Daily Murli for Tuesday 7 January 2025

07-01-2025 praatahmurli om shanti "baapdaada"' madhuban

“meethe bachche - tum apne ko sangamayugi brahman samjho to satayugi jhaad dekhne mein aayenge aur apaar khushi mein rahenge''

prashn:- jo gyaan ke shaukeen bachche hain, unki nishaani kya hogi?

uttar:- ve aapas mein gyaan ki hi baaten karenge। kabhi parchintan nahin karenge। ekaanta mein jaakar vichaar saagar manthan karenge।

prashn:- is srishti drama ka kaun sa raaz tum bachche hi samajhte ho?

uttar:- is srishti mein koi bhi cheez sada kaayam nahin hai, sivaae ek shivbaaba ke। puraani duniya ki aatmaon ko nai duniya mein le jaane ke liye koi to chaahiye, yeh bhi drama ka raaz tum bachche hi samajhte ho।

om shanti। roohaani bachchon prati purooshottam sangamayug par aane vaala baap samjha rahe hain। yeh to bachche samajhte hain - ham brahman hain। apne ko brahman samajhte ho va yeh bhi bhool jaate ho? braahmanon ko apna kul nahin bhoolta hai। tumko bhi yeh zaroor yaad rehna chaahiye ki ham brahman hain। ek baat yaad rahe to bhi beda paar hai। sangam par tum nai-nai baaten sunte ho to uska chintan chalna chaahiye, jisko vichaar saagar manthan kaha jaata hai। tum ho roop-basanta। tumhaari aatma mein saara gyaan bhara jaata hai to ratna nikalne chaahiye। apne ko samajhna hai ham sangamayugi brahman hain। koi to yeh bhi samajhte nahin hain। agar apne ko sangamayugi samjhen to satayug ke jhaad dekhne mein aayen aur athaah khushi bhi rahe। baap jo samjhaate hain woh andar repeat hona chaahiye। ham sangamayug par hain, yeh bhi tumhaare sivaae aur koi ko pata nahin hai। sangamayug ki padhaai time bhi leti hai। yeh ek hi padhaai hai nar se naaraayan, narkavaasi se svargavaasi banne ki। yeh yaad rahne se bhi khushi rahegi - ham so devta svargavaasi ban rahe hain। sangamayugvaasi honge tab to svargavaasi banenge। aage narkavaasi the to bilkul gandi avastha thi, gande kaam karte the। ab woh mitaana hai। manushya se devta svargavaasi banna hai। koi ki stri mar jaati hai, tum poochho - tumhaari yugal kahaan hai? kahenge woh svargavaasi ho gai। svarga kya cheez hai, woh nahin jaante। agar svargavaasi hui phir to khush hona chaahiye na। abhi tum bachche in baaton ko jaante ho। andar vichaar chalna chaahiye - ham abhi sangam par hain, paavan ban rahe hain। svarga ka varsa baap se le rahe hain। yeh ghadi-ghadi simran karna hai, bhoolna nahin chaahiye। parantu maaya bhulaakar ekdam kaliyugi bana deti hai। activity aisi chalti hai, jaise ekdam kaliyugi। woh khushi ka paara nahin rehta। shakla jaise murde misal। baap bhi kehte hain - sab kaam chita par baith jalkar murde ho pade hain। tum jaante ho ham manushya se devta bante hain to woh khushi honi chaahiye na isliye gaayan bhi hai ateendriy sukh ki bhaasna gop-gopiyon se poochho। tum apni dil se poochho ham us bhaasna mein rehte hain? tum eeshvareey mission ho na। eeshvareey mission kya kaam karti hai? pahle to shoodra se brahman, brahman se devta banaati hai। ham brahman hain - yeh bhoolna nahin chaahiye। woh brahman to jhat kah dete hain - ham brahman hain। woh to hain kukh ki santaan। tum ho mukh vanshaavli। tum braahmanon ko bahut nasha hona chaahiye। gaaya hua bhi hai brahma bhojan…। tum kisi ko brahma bhojan khilaate ho to kitna khush hote hain। ham pavitra braahmanon ke haath ka khaate hain। mansa-vaacha-karmana pavitra hona chaahiye। koi apvitra kartavya nahin karna chaahiye। time to lagta hai। janmate hi to koi nahin banta। bhal gaayan hai second mein jeevan mukti, baap ka bachcha bana aur varsa mila। ek baar pahchaan kar kaha - yeh prajaapita brahma hai। brahma valda shiv। nishchay karne se hi vaaris ho jaata hai। phir agar koi akartavya karenge to sajaayen bahut khaani padengi। jaise kaashi kalvat ka samjhaaya hai। saja khaane se hisaab-kitaab chuktu ho jaata hai। mukti ke liye hi kuen mein koodte the। yahaan to woh baat nahin hai। shivbaaba bachchon ko kehte hain - maamekam yaad karo। kitna sahaj hai। phir bhi maaya ka chakra aa jaata hai। yeh tumhaari yuddha sabse jaasti time chalti hai। baahubal ki yuddha itna samay nahin chalti hai। tum to jab se aaye ho, yuddha shuru hai। puraanon se kitni yuddha chalti hai, naye jo aayenge unse bhi chalegi। us ladaai mein bhi marte rehte hain, doosre shaamil hote rehte hain। yahaan bhi marte hain, vriddhi ko bhi paate hain। jhaad bada to hona hi hai। baap meethe-meethe bachchon ko samjhaate hain - yeh yaad rehna chaahiye, woh baap bhi hai, supreme teacher bhi hai, satguru bhi hai। shreekrishna ko to satguru, baap, teacher nahin kahenge।

