Daily Murli for Monday 29 September 2025

29-09-2025 praatahmurli om shanti "baapdaada"' madhuban

“meethe bachche - baap aaye hain tumhein gyaan ka teesra netra dene, jisse tum srishti ke aadi-madhya-ant ko jaante ho''

prashn:- sherni shaktiyaan hi kaun si baat himmat ke saath samjha sakti hain?

uttar:- doosre dharma vaalon ko yeh baat samjhaana hai ki baap kehte hain tum apne ko aatma samjho, paramatma nahin। aatma samajhkar baap ko yaad karo to vikarma vinaash honge aur tum muktidhaam mein chale jaayenge। paramatma samajhne se tumhaare vikarma vinaash nahin ho sakte। yeh baat bahut himmat se sherni shaktiyaan hi samjha sakti hain। samjhaane ka bhi abhyaas chaahiye।

geet:- nayan heen ko raah dikhaao…

om shanti। bachche anubhav kar rahe hain - roohaani yaad ki yaatra mein kathinaai dekhne mein aati hai। bhakti maarga mein dar-dar thokren khaani hi hoti hain। anek prakaar ke jap-tap-yagya karte, shaastra aadi padhte hain, jis kaaran hi brahma ki raat kaha jaata hai। aadhaakalpa raat, aadhaakalpa din। brahma akela to nahin hoga na। prajaapita brahma hai to zaroor unke bachche kumaar-kumaariyaan bhi honge। parantu manushya nahin jaante hain। baap hi bachchon ko gyaan ka teesra netra dete hain, jisse tumko srishti ke aadi-madhya-ant ka gyaan mila hua hai। tum kalpa pahle bhi brahman the aur devta bane the, jo bane the vahi phir banenge। aadi sanaatan devi-devta dharma ke tum ho। tum hi poojya aur pujaari bante ho। angreji mein poojya ko varshipvardi (Worshipworthy) aur pujaari ko varshipar (Worshiper) kaha jaata hai। bhaarat hi aadhaakalpa pujaari banta hai। aatma maanti hai ham poojya the phir ham hi pujaari bane hain। poojya se pujaari phir poojya bante hain। baap to poojya pujaari nahin bante। tum kahenge ham poojya paavan so devi-devta the phir 84 janmon ke baad complete patit pujaari ban jaate hain। abhi bhaaratvaasi jo aadi sanaatan devi-devta dharma vaale the, unhon ko apne dharma ka kuchh bhi pata nahin hai। tumhaari in baaton ko sab dharma vaale nahin samjhenge, jo is dharma ke kahaan convert ho gaye honge, vahi aayenge। aise convert to bahut ho gaye hain। baap kehte hain jo shiv aur devtaaon ke pujaari hain, unko sahaj hai। anya dharma vaale maatha khapaayenge, jo convert hoga unko touch hoga। aur aakar samajhne ki koshish karenge। nahin to maanenge nahin। aarya samaajiyon mein se bhi bahut aaye hue hain। sikkha log bhi aaye hue hain। aadi sanaatan devi-devta dharma vaale jo convert ho gaye hain, unko apne dharma mein zaroor aana padega। jhaad mein bhi alag-alag section hain। phir aayenge bhi nambarvaar। taal-taaliyaan nikalti rahengi। woh pavitra hone kaaran unhon ka prabhaav achha nikalta hai। is samay devi-devta dharma ka foundation hai nahin jo phir lagaana padta hai। behen-bhaai to banaana hi pade। ham ek baap ke bachche sab aatmaayen bhaai-bhaai hain। phir bhaai-behen bante hain। ab jaise ki nai srishti ki sthaapna ho rahi hai, pahle-pahle hain brahman। nai srishti ki sthaapna mein prajaapita brahma to zaroor chaahiye। brahma dvaara brahman honge। inko roodra gyaan yagya bhi kaha jaata hai, ismen brahman zaroor chaahiye। prajaapita brahma ki aulaad zaroor chaahiye। woh hai great-great grand father। brahman hain pahle number mein choti vaale। Adam beebi, Adam Eve ko maante bhi hain। is samay tum pujaari se poojya ban rahe ho। tumhaara sabse achha yaadgaar mandir delvaada mandir hai। neeche tapasya mein baithe hain, oopar mein raajaai aur yahaan tum chaitanya mein baithe ho। yeh mandir khalaas ho jaayenge phir bhakti maarga mein banenge।

tum jaante ho abhi ham raajayog seekh rahe hain phir nai duniya mein jaayenge। woh jad mandir, tum chaitanya mein baithe ho। mukhya mandir yeh theek bana hua hai। svarga ko nahin to kahaan dikhaayen, isliye chhat mein svarga ko dikhaaya hai। is par bahut achha samjha sakte ho। bolo, bhaarat hi svarga tha phir ab bhaarat narka hai। is dharma vaale jhat samjhenge। hinduon mein bhi dekhenge to anek prakaar ke dharmon mein jaakar pade hain। tumko bahut mehnat karni padti hai nikaalne mein। baba ne samjhaaya hai apne ko aatma samajh maamekam yaad karo, bas, aur kuchh baat hi nahin karna chaahiye। jinka abhyaas nahin, unko to baat karni bhi nahin chaahiye। nahin to bi.ke. ka naam badnaam kar dete hain। agar doosre dharma vaale hain to samjhaana chaahiye ki yadi tum muktidhaam mein jaana chaahte ho to apne ko aatma samjho, baap ko yaad karo। apne ko paramatma nahin samjho। apne ko aatma samajh baap ko yaad karenge to tumhaare janma-janmaantar ke paap kat jaayenge aur muktidhaam mein chale jaayenge। tumhaare liye yeh manamnaabhav ka mantra hi bas hai। parantu baat karne ki himmat chaahiye। sherni shaktiyaan hi service kar sakti hain। sannyaasi log baahar mein jaakar vilaayat vaalon ko le aate hain ki chalo tumko spiritual knowledge deven। ab woh baap ko to jaante hi nahin। brahm ko bhagwan samajh kah dete, isko yaad karo। bas yeh mantra de dete hain, jaise kisi chidiya ko apne pinjade mein daal dete hain। to aise-aise samjhaane mein bhi time lagta hai। baba ne kaha tha - har ek chitra ke oopar likha hua ho shiv bhagvaanuvaach।

