Daily Murli for Thursday 11 September 2025

11-09-2025 praatahmurli om shanti "baapdaada"' madhuban

“meethe bachche - tum saari duniya ke sachche-sachche mitra ho, tumhaari kisi se bhi shatruta nahin honi chaahiye''

prashn:- tum roohaani military ho, tumhein baap ka kaun-sa direction mila hua hai, jise amal mein laana hai?

uttar:- tumhein direction hai ki badge sada lagaakar rakho। koi bhi poochhe yeh kya hai? tum kaun ho? to bolo, ham hain saari duniya se kaam ki agni ko bujhaane vaale fire brigade। is samay saari duniya mein kaam agni lagi hui hai, ham sabko sandesh dete hain ab pavitra bano, daiveegun dhaaran karo to beda paar ho jaayega।

om shanti। meethe-meethe roohaani bachche sahaj yaad mein baithe hain। koi-koi ko difficult lagta hai। bahut moonjhate hain - ham tight athva strik hokar baithen। baap kehte hain aisi koi baat nahin hai, kaise bhi baitho। baap ko sirf yaad karna hai। ismen mushkilaat ki koi baat nahin। woh hathayogi aise tight hokar baithte hain। taang, taang par chadhaate hain। yahaan to baap kehte hain aaraam se baitho। baap ko aur 84 ke chakra ko yaad karo। yeh hai hi sahaj yaad। uthte-baithte buddhi mein rahe। jaise dekho yeh chhota bachcha baap ke baaju mein baitha hai, inko buddhi mein maa-baap hi yaad honge। tum bhi bachche ho na। baap ko yaad karna to bahut sahaj hai। ham baba ke bachche hain। baba se hi varsa lena hai। shareer nirvaah arth grihastha vyavhaar mein bhal raho। sirf auron ki yaad buddhi se nikaal do। koi hanoomaan ko, koi kisko, saadhu aadi ko yaad karte the, woh yaad chhod deni hai। yaad to karte hain na, pooja ke liye pujaari ko mandir mein jaana padta hai, ismen kahaan jaane ki bhi darkaar nahin hai। koi bhi mile bolo, shivbaaba ka kehna hai mujh ek baap ko yaad karo। shivbaaba to hai niraakaar। zaroor woh saakaar mein hi aakar kehte hain maamekam yaad karo। main patit-paavan hoon। yeh to right akshar hai na। baba kehte hain mujhe yaad karo। tum sab patit ho। yeh patit tamopradhaan duniya hai na isliye baba kehte hain koi bhi dehdhaari ko yaad nahin karo। yeh to achhi baat hai na। koi guru aadi ki mahima nahin karte hain। baap sirf kehte hain mujhe yaad karo to tumhaare paap kat jaayenge। yeh hai yogbal athva yog agni। behad ka baap to sach kehte hain na - geeta ka bhagwan niraakaar hi hai। shreekrishna ki baat nahin। bhagwan kehte hain sirf mujhe yaad karo aur koi upaay nahin। paavan hokar jaane se oonch pad paayenge। nahin to kam pad ho jaayega। ham tumko baap ka sandesh dete hain। main sandeshi hoon। is samjhaane mein koi takleeph nahin hai। maataayen, ahilyaayen, kubjaayen bhi oonch pad pa sakti hain। chaahe yahaan rahne vaale hon, chaahe ghar grihastha mein rahne vaale hon, aise nahin ki yahaan rahne vaale jaasti yaad kar sakte hain। baba kehte hain baahar mein rahne vaale bhi bahut yaad mein rah sakte hain। bahut service kar sakte hain। yahaan bhi baap se refresh hokar phir jaate hain to andar mein kitni khushi rahni chaahiye। is chhi-chhi duniya mein to baaki thode roz hain। phir chalenge shreekrishna puri mein। shreekrishna ke mandir ko bhi sukhdhaam kehte hain। to bachchon ko apaar khushi honi chaahiye। jabki tum behad ke baap ke bane ho। tumko hi svarga ka maalik banaaya tha। tum bhi kehte ho baba 5 hazaar varsha pahle bhi ham aapse mile the aur phir milenge। ab baap ko yaad karne se maaya par jeet paani hai। ab is duhkhadhaam mein to rehna nahin hai। tum padhte hi ho sukhdhaam mein jaane ke liye। sabko hisaab kitaab chuktu kar vaapis jaana hai। main aaya hi hoon nai duniya sthaapan karne। baaki sab aatmaayen chali jaayengi muktidhaam। baap kehte hain - main kaalon ka kaal hoon। sabko shareer se chhudaae aur aatmaon ko le jaaoonga। sab kehte bhi hain ham jaldi jaayen। yahaan to rahne ka nahin hai। yeh to puraani duniya, puraana shareer hai। ab baap kehte hain main sabko le jaaoonga। chhodoonga kisko bhi nahin। tum sabne bulaaya hi hai - he patit-paavan aao। bhal yaad karte rehte hain parantu arth kuchh bhi nahin samajhte hain। patit-paavan ki kitni dhun lagaate hain। phir kehte hain raghupti raaghav raaja raam। ab shivbaaba to raaja bante nahin, raajaai karte nahin। unko raaja raam kehna wrong ho gaya। maala jab simarte hain to raam-raam kehte hain। usmein bhagwan ki yaad aati hai। bhagwan to hai hi shiv। manushyon ke naam bahut rakh diye hain। shreekrishna ko bhi shyaam sundar, vaikuntha naath, makkhan chor aadi-aadi bahut naam dete hain। tum abhi shreekrishna ko makkhanchor kahenge? bilkul nahin। tum abhi samajhte ho bhagwan to ek niraakaar hai, koi bhi dehdhaari ko bhagwan kah nahin sakte। brahma, vishnu, shankar ko bhi nahin kah sakte to phir manushya apne ko bhagwan kaise kah sakte। vaijayanti maala sirf 108 ki gaai jaati hai। shivbaaba ne svarga sthaapan kiya, unke yeh maalik hain। zaroor usse pahle unhonne yeh purushaartha kiya hoga। usko kaha jaata hai kaliyug ant satayug aadi ka sangamayug। yeh hai kalpa ka sangamayug। manushyon ne phir yuge-yuge kah diya hai, avtaar naam bhi bhool phir unko thikkar-bhittar mein, kan-kan mein kah diya hai। yeh bhi hai drama। jo baat past ho jaati hai usko kaha jaata hai drama। koi se jhagda aadi hua, paas hua, unka chintan nahin karna hai। achha koi ne kam jaasti bola, tum unko bhool jaao। kalpa pahle bhi aise bola tha। woh baaten yaad rahne se phir bigadte rahenge। woh baat phir kabhi bolo bhi nahin।

