Daily Murli for Thursday 27 March 2025

27-03-2025 praatahmurli om shanti "baapdaada"' madhuban

“meethe bachche - khivaiya aaya hai tumhaari naeeya paar lagaane, tum baap se sachche hokar raho to naeeya hilegi-dulegi lekin doob nahin sakti''

prashn:- baap ki yaad bachchon ko yathaartha na rahne ka mukhya kaaran kya hai?

uttar:- saakaar mein aate-aate bhool gaye hain ki ham aatma niraakaar hain aur hamaara baap bhi niraakaar hai, saakaar hone ke kaaran saakaar ki yaad sahaj aa jaati hai। dehi-abhimaani ban apne ko bindi samajh baap ko yaad karna - isi mein hi mehnat hai।

om shanti। shiv bhagvaanuvaach। inka naam to shiv nahin hai na। inka naam hai brahma aur in dvaara baat karte hain shiv bhagvaanuvaach। yeh to bahut baar samjhaaya hai koi manushya ko ya devta ko athva sookshmavtanvaasi brahma-vishnu-shankar ko bhagwan nahin kaha jaata। jinka koi aakaar va saakaar chitra hai unko bhagwan nahin kah sakte। bhagwan kaha hi jaata hai behad ke baap ko। bhagwan kaun hai, yeh koi ko bhi pata nahin। neti-neti kehte hain arthaat ham nahin jaante। tumhaare mein bhi bahut thode hain jo yathaartha reeti jaante hain। aatma kehti hai - he bhagwan। ab aatma to hai bindi। to baap bhi bindi hi hoga। ab baap bachchon ko baith samjhaate hain। baba ke paas kai aise bachche hain, jo yeh bhi nahin samajhte ki ham aatma kaise bindi hain! koi to achhi reeti samajhte hain, baap ko yaad karte hain। behad ka baap hai sachcha heera। heere ko bahut achhi dibbi mein daala jaata hai। koi ke paas achhe heere hote hain to kisko dikhlaana ho to sone-chaandi ki dibbi mein daal phir dikhaate hain। heere ko jauhri hi jaane aur koi jaan na sake। jhootha heera dikhaayen to bhi kisko pata na pade। aise bahut thag jaate hain। to ab sachcha baap aaya hai, parantu jhoothe bhi aise-aise hain jo manushyon ko kuchh bhi pata nahin padta। gaaya bhi jaata hai sach ki naanv hile-dule par doobe nahin। jhooth ki naanv hilti nahin hai, inko kitna hilaane ki karte hain। jo yahaan is naanv mein baithe hue hain woh bhi hilaane ki koshish karte hain। traitor gaaye jaate hain na। ab tum bachche jaante ho khivaiya baap aaya hua hai। baagvaan bhi hai। baap ne samjhaaya hai yeh hai kaanton ka jangal। sabhi patit hain na। kitna jhooth hai। sachche baap ko virla koi jaanta hai। yahaan vaale bhi kai poora nahin jaante, poori pahchaan nahin, kyonki gupta hai na। bhagwan ko yaad to sab karte hain, yeh bhi jaante hain ki woh niraakaar hai। paramdham mein rehte hain। ham bhi niraakaar aatma hain - yeh nahin jaante। saakaar mein baithe-baithe woh bhool gaye hain। saakaar mein rehte-rehte saakaar hi yaad aa jaata hai। tum bachche abhi dehi-abhimaani bante ho। bhagwan ko kaha jaata hai - parampita paramatma। yeh samajhna to bilkul sahaj hai। parampita arthaat pare se pare rahne vaala param aatma। tumko kaha jaata hai aatma। tumko param nahin kahenge। tum to punarjanma lete ho na। yeh baaten koi bhi nahin jaante। bhagwan ko bhi sarvavyaapi kah dete hain। bhakta bhagwan ko dhoondhate hain, pahaadon par, teertho par, nadiyon par bhi jaate hain। samajhte hain nadi patit-paavni hai, usmein snaan kar ham paavan ban jaayenge। bhakti maarga mein yeh bhi kisko pata nahin padta ki hamko chaahiye kya! sirf kah dete hain mukti chaahiye, moksha chaahiye kyonki yahaan duhkhi hone ke kaaran tang hain। satayug mein koi moksha va mukti thode hi maangate hain। vahaan bhagwan ko koi bulaate nahin, yahaan duhkhi hone ke kaaran bulaate hain। bhakti se koi ka duhkh har nahin sakte। bhal koi saara din raam-raam baith jape, to bhi duhkh har nahin sakte। yeh hai hi raavan raajya। duhkh to gale se jaise baandha hua hai। gaate bhi hain duhkh mein simran sab karen sukh mein kare na koi। iska matlab zaroor sukh tha, ab duhkh hai। sukh tha satayug mein, duhkh hai abhi kaliyug mein isliye isko kaanton ka jangal kaha jaata hai। pahla number hai deh-abhimaan ka kaanta। phir hai kaam ka kaanta।

