Daily Murli for Friday 12 September 2025

12-09-2025 praatahmurli om shanti "baapdaada"' madhuban

“meethe bachche - tumhaari padhaai ka saara madaar hai yog par, yog se hi aatma pavitra banti hai, vikarma vinaash hote hain''

prashn:- kai bachche baap ka bankar phir haath chhod dete hain, kaaran kya hota hai?

uttar:- baap ko poori reeti na pahchaanne ke kaaran, poora nishchaybuddhi na hone ke kaaran 8-10 varsha ke baad bhi baap ko phaarakti de dete hain, haath chhod dete hain। pad bhrashta ho jaata hai। 2- criminal aai hone se maaya ki grahchaari baith jaati hai, avastha neeche oopar hoti rehti hai to bhi padhaai chhoot jaati hai।

om shanti। roohaani bachchon prati roohaani baap samjha rahe hain। abhi samajhte ho ki ham sab roohaani behad ke baap ke bachche hain, inko baapdaada kaha jaata hai। jaise tum roohaani bachche ho vaise yeh (brahma) bhi roohaani bachcha hai shivbaaba ka। shivbaaba ko rath to zaroor chaahiye na isliye jaise tum aatmaon ko organs mile hue hain karma karne ke liye, vaise shivbaaba ka bhi yeh rath hai kyonki yeh karmakshetra hai jahaan karma karna hota hai। woh hai ghar jahaan aatmaayen rehti hain। aatma ne jaana hai hamaara ghar shantidham hai, vahaan yeh khel nahin hota। battiyaan aadi kuchh nahin hoti, sirf aatmaayen rehti hain। yahaan aati hain part bajaane। tumhaari buddhi mein hai - yeh behad ka drama hai। jo actors hain, unhon ki act shuru se lekar ant tak tum bachche nambarvaar purushaartha anusaar jaante ho। yahaan koi saadhu-santa aadi nahin samjhaate hain। yahaan ham bachche behad ke baap paas baithe hain, ab hamko vaapis jaana hai, pavitra to zaroor banna hai aatma ko। aise nahin ki shareer bhi yahaan pavitra banna hai, nahin। aatma pavitra banti hai। shareer to pavitra tab banen jab 5 tatva bhi satopradhaan hon। ab tumhaari aatma purushaartha kar paavan ban rahi hai। vahaan aatma aur shareer donon pavitra hote hain। yahaan nahin ho sakte। aatma pavitra ban jaati hai to phir puraana shareer chhodti hai, phir naye tatvon se naye shareer bante hain। tum jaante ho hamaari aatma behad ke baap ko yaad karti hai va nahin karti hai? yeh to har ek ko apne se poochhna hai। padhaai ka saara madaar hai yog par। padhaai to sahaj hai, samajh gaye hain ki chakra kaise phirta hai, mukhya hai hi yaad ki yaatra। yeh andar gupta hai। dekhne mein thode hi aata hai। baba nahin kah sakte ki yeh bahut yaad karte hain va kam। haan, gyaan ke liye bata sakenge ki yeh gyaan mein bahut teekha hai। yaad ka to kuchh dekhne mein nahin aata hai। gyaan mukh se bola jaata hai। yaad to hai ajpaajaap। jaap akshar bhakti maarga ka hai, jaap maana koi ka naam japna। yahaan to aatma ko apne baap ko yaad karna hai।

