Daily Murli for Friday 28 March 2025

28-03-2025 praatahmurli om shanti "baapdaada"' madhuban

“meethe bachche - tum bahut lucky ho kyonki tumhein baap ki yaad ke sivaae aur koi phikraat nahin, is baap ko to phir bhi bahut khyaalaat chalte hain''

prashn:- baap ke paas jo sapoot bachche hain, unki nishaani kya hogi?

uttar:- ve sabhi ka buddhiyog ek baap se judaate rahenge, serviceable honge। achhi reeti padhkar auron ko padhaayenge। baap ki dil par chadhe hue honge। aise sapoot bachche hi baap ka naam baala karte hain। jo poora padhte nahin woh auron ko bhi kharaab karte hain। yeh bhi drama mein noondh hai।

geet:- le lo duaayen maa-baap ki…

om shanti। har ek ghar mein maa-baap aur 2-4 bachche hote hain phir aasheervaad aadi maangate hain। woh to had ki baat hai। yeh had ke liye gaaya hua hai। behad ka kisko bhi pata nahin hai। abhi tum bachche jaante ho ham behad ke baap ke bachche aur bachchiyaan hain। woh maat-pita hote hain had ke, le lo duaayen had ke maat-pita ki। yeh hai behad ka maa baap। woh had ke maa baap bhi bachchon ko sambhaalte hain, phir teacher padhaate hain। ab tum bachche jaante ho - yeh hai behad ke maa-baap, behad ka teacher, behad ka satguru, supreme father, teacher, supreme guru। sat bolne vaala, sat sikhlaane vaala hai। bachchon mein nambarvaar to hote hain na। laukik ghar mein 2-4 bachche hote hain to unhon ki kitni sambhaal karni padti hai। yahaan kitne dher bachche hain, kitne centres se bachchon ke samaachaar aate hain - yeh bachcha aisa hai, yeh shaitaani karta hai, yeh tang karta hai, vighna daalta hai। phurna to is baap ko rahega na। prajaapita to yeh hai na। kitne dher bachchon ka khyaal rehta hai, tab baba kehte hain tum bachche achhi reeti baap ki yaad mein rah sakte ho। inko to hazaaron phurne hain। ek phurna to hai hi। hazaaron phurne (khyaalaat) doosre rehte hain। kitne dher bachchon ko sambhaalna padta hai। maaya bhi badi dushman hai na। achhi reeti koi-koi ki khaal utaar deti hai। koi ko naak se, koi ko choti se pakad leti hai। itne sabka vichaar to karna padta hai। phir bhi behad baap ki yaad mein rehna pade। tum ho behad ke baap ke bachche। jaante ho ham baap ki shreemat par chal kyon na baap se poora varsa le leven। sab to ekras chal na saken kyonki yeh raajaai sthaapan ho rahi hai, aur koi ki buddhi mein aa na sake। yeh hai bahut oonch padhaai। baadshaahi mil gai phir pata nahin padta hai ki yeh raajaai kaise sthaapan hui। yeh raajaai ka sthaapan hona bada wonderful hai। abhi tum anubhvi ho। pahle inko bhi pata thode hi tha ki ham kya the, phir kaise 84 janma liye hain। abhi samajh mein aaya hai, tum bhi kehte ho - baba aap vahi ho, yeh badi samajhne ki baat hai। is samay hi baap aakar sab baaten samjhaate hain। is samay bhal koi kitna bhi lakhapti, karodapti ho, baap kehte hain yeh paise aadi sab mitti mein mil jaane hain। baaki time hi kitna hai। duniya ke samaachaar tum radio mein athva akhbaaron mein sunte ho - kya-kya ho raha hai। din-pratidin bahut jhagda badhta ja raha hai। soot moonjhata hi rehta hai। sab aapas mein ladte-jhagadte, marte hain। taiyaariyaan aisi ho rahi hain, jisse samajh mein aata hai ladaai shuru hui ki hui। duniya nahin jaanti ki yeh kya ho raha hai, kya hone ka hai! tumhaare mein bhi bahut thode hain jo poori reeti samajhte hain aur khushi mein rehte hain। is duniya mein ham baaki thode roz hain। abhi hamko karmaateet avastha mein jaana hai। har ek ko apne liye purooshaartha karna hai। tum to purooshaartha karte ho apne liye। jitna jo karenge utna phal paayenge। apna purooshaartha karna hai aur doosron ko purooshaartha karaana hai। raasta bataana hai। yeh puraani duniya khalaas honi hai। ab baba aaya hua hai nai duniya sthaapan karne, to is vinaash ke pahle tum nai duniya ke liye padhaai padh lo। bhagvaanuvaach main tumko raajayog sikhaata hoon। laadle bachche tumne bhakti bahut ki hai। aadhaakalpa tum raavan raajya mein the na। yeh bhi kisi ko pata nahin ki raam kisko kaha jaata hai? raamraajya ki kaise sthaapna hui? yeh sab tum brahman hi jaante ho। tumhaare mein bhi koi to aise hain jo kuchh bhi nahin jaante hain।

