Daily Murli for Friday 7 March 2025

07-03-2025 praatahmurli om shanti "baapdaada"' madhuban

“meethe bachche - yeh anaadi avinaashi bana banaaya drama hai, ismen jo scene paas hui, woh phir kalpa ke baad hi repeat hogi, isliye sada nishchint raho''

prashn:- yeh duniya apni tamopradhaan stage par pahunch gai hai, uski nishaaniyaan kya hain?

uttar:- din-pratidin upadrav hote rehte hain, kitni ghamsaan ho rahi hai। chor kaise maar-peet kar loot le jaate hain। bina mausam barsaat padti rehti hai। kitna nuksaan ho jaata hai। yeh sab tamopradhaanta ke chinha hain। tamopradhaan prakriti duhkh deti rehti hai। tum bachche drama ke raaz ko jaante ho isliye kehte ho nothing new।

om shanti। abhi tum bachchon par gyaan ki varsha ho rahi hai। tum ho sangamayugi aur baaki jo bhi manushya hain woh sab hain kaliyugi। is samay duniya mein anek mat-mataantar hain। tum bachchon ki to hai ek mat। jo ek mat bhagwan ki hi milti hai। ve log bhakti maarga mein jap-tap-teertha aadi jo kuchh karte hain woh samajhte hain yeh sab raaste bhagwan se milne ke hain। kehte hain bhakti ke baad hi bhagwan milenge। parantu unhon ko yeh pata hi nahin hai ki bhakti shuru kab hoti hai aur kab tak chalti hai। sirf kah dete bhakti se bhagwan milega isliye anek prakaar ki bhakti karte aate hain। yeh bhi khud samajhte hain ki parampara se ham bhakti karte aaye hain। ek din bhagwan zaroor milega। koi na koi roop mein bhagwan milega। kya karenge? zaroor sadgati karenge kyonki woh hai hi sarva ka sadgati daata। bhagwan kaun hai, kab aayega, yeh bhi nahin jaante। mahima bhal kisma-kisma ki gaate hain, kehte hain bhagwan patit-paavan hai, gyaan ka saagar hai। gyaan se hi sadgati hoti hai। yeh bhi jaante hain bhagwan niraakaar hai। jaise ham aatma bhi niraakaar hain, peechhe shareer leti hain। ham aatmaayen bhi baap ke saath paramdham mein rahne vaali hain। ham yahaan ki vaasi nahin hain। kahaan ke nivaasi hain, yeh bhi yathaartha reeti nahin batlaate hain। koi to samajhte hain - ham svarga mein chale jaayenge। ab seedha svarga mein to kisko bhi jaana nahin hai। koi phir kehte jyoti jyot mein sama jaayenge। yeh bhi wrong hai। aatma ko vinaashi bana dete hain। moksha bhi ho na sake। jabki kehte hain bani banaai… yeh chakra phirta rehta hai। history-geography repeat hoti hai। parantu chakra kaise phirta hai, yeh nahin jaante। na chakra ko jaante, na eeshvar ko jaante। bhakti maarga mein kitna bhatakte hain। bhagwan kaun hai yeh tum jaante ho। bhagwan ko father bhi kehte hain to buddhi mein aana chaahiye na। laukik father bhi to hai phir ham unko yaad karte hain to do father ho gaye - laukik aur paarlaukik। us paarlaukik baap se milne ke liye itni bhakti karte hain। woh parlok mein rehte hain। niraakaari duniya bhi hai zaroor।

