Daily Murli for Saturday 21 June 2025

21-06-2025 praatahmurli om shanti "baapdaada"' madhuban

“meethe bachche - tumhein smriti aai ki hamne 84 janmon ka chakra poora kiya, ab jaate hain apne ghar shanti-dhaam, ghar jaane mein baaki thoda samay hai''

prashn:- jin bachchon ko ghar chalne ki smriti rehti hai, unki nishaani kya hogi?

uttar:- woh is puraani duniya ko dekhte hue bhi nahin dekhenge। unhein behad ka vairaagya hoga, dhandhedhori mein rehte bhi halke rahenge। idhar-udhar jharmui-jhagmui ki baaton mein apna samay barbaad nahin karenge। apne ko is duniya mein mehmaan samjhenge।

om shanti। sirf tum sangamayugi brahman bachche hi jaante ho ki ham thode samay ke liye is puraani duniya ke mehmaan hain। tumhaara sachcha ghar hai shantidham। unko hi manushya bahut yaad karte hain, man ko shanti mile। parantu man kya hai, shanti kya hai, hamko milegi kahaan se, kuchh bhi samajhte nahin hain। tum jaante ho abhi apne ghar jaane ke liye baaki thoda samay hai। saari duniya ke manushya maatra nambarvaar vahaan jaayenge। woh hai shantidham aur yeh hai duhkhadhaam। yeh yaad karna to sahaj hai na। koi bhi boodhe ho va javaan ho, yeh to yaad kar sakte ho na। inmen saare srishti ka gyaan aa jaata hai। saari detail buddhi mein aa jaati hai। abhi tum sangamayug par baithe ho, yeh buddhi mein rehta hai ham ja rahe hain shantidham, drama plan anusaar। yeh buddhi mein rahne se tumko khushi hogi, smriti rahegi। hamko apne 84 janmon ki smriti aai hai। woh bhaktimaarga alag hai, yeh hai gyaan maarga ki baaten। baap samjha rahe hain - meethe bachchon, ab apna ghar yaad aata hai? kitna sunte rehte ho, itni dher baaten sunte ho। ek yahi hai ki abhi ham shanti-dhaam jaayenge phir sukhdhaam aayenge। baap aaya hi hai paavan duniya mein le jaane ke liye। sukhdhaam mein bhi aatmaayen sukh aur shanti mein rehti hain। shantidham mein sirf shanti hai, yahaan to bahut hangaama hai na। yahaan madhuban se tum jaayenge apne ghar mein to buddhi jharmui-jhagmui, apne dhandhe aadi taraph chali jaayegi। yahaan to woh jhanjhat nahin rehti। tum jaante ho ham aatmaayen hain hi shantidham ki nivaasi। yahaan ham paartadhaari bane hain, aur koi ko yeh pata nahin ki ham paartadhaari kaise hain! tum bachchon ko hi baap aakar padhaate hain, koton mein koi padhte hain। sab to nahin padhenge। tum abhi kitne samajhdaar bante ho। pahle besmajh the। abhi to dekho ladaai-jhagda aadi kitna hai, inko kya kahenge? ham aapas mein bhaai-bhaai hain, vo bhool gaye hain। bhaai-bhaai kabhi khoon karte hain kya? haan, khoon karte bhi hain to sirf milkiyat ke liye। abhi tum jaante ho - ham sab ek baap ke bachche bhaai-bhaai hain। tum practical mein samajhte ho, ham aatmaon ko baba aakar padhaate hain। 5 hazaar varsha pahle muaaphik hamko padhaate hain kyonki woh gyaan ka saagar hai, is padhaai ko aur koi bhi nahin jaante। yeh bhi tum bachche jaante ho - baap hi svarga ka rachayita hai। srishti ko rachne vaala nahin kahenge। srishti to anaadi hai hi। svarga ko rachne vaala kahenge, vahaan aur koi khanda nahin tha। yahaan to bahut khanda hain। koi samay tha jabki ek hi dharma tha, ek hi khanda tha। peechhe phir variety dharma aaye hain।