baap ke paas sapoot bachche woh hain jo sabka buddhiyog ek baap ke saath judaate hain। jo serviceable hain, jo achhi reeti padhte hain vo baap ki dil par chadhe hue hain। koi to phir na laayak bhi hote hain, service ke badle disservice karte jo baap se unka buddhiyog tuda dete hain। yeh bhi drama mein noondh hai। drama anusaar yeh hone ka hi hai। jo poora padhte nahin hain woh kya karenge? auron ko bhi kharaab kar denge isliye bachchon ko samjhaaya jaata hai, baap ko follow karo aur jo bhi serviceable bachche hain, baba ki dil par chadhe hue hain unka sang karo। poochh sakte ho kiska sang karen? baba jhat bata denge, inka sang bada achha hai। bahut hain jo sang hi aisa karte hain, jinka rang bhi ulta chadh jaata hai। gaaya bhi jaata hai sang taare kusang bore। kusang laga to ek-dam khatma kar denge। ghar mein bhi daas-daasiyaan chaahiye। praja ke bhi naukar chaakar sab chaahiye na। yeh saari raajdhaani sthaapan ho rahi hai, ismen badi vishaalbuddhi chaahiye isliye behad ka baap mila hai to shreemat le us par chalo। nahin to muphta pad bhrashta ho jaayenge। yeh padhaai haikh ismen abhi fail hue to janma-janmaantar, kalpa-kalpaantar fail hote rahenge। achhi reeti padhenge to kalpa-kalpaantar achhi reeti padhte rahenge। samjha jaata hai yeh poora padhte nahin hain, to kya pad milega? khud bhi samajhte hain, ham service to kuchh karte nahin hain। hamse to hoshiyaar bahut hain, hoshiyaar ko hi bhaashan ke liye bulaate hain। to zaroor jo hoshiyaar hain, oonch pad bhi woh paayenge। ham itni service nahin karte hain to oonch pad pa nahin sakenge। teacher to student ko bhi samajh sakte hain na। roz padhaate hain, register unke paas rehta hai। padhaai ka aur chalan ka bhi register rehta hai। yahaan bhi aise hain, ismen phir mukhya hai yog ki baat। yog achha hai to chalan bhi achhi rahegi। padhaai mein phir kahaan ahankaar aa jaata hai, ismen saari gupta mehnat karni hai yaad ki isliye hi bahuton ki report aati hai ki baba ham yog mein nahin rah sakte। baba ne samjhaaya hai yog akshar nikaal do। baap jisse varsa milta hai, unko tum yaad nahin kar sakte ho! wonder hai। baap kehte hain - he aatmaayen, tum mujh baap ko yaad nahin karte ho, main tumko raasta bataane aaya hoon, tum mujhe yaad karo to is yog agni se paap dagdha ho jaayenge। bhakti maarga mein manushya kitna dhakka khaane jaate hain। kumbha ke mele mein kitna thande paani mein jaakar snaan karte hain। kitni takleeph sahan karte hain। yahaan to koi takleeph nahin। jo first class bachche hain woh ek maashook ke sachche-sachche aashik ban yaad karte rahenge। ghoomne phirne jaate hain to ekaanta mein bageeche mein baithkar yaad karenge। jharmui jhagmui aadi vaartaalaap mein rahne se vaayumandal kharaab hota hai isliye jitna time mile baap ko yaad karne ki practice karo। first class sachche maashook ke aashik bano। baap kehte hain dehdhaari ka photo nahin rakho। sirf ek shivbaaba ka photo rakho, jisko yaad karna hai। agar samjho srishti chakra ko bhi yaad karte rahen to trimoorti aur gole ka chitra first class hai, ismen saara gyaan hai। svadarshan chakradhaari, tumhaara naam arth sahit hai। naya koi bhi naam sune to samajh na sake, yeh tum bachche hi samajhte ho। tumhaare mein bhi koi achhi reeti yaad karte hain। bahut hain jo yaad karte hi nahin। apna khaana hi kharaab kar dete hain। padhaai to badi sahaj hai। baap kehte hain silence se tumko science par vijay paani hai। silence aur science raashi ek hi hai। military mein bhi 3 minute silence karaate hain। manushya bhi chaahte hain hamko shanti mile। abhi tum jaante ho shanti ka sthaan to hai hi brahmaanda। jis brahm mahtatva mein ham aatma itni chhoti bindi rehti hain। woh sab aatmaon ka jhaad to wonderful hoga na। manushya kehte bhi hain bhrikuti ke beech chamakta hai ajab sitaara। bahut chhota sone ka tilak banaae yahaan lagaate hain। aatma bhi bindi hai, baap bhi unke baaju mein aakar baithta hai। saadhu-santa aadi koi bhi apni aatma ko jaante nahin। jabki aatma ko hi nahin jaante to paramatma ko kaise jaan sakte? sirf tum brahman hi aatma aur paramatma ko jaante ho। koi bhi dharma vaala jaan nahin sakta। abhi tum hi jaante ho, kaise itni chhoti si aatma saara part bajaati hai। satsang to bahut karte hain। samajhte kuchh bhi nahin। isne bhi bahut guru kiye। ab baap kehte hain yeh sab hain bhakti maarga ke guru। gyaan maarga ka guru hai hi ek। double sirtaaj raajaaon ke aage single taaj vaale raajaayen maatha jhukaate hain, naman karte hain kyonki woh pavitra hain। un pavitra raajaaon ke hi mandir bane hue hain। patit jaakar unhon ke aage maatha tekte hain parantu unko koi yeh pata thode hi hai ki yeh kaun hain, ham maatha kyon tekte hain? somnaath ka mandir banaaya, ab pooja to karte hain parantu bindi ki pooja kaise karen? bindi ka mandir kaise banega? yeh hai badi guhya baaten। geeta aadi mein thode hi yeh baaten hain। jo khud maalik hai, vahi samjhaate hain। tum abhi jaante ho kaise itni chhoti aatma mein part noondha hua hai। aatma bhi avinaashi hai, part bhi avinaashi hai। wonder hai na। yeh saara bana banaaya khel hai। kehte bhi hain bani banaai ban rahi... drama mein jo noondh hai, woh to zaroor hoga। chinta ki baat nahin।