tum bachchon ko service to karni hai na। service mein koi vighna nahin padna chaahiye। service mein kamjori nahin dikhaani chaahiye। shiv-baba ki service hai na। unmein kabhi zara bhi na nahin karna chaahiye। nahin to apna pad bhrashta kar denge। baap ke madadgaar bane ho to poori madad deni hai। baap ki service karne mein zara bhi dhokha nahin dena hai। paigaam sabko pahunchaana hi hai। baap kehte rehte hain museum ka naam aisa rakho jo manushya dekh andar ghusen aur aakar samjhen kyonki yeh nai cheez hai na। manushya nai cheez dekh andar ghuste hain। aajkal baahar se aate hain, bhaarat ka praacheen yog seekhne। ab praacheen arthaat puraane te puraana, woh to bhagwan ka hi sikhaaya hua hai, jisko 5 hazaar varsha hue। satayug-treta mein yog hota nahin, jisne sikhaaya woh to chala gaya phir jab 5 hazaar varsha baad aaye tab hi aakar raajayog sikhaaye। praacheen arthaat 5 hazaar varsha pahle bhagwan ne sikhaaya tha। vahi bhagwan phir sangam par hi aakar raajayog sikhlaayenge, jisse paavan ban sakte hain। is samay to tatva bhi tamopradhaan hain। paani bhi kitna nuksaan kar deta hai। upadrav hote rehte hain, puraani duniya mein। satayug mein upadrav ki baat hi nahin। vahaan to prakriti daasi ban jaati hai। yahaan prakriti dushman bankar duhkh deti hai। in lakshmi-naaraayan ke raajya mein duhkh ki baat nahin thi। satayug tha। abhi phir woh sthaapan ho raha hai। baap praacheen raajayog sikha rahe hain। phir 5 hazaar varsha baad sikhaayenge, jiska part hai vahi bajaayenge। behad ka baap bhi part baja rahe hain। baap kehte hain main inmen pravesh kar, sthaapna kar chala jaata hoon। haahaakaar ke baad phir jay jaykaar ho jaati hai। puraani duniya khatma ho jaayegi। in lakshmi-naaraayan ka raajya tha to puraani duniya nahin thi। 5 hazaar varsha ki baat hai। laakhon varsha ki baat ho nahin sakti। to baap kehte hain aur sab baaton ko chhod is service mein lag jaao, apna kalyaan karne। rooth kar service mein dhokha nahin dena chaahiye। yeh hai eeshvareey service। maaya ke toofaan bahut aayenge। parantu baap ki eeshvareey service mein dhokha nahin dena hai। baap service arth direction to dete rehte hain। mitra-sambandhi aadi jo bhi aayen, sabke sachche mitra to tum ho। tum brahmaakumaar-kumaariyaan to saari duniya ke mitra ho kyonki tum baap ke madadgaar ho। mitron mein koi shatruta nahin honi chaahiye। koi bhi baat nikle bolo, shivbaaba ko yaad karo। baap ki shreemat par lag jaana hai। nahin to apna nuksaan kar denge। train mein tum aate ho vahaan to sab free hain। service ka bahut achha chance hai। badge to bahut achhi cheez hai। har ek ko lagaakar rakhna hai। koi poochhe aap kaun ho to bolo, ham hain fire brigade, jaise woh fire brigade hote hain, aag ko bujhaane ke liye। to is samay saari srishti mein kaam agni mein sab jale hue hain। ab baap kehte hain kaam mahaashatru par jeet pahno। baap ko yaad karo, pavitra bano, daivi gun dhaaran karo to beda paar hai। yeh badge shreemat se hi to bane hain। bahut thode bachche hain jo badge par service karte hain। baba murliyon mein kitna samjhaate rehte hain। har ek brahman ke paas yeh badge hona chaahiye, koi bhi mile unko is par samjhaana hai, yeh hai baba, inko yaad karna hai। ham saakaar ki mahima nahin karte। sarva ka sadgati daata ek hi niraakaar baap hai, unko yaad karna hai। yaad ke bal se hi tumhaare paap kat jaayenge। phir ant mati so gati ho jaayegi। duhkhadhaam se chhoot jaayenge। phir tum vishnupuri mein aa jaayenge। kitni badi khushkhabri hai। literature bhi de sakte ho। bolo, tum gareeb ho to free de sakte hain। saahookaaron ko to paisa dena hi chaahiye kyonki yeh to bahut chhapaane hote hain। yeh cheez aisi hai jisse tum phakeer se vishwa ka maalik ban jaayenge। samjhaani to milti rehti hai। koi bhi dharma vaala ho, bolo, vaastav mein tum aatma ho, apne ko aatma samajh baap ko yaad karo। ab vinaash saamne khada hai, yeh duniya badalne vaali hai। shivbaaba ko yaad karenge to vishnupuri mein aa jaayenge। bolo, yeh aapko karodon padmon ki cheez dete hain।

