Daily Murli for Thursday 13 March 2025

13-03-2025 praatahmurli om shanti "baapdaada"' madhuban

“meethe bachche - pad ka aadhaar hai padhaai, jo puraane bhakta honge woh achha padhenge aur pad bhi achha paayenge''

prashn:- jo baap ki yaad mein rehte hain, unki nishaani kya hogi?

uttar:- yaad mein rahne vaalon mein achhe gun honge। woh pavitra hote jaayenge। royalty aati jaayegi। aapas mein meetha ksheerkhanda hokar rahenge, doosron ko na dekh svayan ko dekhenge। unki buddhi mein rehta - jo karega woh paayega।

om shanti। bachchon ko samjhaaya gaya hai ki yeh bhaarat ka jo aadi sanaatan devi-devta dharma hai, uska shaastra hai geeta। yeh geeta kisne gaai, yeh koi nahin jaante। yeh gyaan ki baaten hain। baaki yeh holi aadi koi apna tyohaar hai nahin, yeh sab hain bhakti maarga ke tyohaar। tyohaar hai to sirf ek trimoorti shivjayanti। bas। sirf shivjayanti kabhi bhi nahin kehna chaahiye। trimoorti akshar na daalne se manushya samjhenge nahin। jaise trimoorti ka chitra hai, neeche likhat ho ki daivi svaraajya aapka janma siddha adhikaar hai। shiv bhagwan baap bhi hai na। zaroor aate hain, aakar svarga ka maalik banaate hain। svarga ke maalik bane hi hain raajayog seekhne se। andar chitron mein to bahut gyaan hai। chitra aise banaane hain jo manushya dekhne se wonder khaayen। woh bhi jinhonne bahut bhakti ki hogi, vahi bahut achhi reeti gyaan uthaayenge। kam bhakti karne vaale gyaan bhi kam uthaayenge to pad bhi kam paayenge। daas-daasiyon mein bhi nambarvaar hote hain na। saara madaar hai padhaai par। tumhaare mein bahut thode hain jo achhi reeti yukti se baat kar sakte hain। achhe bachchon ki activity bhi achhi hogi। gun bhi sundar hone chaahiye। jitna baap ki yaad mein rahenge to pavitra hote jaayenge aur royalty bhi aati jaayegi। kahaan-kahaan to shoodron ki chalan badi achhi hoti hai aur yahaan brahman bachchon ki chalan aisi hai, baat mat poochho isliye ve log bhi kehte hain kya inko eeshvar padhaate hain! to bachchon ki aisi chalan nahin honi chaahiye। bahut meetha ksheerkhanda hona chaahiye, jo karenge so paayenge। nahin karenge to nahin paayenge। baap to achhi reeti samjhaate rehte hain। pahle-pahle to behad ke baap ka parichay dete raho। trimoorti ka chitra to bada achha hai - svarga aur narka bhi donon taraph hain। gole mein bhi clear hai। koi bhi dharma vaale ko is gole par va jhaad par tum samjha sakte ho - is hisaab se tum svarga nai duniya mein to aa nahin sakenge। jo sabse oonch dharma tha, sabse saahookaar the, vahi sabse gareeb bane hain, jo sabse pahle-pahle the, sankhya bhi unki jaasti honi chaahiye parantu hindu log bahut aur-aur dharmon mein convert ho gaye hain। apne dharma ko na jaanne kaaran aur dharmon mein chale gaye hain ya to hindu dharma kah dete hain। apne dharma ko bhi samajhte nahin hain। eeshvar ko pukaarte bahut hain shanti deva, parantu shanti ka arth samajhte nahin hain। ek-do ko shanti ki prize dete rehte hain। yahaan tum vishwa mein shanti sthaapan karne ke nimitta bane hue bachchon ko baap vishwa ki raajaai prize mein dete hain। yeh inaam bhi nambarvaar purooshaartha anusaar milta hai। dene vaala hai bhagwan baap। inaam kitna bada hai - sooryavanshi vishwa ki raajaai! abhi tum bachchon ki buddhi mein saare world ki history-geography varna aadi sab hain। vishwa ki raajaai leni hai to kuchh mehnat bhi karni hai। point to bahut sahaj hai। teacher jo kaam dete hain woh karke dikhaana chaahiye। to baba dekhen ki kismen poora gyaan hai। kai bachche to murli par bhi dhyaan nahin dete hain। regular murli padhte nahin। jo murli nahin padhte woh kya kiska kalyaan karte honge! bahut bachche hain jo kuchh bhi kalyaan nahin karte। na apna, na auron ka karte hain isliye ghodesvaar, pyaade kaha jaata hai। koi thode mahaarthi hain, khud bhi samajh sakte hain - kaun-kaun mahaarthi hain। kehte hain baba gulzaar ko, kumaarka ko, manohar ko bhejo… kyonki khud ghodesvaar hain। woh mahaarthi hain। baap to sab bachchon ko achhi reeti jaan sakte hain। koi par grahchaari bhi baithti hai na। kabhi achhe-achhe bachchon ko bhi maaya ka toofaan aane se betaale ban jaate hain। gyaan taraph attention hi nahin jaata hai। baba ko har ek ki service se maaloom to padta hai na। service karne vaale apna poora samaachaar baba ko dete rahenge।