tum bachchon ko ab apne aapse pratigya karni hai ki kuchh bhi ho jaae - osu nahin bahaayenge। phalaana mar gaya, aatma ne jaakar doosra shareer liya, phir rone ki kya darkaar? vaapis to aa nahin sakte। aansu aaya - naapaas hue isliye baba kehte hain pratigya karo ki ham kabhi royenge nahin। parvaah thi paar brahm mein rahne vaale baap ki, woh mil gaya to baaki kya chaahiye। baap kehte hain tum mujh baap ko yaad karo। main ek hi baar aata hoon - yeh raajdhaani sthaapan karne liye, ismen ladaai aadi ki koi baat nahin। geeta mein dikhaaya hai ladaai lagi, sirf paandav bache। woh kutta saath mein le pahaadon par gal gaye। jeet pahni aur mar gaye। baat hi nahin thaharti। yeh sab hain danta kathaayen। isko kaha jaata hai bhakti maarga।

baap kehte hain tum bachchon ko isse vairaagya hona chaahiye। puraani cheez se naphrat hoti hai na। naphrat kada akshar hai। vairaagya akshar meetha hai। jab gyaan milta hai to phir bhakti ka vairaagya ho jaata hai। satayug treta mein to phir gyaan ki praalabdha 21 janma ke liye mil jaati hai। vahaan gyaan ki darkaar nahin rehti। phir jab tum vaam maarga mein jaate ho to seedhi utarte ho। abhi hai ant। baap kehte hain ab is puraani duniya se tum bachchon ko vairaagya aana hai। tum abhi shoodra se brahman bane ho phir so devta banenge। aur manushya in baaton se kya jaanen। bhal viraat roop ka chitra banaate hain parantu usmein na choti hai, na shiv hai। kah dete hain devta, kshatriy, vaishya, shoodra। bas shoodra se devta kaise kaun banaate hain, yeh kuchh nahin jaante। baap kehte hain tum devi-devta kitne saahookaar the phir woh sab paise kahaan gaye! maatha tekte-tekte tippad ghisaate paisa ganvaaya। kal ki baat hai na। tumko yeh banaakar gaye phir tum kya ban gaye ho! achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jharmui jhagmui (parchintan) ke vaartaalaap se vaataavran kharaab nahin karna hai। ekaanta mein baith sachche-sachche aashik ban apne maashook ko yaad karna hai।

2) apne aap se pratigya karni hai ki kabhi bhi royenge nahin। aankhon se aansu nahin bahaayenge। jo serviceable, baap ki dil par chadhe hue hain unka hi sang karna hai। apna register bahut achha rakhna hai।

vardaan:- powerful vritti dvaara mansa seva karne vaale vishwa kalyaankaari bhav

vishwa ki tadapti hui aatmaon ko raasta bataane ke liye saakshaat baap samaan light house, might house bano। lakshya rakho ki har aatma ko kuchh na kuchh dena hai। chaahe mukti do chaahe jeevanmukti। sarva ke prati mahaadaani aur vardaani bano। abhi apne-apne sthaan ki seva to karte ho lekin ek sthaan par rehte mansa shakti dvaara vaayumandal, vibration dvaara vishwa seva karo। aisi powerful vritti banaao jisse vaayumandal bane - tab kahenge vishwa kalyaankaari aatma।

slogan:- ashareeri pan ki exercise aur vyartha sankalp roopi bhojan ki parhej se svayan ko tandaroosta banaao।

avyakt ishaare - satyata aur sabhyata roopi culture ko apnaao

ab apne bhaashnon ki rooprekha nai karo। vishwa shanti ke bhaashan to bahut kar liye lekin aadhyaatmik gyaan va shakti kya hai aur iska source kaun hai! is satyata ko sabhyataapoorvak siddha karo। sabhi samjhen ki yeh bhagwan ka kaarya chal raha hai। maataayen bahut achha kaarya kar rahi hain - samay pramaan yeh bhi dharni banaani padi lekin jaise father shows san hai, aise san shows father ho tab pratyakshata ka jhanda lahraayega।