baba ne kitna samjhaaya hai - badge par service karni hai parantu badge lagaate nahin। lajja aati hai। braahmaniyaan jo party lekar aati hain athva kahaan office aadi mein akeli jaati hain, to yeh badge zaroor laga rehna chaahiye, jisko tum in par samjhaayenge woh bahut khush honge। bolo, ham ek baap ko hi maante hain, vahi sabko sukh-shanti dene vaala hai, unko yaad karo। patit aatma to ja na sake। abhi yeh puraani duniya badal rahi hai। aise-aise raaste mein service karte aana chaahiye। tumhaara naam bahut hoga, baba samajhte hain shaayad lajja aati hai jo badge pahan service nahin karte hain। ek to badge, seedhi ka chitra athva trimoorti, gola aur jhaad ka chitra saath mein ho, aapas mein baith ek-do ko samjhaao to sab ikatthe ho jaayenge। poochhenge yeh kya hai? bolo, shivbaaba inke dvaara yeh nai duniya sthaapan kar rahe hain। ab baap kehte hain mujhe yaad karo, pavitra bano। apvitra to vaapas ja nahin sakenge। aisi meethi-meethi baaten sunaani chaahiye। to khushi se sab sunenge। parantu koi ki buddhi mein baithta nahin hai। centre par class mein jaate ho to bhi badge laga rahe। military vaalon ko yahaan billa (badge) laga rehta hai। unko kabhi lajja aati hai kya? tum bhi roohaani military ho na। baap direction dete hain phir amal mein kyon nahin laate। badge laga rahe to shivbaaba ki yaad bhi rahegi - ham shivbaaba ke bachche hain। din-pratidin centres bhi khulte jaayenge। koi na koi nikal aayenge। kahenge phalaane shahar mein aapki braancha nahin hai। bolo, koi prabandha kare makaan aadi ka, nimantran de to ham aakar service kar sakte hain। himmate bachche madde baap, baap to bachchon ko hi kahenge centre kholo, service karo। yeh sab shivbaaba ki dukaan hai na। bachchon dvaara chala rahe hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kabhi aapas mein rooth kar service mein dhokha nahin dena hai। vighna roop nahin banna hai। apni kamjori nahin dikhaani hai। baap ka poora-poora madadgaar banna hai।

2) kabhi koi se jhagda aadi hua, paas hua, unka chintan nahin karna hai। koi ne kam jaasti bola, tum unko bhool jaao। kalpa pahle bhi aise bola tha। woh baat phir kabhi bolo bhi nahin।

vardaan:- shanti ke doot ban sarva ko shanti ka sandesh dene vaale master shanti, shakti daata bhav

aap bachche shanti ke messenger shanti ke doot ho। kahaan bhi rehte sada apne ko shanti ka doot samajhkar chalo। shanti ke doot hain, shanti ka sandesh dene vaale hain isse svayan bhi shant swaroop shaktishaali rahenge aur doosron ko bhi shanti dete rahenge। woh ashaanti den aap shanti do। woh aag lagaayen aap paani daalo। yahi aap shanti ke messenger, master shanti, shakti daata bachchon ka kartavya hai।

slogan:- jaise aavaaj mein aana sahaj lagta hai vaise aavaaj se pare jaana bhi sahaj ho।

avyakt ishaare - ab lagan ki agni ko prajvalit kar yog ko jvaala roop banaao

yog mein sada light house aur might house ki sthiti ka anubhav karo। gyaan hai light aur yog hai might। gyaan aur yog - donon shaktiyaan light aur might sampanna hon - isko kehte hain master sarvashaktimaan। aisi shaktishaali aatmaayen kisi bhi paristhiti ko second mein paar kar leti hain।