abhi buddhi mein baithta hai ki variety dharma kaise aate hain। pahla-pahla aadi sanaatan devi-devta dharma hai, sanaatan dharma bhi yahaan kehte hain। parantu arth to kuchh samajhte nahin। tum sab aadi sanaatan devi-devta dharma ke ho sirf patit ban gaye ho, satopradhaan se sato-rajo-tamo hote gaye ho। tum samajhte ho aadi sanaatan devi-devta dharma ke hain, ham bahut pavitra the, abhi patit bane hain। tumne baap se varsa liya tha, pavitra duniya ke maalik banne ka। samajhte ho ham pahle-pahle pavitra grihastha dharma ke the, abhi drama ke plan anusaar raavan raajya mein ham patit pravritti maarga ke ban gaye hain। tum hi pukaarte ho - he patit-paavan hamko sukhdhaam mein le jaao। kal ki baat hai। kal tum pavitra the, aaj apvitra ban pukaarte ho। aatma patit ho gai hai। aatma pukaarti hai baba aakar hamko phir se paavan banaao। baap kehte hain abhi yeh antim janma pavitra bano phir tum 21 janma ke liye bahut sukhi ho jaayenge। baba to bahut achhi baaten sunaate hain। buri cheez chhudaate hain, tum devta the na। ab phir banna hai। pavitra bano। kitna sahaj hai। kamaai bahut bhaari hai। tum bachchon ki buddhi mein hai shivbaaba aaya hai, har 5 hazaar varsha baad aate hain। puraani duniya se nai hoti hai zaroor। yeh koi aur bata na sake। shaastron mein kaliyug ki aayu bahut lambi kar di hai। yeh hai saari bhaavi drama ki।

abhi tum bachche paapon se mukta hone ka purushaartha karte ho, dhyaan rahe aur koi paap na ho jaaen। deh-abhimaan mein aane se hi phir aur vikaar aate hain, jisse paap hota hai isliye bhooton ko bhagaana padta hai। is duniya ki koi bhi cheez mein moh na ho। is puraani duniya se vairaagya ho। bhal dekhte ho, puraane ghar mein rahe pade ho parantu buddhi nai duniya mein lagi hui hai। jab naye ghar mein jaayenge to naye ko hi dekhenge। jab tak yeh puraana ghar khatma ho tab tak aankhon se puraane ko dekhte hue yaad naye ko karna hai। koi bhi aisa kaam nahin karna hai jo phir pachhtaana pade। aaj phalaane ko duhkh diya, yeh paap kiya, baba se poochh sakte ho baba yeh paap hai? ghutka kyon khaana chaahiye। poochhenge nahin to ghutka khaate rahenge। baba se poochhenge to baba jhat halka kar denge। tum bahut bhaari ho। paapon ka bojha bada bhaari hai। 21 janma phir paapon se halke ho jaayenge। janma-janmaantar ka sir par bojha hai। jitna yaad mein rahenge, halke hote jaayenge। khaad nikalti jaayegi aur khushi chadh jaayegi। satayug mein tum bahut khushi mein the phir kam hote-hote saari khushi tumhaari gum hoti gai hai। satayug se lekar kaliyug tak is journey (yaatra) mein 5 hazaar varsha lage hain। svarga se narka mein aane ki yaatra ka abhi pata laga hai ki ham svarga se narka mein kaise aaye hain। abhi phir tum narka se svarga mein chalte ho। ek second mein jeevanmukti। baap ko pahchaana। baap aaye hain to zaroor hamko svarga mein le jaayenge। bachcha paida hua aur milkiyat ka maalik ban gaya। baap ke bane to phir nasha chadhna chaahiye na। utarna kyon chaahiye। tum to bade ho na। behad baap ke bachche bane ho to behad ki raajdhaani par tumhaara hak hai isliye gaayan bhi hai - ateendriy sukh poochhna ho to gopi vallabh ke gop-gopiyon se poochho। vallabh baap hai na, unse poochho। nambarvaar purushaartha anusaar hi khushi ka paara chadhega। koi to jhat aapasmaan bana denge। bachchon ka kaam hi yeh hai, sab kuchh bhulaae apni raajdhaani ki yaad dilaana।