tum achhi reeti jaante ho - manushya jo kuchh karte hain woh sab hai bhaktimaarga। raavan raajya mein bhakti hi bhakti hoti aai hai। gyaan ho na sake। bhakti se kabhi sadgati nahin ho sakti। sadgati karne vaale baap ko yaad karte hain to zaroor woh kabhi aakar sadgati karenge। tum jaante ho yeh bilkul hi tamopradhaan duniya hai। satopradhaan the abhi tamopradhaan hain, kitne upadrav hote rehte hain। bahut ghamsaan ho rahi hai। chor bhi lootte rehte hain। kaise-kaise maar peetkar chor paise loot le jaate hain। aisi-aisi davaaiyaan hain jo sunghaakar behosh kar dete hain। yeh hai raavan raajya। yeh bahut bada behad ka khel hai। isko phirne mein 5 hazaar varsha lagte hain। khel bhi drama misal hai। naatak nahin kahenge। naatak mein to samjho koi actor beemaar padta hai to adli badli kar lete hain। ismen to yeh baat ho na sake। yeh to anaadi drama hai na। samjho koi beemaar ho padta hai to kahenge aise beemaar hone ka bhi drama mein part hai। yeh anaadi bana banaaya hai। aur kisko tum drama kaho to moonjh jaayenge। tum jaante ho yeh behad ka drama hai। kalpa baad phir bhi yahi actors honge। jaise abhi barsaat aadi padti hai, kalpa baad phir bhi aise hi padegi। yahi upadrav honge। tum bachche jaante ho gyaan ki barsaat to sabhi par pad nahin sakti hai lekin yeh aavaaz sabhi ke kaanon tak avashya jaayega ki gyaan saagar bhagwan aaya hua hai। tumhaara mukhya hai yog। gyaan bhi tum sunte ho baaki barsaat to saari duniya mein padti hai। tumhaare yog se sthaai shanti ho jaati hai। tum sabko sunaate ho ki svarga ki sthaapna karne bhagwan aaya hua hai, parantu aise bhi bahut hain jo apne ko bhagwan samajh lete hain, to tumko phir kaun maanega isliye baap samjhaate hain koto mein koi niklenge। tumhaare mein bhi nambarvaar jaante hain bhagwan baap aaya hua hai। baap se to varsa lena chaahiye na। kaise baap ko yaad karo woh bhi samjhaaya hai। apne ko aatma samjho। manushya to deh-abhimaani ban gaye hain। baap kehte hain main aata hi tab hoon jab sabhi manushyaatmaayen patit ban jaati hain। tum kitne tamopradhaan ban gaye ho। ab main aaya hoon tumko satopradhaan banaane। kalpa pahle bhi mainne tumko aise samjhaaya tha। tum tamopradhaan se satopradhaan kaise banenge? sirf mujhe yaad karo। main aaya hoon tumko apna aur rachna ka parichay dene। us baap ko sabhi yaad karte hi hain raavan raajya mein। aatma apne baap ko yaad karti hai। baap hai hi ashareeri, bindi hai na। unka naam phir rakha gaya hai। tumko kehte hain saaligraam aur baap ko kehte hain shiv। tum bachchon ka naam shareer par padta hai। baap to hai hi param aatma। unko shareer to lena nahin hai। usne inmen pravesh kiya hai। yeh brahma ka tan hai, inko shiv nahin kahenge। aatma naam to tumhaara hai hi phir tum shareer mein aate ho। woh param aatma hai sabhi aatmaon ka pita। to sabhi ke do baap ho gaye। ek niraakaari, ek saakaari। inko phir alaukik wonderful baap kaha jaata hai। kitne dher bachche hain। manushyon ko yeh samajh mein nahin aata hai - prajaapita brahmaakumaar-kumaariyaan itne dher hain, yeh kya hain! kis prakaar ka yeh dharma hai! samajh nahin sakte। tum jaante ho yeh kumaar-kumaari pravritti maarga ka akshar hai na। maa, baap, kumaari aur kumaar। bhakti maarga mein tum yaad karte ho tum maat-pita....... abhi tumko maat-pita mila hai, tumko adopt kiya hai। satayug mein adopt nahin kiya jaata hai। vahaan adoption ka naam nahin। yahaan phir bhi naam hai। woh hai had ka baap, yeh hai behad ka baap। behad ki adoption hai। yeh raaz bahut hi guhya samajhne laayak hai। tum log poori reeti kisko samjhaate nahin ho। pahle-pahle andar koi aate hain, bole guru ka darshan karne aaye hain, to tum bolo ki yeh koi mandir nahin hai। board par dekho kya likha hua hai! brahmaakumaar-kumaariyaan dher hain। yeh sab prajaapita ke bachche ho gaye। praja to tum bhi ho। bhagwan srishti rachte hain, brahma mukh kamal dvaara hamko racha hai। ham hain hi nai srishti ke, tum ho puraani srishti ke। nai srishti ka banna hota hai sangamayug par। yeh hai purooshottam banne ka yug। tum sangamayug par khade ho, ve kaliyug mein khade hain jaise ki partition pad gai hai। aajkal to dekho kitni partition hai। har ek dharma vaala samajhte ham apni praja ko sambhaalenge, apne dharma ko, hamjinsa ko sukhi rakhenge isliye har ek kehte hain - hamaari state se yeh cheez baahar na jaaye। aage to raaja ka saari praja par hukm chalta tha। raaja ko maai baap, anna daata kehte the। abhi to raaja-raani koi hai nahin। alag-alag tukde ho gaye hain। kitne upadrav hote rehte hain। achaanak baadh aa jaati hai, bhookampa hote rehte hain, yeh sab hai duhkh ka maut।

