40 hajaar varsha pade hain। tum samajhte ho vinaash to saamne khada hai। tum ho minority, woh hain majority। to tumhaara kaun maanega? jab tumhaari vriddhi ho jaayegi phir tumhaare yogbal se bahut kheenchakar aayenge, jitna tumhaare se kat nikalti jaayegi, utna bal bharta jaayega। aise nahin ki baba jaani-jaananhaar hai। nahin, sabhi ki avasthaaon ko jaante hain। baap bachchon ki avastha ko nahin jaanenge? sab kuchh maaloom rehta hai। abhi to karmaateet avastha ho na sake। kadi-kadi bhoolen hona bhi sambhav hai, mahaarthiyon se bhi hoti hain। baat-cheet, chaal-chalan aadi sabhi prasiddha ho jaati hai। abhi to daivi chalan banaani hai। devta, sarvagun sampanna hain na। abhi tumko aisa banna hai। parantu maaya kisko bhi nahin chhodti। chhueemui bana deti hai। 5 seedhi hain na। deh-abhimaan aane se oopar se ekdam girte hain। gira aur mara। aajkal apne ko maarne liye kaise-kaise upaay karte hain! 20 manzil se girkar ekdam khatma ho jaate hain। aise bhi na ho ki hospital mein pade rahen, duhkh bhogen। phir koi apne ko aag laga dete hain, kisne bacha liya to kitna duhkh bhogte hain। jal jaayen to aatma bhaag jaae isliye jeevghaat karte hain। samajhte hain jeevghaat karne se duhkh se chhoot jaayenge। josh aata hai to bas। kai to hospital mein kitna duhkh bhogte hain। doctor samajhte hain ki yeh duhkh se chhoot nahin sakta, inse to achha goli de den to yeh khatma ho jaaen। parantu woh samajhte hain aise goli dena mahaapaap hai। aatma khud kehti hai is peeda bhogne se achha hai shareer chhod den। abhi shareer kaun chhudaave? yeh hai apaar duhkhon ki duniya। vahaan hain apaar sukh।

tum bachche samajhte ho - ham abhi return hote hain, duhkhadhaam se sukhdhaam jaate hain to unko yaad karna hai। baap bhi sangamayug par aate hain jabki duniya ko badalna hota hai। baap kehte hain main aaya hoon tum bachchon ko sarva duhkhon se chhudaakar nai paavan duniya mein le jaane। paavan duniya mein thode rehte hain। yahaan to bahut hain, patit bane hain isliye bulaate hain he patit-paavan... yeh thode hi samajhte hain ki ham mahaakaal ko bulaate hain ki humein is chhi-chhi duniya se ghar le chalo। zaroor baba aayega, sab marenge tab to pees hogi na। shanti-shanti karte rehte hain। shanti to shantidham mein hogi। parantu is duniya mein shanti kaise ho? jab tak ki itne dher manushya hain। satayug mein to sukh-shanti thi। abhi to kaliyug mein anek dharma hain। woh jab khatma hon, ek dharma ki sthaapna ho, tab to sukh-shanti ho। haahaakaar ke baad phir jayjaykaar hoti hai। aage chal dekhna maut ka baajaar kitna garam hota hai! kaise marte hain! bombs se bhi aag lagti hai। aage chal dekhenge to bahut kahenge ki barobar vinaash to hoga hi।