tum to svarga ke maalik the। abhi kaliyug puraani duniya hai phir nai duniya hogi। abhi tum bachchon ki buddhi mein hai ki har 5 hazaar varsha baad baap bhaarat mein hi aate hain। unki jayanti bhi manaate hain। tum jaante ho baap aakar hamko raajdhaani dekar jaate hain phir yaad karne ki darkaar hi nahin rehti phir jab bhakti shuru hoti hai tab yaad karte hain। aatma ne maal khaaye hain, to yaad karti hai baba phir aakar hamko shantidham, sukhdhaam mein le jaao। abhi tum bachche samajhte ho - woh hamaara baap hai, teacher bhi hai, guru bhi hai। srishti ke aadi-madhya-ant ka chakra, 84 janmon ka gyaan tumhaari buddhi mein hai। anginat baar 84 janma liye hain aur lete rahenge। inka end (ant) kabhi hota nahin hai। tumhaari buddhi mein hi yeh chakra hai, svadarshan chakra ghadi-ghadi yaad aana chaahiye। yahi manamnaabhav hai, jitna baap ko yaad karenge utna paap bhasma honge।

tum jab karmaateet avastha ke sameep pahunch jaayenge to tumse koi bhi vikarma nahin honge। abhi thode-thode vikarma ho jaate hain। sampoorn karmaateet avastha abhi thode hi bani hai। yeh baba bhi tumhaare saath student hai। padhaane vaala hai shiv-baba। bhal inmen pravesh karte hain, yeh bhi student hai। yeh hain nai-nai baaten। ab sirf tum baap ko aur srishti chakra ko yaad karo। woh hai bhakti maarga, yeh hai gyaan maarga। raat-din ka farka hai! vahaan kitne jhaanjh ghante aadi bajaate hain। yahaan sirf yaad mein rehna hai। aatma to amar hai, akaal takhta bhi hai। aise nahin ki akaal moorta sirf baap hai। tum bhi akaal moorta ho। akaal moorta aatma ka yeh bhrikuti takhta hai। zaroor bhrikuti mein hi baithenge। pet mein thode hi baithenge। abhi tum jaante ho ham akaal moorta aatma ka takhta kahaan hai। is bhrakuti ke beech mein hamaara takhta hai। amritsar mein akaaltakhta hai na। arth kuchh bhi nahin samajhte। mahima bhi gaate hain akaalmoorta। unke akaal takhta ka kisko pata nahin hai। abhi tumko maaloom pada hai, takhta to yahi hai, jis par baithkar sunaate hain। to aatma avinaashi hai, shareer hai vinaashi। aatma ka yeh akaaltakhta hai, sadaiv yeh akaaltakhta rehta hai। yeh tum samajhte ho। unhonne phir woh takhta banaakar naam rakh diya hai। vaastav mein akaal aatma to yahaan baithi hai। tum bachchon ki buddhi mein arth hai, ekoankaar. . . inka arth tum samajhte ho। manushya mandiron mein jaakar kehte hain achtam keshvam… arth kuchh nahin। aise hi stuti karte rehte hain। achtam keshvam raam naaraaynam....... ab raam kahaan, naaraayan kahaan। baap kehte hain woh sab hai bhakti maarga। gyaan to bada simple hai, koi aur baat poochhne ke pahle baap aur varse ko yaad karna hai, woh mehnat koi se hoti nahin hai, bhool jaate hain। ek naatak bhi hai - maaya aise karti, bhagwan aise karte hain। tum baap ko yaad karte ho, maaya tumko aur toofaan mein le jaati hai। maaya ka pharmaan hai - roostam se roostam hokar lado, tum sab ladaai ke maidaan mein ho। jaante ho inmen kis-kis prakaar ke yoddhe hain। koi to bahut kamzor hain, koi madhyam kamzor hain, koi to phir teekhe hain। sabhi maaya se yuddha karne vaale hain। gupta hi gupta underground। ve bhi underground bombs ki trial karte hain। yeh bhi tum bachche jaante ho, apni maut ke liye sab kuchh kar rahe hain। tum bilkul shanti mein baithe ho, unka hain science bal। kudarti aapdaayen bhi bahut hain। unmein to koi ka vash chal na sake। abhi jhoothi barsaat ke liye bhi koshish karte hain। jhoothi barsaat pade to phir anaaj jaasti ho। tum bachche to jaante ho kitni bhi barsaat pade phir bhi natural calamities zaroor honi hai। moosaldhaar barsaat padegi phir kya kar sakenge। inko kaha jaata hai natural calamities। satayug mein yeh hoti nahin। yahaan hoti hai jo phir vinaash mein madad karti hai।