tumhein sabka kalyaan karne ka shauk hona chaahiye। mahaarthi bachche service par rehte hain। unhon ko to bahut khushi rehti hai। jahaan se nimantran milta hai, bhaagte hain। pradarshani service committee mein bhi achhe-achhe bachche chune jaate hain। unhon ko direction milte hain, service karte rahen to kahenge yeh eeshvareey mission ke achhe bachche hain। baap bhi khush hoga yeh to bahut achhi service karte hain। apni dil se poochhna chaahiye - ham service karte hain? kehte hain on god fatherly service। god father ki service kya hai? bas, sabko yahi paigaam do - manmanaabhav। aadi-madhya-ant ki knowledge to buddhi mein hai। tumhaara naam hi hai - svadarshan chakradhaari। to uska chintan chalna chaahiye। svadarshan chakra rookta thode hi hai। tum chaitanya light house ho। tumhaari mahima bahut gaai jaati hai। behad ke baap ka gaayan bhi tum samajhte ho। woh gyaan ka saagar patit-paavan hai, geeta ka bhagwan hai। vahi gyaan aur yogbal se yeh kaarya karaate hain, ismen yogbal ka bahut prabhaav hai। bhaarat ka praacheen yog mashhoor hai। woh tum abhi seekhte ho। sannyaasi to hathayogi hain, woh patiton ko paavan bana na saken। gyaan hai hi ek baap ke paas। gyaan se tum janma lete ho। geeta ko maai baap kaha jaata hai, maat-pita hai na। tum shiv-baba ke bachche ho phir maat-pita chaahiye na। manushya to bhal gaate hain parantu samajhte thode hi hain। baap samjhaate hain - iska arth kitna guhya hai। god father kaha jaata hai, phir maat-pita kyon kaha jaata? baba ne samjhaaya hai - bhal sarasvati hai parantu vaastav mein sachchi-sachchi mother brahmaputra hai। saagar aur brahmaputra hai, pahle-pahle sangam inka hota hai। baba inmen pravesh karte hain। yeh kitni maheen baaten hain। bahuton ki buddhi mein yeh baaten rehti nahin jo chintan karen। bilkul kam buddhi hai, kam darja paane vaale hain। unhon ke liye baap phir bhi kehte - apne ko aatma samjho। yeh to sahaj hai na। ham aatmaon ka baap hai paramatma। woh tum aatmaon ko kehte hain maamekam yaad karo to vikarma vinaash hon। yeh hai mukhya baat। dull buddhi vaale badi baaten samajh na saken isliye geeta mein bhi hai - manmanaabhav। sabhi likhte hain - baba, yaad ki yaatra bahut difficult hai। ghadi-ghadi bhool jaate hain। koi na koi point par haarte hain। yeh boxing hain - maaya aur eeshvar ke bachchon ki। iska kisko bhi pata nahin hai। baba ne samjhaaya hai - maaya par jeet paakar karmaateet avastha mein jaana hai। pahle-pahle tum aaye ho karma sambandh mein। usmein aate-aate phir aadhaakalpa baad tum karma bandhan mein aa gaye ho। pahle-pahle tum pavitra aatma thi। karmabandhan na sukh ka, na duhkh ka tha, phir sukh ke sambandh mein aaye। yeh bhi abhi tum samajhte ho - ham sambandh mein the, abhi duhkh mein hain phir zaroor sukh mein honge। nai duniya jab thi to maalik the, pavitra the, abhi puraani duniya mein patit ho pade hain। phir ham so devta bante hain, to yeh yaad karna pade na।

