Daily Murli for Monday 6 January 2025

06-01-2025 praatahmurli om shanti "baapdaada"' madhuban

“meethe bachche - tumhaara ek-ek bol bahut meetha first class hona chaahiye, jaise baap duhkh harta, sukh karta hai, aise baap samaan sabko sukh do''

prashn:- laukik mitra-sambandhiyon ko gyaan dene ki yukti kya hai?

uttar:- koi bhi mitra-sambandhi aadi hain to unse bahut namrata se, prembhaav se muskaraate hue baat karni chaahiye। samjhaana chaahiye yeh vahi mahaabhaarat ladaai hai। baap ne roodra gyaan yagya racha hai। main aapko satya kehta hoon ki bhakti aadi to janma-janmaantar ki, ab gyaan shuru hota hai। jab mauka mile to bahut yukti se baat karo। kutumba parivaar mein bahut pyaar se chalo। kabhi kisi ko duhkh na do।

geet:- aakhir woh din aaya aaj…

om shanti। jab koi geet bajta hai to bachchon ko apne andar uska arth nikaalna chaahiye। second mein nikal sakta hai। yeh behad ke drama ki bahut badi ghadi hai na। bhakti maarga mein manushya pukaarte bhi hain। jaise court mein case hota hai to kehte hain kab sunvaai ho, kab bulaava ho to hamaara case poora ho। to bachchon ka bhi case hai, kaun-sa case? raavan ne tumko bahut duhkhi banaaya hai। tumhaara case daakhil hota hai bade court mein। manushya pukaarte rehte hain - baba aao, aakarke hamko duhkhon se chhudaao। ek din sunvaai to zaroor hoti hai। baap sunte bhi hain, drama anusaar aate bhi hain bilkul poore time par। usmein ek second ka bhi farka nahin pad sakta hai। behad ki ghadi kitni accurate chalti hai। yahaan tumhaare paas yeh chhoti ghadiyaan bhi accurate nahin chalti hain। yagya ka har kaarya accurate hona chaahiye। ghadi bhi accurate honi chaahiye। baap to bada accurate hai। sunvaai badi accurate hoti hai। kalpa-kalpa, kalpa ke sangam par accurate time par aate hain। to bachchon ki ab sunvaai hui, baba aaya hua hai। abhi tum sabko samjhaate ho। aage tum bhi nahin samajhte the ki duhkh kaun deta hai? abhi baap ne samjhaaya hai raavan raajya shuru hota hai dvaapar se। tum bachchon ko maaloom pad gaya hai - baba kalpa-kalpa sangamayug par aate hain। yeh hai behad ki raat। shivbaaba behad ki raat mein aate hain, shreekrishna ki baat nahin, jab ghor andhiyaare mein agyaan neend mein soye rehte hain tab gyaan soorya baap aate hain, bachchon ko din mein le jaane। kehte hain mujhe yaad karo kyonki patit se paavan banna hai। baap hi patit-paavan hai। woh jab aaye tab to sunvaai ho। ab tumhaari sunvaai hui hai। baap kehte hain main aaya hoon patiton ko paavan banaane। paavan banne ka tumko kitna sahaj upaay bataata hoon। aajkal dekho science ka kitna jor hai। atomic bombs aadi ka kitna jor se aavaaz hota hai। tum bachche silence ke bal se is science par jeet paate ho। silence ko yog bhi kaha jaata hai। aatma baap ko yaad karti hai - baba aap aao to ham shantidham mein jaakar nivaas karen। to tum bachche is yogbal se, silence ke bal se science par jeet paate ho। shanti ka bal praapta karte ho। science se hi yeh saara vinaash hone ka hai। silence se tum bachche vijay paate ho। baahubal vaale kabhi bhi vishwa par jeet pa nahin sakte। yeh points bhi tumko pradarshani mein likhni chaahiye।

