Daily Murli for Wednesday 12 March 2025

12-03-2025 praatahmurli om shanti "baapdaada"' madhuban

“meethe bachche - baap abhi tumhaari paalna kar rahe hain, padha rahe hain, ghar baithe raay de rahe hain, to kadam-kadam par raay lete raho tab oonch pad milega''

prashn:- sajaaon se chhootne ke liye kaun-sa purooshaartha bahut samay ka chaahiye?

uttar:- nashtomoha banne ka। kisi mein bhi mamatva na ho। apne dil se poochhna hai - hamaara kisi mein moh to nahin hai? koi bhi puraana sambandh ant mein yaad na aaye। yogbal se sab hisaab-kitaab chuktu karne hain tab hi bigar saja oonch pad milega।

om shanti। abhi tum kiske sammukh baithe ho? baapdaada ke। baap bhi kehna pade to daada bhi kehna pade। baap bhi is daada ke dvaara tumhaare sammukh baithe hain। baahar mein tum rehte ho to vahaan baap ko yaad karna padta hai। chitthi likhni padti hai। yahaan tum sammukh ho। baatcheet karte ho - kiske saath? baapdaada ke saath। yeh hai oonch te oonch do authority। brahma hai saakaar aur shiv hai niraakaar। abhi tum jaante ho oonch te oonch authority, baap se kaise milna hota hai! behad ka baap jisko patit-paavan kah bulaate hain, abhi practical mein tum unke sammukh baithe ho। baap bachchon ki paalna kar rahe hain, padha rahe hain। ghar baithe bhi bachchon ko raay milti hai ki ghar mein aise-aise chalo। ab baap ki shreemat par chalenge to shreshtha se shreshtha banenge। bachche jaante hain ham oonch te oonch baap ki mat se oonch te oonch martaba paate hain। manushya srishti mein oonch te oonch yeh lakshmi-naaraayan ka martaba hai। yeh past mein hokar gaye hain। manushya jaakar in oonch ko namaste karte hain। mukhya baat hai hi pavitrata ki। manushya to manushya hi hain। parantu kahaan woh vishwa ke maalik, kahaan abhi ke manushya! yeh tumhaari buddhi mein hi hai - bhaarat barobar 5 hazaar varsha pahle aisa tha, ham hi vishwa ke maalik the। aur kiski buddhi mein yeh nahin hai। inko bhi pata thode hi tha, bilkul ghor andhiyaare mein the। abhi baap ne aakar bataaya hai brahma so vishnu, vishnu so brahma kaise hote hain? yeh badi guhya ramneek baaten hain jo aur koi samajh na sake। sivaae baap ke yeh knowledge koi padha na sake। niraakaar baap aakar padhaate hain। shreekrishna bhagvaanuvaach nahin hai। baap kehte hain main tumko padhaakar sukhi banaata hoon। phir main apne nirvaandhaam mein chala aata hoon। abhi tum bachche satopradhaan ban rahe ho, ismen kharcha kuchh bhi nahin hai। sirf apne ko aatma samajh baap ko yaad karna hai। bigar kaudi kharcha 21 janma ke liye tum vishwa ke maalik bante ho। paai-paisa bhej dete hain, woh bhi apna bhavishya banaane। kalpa pahle jisne jitna khajaane mein daala hai, utna hi ab daalenge। na jaasti, na kam daal sakte। yeh buddhi mein gyaan hai isliye phikra ki koi baat nahin rehti। bigar koi phikra ke ham apni gupta raajdhaani sthaapan kar rahe hain। yeh buddhi mein simran karna hai। tum bachchon ko bahut khushi mein rehna chaahiye aur phir nashtomoha bhi banna hai। yahaan nashtomoha hone se phir tum vahaan mohjeet raaja-raani banenge। tum jaante ho yeh puraani duniya to ab khatma honi hai, ab vaapis jaana hai phir ismen mamatva kyon rakhen। koi beemaar hota hai, doctor kah dete hain, case hopeless hai to phir unse mamatva nikal jaata hai। samajhte hain aatma ek shareer chhod jaae doosra leti hai। aatma to avinaashi hai na। aatma chali gai, shareer khatma ho gaya phir unko yaad karne se phaayda kya! abhi baap kehte hain tum nashtomoha bano। apni dil se poochhna hai - hamaara kisi mein moh to nahin hai? nahin to woh pichhaadi mein yaad zaroor aayenge। nashtomoha honge to yeh pad paayenge। svarga mein to sab aayenge - woh koi badi baat nahin hai। badi baat hai saza na khaakar, oonch pad paana। yogbal se hisaab-kitaab chuktu karenge to phir saza nahin khaayenge। puraane sambandhi bhi yaad na paden। abhi to hamaara braahmanon se naata hai phir hamaara devtaaon se naata hoga। abhi ka naata sabse oonch hai।