tum jaante ho ham baap ko yaad karte-karte pavitra bante-bante muktidhaam-shantidham mein jaakar pahunchenge। aise nahin ki drama se mukta ho jaayenge। mukti ka arth hai - duhkh se mukta ho, shantidham jaae phir sukhdhaam mein aayenge। pavitra jo bante hain woh sukh bhogte hain। apvitra manushya unhon ki khidmat karte hain। pavitra ki mahima hai, ismen hi mehnat hai। aankhen bada dhokha deti hain, gir padte hain। neeche-oopar to sabko hona padta hai। grahchaari sabko lagti hai। bhal baba kehte, bachche bhi samjha sakte hain। phir kehte hain maata guru chaahiye kyonki ab maata guru ka system chalta hai। aage pitaaon ka tha। abhi pahle-pahle kalash maataaon ko milta hai। maataayen majority mein hain, kumaariyaan raakhi baandhati hain, pavitrata ke liye। bhagwan kehte hain kaam mahaashatru hai, is par jeet pahno। raksha bandhan pavitrata ki nishaani hai, vo log raakhi baandhate hain। pavitra to bante nahin hain। woh sab hain artificial raakhi, koi paavan banaane vaale nahin hain ismen to gyaan chaahiye। abhi tum raakhi baandhate ho। arth bhi samjhaate ho। yeh pratigya karaate hain। jaise sikkha logon ko kangan nishaani hoti hai parantu pavitra to bante nahin। patit ko paavan banaane vaala, sarva ka sadgati daata ek hai, woh bhi dehdhaari nahin hai। paani ki ganga to in aankhon se dekhne mein aati hai। baap jo sadgati daata hai, unko in aankhon se nahin dekha jaata। aatma ko koi bhi dekh nahin sakte ki woh kya cheez hai। kehte bhi hain hamaare shareer mein aatma hai, unko dekha hai? kahenge nahin। aur sab cheezen jiska naam hai woh dekhne mein zaroor aati hain। aatma ka bhi naam to hai। kehte bhi hain bhrakuti ke beech chamakta hai ajab sitaara। parantu dekhne mein nahin aate hain। paramatma ko bhi yaad karte hain, dekhne mein kuchh nahin aayega। lakshmi-naaraayan ko dekha jaata hai in aankhon se। ling ki bhal pooja karte hain parantu woh koi yathaartha reeti to nahin hai na। dekhte hue bhi jaante nahin hain, paramatma kya? yeh koi nahin jaan sakte। aatma to bahut chhoti bindi hai। dekhne mein nahin aati hai। na aatma ko, na paramatma ko dekha ja sakta hai, jaana jaata hai।