tumhaari buddhi mein hai ham jab satayug mein honge to jamuna ke kanthe par sone ke mahal honge। ham bahut thode vahaan ke rahne vaale honge। kalpa-kalpa aise hota rehta hai। pahle thode hote hain phir jhaad badhta hai, vahaan koi bhi gandagi ki cheez hoti hi nahin। yahaan to dekho chidiya bhi ganda karti rehti, vahaan gandagi ki baat nahin, unko kaha hi jaata hai heaven। abhi tum samajhte ho ham yeh devta bante hain to andar mein kitni khushi honi chaahiye। maaya roopi jinna se bachne ke liye baap kehte hain tum bachche is roohaani dhandhe mein lag jaao। manamnaabhav। bas ismen hi jinna ban jaao। jinna ka misaal dete hain na। kaha kaam do.. to baba bhi kaam dete hain। nahin to maaya kha jaayegi। baap ka poora madadgaar banna hai। akela baap to nahin karega। baap to raajya bhi nahin karta hai। tum service karte ho, raajaai bhi tumhaare liye hi hai। baap kehte hain main bhi magadh desh mein aata hoon। maaya bhi magarmachchha hai, kitne mahaarthiyon ko hap kar kha jaati hai। yeh sab hain dushman। jaise medhak ka dushman sarpa hota hai na। tumko maaloom hai, aise tumhaari dushman hai maaya। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan ko paapon se mukta karne ka purushaartha karna hai, deh-abhimaan mein kabhi nahin aana hai। is duniya ki koi bhi cheez mein moh nahin rakhna hai।

2) maaya roopi jinna se bachne ke liye buddhi ko roohaani dhandhe mein busy rakhna hai। baap ka poora-poora madadgaar banna hai।

vardaan:- sarva khajaanon ko samay par use kar nirantar khushi ka anubhav karne vaale khushanseeb aatma bhav

baapdaada dvaara brahman janma hote hi saare din ke liye anek shreshtha khushi ke khajaane praapta hote hain isliye aapke naam se hi ab tak anek bhakta alpakaal ki khushi mein aa jaate hain, aapke jad chitron ko dekhkar khushi mein naachne lagte hain। aise aap sab khushanseeb ho, bahut khajaane mile hain lekin sirf samay par use karo। chaabi ko sada saamne rakho arthaat sada smriti mein rakho aur smriti ko swaroop mein laao to nirantar khushi ka anubhav hota rahega।

slogan:- baap ki shreshtha aashaaon ka deepak jagaane vaale hi kul deepak hain।

avyakt ishaare-aatmik sthiti mein rahne ka abhyaas karo, antarmukhi bano

aatmik sthiti mein rah baaharmukhta ko chhod do to mehnat se chhoot jaayenge aur anubhvon ke saagar mein sama jaayenge। ek do anubhav nahin athaah hain। ek do anubhav karke anubhav ke taalaab mein nahin nahaao। saagar ke bachche anubhvon ke saagar mein sama jaao।