abhi tum gyaan saagar baap ke bane ho। saari knowledge buddhi mein hai। aage thode hi yeh jaante the ki srishti chakra kaise phirta hai? abhi baap ne samjhaaya hai। baap se varsa milta hai tab to baap ke saath love hai na। baap dvaara svarga ki baadshaahi milti hai। unka yeh rath mukrar hai। bhaarat mein hi bhaageerath gaaya hua hai। baap aate bhi bhaarat mein hain। tum bachchon ki buddhi mein abhi 84 janmon ki seedhi ka gyaan hai। tum jaan chuke ho yeh 84 ka chakra hamko lagaana hi hai। 84 ke chakra se chhoot nahin sakte hain। tum jaante ho ki seedhi utarne mein bahut time lagta hai, chadhne mein sirf yeh antim janma lagta hai isliye kaha jaata hai tum trilokeenaath, trikaaldarshi bante ho। pahle tumko yeh pata tha kya ki ham trilokeenaath banne vaale hain? abhi baap mila hai, shiksha de rahe hain tab tum samajhte ho। baba ke paas koi aate hain baba poochhte hain - aage is dress mein isi makaan mein kabhi mile ho? kehte hain - haan baba, kalpa-kalpa milte hain। to samjha jaata hai brahmaakumaari ne theek samjhaaya hai। abhi tum bachche svarga ke jhaad saamne dekh rahe ho। najdeek ho na। manushya baap ke liye kehte hain - naam-roop se nyaara hai, to phir bachche kahaan se aayenge! woh bhi naam-roop se nyaare ho jaaen! akshar jo kehte hain bilkul wrong। jinhonne kalpa pahle samjha hoga, unki hi buddhi mein baithega। pradarshani mein dekho kaise-kaise aate hain। koi to suni sunaai baaton par likh dete hain ki yeh sab kalpana hai। to samjha jaata hai yeh apne kul ke nahin hain। anek prakaar ke manushya hain। tumhaari buddhi mein saara jhaad, drama, 84 ka chakra aa gaya hai। abhi purooshaartha karna hai। woh bhi drama anusaar hi hota hai। drama mein noondh hai। aise bhi nahin, drama mein purooshaartha karna hoga to karenge, yeh kehna wrong hai। drama ko poora nahin samjha hai, unko phir naastik kaha jaata hai। ve baap se preet rakh na saken। drama ke raaz ko ulta samajhne se gir padte hain, phir samjha jaata hai inki takdeer mein nahin hai। vighna to anek prakaar ke aayenge। unki parvaah nahin karni hai। baap kehte hain jo achhi baaten tumko sunaate hain woh suno। baap ko yaad karne se khush bahut rahenge। buddhi mein hai ab 84 ka chakra poora hota hai, ab jaana hai apne ghar। aise-aise apne saath baaten karni hain। tum patit to ja nahin sakte ho। pahle zaroor saajan chaahiye, peechhe baraat। gaaya hua bhi hai bholaanaath ki baraat। sabko nambarvaar jaana to hai, itna aatmaon ka jhunda kaise nambarvaar jaata hoga! manushya prithvi par kitni jagah lete hain, kitna furniture jaageer aadi chaahiye। aatma to hai bindi। aatma ko kya chaahiye? kuchh bhi nahin। aatma kitni chhoti jagah leti hai। is saakaari jhaad aur niraakaari jhaad mein kitna pharka hai! woh hai bindiyon ka jhaad। yeh sab baaten baap buddhi mein bithaate hain। tumhaare sivaae ye baaten duniya mein aur koi sun na sake। baap abhi apne ghar aur raajdhaani ki yaad dilaate hain। tum bachche rachayita ko jaanne se srishti chakra ke aadi-madhya-ant ko jaante ho। tum trikaaldarshi, aastik ho gaye। duniya bhar mein koi aastik nahin। woh hai had ki padhaai, yeh hai behad ki padhaai। woh anek teachers padhaane vaale, yeh ek teacher padhaane vaala। jo phir wonderful hai। yeh baap bhi hai, teacher bhi hai to guru bhi hai। yeh teacher to saare world ka hai। parantu sabko to padhna nahin hai। baap ko sabhi jaan jaayen to bahut bhaagen, baapdaada ko dekhne liye। great great grand father Adam mein baap aaya hai, to ekdam bhaag aaye। baap ki pratyakshata tab hoti hai jab ladaai shuru hoti hai, phir koi aa bhi nahin sakte hain। tum jaante ho yeh anek dharmon ka vinaash bhi hona hai। pahle-pahle ek bhaarat hi tha aur koi khanda nahin tha। abhi tumhaari buddhi mein bhakti maarga ki bhi baaten hain। buddhi se koi bhool thode hi jaata hai। parantu yaad rehte hue bhi yeh gyaan hai, bhakti ka part poora hua ab to hamko vaapis jaana hai। is duniya mein rehna nahin hai। ghar jaane liye to khushi honi chaahiye na। tum bachchon ko samjhaaya hai tumhaari ab vaanaprastha avastha hai। tum do paise is raajdhaani sthaapan karne mein lagaate ho, woh bhi jo karte ho, hoobhu kalpa pahle misal। tum bhi hoobhu kalpa pahle vaale ho। tum kehte ho baba aap bhi kalpa pahle vaale ho। ham kalpa-kalpa baba se padhte hain। shreemat par chal shreshtha banna hai। yeh baaten aur koi ki buddhi mein nahin hongi। tumko yeh khushi hai ki ham apni raajdhaani sthaapan kar rahe hain shreemat par। baap sirf kehte hain pavitra bano। tum pavitra banenge to saari duniya pavitra banengi। sab vaapis chale jaayenge। baaki aur baaton ki ham phikra hi kyon karen। kaise saja khaayenge, kya hoga, ismen hamaara kya jaata hai। hamko apna phikra karna hai। aur dharma vaalon ki baaton mein ham kyon jaayen। ham hain aadi sanaatan devi-devta dharma ke। vaastav mein inka naam bhaarat hai phir hindustaan naam rakh diya hai। hindu koi dharma nahin hai। ham likhte hain ki ham devta dharma ke hain to bhi woh hindu likh dete hain kyonki jaante hi nahin ki devi-devta dharma kab tha। koi bhi samajhte nahin hain। abhi itne bi.ke. hain, yeh to family ho gai hai na! ghar ho gaya na! brahma to hai prajaapita, sabka great-great grand father। pahle-pahle tum brahman bante ho phir varnon mein aate ho।