abhi tum jaante ho hamaara baba aaya hua hai inmen। is shareer ki apni aatma bhi hai, phir parampita paramatma kehte hain - main inke rath par viraajmaan hoon isliye baapdaada kehte ho। ab daada ko to in aankhon se dekhte ho, baap ko nahin dekhte ho। jaante ho baba gyaan ka saagar hai, woh is shareer dvaara hamko gyaan suna rahe hain। woh gyaan ka saagar patit-paavan hai। niraakaar raasta kaise bataayenge? prerna se to koi kaam nahin hota। bhagwan aate hain yeh kisko bhi pata nahin hai। shiv jayanti bhi manaate hain to zaroor yahaan aata hoga na। tum jaante ho abhi woh hamko padha rahe hain। baba ismen aakar padhaate hain। baap ko poori reeti na pahchaanne kaaran, nishchaybuddhi na hone kaaran 8-10 varsha ke baad bhi phaarakti de dete hain। maaya bilkul hi andha bana deti hai। baap ka bankar phir chhod dete hain to pad bhrashta ho jaata hai। ab tum bachchon ko baap ka parichay mila hai to auron ko bhi dena hai। rishi-muni aadi sab neti-neti karte gaye। aage tum bhi jaante nahin the। abhi tum kahenge haan ham jaante hain to aastik ho gaye। srishti ka chakra kaise phirta hai, yeh bhi tum jaante ho। saari duniya aur tum khud is padhaai ke pahle naastik the। ab baap ne samjhaaya hai to tum kehte ho hamko parampita paramatma baap ne samjhaaya hai, aastik banaaya hai। ham rachta aur rachna ke aadi-madhya-ant ko nahin jaante the। baap hai rachta, baap hi sangam par aakar nai duniya ki sthaapna bhi karte hain aur puraani duniya ka vinaash bhi karte hain। puraani duniya ke vinaash ke liye yeh mahaabhaarat ladaai hai, jiske liye samajhte hain, us samay shreekrishna tha। abhi tum samajhte ho - niraakaar baap tha, unko dekha nahin jaata hai। shreekrishna ka to chitra hai, dekha jaata hai। shiv ko dekh nahin sakte। shreekrishna to hai satayug ka prince। vahi features phir ho na saken। shreekrishna bhi kab kaise aaya, yeh bhi koi nahin jaante। shreekrishna ko kans ki jel mein dikhaate hain। kans satayug mein tha kya? yeh ho kaise sakta। kans asur ko kaha jaata hai। is samay saari aasuri sampradaay hai na। ek-do ko maarte-kaatte rehte hain। daivi duniya thi, yeh bhool gaye hain। eeshvareey daivi duniya eeshvar ne sthaapan ki। yeh bhi tumhaari buddhi mein hai - nambarvaar purushaartha anusaar। abhi tum ho eeshvareey parivaar, phir vahaan honge daivi parivaar। is samay eeshvar tumko laayak bana rahe hain svarga ka devi-devta banaane। baap padha rahe hain। is sangamayug ko koi bhi nahin jaante। koi bhi shaastra mein is purushottam yug ki baat nahin hai। purushottam yug arthaat jahaan purushottam banna hota hai। satayug ko kahenge purushottam yug। is samay to manushya purushottam nahin hai। inko to kanishta tamopradhaan kahenge, yeh sab baaten sivaae tum braahmanon ke aur koi nahin samajh sakte। baap kehte hain yeh hai aasuri bhrashtaachaari duniya। satayug mein aisa koi vaataavran nahin hota। woh thi shreshtha-chaari duniya। unhon ke chitra hain। barobar yeh shreshthaachaari duniya ke maalik the। bhaarat ke raajaayen hokar gaye hain jo pooje jaate hain। poojya pavitra the, jo hi phir pujaari bane। pujaari bhakti maarga ko, poojya gyaan maarga ko kaha jaata hai। poojya so pujaari, pujaari phir poojya kaise bante hain। yeh bhi tum jaante ho is duniya mein poojya ek bhi ho na sake। poojya parampita paramatma aur devtaaon ko hi kaha jaata hai। parampita paramatma hai sabka poojya। sab dharma vaale unki pooja karte hain। aise baap ka janma yahaan hi gaaya jaata hai। shiv jayanti hai na। parantu manushyon ko kuchh pata nahin ki unka janma bhaarat mein hota hai, aajkal to shivjayanti ki holy de bhi nahin karte। jayanti manaao, na manaao, tumhaari marji। official holy de nahin hai। jo shivjayanti ko nahin maante hain, woh to apne kaam par chale jaate hain। bahut dharma hain na। satayug mein aisi baaten hoti nahin। vahaan yeh vaataavran hi nahin। satayug hai hi nai duniya, ek dharma। vahaan yeh pata nahin padta ki hamaare peechhe chandravanshi raajya hoga। yahaan tum sab jaante ho - yeh-yeh past ho gaya hai। satayug mein tum honge, vahaan kis past ko yaad karenge? past to hua kaliyug। unki history-geography sunne se kya phaayda।