abhi baap samjhaate hain - tum in aankhon se jo kuchh dekhte ho woh vinaash hone ka hai। ab tumko chalna hai shantidham। apne ghar ko aur raajdhaani ko yaad karo। ghar ki yaad ke saath-saath baap ki yaad bhi zaroori hai kyonki ghar koi patit-paavan nahin hai। tum patit-paavan baap ko kehte ho। to baap ko hi yaad karna pade। woh kehte hain maamekam yaad karo। mujhe hi bulaate ho na - baba, aakar paavan banaao। gyaan ka saagar hai to zaroor mukh se aakar samjhaana pade। prerna to nahin karenge। ek taraph shiv jayanti bhi manaate hain, doosre taraph phir kehte naam-roop se nyaara hai। naam-roop se nyaari cheez to koi hoti nahin। phir kah dete thikkar-bhittar sabmen hai। anek mat hain na। baap samjhaate hain tumko 5 vikaaron roopi raavan ne tuchchha buddhi bana diya hai isliye devtaaon ke aage jaakar namaste karte hain। koi to naastik hote hain, kisko bhi maante nahin। yahaan baap ke paas to aate hi hain brahman, jinko 5 hazaar varsha pahle bhi samjhaaya tha। likha hua bhi hai parampita paramatma brahma dvaara sthaapna karte hain to brahma ki santaan thahre। prajaapita brahma to mashhoor hai। zaroor brahman-braahmaniyaan bhi honge। abhi tum shoodra dharma se nikal brahman dharma mein aaye ho। vaastav mein hindu kahlaane vaale apne asli dharma ko jaante nahin hain isliye kabhi kisko maanenge, kabhi kisko maanenge। bahuton ke paas jaate rahenge। Christian log kabhi kiske paas jaayenge nahin। abhi tum siddha kar batlaate ho - bhagwan baap kehte hain mujhe yaad karo। ek din akhbaaron mein bhi padega ki bhagwan kehte hain - mujhe yaad karne se hi tum patit se paavan ban jaayenge। jab vinaash najdeek hoga tab akhbaaron dvaara bhi yeh aavaaz kaanon par padega। akhbaar mein to kahaan-kahaan se samaachaar aate hain na। abhi bhi daal sakte ho। bhagvaanuvaach - parampita paramatma shiv kehte hain - main hoon patit-paavan, mujhe yaad karo to tum paavan ban jaayenge। is patit duniya ka vinaash saamne khada hai। vinaash zaroor hona hai, yeh bhi sabko nishchay ho jaayega। rehearsal bhi hoti rahegi। tum bachche jaante ho jab tak raajdhaani sthaapan nahin hui hai tab tak vinaash nahin hoga, arth quake aadi bhi honi hai na। ek taraph bombs phatenge doosre taraph natural calamities bhi aayengi। anna aadi nahin milega, steamer nahin aayenge, famine pad jaayega, bhookh marte-marte khatma ho jaayenge। bhookh hadtaal jo karte hain woh phir kuchh na kuchh jal va maakhi (shahad) aadi lete rehte hain। vajan mein halke ho jaate hain। yeh to baithe-baithe achaanak arth quake hogi, mar jaayenge। vinaash to zaroor hona hai। saadhu-santa aadi aise nahin kahenge ki vinaash hona hai isliye raam-raam kaho। manushya to bhagwan ko hi nahin jaante hain। bhagwan to khud hi apne ko jaane, aur na jaane koi। unka time hai aane ka। jo phir is boodhe tan mein aakar saare srishti ke aadi-madhya-ant ka knowledge sunaate hain। tum bachche jaante ho abhi vaapis jaana hai। ismen to khush hona chaahiye, ham shantidham jaate hain। manushya shanti hi chaahte hain parantu shanti kaun deve? kehte hain na-shanti deva. . . ab devon ka dev to ek hi oonch te oonch baap hai। woh kehte hain main tum sabko paavan banaakar le jaaoonga। ek ko bhi nahin chhodoonga। drama anusaar sabko jaana hi hai। gaaya hua hai machchharon sadrishya sab aatmaayen jaati hain। yeh bhi jaante hain satayug mein bahut thode manushya hote hain। abhi kaliyug ant mein kitne dher manushya hain phir thode kaise honge? abhi hai sangam। tum satayug mein jaane ke liye purooshaartha karte ho। jaante ho yeh vinaash hoga। machchharon sadrishya aatmaayen jaayengi। saara jhunda chala jaayega। satayug mein bahut thode rahenge।