tumhaara yeh college athva university bhi hai, hospital bhi hai। gaaya jaata hai gyaan anjan satguru diya, agyaan andher vinaash…। yogbal se tum ever healthy ever wealthy bante ho। nature-cure karaate hain na। abhi tumhaari aatma cure hone se phir shareer bhi cure ho jaayega। yeh hai spiritual nature-cure। health wealth happiness 21 janmon ke liye milti hai। oopar mein naam likh do roohaani nature-cure। manushyon ko pavitra banaane ki yuktiyaan likhne mein koi harja nahin hai। aatma hi patit bani hai tab to bulaate hain na। aatma pahle satopradhaan pavitra thi phir apvitra bani hai phir pavitra kaise bane? bhagvaanuvaach - manamnaabhav, mujhe yaad karo to main guarantee karta hoon tum pavitra ho jaayenge। baba kitni yuktiyaan batlaate hain - aise-aise board lagaao। parantu koi ne bhi aise board lagaaya nahin hai। chitra mukhya rakhe hon। andar koi bhi aaye to bolo tum aatma paramdham mein rahne vaali ho। yahaan yeh organs mile hain part bajaane ke liye। yeh shareer to vinaashi hai na। baap ko yaad karo to vikarma vinaash ho jaayenge। abhi tumhaari aatma apvitra hai phir pavitra bano to ghar chale jaayenge। samjhaana to bahut sahaj hai। jo kalpa pahle vaala hoga vahi aakar phool banenge। ismen darne ki koi baat nahin hai। tum to achhi baat likhte ho। woh guru log bhi mantra dete hain na। baap bhi manamnaabhav ka mantra de phir rachayita aur rachna ka raaz samjhaate hain। grihastha vyavhaar mein rehte sirf baap ko yaad karo। doosre ko bhi parichay do, light house bhi bano।