tum bachche jaante ho ki yeh srishti ka chakra kaise phirta hai? vinaash to hona hi hai। ek dharma ki sthaapna baap karaate hain, raajayog bhi sikhlaate hain। baaki sabhi anek dharma khalaas ho jaayenge। geeta mein kuchh dikhaaya nahin hai। phir geeta padhne ki result kya? dikhaate hain pralay ho gai। bhal jalmai hoti hai parantu saari duniya jalmai nahin hoti। bhaarat to avinaashi pavitra khanda hai। usmein bhi aabu sabse pavitra teertha sthaan hai, jahaan baap aakar sarva ki sadgati karte hain। delvaada mandir kaisa achha yaadgaar hai। kitna arth sahit hai। parantu jinhonne banvaaya hai, woh yeh nahin jaante। phir bhi achhe samajhdaar to the na। dvaapar mein zaroor achhe samajhdaar honge। kaliyug mein to hain sabhi tamopradhaan। sabhi mandiron se yeh oonch hai, jahaan tum baithe ho। tum jaante ho ham hain chaitanya, woh hamaara hi jad yaadgaar hai। baaki kuchh samay yeh mandir aadi aur bhi bante rahenge। phir to tootne ka samay aayega। sab mandir aadi toot-phoot jaayenge। wholesale maut hoga। mahaabhaari mahaabhaarat ladaai gaai hui hai na, jismen sab khalaas ho jaate hain। yeh bhi tum samajhte ho - baap sangam par hi aate hain। baap ko rath to chaahiye na। aatma jab shareer mein aati hai tab hi churpur hoti hai। aatma shareer se nikalti hai to shareer jad ho jaata hai। to baap samjhaate hain abhi tum ghar jaate ho। tumhein lakshmi-naaraayan jaisa banna hai। to aise gun bhi chaahiye na। tum bachche is khel ko bhi jaante ho। yeh khel kitna wonderful bana hua hai। is khel ka raaz baap baith samjhaate hain। baap knowledgeful, beejroop hai na। baap hi aakar saare vriksha ki knowledge dete hain - ismen kya-kya hota hai, tumne ismen kitna part bajaaya? aadhaakalpa hai daivi raajya, aadha kalpa hai aasuri raajya। jo achhe-achhe bachche hain unki buddhi mein saari knowledge rehti hai। baap aap samaan teacher banaate hain। teacher bhi nambarvaar to hote hain। kai to teacher hokar phir bigad padte hain। bahuton ko sikhlaakar khud khatma ho jaate hain। chhote-chhote bachchon mein bhinna-bhinna sanskaar hote hain। baap samjhaate hain yahaan bhi jo gyaan theek reeti nahin uthaate hain, chalan nahin sudhaarte hain vo bahuton ko duhkh dene ke nimitta ban jaate hain। yeh bhi shaastron mein dikhaaya hai - asur chhipkar baithte the phir baahar jaakar traitor ban kitna tang karte the। yeh to sabhi hota hi rehta hai। oonch te oonch baap jo svarga ki sthaapna karte hain to kitne vighna roop ban padte hain।

baap samjhaate hain tum bachche sukh-shanti ke tower ho। tum bahut royal ho। tumse royal is samay koi hota nahin। behad ke baap ke bachche ho to kitna meetha hokar chalna chaahiye। kisko duhkh nahin dena hai। nahin to woh ant mein yaad aayega। phir sajaayen khaani hongi। baap kehte hain abhi to ghar chalna hai। sookshm vatan mein bachchon ko brahma ka saakshaatkaar hota hai isliye tum bhi aise sookshmavtanvaasi bano। movie ki practice karni hai। bahut kam bolna hai, meetha bolna hai। aisa purushaartha karte-karte tum shanti ke tower ban jaayenge। tumko sikhlaane vaala baap hai। phir tumhein auron ko sikhlaana hai। bhakti maarga talkie maarga hai। abhi tumko banna hai silence। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bahut royalty se meetha hokar chalna hai। shanti aur sukh ka tower banne ke liye bahut kam aur meetha bolna hai। movie ki practice karni hai। talkie mein nahin aana hai।

2) svayan ki daivi chalan banaani hai। chhueemui nahin banna hai। ladaai ke pahle karmaateet avastha tak pahunchna hai। nirvikaari ban nirvikaari banaane ki seva karni hai।

vardaan:- pavitra pyaar ki paalna dvaara sarva ko sneh ke sootra mein baandhane vaale master sneh ke saagar bhav

jab sneh ke saagar aur sneh sampanna nadiyon ka mel hota hai to nadi bhi baap samaan master sneh ka saagar ban jaati hai। isliye vishwa ki aatmaayen sneh ke anubhav se svatah sameep aati hain। pavitra pyaar va eeshvareey parivaar ki paalna, chumbak ke samaan svatah hi har ek ko sameep le aata hai। yeh eeshvareey sneh sabko sahayogi banaae aage badhne ke sootra mein baandh deta hai।

slogan:- sankalp, bol, samay, gun aur shaktiyon ke khajaane jama karo to inka sahayog milta rahega।