abhi tum brahman samajhte ho ki ham sab aapas mein bhaai-bhaai hain। to humein aapas mein bahut-bahut pyaar se ksheerkhanda hokar rehna hai। ham ek baap ke bachche hain to aapas mein bahut pyaar hona chaahiye। raamraajya mein sher-bakri jo ekdam pakke dushman hain, woh bhi ikatthe paani peete hain। yahaan to dekho ghar-ghar mein kitna jhagda hai। nation-nation ka jhagda, aapas mein hi phoot padti hai। anek mate hain। abhi tum jaante ho ham sabne anek baar baap se varsa liya hai aur phir ganvaaya hai arthaat raavan par jeet paate hain aur phir haarte hain। ek baap ki shreemat par ham vishwa ke maalik ban jaate hain, isliye unko oonch te oonch bhagwan kaha jaata hai। sarva ka duhkh harta, sukh karta kaha jaata hai। abhi tumko sukh ka raasta bata rahe hain। tum bachche aapas mein ksheerkhanda hone chaahiye। duniya mein aapas mein sabhi hain loonpaani। ek-do ko maarne mein deri nahin karte। tum eeshvareey aulaad to ksheerkhanda hone chaahiye। tum eeshvareey santaan devtaaon se bhi oonch thahre। tum baap ke kitne madadgaar bante ho। purooshottam banaane ke madadgaar ho to yeh dil mein aana chaahiye - ham purooshottam hain, to hamaare mein woh daiveegun hain? aasuri gun hain to woh phir baap ka bachcha to kahla na sake isliye kaha jaata hai satguru ka nindak thaur na paaye। woh kaliyugi guru phir apne liye kahkar manushyon ko dara dete hain। to baap bachchon ko samjhaate hain - sapoot bachche woh hain jo baap ka naam baala karte hain, ksheerkhanda ho rehte hain। baap hamesha kehte hain - ksheerkhanda bano। loonpaani ho aapas mein lado-jhagdo nahin। tumko yahaan ksheerkhanda banna hai। aapas mein bahut love chaahiye kyonki tum eeshvareey aulaad ho na। eeshvar most lovely hai tab to unko sabhi yaad karte hain। to tumhaara aapas mein bahut pyaar hona chaahiye। nahin to baap ki ijjat ganvaate ho। eeshvar ke bachche aapas mein loonpaani kaise ho sakte, phir pad kaise pa sakenge। baap samjhaate hain aapas mein ksheerkhanda ho raho। loon-paani honge to kuchh bhi dhaarna nahin hogi। agar baap ke direction par nahin chalenge to phir oonch pad kaise paayenge। deh-abhimaan mein aane se hi phir aapas mein ladte hain। dehi-abhimaani ho to kuchh bhi khitpit na ho। eeshvar baap mila hai to phir daivi gun bhi dhaaran karne hain। aatma ko baap jaisa banna hai। jaise baap mein pavitrata, sukh, prem aadi sab hain, tumko bhi banna hai। nahin to oonch pad pa nahin sakte। padhkar baap se oonch varsa paana hai, bahuton ka jo kalyaan karte hain, vahi raaja-raani ban sakte hain। baaki daas-daasiyaan jaakar banenge। samajh to sakte hain na - kaun-kaun kya banenge? padhne vaale khud bhi samajh sakte hain - is hisaab se ham baba ka kya naam nikaalenge। eeshvar ke bachche to most lovely hone chaahiye, jo koi bhi dekh khush ho jaae। baba ko bhi meethe woh lagenge। pahle ghar ko to sudhaaro। pahle ghar ko phir par (doosron) ko sudhaarna hai। grihastha vyavhaar mein kamal phool samaan pavitra aur ksheerkhanda hokar raho। koi bhi dekhe to kahe - oho! yahaan to svarga laga pada hai। agyaankaal mein bhi baba ne khud aise ghar dekhe hain। 6-7 bachche shaadi kiye hue sab ikatthe rehte hain। sab savere uthkar bhakti karte hain। ghar mein ekdam shanti lagi rehti hai। yeh to tumhaara eeshvareey kutumba hai। hans aur bagula ikattha to rah nahin sakte। tumko to hans banna hai। loonpaani hone se baba raazi nahin hoga। baap kahenge tum kitna naam badnaam karte ho। agar ksheerkhanda hokar nahin rahenge to svarga mein oonch pad pa nahin sakenge, bahut saja khaayenge। baap ka bankar phir agar loonpaani ho rehte hain to sauguna saja khaayenge। phir tumko saakshaatkaar bhi hote rahenge ki ham kya pad paayenge। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada dhyaan rahe - ham eeshvar ke bachche hain, humein most lovely hokar rehna hai। aapas mein kabhi bhi loonpaani nahin hona hai। pahle apne ko sudhaarna hai phir doosron ko sudhaarne ki shiksha deni hai।