tum bachchon ko dehi-abhimaani banne ki bahut gupta mehnat karni hai। jaise baap jaante hain main aatmaon ko padha raha hoon, aise tum bachche bhi aatma-abhimaani banne ki mehnat karo। mukh se shiv-shiv bhi kehna nahin hai। apne ko aatma samajh baap ko yaad karna hai kyonki sir par paapon ka bojha bahut hai। yaad se hi tum paavan banenge। kalpa pahle jaise-jaise jinhonne varsa liya hoga, vahi apne-apne samay par lenge। adli badli kuchh ho nahin sakti। mukhya baat hai hi dehi-abhimaani ho baap ko yaad karna to phir maaya ka thappad nahin khaayenge। deh-abhimaan mein aane se kuchh na kuchh vikarma hoga phir sau guna paap ban jaata hai। seedhi utarne mein 84 janma lage hain। ab phir chadhti kala ek hi janma mein hoti hai। baba aaya hai to lift ki bhi invention nikli hai। aage to kamar ko haath dekar seedhi chadhte the। abhi sahaj lift nikli hai। yeh bhi lift hai jo mukti aur jeevanmukti mein ek second mein jaate hain। jeevanbandh tak aane mein 5 hazaar varsha, 84 janma lagte hain। jeevanmukti mein jaane mein ek janma lagta hai। kitna sahaj hai। tumhaare se bhi jo peechhe aayenge vo bhi jhat chadh jaayenge। samajhte hain khoi hui cheez baap dene aaye hain। unki mat par zaroor chalenge। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bigar koi phikra (chinta) ke apni gupta raajdhaani shreemat par sthaapan karni hai। vighnon ki parvaah nahin karni hai। buddhi mein rahe kalpa pahle jinhonne madad ki hai woh abhi bhi avashya karenge, phikra ki baat nahin।

2) sada khushi rahe ki abhi hamaari vaanaprastha avastha hai, ham vaapas ghar ja rahe hain। aatma-abhimaani banne ki bahut gupta mehnat karni hai। koi bhi vikarma nahin karna hai।

vardaan:- kisi bhi vikraal samasya ko sheetal banaane vaale sampoorn nishchaybuddhi bhav

jaise baap mein nishchay hai vaise svayan mein aur drama mein bhi sampoorn nishchay ho। svayan mein yadi kamjori ka sankalp utpanna hota hai to kamjori ke sanskaar ban jaate hain, isliye vyartha sankalp roopi kamjori ke germs apne andar pravesh hone nahin dena। saath-saath jo bhi drama ki scene dekhte ho, halchal ki scene mein bhi kalyaan ka anubhav ho, vaataavran hilaane vaala ho, samasya vikraal ho lekin sada nishchaybaddhi vijayi bano to vikraal samasya bhi sheetal ho jaayegi।

slogan:- jiska baap aur seva se pyaar hai use parivaar ka pyaar svatahmilta hai।

avyakt ishaare - satyata aur sabhyata roopi culture ko apnaao

jaise paramatma ek hai yeh sabhi bhinna-bhinna dharma vaalon ki maanyata hai। aise yathaartha satya gyaan ek hi baap ka hai athva ek hi raasta hai, yeh aavaaj jab bulanda ho tab aatmaon ka anek tinkon ke sahaare taraph bhatakna banda ho। abhi yahi samajhte hain ki yeh bhi ek raasta hai। achha raasta hai। lekin aakhir bhi ek baap ka ek hi parichay, ek hi raasta hai। yeh satyata ke parichay ki va satya gyaan ke shakti ki lahar phailaao tab pratyakshata ke jhande ke neeche sarva aatmaayen sahaara le sakengi।