baap kehte hain mujhe yaad karo to tumhaare paap mit jaayenge, tum mere ghar mein aa jaayenge। via shantidham sukhdhaam mein aa jaayenge। pahle-pahle jaana hai ghar, baap kehte hain mujhe yaad karo to tum pavitra banenge, main patit-paavan tumko pavitra bana raha hoon - ghar aane liye। aise-aise apne se baaten karni hoti hain। barobar abhi chakra poora hota hai, hamne itne janma liye hain। ab baap aaya hai patit se paavan banaane। yogbal se hi paavan banenge। yeh yogbal bahut naameegraami hai, jo baap hi sikhla sakte hain। ismen shareer se kuchh bhi karne ki darkaar nahin। to saara din in baaton ka manthan chalna chaahiye। ekaanta mein kahaan bhi baitho athva jaao, buddhi mein yahi chalta rahe। ekaanta to bahut hai, oopar chhat par to darne ki baat nahin। aage tum savere mein murli sunne ke baad chalte the pahaadon par। jo suna uska chintan karne ke liye pahaadiyon par jaakar baithte the। jo gyaan ke shaukeen honge, woh to aapas mein gyaan ki baaten hi karenge। gyaan nahin hai to phir parchintan karte rahenge। pradarshani mein tum kitnon ko yeh raasta bataate ho। samajhte ho hamaara dharma bahut sukh dene vaala hai। doosre dharma vaalon ko sirf itna samjhaana hai ki baap ko yaad karo। yeh nahin samajhna hai ki yeh musalmaan hai, main phalaana hoon। nahin, aatma ko dekhna hai, aatma ko samjhaana hai। pradarshani mein samjhaate ho to yeh practice rahe - ham aatma bhaai ko samjhaate hain। ab hamko baap se varsa mil raha hai। apne ko aatma samajh bhaaeeyon ko gyaan dete hain - abhi chalo baap ke paas, bahut samay bichhude ho। woh hai shantidham, yahaan to kitni ashaanti-duhkh aadi hai। ab baap kehte hain apne ko aatma samajhne ki practice daalo to naam, roop, deh sab bhool jaaye। phalaana musalmaan hai, aise kyon samajhte ho? aatma samajhkar samjhaao। samajh sakte hain - yeh aatma achhi hai ya buri hai। aatma ke liye hi kaha jaata hai - bure se door bhaagna chaahiye। abhi tum behad ke baap ke bachche ho। yahaan part bajaaya ab phir vaapis chalna hai, paavan banna hai। baap ko zaroor yaad karna pade। paavan banenge to paavan duniya ke maalik banenge। jabaan se pratigya karni hoti hai। baap bhi kehte hain pratigya karo। baap yukti bhi bataate hain ki tum aatma bhaai-bhaai ho phir shareer mein aate ho to bhaai-behen ho। bhaai-behen kabhi vikaar mein ja nahin sakte। pavitra ban aur baap ko yaad karne se tum vishwa ke maalik ban jaayenge। samjhaaya jaata hai - maaya se haare phir uthkar khade ho jaao। jitna khade honge utni praapti hogi। na (ghaata) aur jama to hota hai na। aadhaakalpa jama phir raavan raajya mein na ho jaata hai। hisaab hai na। jeet jama, haar na। to apni poori jaanch karni chaahiye। baap ko yaad karne se tum bachchon ko khushi hogi। woh to sirf gaayan karte hain, samajh kuchh nahin। besamjhi se sab-kuchh karte hain। tum to pooja aadi karte nahin ho। baaki gaayan to karenge na। us ek baap ka gaayan hai avyabhichaari। baap aakar tum bachchon ko aapehi padhaate hain। tumhein kuchh prashn poochhne ki darkaar nahin hai। chakra smriti mein rehna chaahiye। samajhna chaahiye - kaise ham maaya par jeet paate hain aur phir haar khaate hain। baap samjhaate hain haar khaane se sau guna danda pad jaayega। baap kehte hain - satguru ki ninda nahin karaao, nahin to thaur nahin paayenge। yeh satya naaraayan ki katha hai, isko koi nahin jaante hain। geeta alag, satya naaraayan ki katha alag kar di hai। nar se naaraayan banne ke liye yeh geeta hai।