dehli mein bahut service ho sakti hai kyonki dehli hai sabka capital। tumhaari bhi dehli hi capital hogi। dehli ko hi paristaan kaha jaata hai। paandavon ke kile to nahin hain। kila tab baandha jaata hai jab dushman chadhaai karte hain। tumko to kile aadi ki darkaar rehti nahin। tum jaante ho ham silence ke bal se apna raajya sthaapan kar rahe hain, unhon ki hai artificial silence। tumhaari hai real silence। gyaan ka bal, shanti ka bal kaha jaata hai। knowledge hai padhaai। padhaai se hi bal milta hai। pulis superintendent bante hain, kitna bal rehta hai। woh sab hain jismaani baaten duhkh dene vaali। tumhaari har baat roohaani hai। tumhaare mukh se jo bhi bol nikalte hain woh ek-ek bol aise first class meethe hon jo sunne vaala khush ho jaae। jaise baap duhkh harta sukh karta hai, aise tum bachchon ko bhi sabko sukh dena hai। kutumba parivaar ko bhi duhkh aadi na ho। kaayde anusaar sabse chalna hai। badon ke saath pyaar se chalna hai। mukh se akshar aise meethe first class niklen jo sab khush ho jaaen। bolo, shivbaaba kehte hain manmanaabhav। oonch te oonch main hoon। mujhe yaad karne se hi tumhaare vikarma vinaash honge। bahut pyaar se baat karni chaahiye। samjho koi bada bhaai ho bolo daada ji shivbaaba kehte hain - mujhe yaad karo। shivbaaba jisko roodra bhi kehte hain, vahi gyaan yagya rachte hain। shreekrishna gyaan yagya akshar nahin sunenge। roodra gyaan yagya kehte hain to roodra shivbaaba ne yeh yagya racha hai। raajaai praapta karne ke liye gyaan aur yog sikhla rahe hain। baap kehte hain bhagvaanuvaach maamekam yaad karo kyonki abhi sabki ant ghadi hai, vaanaprastha avastha hai। sabko vaapis jaana hai। marne samay manushya ko kehte hain na eeshvar ko yaad karo। yahaan eeshvar svayan kehte hain maut saamne khada hai, inse koi bach nahin sakte। ant mein hi baap aakar ke kehte hain ki bachche mujhe yaad karo to tumhaare paap bhasma ho jaaen, inko yaad ki agni kaha jaata hai। baap guarantee karte hain ki isse tumhaare paap dagdha honge। vikarma vinaash hone ka, paavan banne ka aur koi upaay nahin hai। paapon ka bojha sir par chadhte-chadhte, khaad padte-padte sona 9 carat ka ho gaya hai। 9 carat ke baad mulamma kaha jaata hai। abhi phir 24 carat kaise banen, aatma pure kaise banen? pure aatma ko jevar bhi pure milega।