tum bachche jaante ho geeta ka bhagwan hamko vishwa ka maalik bana rahe hain। bahut hain jo woh geeta bhi kantha kar lete hain, hazaaron roopaya kamaate hain। tum ho brahman sampradaay jo phir daivi sampradaay bante ho। eeshvar ki aulaad bhi sabhi apne ko kehte hain phir kah dete ham sab eeshvar hain, jisko jo aata hai woh bolte rehte hain। bhaktimaarga mein manushyon ki haalat kaisi ho gai hai। yeh duniya hi iron aged patit hai। is chitra se bahut achhi reeti samjha sakenge। saath mein daiveegun bhi chaahiye। andar-baahar sachchaai chaahiye। aatma hi jhoothi bani hai unko phir sachcha baap sachcha banaate hain। baap hi aakar svarga ka maalik banaate hain। daiveegun dhaaran karaate hain। tum bachche jaante ho ham aise (lakshmi-naaraayan) gunvaan ban rahe hain। apni jaanch karte raho - hamaare mein koi aasuri gun to nahin hain? chalte-chalte maaya ka thappad aisa lagta hai jo dher ho gir padte hain।

tumhaare liye yeh gyaan aur vigyaan hi holi-dhooriya hai। ve log bhi holi aur dhuriya manaate hain lekin uska arth kya hai, yeh bhi koi nahin jaante। vaastav mein yeh gyaan aur vigyaan hai, jisse tum apne ko bahut oonch banaate ho। woh to kya-kya karte hain, dhool daalte hain kyonki yeh hai raurav narka। nai duniya ki sthaapna aur puraani duniya ke vinaash ka kartavya chal raha hai। tum eeshvareey santaan ko bhi maaya ekdam ghoonsa aisa laga deti hai jo jor se duban mein gir padte hain। phir usse nikalna bada mushkil hota hai, ismen phir aasheervaad aadi ki koi baat nahin rehti। phir is taraph mushkil chadh sakte hain isliye badi khabardaari chaahiye। maaya ke vaar se bachne ke liye kabhi deh-abhimaan mein mat phanso। sada khabardaar, sab bhaai-behen hain। baba ne jo sikhaaya hai vahi bahnen sikhaati hain। balihaari baap ki hai, na ki bahnon ki। brahma ki bhi balihaari nahin। yeh bhi purooshaartha se seekhe hain। purooshaartha achha kiya hai goya apna kalyaan kiya hai। hamko bhi sikhlaate hain to ham apna kalyaan karen।

aaj holi hai, ab holi ka gyaan bhi sunaate rehte hain। gyaan aur vigyaan। padhaai ko knowledge kaha jaata hai। vigyaan kya cheez hai, kisko bhi pata nahin hai। vigyaan hai gyaan se bhi pare। gyaan tumko yahaan milta hai, jisse tum praalabdha paate ho। baaki woh hai shantidham। yahaan part bajaae thak jaate hain to phir shanti mein jaana chaahte hain। abhi tumhaari buddhi mein yeh chakra ka gyaan hai। abhi ham svarga mein jaayenge phir 84 janma lete narka mein aayenge। phir vahi haalat hogi, yeh chalta hi rahega। inse koi chhoot nahin sakte। koi kehte hain yeh drama bana hi kyon? are, yeh to nai duniya aur puraani duniya ka khel hai। anaadi bana hua hai। jhaad par samjhaana bahut achha hai। sabse pahli mukhya baat hai baap ko yaad karo to paavan ban jaayenge। aage chal maaloom padta jaayega - kaun-kaun is kul ke hain jo aur dharmon mein convert ho gaye hain, woh bhi nikalte jaayenge। jab sabhi aayenge to manushya wonder khaayenge। sabko yahi kehna hai ki deh-abhimaan chhod dehi-abhimaani bano। tumhaare liye padhaai hi bada tyohaar hai, jisse tumhaari kitni kamaai hoti hai। vo log to in tyohaaron ko manaane mein kitne paise aadi barbaad karte hain, kitna jhagda aadi hota hai। panchaayti raajya mein kitne jhagde hi jhagde hain, kisko rishvat dekar bhi marvaane ki koshish karte hain। aise bahut misaal hote rehte hain। bachche jaante hain satayug mein koi upadrav hota hi nahin। raavan raajya mein bahut upadrav hain। abhi to tamopradhaan hain na। ek-do mein mat na milne kaaran kitna jhagda hai isliye baap samjhaate rehte hain is puraani duniya ko bhool akele ban jaao, ghar ko yaad karo। apne sukhdhaam ko yaad karo, kisse jaasti baat bhi na karo, nahin to nuksaan ho jaata hai। bahut meetha, shant, pyaar se bolna achha hai। jaasti na bolna achha hai। shanti mein rehna sabse achha hai। tum bachche to shanti se vijay paate ho। sivaae ek baap ke aur koi se preet nahin lagaani hai। jitna baap se property lena chaaho utni le lo। nahin to laukik baap ki property par kitna jhagda ho padta hai। ismen koi khit-khit nahin। jitna chaahe utna apni padhaai se le sakte ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachcha baap sachcha banaane aaye hain isliye sachchaai se chalna hai। apni jaanch karni hai - hamaare mein koi aasuri gun to nahin hain? ham jaasti baat to nahin karte hain? bahut meetha ban shanti aur pyaar se baat karni hai।