2) jaise baap mein pavitrata, sukh, prem aadi sab gun hain, aise baap samaan banna hai। aisa koi karma nahin karna hai jo satguru ka nindak banen। apni chalan se baap ka naam baala karna hai।

vardaan:- baap aur praapti ki smriti se sada himmat-hullaas mein rahne vaale ekras, achal bhav

baap dvaara janma se hi jo praaptiyaan hui hain unki list sada saamne rakho। jab praapti atal, achal hai to himmat aur hullaas bhi achal hona chaahiye। achal ke bajaae yadi man kabhi chanchal ho jaata hai va sthiti chanchalta mein aa jaati hai to iska kaaran hai ki baap aur praapti ko sada saamne nahin rakhte। sarva praaptiyon ka anubhav sada saamne va smriti mein rahe to sab vighna khatma ho jaayenge, sada naya umang, naya hullaas rahega। sthiti ekras aur achal rahegi।

slogan:- kisi bhi prakaar ki seva mein sada santushta rehna hi achhe marks lena hai।

avyakt ishaare - satyata aur sabhyata roopi culture ko apnaao

aap brahman bachche bahut-bahut royal ho। aapka chehra aur chalan donon hi satyata ki sabhyata anubhav karaayen। vaise bhi royal aatmaon ko sabhyata ki devi kaha jaata hai। unka bolna, dekhna, chalna, khaana-peena, uthna-baithna, har karma mein sabhyata, satyata svatah hi dikhaai deti hai। aise nahin ki main to satya ko siddha kar raha hoon aur sabhyata ho hi nahin। to yeh right nahin hai।