baap kehte hain koi bhi dehdhaari ko yaad nahin karo, dekhte hue ham nahin dekhte hain। ham aatma hain, ham apne ghar jaayenge। khushi se puraana shareer chhod dena hai। apne shantidham ko yaad karte rahenge to ant mati so gati ho jaayegi। ek baap ko yaad karna, ismen hi mehnat hai। mehnat bigar oonch pad thode hi milega। baap aate hi hain tumko nar se naaraayan banaane ke liye। ab is puraani duniya mein koi chain nahin hai। chain hai hi shantidham aur sukhdhaam mein। yahaan to ghar-ghar mein ashaanti hai, maar-peet hai। baap kehte hain ab is chhi-chhi duniya ko bhoolo। meethe-meethe bachchon, main tumhaare liye svarga ki sthaapna karne aaya hoon, is narka mein tum patit ban pade ho। ab svarga mein chalna hai। ab baap ko aur svarga ko yaad karo to ant mati so gati ho jaayegi। shaadi aadi mein bhal jaao parantu yaad baap ko karo। knowledge saari buddhi mein rahni chaahiye। bhal ghar mein raho, bachchon aadi ki sambhaal karo parantu buddhi mein yaad rakho - baba ka pharmaan hai mujhe yaad karo। ghar chhodna nahin hai। nahin to bachchon ki sambhaal kaun karega? bhakta log ghar mein rehte hain, grihastha vyavhaar mein rehte hain phir bhi bhakta kaha jaata hai kyonki bhakti karte hain, ghar-baar sambhaalte hain। vikaar mein jaate hain to bhi guru log unko kehte hain shreekrishna ko yaad karo to un jaisa bachcha hoga। in baaton mein ab tum bachchon ko nahin jaana hai kyonki tumko ab satayug mein jaane ki baaten sunaai jaati hain, jiski sthaapna ho rahi hai। vaikuntha ki sthaapna koi shreekrishna nahin karte hain, shreekrishna to maalik bana hai। baap se varsa liya hai। sangam ke samay hi geeta ka bhagwan aate hain। geeta sunaai baap ne aur bachche ne suni। bhakti maarga mein phir baap ke badle bachche ka naam daal diya hai। baap ko bhool gaye hain to geeta bhi khandan ho gai। woh khandan ki hui geeta padhne se kya hoga। baap to raajayog sikhlaakar gaye, inse shreekrishna satayug ka maalik bana। bhakti maarga mein satya naaraayan ki katha sunne se koi svarga ka maalik banega kya? na koi is khyaalaat se sunte hain, usse phaayda kuchh nahin milta। saadhu-santa aadi apne-apne mantra dete hain, photo dete hain। yahaan woh koi baat nahin। doosre satsangon mein jaayenge to kahenge phalaane svaami ki katha hai। kiski katha? vedaanta ki katha, geeta ki katha, bhaagvat ki katha। abhi tum bachche jaante ho hamko padhaane vaala koi dehdhaari nahin hai, na koi shaastra aadi kuchh padha hua hai। shivbaaba koi shaastra padha hai kya! padhte hain manushya। shivbaaba kehte hain - main geeta aadi kuchh padha hua nahin hoon। yeh rath jismen baitha hoon, yeh padha hua hai, main nahin padha hua hoon। mere mein to saare srishti chakra ke aadi-madhya-ant ka gyaan hai। yeh roz geeta padhta tha। tote muaaphik kantha kar lete the, jab baap ne pravesh kiya to jhat geeta chhod di kyonki buddhi mein aa gaya yeh to shivbaaba sunaate hain।