2) murli par poora dhyaan dena hai। roz murli padhni hai। apna aur auron ka kalyaan karna hai। teacher jo kaam dete hain woh karke dikhaana hai।

vardaan:- holi shabd ke arth ko jeevan mein laakar purushaartha ki speed ko tej karne vaale teevra purushaarthi bhav

holi arthaat jo baat ho gai, beet gai usko bilkul khatma kar dena। beeti ko beeti kar aage badhna yahi hai holi manaana। beeti hui baat aise mahsoos ho jaise bahut puraani koi janma ki baat hai, jab aisi sthiti ho jaati hai tab purushaartha ki speed tej hoti hai। to apni ya doosron ki beeti hui baaton ko kabhi chintan mein nahin laana, chitta par nahin rakhna aur varnan to kabhi nahin karna, tab hi teevra purushaarthi ban sakenge।

slogan:- sneh hi sahaj yaad ka saadhan hai isliye sada snehi rehna aur snehi banaana।

maateshvari ji ke anmol mahaavaakya

“gupta baandheli gopikaaon ka gaayan hai''

geetah bin dekhe pyaar karoon, ghar baithe yaad karoon...।

ab yeh geet koi baandheli masta gopi ka gaaya hua hai, yeh hai kalpa-kalpa vaala vichitra khel। bin dekhe pyaar karte hain, duniya bichaari kya jaane, kalpa pahle vaala part hoobhu repeat ho raha hai। bhal us gopi ne gharbaar nahin chhoda hai parantu yaad mein karmabandhan chuktu kar rahi hai, to yeh kitna khushi mein jhoom-jhoom kar masti mein ga rahi hai। to vaastav mein ghar chhodne ki baat nahin hai। ghar baithe bin dekhe us sukh mein rah service karni hai। kaun-si seva karni hai? pavitra ban pavitra banaane ki, tumko teesra netra ab mila hai। aadi se lekar ant tak beez aur jhaad ka raaz tumhaari nazron mein hai। to balihaari is jeevan ki hai, is knowledge dvaara 21 janmon ke liye saubhaagya bana rahe hain, ismen agar kuchh bhi lok-laaz vikaari kul ki maryaada hai to vo service nahin kar sakenge, yeh hai apni kami। bahuton ko vichaar aata hai ki yeh brahmaakumaariyaan ghar phitaane aai hain parantu ismen ghar phitaane ki baat nahin hai, ghar baithe pavitra rehna hai aur service karni hai, ismen koi kathinaai nahin hai। pavitra banenge tab pavitra duniya mein chalne ke adhikaari banenge। baaki jo nahin chalne vaale hain, woh to kalpa pahle vaali shatruta ka part bajaayenge, ismen koi ka dosh nahin hai। jaise ham paramatma ke kaarya ko jaante hain vaise drama ke andar har ek ke part ko jaan chuke hain to ismen ghrina nahin aa sakti। aisi teevra purushaarthi gopiyaan race kar vijaymaala mein bhi aa sakti hain। achha। om shanti।

avyakt ishaare - satyata aur sabhyata roopi culture ko apnaao

jo bhi gyaan ki guhya baaten hain, usko spashta karne ki vidhi aapke paas bahut achhi hai aur spashteekran hai। ek ek point ko logical spashta kar sakte ho। apni authority vaale ho। koi manomay va kalpana ki baaten to hain nahin। yathaartha hain। anubhav hai। anubhav ki authority, knowledge ki authority, satyata ki authority... kitni authorities hain! to authority aur sneh - donon ko saath-saath kaarya mein lagaao।