koi mitra-sambandhi aadi hain to unse bahut namrata se, prem bhaav se muskaraate hue baat karni chaahiye। samjhaana chaahiye yeh to vahi mahaabhaarat ladaai hai। yeh roodra gyaan yagya bhi hai। baap dvaara hamko srishti ke aadi-madhya-ant ki knowledge mil rahi hai। aur kahaan bhi yeh knowledge mil na sake। main aapko satya kehta hoon yeh bhakti aadi to janma-janmaantar ki hai, ab gyaan shuru hota hai। bhakti hai raat, gyaan hai din। satayug mein bhakti hoti nahin। aise-aise yukti se baat karni chaahiye। jab koi mauka mile, jab teer maarna hota hai to samay aur mauka dekha jaata hai। gyaan dene ki bhi badi yukti chaahiye। baap yuktiyaan to sabke liye bataate rehte hain। pavitrata to badi achhi hai, yeh lakshmi-naaraayan hamaare bade poojya hain na। poojya paavan phir pujaari patit banen। paavan ki patit baith pooja karen - yeh to shobhta nahin hai। kai to patit se door bhaagte hain। vallabhaachaari kabhi paanv ko chhoone nahin dete। samajhte hain yeh chhi-chhi manushya hain। mandiron mein bhi hamesha brahman ko hi moorti chhoone ka allow rehta hai। shoodra manushya andar jaakar chhu na saken। vahaan brahman log hi unko snaan aadi karaate hain, aur koi ko jaane nahin dete। pharka to hai na। ab ve to hain kukh vanshaavli brahman, tum ho mukh vanshaavli sachche brahman। tum un braahmanon ko achha samjha sakte ho ki brahman do prakaar ke hote hain - ek to hain prajaapita brahma ke mukh vanshaavli, doosre hain kukh vanshaavli। brahma ke mukh vanshaavli brahman hain oonch te oonch choti। yagya rachte hain to bhi braahmanon ko mukrar kiya jaata hai। yeh phir hai gyaan yagya। braahmanon ko gyaan milta hai jo phir devta bante hain। varna bhi samjhaaye gaye hain। jo serviceable bachche honge unhein service ka sadaiv shauk rahega। kahaan pradarshani hogi to jhat service par bhaagenge - ham jaakar aisi-aisi points samjhaayen। pradarshani mein to praja banne ka vihang maarga hai, aapehi dher ke dher aa jaate hain। to samjhaane vaale bhi achhe hone chaahiye। agar koi ne poora nahin samjhaaya to kahenge bi.ke. ke paas yahi gyaan hai! disservice ho jaati hai। pradarshani mein ek aisa chusta ho jo samjhaane vaale guides ko dekhta rahe। koi bada aadmi hai to unko samjhaane vaala bhi aisa achha dena chaahiye। kam samjhaane vaalon ko hata dena chaahiye। supervise karne par ek achha hona chaahiye। tumko to mahaatmaaon ko bhi bulaana hai। tum sirf batlaate ho ki baba aise kehte hain, woh oonch te oonch bhagwan hai, vahi rachayita baap hai। baaki sab hain unki rachna। varsa baap se milega, bhaai, bhaai ko varsa kya dega! koi bhi sukhdhaam ka varsa de na sake। varsa dete hi hain baap। sarva ka sadgati karne vaala ek hi baap hai, unko yaad karna hai। baap khud aakar golden ez banaate hain। brahma tan se svarga sthaapan karte hain। shiv jayanti manaate bhi hain, parantu woh kya karte hain, yeh sab manushya bhool gaye hain। shivbaaba hi aakar raajayog sikhlaae varsa dete hain। 5000 varsha pahle bhaarat svarga tha, laakhon varsha ki to baat hi nahin hai। tithi-taareekh sab hai, inko koi khandan kar na sake। nai duniya aur puraani duniya aadha-aadha chaahiye। woh satayug ki aayu laakhon varsha kah dete to koi hisaab ho nahin sakta। svaastika mein bhi poore 4 bhaag hain। 1250 varsha har yug mein baante hue hain। hisaab kiya jaata hai na। vo log hisaab to kuchh bhi jaante nahin isliye kaudi tulya kaha jaata hai। ab baap heere tulya banaate hain। sab patit hain, bhagwan ko yaad karte hain। unhon ko bhagwan aakar gyaan se gul-gul banaate hain। tum bachchon ko gyaan ratnon se sajaate rehte hain। phir dekho tum kya bante ho, tumhaari em object kya hai? bhaarat kitna sirtaaj tha, sab bhool gaye hain। musalmaanon aadi ne bhi kitna somnaath mandir se lootkar masjidon aadi mein heere aadi jaakar lagaaye hain। abhi unki to koi value bhi kar nahin sakte। itni badi-badi maniyaan raajaaon ke taaj mein rehti thi। koi to karod ki, koi 5 karod ki। aajkal to sab imitation nikal padi hai। is duniya mein sab hai artificial paai ka sukh। baaki hai duhkh isliye sannyaasi bhi kehte hain kaag vishta samaan sukh hai isliye woh gharbaar chhodte hain parantu ab to woh bhi tamopradhaan ho pade hain। shahar mein andar ghus pade hain। parantu ab kisko sunaayen, raaja-raani to hain nahin। koi bhi maanega nahin। kahenge sabki apni-apni mat hai, jo chaahe so kare। sankalp ki srishti hai। ab tum bachchon ko baap gupta reeti purooshaartha karaate rehte hain। tum kitna sukh bhogte ho। doosre dharma bhi pichhaadi mein jab vriddhi ko paate hain tab ladaaiyaan aadi khitpit hoti hai। pauna samay to sukh mein rehte ho isliye baap kehte hain tumhaara devi-devta dharma bahut sukh dene vaala hai। ham tumko vishwa ka maalik banaate hain। aur dharma sthaapak koi raajaai nahin sthaapan karte hain। woh sadgati nahin karte। aate hain sirf apna dharma sthaapan karne। woh bhi jab ant mein tamopradhaan ban jaate hain to phir baap ko aana padta hai satopradhaan banaane।