yahaan tum jaante ho ham baba ke paas baithe hain। baba teacher bhi hai, satguru bhi hai। baap aaye hain sabki sadgati karne। sabhi aatmaon ko zaroor le jaayenge। manushya to deh-abhimaan mein aakar kehte hain, sab mitti mein mil jaana hai। yeh nahin samajhte aatmaayen to chali jaayengi, baaki yeh shareer mitti ke bane hue hain, yeh puraana shareer khatma ho jaata। ham aatma ek shareer chhod doosra jaae leti hain। yeh is duniya mein hamaara antim janma hai, sab patit hain, sadaiv paavan to koi rah nahin sakte। satopradhaan, sato, rajo, tamo hote hi hain। vo log to kah dete sab eeshvar ke hi roop hain, eeshvar ne apne anek roop banaaye hain, khelpaal karne ke liye। hisaab-kitaab kuchh nahin jaante। na khelpaal karne vaale ko jaante hain। baap hi baithkar world ki history-geography samjhaate hain। khel mein har ek ka part alag-alag hai। sabka position alag-alag hai, jo jaisa position vaala hota hai, unki mahima hoti hai। yeh sab baaten baap sangam par hi samjhaate hain। satayug mein phir satayug ka part chalega। vahaan yeh baaten nahin hogi। yahaan tumko srishti chakra ka gyaan buddhi mein phirta rehta hai। tumhaara naam hi hai svadarshan chakradhaari। lakshmi-naaraayan ko thode hi svadarshan chakra diya jaata hai। yeh hain hi yahaan ke। mool vatan mein sirf aatmaayen rehti hain, sookshm vatan mein kuchh nahin। manushya, jaanvar, pashu pakshi aadi sab yahaan hote hain। satayug mein mor aadi dikhaate hain। aise nahin ki vahaan mor ke pankh nikaal pahante hain, mor ko thode hi duhkh denge। aise bhi nahin mor ka gira hua pankh taaj mein lagaayenge। nahin, taaj mein bhi jhoothi nishaani de di hai। vahaan sab khoobsoorat cheejen hoti hain। gandi koi cheez ka naam-nishaan nahin। aisi koi cheez nahin hoti jisko dekhkar ghrina aaye। yahaan to ghrina aati hai na। vahaan jaanavron ko bhi duhkh nahin hota hai। satayug kitna first class hoga। naam hi hai svarga, heaven, nai duniya। yahaan to puraani duniya mein dekho barsaat ke kaaran makaan girte rehte hain। manushya mar jaate hain। earthquake hogi sab dabkar mar jaayenge। satayug mein bahut thode hoge phir baad mein vriddhi ko paate rahenge। pahle sooryavanshi honge। jab duniya 25 percent puraani hogi to peechhe chandravanshi honge। satayug 1250 varsha hai, woh hai 100 percent nai duniya। jahaan devi-devta raajya karte hain। tumhaare mein bhi bahut in baaton ko bhool jaate hain। raajdhaani to sthaapan honi hi hai। heartfail nahin hona hai। purushaartha ki baat hai। baap sabhi bachchon se ek samaan tadbeer (purushaartha) karaate hain। tum apne liye vishwa par svarga ki baadshaahi sthaapan karte ho। apne ko dekhna hai ham kya banenge? achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is purushottam yug mein svarga ke devi-devta banne ki padhaai padhkar svayan ko laayak banaana hai। purushaartha mein heartfail (dilshikasta) nahin hona hai।

2) is behad ke khel mein har actor ka part aur position alag-alag hai, jaisi jiski position vaisa use maan milta hai, yeh sab raaz samajh world ki history-geography ka simran kar svadarshan chakradhaari banna hai।

vardaan:- baap ki har shreemat ka paalan karne vaale sachche snehi aashik bhav

jo bachche sada ek baap ke sneh mein lavleen rehte hain, unhein baap ka har bol pyaara lagta hai, question samaapta ho jaate hain। brahman janma ka foundation sneh hai। jo snehi aashik aatmaayen hain unhein baap ki shreemat paalan karne mein mushkil ka anubhav nahin hota hai। sneh ke kaaran sada yahi umang rehta ki baba ne jo kaha hai woh mere prati kaha hai - mujhe karna hai। snehi aatmaayen badi dil vaali hoti hain, isliye unke liye har badi baat bhi chhoti ho jaati hai।

slogan:- koi bhi baat ko feel karna - yeh bhi fail ki nishaani hai।

avyakt ishaare - ab lagan ki agni ko prajvalit kar yog ko jvaala roop banaao

jvaala swaroop ki sthiti ka anubhav karne ke liye nirantar yaad ki jvaala prajvalit rahe। iski sahaj vidhi hai - sada apne ko “saarthi'' aur “saakshi'' samajhkar chalo। aatma is rath ki saarthi hai - yeh smriti svatah hi is rath (deh) se va kisi bhi prakaar ke dehbhaan se nyaara bana deti hai। svayan ko saarthi samajhne se sarva karmendriyaan apne control mein rehti hain। sookshm shaktiyaan “man-buddhi-sanskaar'' bhi order pramaan rehte hain।