baap kehte hain main tumko svarga ki baadshaahi deta hoon to ab puraani duniya se mamatva mita do। sirf maamekam yaad karo। yeh mehnat karni hai। sachche aashik ko ghadi-ghadi maashook ki yaad hi aati rehti hai। to ab baap ki yaad bhi aisi pakki rahni chaahiye। paarlaukik baap kehte hain - bachche, mujhe yaad karo aur svarga ke varse ko yaad karo। ismen aur kuchh bhi aavaaz karne, jhaanjh aadi bajaane ki koi darkaar nahin। geet bhi koi achhe-achhe aate hain to bajaaye jaate hain, jinka arth bhi tumko samjhaate hain। geet banaane vaale khud kuchh bhi nahin jaante। meera bhaktin thi, tum to abhi gyaani ho। bachchon se jab koi kaam theek nahin hota hai to baba kehte tum to jaise bhakta ho। to woh samajh jaate hain ki baba ne hamko aisa kyon kaha? baap samjhaate hain - bachche, ab baap ko yaad karo, paigambar bano, messenger bano, sabko yahi paigaam do ki baap aur varse ko yaad karo to janma-janmaantar ke paap bhasma ho jaayenge। ab vaapis ghar jaane ka samay hai। bhagwan ek hi niraakaar hai, unko apni deh hai nahin। baap hi apna parichay baith dete hain। manamnaabhav ka mantra dete hain। saadhu sannyaasi aadi aisa kabhi nahin kahenge ki ab vinaash hona hai, baap ko yaad karo। baap hi brahman bachchon ko yaad dilaate hain। yaad se health, padhaai se wealth milegi। tum kaal par jeet paate ho। vahaan kabhi akaale mrityu nahin hota। devtaaon ne kaal par vijay paai hui hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aisa koi karma nahin karna hai jo baap dvaara bhakta ka title mile। paigambar ban sabko baap aur varse ko yaad karne ka paigaam dena hai।

2) is puraani duniya mein koi chain nahin hai, yeh chhi-chhi duniya hai ise bhoolte jaana hai। ghar ki yaad ke saath-saath paavan banne ke liye baap ko bhi zaroor yaad karna hai।

vardaan:- pravritti mein rehte par-vritti mein rahne vaale nirantar yogi bhav

nirantar yogi banne ka sahaj saadhan hai - pravritti mein rehte par-vritti mein rehna। par-vritti arthaat aatmik roop। jo aatmik roop mein sthit rehta hai woh sada nyaara aur baap ka pyaara ban jaata hai। kuchh bhi karega lekin yeh mahsoos hoga jaise kaam nahin kiya hai lekin khel kiya hai। to pravritti mein rehte aatmik roop mein rahne se sab khel ki tarah sahaj anubhav hoga। bandhan nahin lagega। sirf sneh aur sahayog ke saath shakti ki addition karo to highjump laga lenge।

slogan:- buddhi ki maheenta athva aatma ka halkaapan hi brahman jeevan ki personality hai।

avyakt ishaare - satyata aur sabhyata roopi culture ko apnaao

himmate shaktiyaan madad de sarvashaktimaan। sherniyaan kabhi kisse darti nahin, nirbhay hoti hain। yeh bhi bhay nahin ki na-maaloom kya hoga! satyata ke shakti swaroop hokar nashe se bolo, nashe se dekho। ham almighty government ke anuchar hain, isi smriti se aythaartha ko yathaartha mein laana hai। satya ko prasiddha karna hai na ki chhipaana hai lekin satyata ke saath bol mein madhurta aur sabhyata aavashyak hai।