baap kehte hain ham tumko nar se naaraayan banne ki katha sunaata hoon, isko geeta bhi kehte, amarnaath ki katha bhi kehte hain। teesra netra baap hi dete hain। yeh bhi jaante ho ham devta bante hain to gun bhi zaroor hone chaahiye। is srishti mein koi bhi cheez sada kaayam hai nahin। sada kaayam to ek shivbaaba hi hai, baaki to sabko neeche aana hi hai। parantu woh bhi sangam par aate hain, sabhi ko vaapis le jaate hain। puraani duniya ki aatmaon ko nai duniya mein le jaane ke liye koi to chaahiye na। to drama ke andar yeh sab raaz hain। baap aakar pavitra banaate hain, koi bhi dehdhaari ko bhagwan nahin kaha ja sakta। is samay baap samjhaate hain, aatma ke pankh toote hue hain to ud nahin sakti। baap aakar gyaan aur yog ke pankh dete hain। yogbal se tumhaare paap bhasma ho jaayenge, punya aatma ban jaayenge। pahle-pahle to mehnat bhi karni chaahiye, isliye baap kehte hain maamekam yaad karo, chart rakho। jinka chart achha hoga, woh likhenge aur unko khushi hogi। abhi sabhi mehnat karte hain, chart nahin likhte to yog ka jauhar nahin bharta। chart likhne mein faayda hai bahut। chart ke saath points bhi chaahiye। chart mein to donon likhenge - service kitni ki aur yaad kitna kiya? purooshaartha aisa karna hai jo pichhaadi mein koi bhi cheez yaad na aaye। apne ko aatma samajh punya aatma ban jaayen - yeh mehnat karni hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ekaanta mein gyaan ka manan-chintan karna hai। yaad ki yaatra mein rah, maaya par jeet paakar karmaateet avastha ko paana hai।

2) kisi ko bhi gyaan sunaate samay buddhi mein rahe ki ham aatma bhaai ko gyaan dete hain। naam, roop, deh sab bhool jaaye। paavan banne ki pratigya kar, paavan ban paavan duniya ka maalik banna hai।

vardaan:- svayan ke prati ichchha maatram avidya ban baap samaan akhandadaani, paropkaari bhav

jaise brahma baap ne svayan ka samay bhi seva mein diya, svayan nirmaan ban bachchon ko maan diya, kaam ke naam ki praapti ka bhi tyaag kiya। naam, maan, shaan sabmen paropkaari banen, apna tyaag kar doosron ka naam kiya, svayan ko sada sevaadhaari rakha, bachchon ko maalik banaaya। svayan ka sukh bachchon ke sukh mein samjha। aise baap samaan ichchha maatram avidya arthaat masta phakeer ban akhandadaani paropkaari bano to vishwa kalyaan ke kaarya mein teevragti aa jaayegi। case aur kisse samaapta ho jaayenge।

slogan:- gyaan, gun aur dhaarna mein sindhu bano, smriti mein bindu bano।

apni shaktishaali mansa dvaara sakaash dene ki seva karo

abhi aap bachche apne shreshtha shaktishaali sankalp dvaara sakaash do। kamjoron ko bal do। apne purushaartha ka samay doosron ko sahayog dene mein lagaao। doosron ko sahayog dena arthaat apna jama karna। abhi aisi lahar phailaao - salvation lena nahin hai, salvation dena hai। dene mein lena samaaya hua hai।