tumhaare paas saikdon manushya aate hain parantu kuchh bhi samajhte nahin। baba ko likhte hain phalaana bahut achha samajh raha hai, bahut achha hai। baba kehte hain kuchh bhi samjha nahin hai। agar samajh jaae baba aaya hua hai, vishwa ka maalik bana rahe hain, bas usi samay masti chadh jaae। phauran ticket lekar yeh bhaage। parantu braahmani ki chitthi to zaroor laani pade - baap se milne liye। baap ko pahchaan jaaen to milne bigar rah na sake, ekdam nasha chadh jaae। jinhen nasha chadha hua hoga unhein andar mein bahut khushi rahegi। unki buddhi mitra-sambandhiyon mein bhatkegi nahin। parantu bahuton ki bhatakti rehti hai। grihastha vyavhaar mein rehte kamal phool samaan pavitra banna hai aur baap ki yaad mein rehna hai। hai bahut sahaj। jitna ho sake baap ko yaad karte raho। jaise office se chhutti lete hain, vaise dhandhe se chhutti paakar ek-do din yaad ki yaatra mein baith jaao। ghadi-ghadi yaad mein baithne ke liye achha saara din vrat rakh leta hoon - baap ko yaad karne ka। kitna jama ho jaayega। vikarma bhi vinaash honge। baap ki yaad se hi satopradhaan banna hai। saara din poora yog to kiska lag bhi na sake। maaya vighna zaroor daalti hai phir bhi purooshaartha karte-karte vijay pa lenge। bas, aaj ka saara din bageeche mein baith baap ko yaad karta hoon। khaane par bhi bas yaad mein baith jaata hoon। yeh hai mehnat। hamko paavan zaroor banna hai। mehnat karni hai, auron ko bhi raasta bataana hai। badge to bahut achhi cheez hai। raaste mein aapas mein bhi baat karte rahenge to bahut aakar sunenge। baap kehte hain mujhe yaad karo, bas message mil gaya to ham responsibility se chhoot gaye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dhandhe aadi se jab chhutti mile to yaad mein rahne ka vrat lena hai। maaya par vijay praapta karne ke liye yaad ki mehnat karni hai।

2) bahut namrata aur prem bhaav se muskaraate hue mitra-sambandhiyon ki seva karni hai। unmein buddhi ko bhatkaana nahin hai। pyaar se baap ka parichay dena hai।

vardaan:- chalte-phirte pharishte swaroop ka saakshaatkaar karaane vaale saakshaatkaarmoorta bhav

jaise shuru mein chalte phirte brahma gum hokar shreekrishna dikhaai dete the, isi saakshaatkaar ne sab kuchh chhuda diya। aise saakshaatkaar dvaara abhi bhi seva ho। jab saakshaatkaar se praapti hogi to banne ke bina rah nahin sakenge isliye chalte phirte pharishte swaroop ka saakshaatkaar karaao। bhaashan vaale bahut hain lekin aap bhaasna dene vaale bano - tab samjhenge yeh allaah log hain।

slogan:- sada roohaani mauj ka anubhav karte raho to kabhi bhi moonjhenge nahin।

apni shaktishaali mansa dvaara sakaash dene ki seva karo

ab apne dil ki shubh bhaavnaayen anya aatmaon tak pahunchaao। silence ki shakti ko pratyaksha karo। har ek brahman bachche mein yeh silence ki shakti hai। sirf is shakti ko man se, tan se emerge karo। ek second mein man ke sankalpon ko ekaagra kar lo to vaayumandal mein silence ki shakti ke prakampanna svatah phailte rahenge।