tum jaante ho is duniya mein dhani bigar sab nidhanke hain। pukaarte hain tum maat-pita.... achha unka arth kya? aise hi bolte rehte tumhaari kripa se sukh ghanere। ab baap tumko svarga ke sukh ke liye padha rahe hain, jiske liye tum purushaartha kar rahe ho। jo karega woh paayega। is samay to sab patit hain। paavan duniya to ek svarga hi hai, yahaan koi bhi satopradhaan ho na sake। satayug mein jo satopradhaan the, vahi tamopradhaan patit ban jaate hain। Christ ke pichhaadi jo unke dharma vaale aate hain, woh to pahle satopradhaan honge na। jab laakhon ki andaaj mein hote ho tab lashkar taiyaar hota hai, ladkar baadshaahi lene। unko sukh bhi kam to duhkh bhi kam। tumhaare jaisa sukh to kisko mil na sake। tum abhi taiyaar ho rahe ho - sukhdhaam mein aane ke liye। baaki sab dharma koi svarga mein thode hi aate hain। bhaarat jab svarga tha to un jaisa paavan khanda koi hota nahin। jab baap aate hain tab hi eeshvareey raajya sthaapan hota hai। vahaan ladaai aadi ki baat nahin। ladna-jhagadna to bahut peechhe shuru hota hai। bhaaratvaasi itna nahin lade hain। thode aapas mein ladkar alag ho gaye hain। dvaapar mein ek-do par chadhaai karte hain। yeh chitra aadi banaane mein bhi badi buddhi chaahiye। yeh bhi likhna chaahiye ki bhaarat jo svarga tha so phir narka jaisa kaise bana hai, aakar samjho। bhaarat sadgati mein tha, ab durgati mein hai। ab sadgati ko paane ke liye baap hi knowledge dete hain। manushyon mein yeh roohaani knowledge hoti nahin। yeh hoti hai parampita paramatma mein। baap yeh knowledge dete hain aatmaon ko। baaki to sab manushya, manushyon ko hi dete hain। shaastra bhi manushyon ne likhe hain, manushyon ne padhe hain। yahaan to tumhein roohaani baap padhaate hain aur rooh padhti hai। padhne vaali to aatma hai na। woh likhne aur padhne vaale manushya hi hain। paramatma ko to shaastra aadi padhne ki darkaar nahin। baap kehte hain in shaastron aadi se kiski bhi sadgati ho nahin sakti। mujhe hi aakar sabko vaapas le jaana hai। abhi to duniya mein karodon manushya hain। satayug mein jab in lakshmi-naaraayan ka raajya tha to vahaan 9 laakh hote hain। bahut chhota jhaad hoga। phir vichaar karo itni sab aatmaayen kahaan gai? brahm mein va paani mein to nahin leen ho gai। woh sab muktidhaam mein rehti hain। har ek aatma avinaashi hai। unmein avinaashi part noondha hua hai jo kabhi mit nahin sakta। aatma vinaash ho na sake। aatma to bindi hai। baaki nirvaan aadi mein koi bhi jaata nahin, sabko part bajaana hi hai। jab sab aatmaayen aa jaati hain tab main aakar sabko le jaata hoon। pichhaadi mein hai hi baap ka part। nai duniya ki sthaapna phir puraani duniya ka vinaash। yeh bhi drama mein noondh hai। tum aarya samaajiyon ke jhunda ko samjhaayenge to usmein jo koi is devta dharma ka hoga unko touch hoga। barobar yeh baat to theek hai, paramatma sarvavyaapi kaise ho sakta। bhagwan to baap hai, unse varsa milta hai। koi aarya samaaji bhi tumhaare paas aate hain na। unko hi sapling kaha jaata hai। tum samjhaate raho phir tumhaare kul ka jo hoga woh aa jaayega। bhagwan baap hi paavan hone ki yukti bataate hain। bhagvaanuvaach maamekam yaad karo। main patit-paavan hoon, mujhe yaad karne se tumhaare vikarma vinaash honge aur muktidhaam mein aa jaayenge। yeh paigaam sab dharma vaalon ke liye hai। bolo, baap kehte hain deh ke sab dharma chhod mujhe yaad karo to tum tamopradhaan se satopradhaan ban jaayenge। main gujraati hoon, phalaana hoon - yeh sab chhodo। apne ko aatma samjho aur baap ko yaad karo। yeh hai yog agni। sambhaal kar kadam uthaana hai। sab nahin samjhenge। baap kehte hain - patit-paavan main hi hoon। tum sab ho patit, nirvaandhaam mein bhi paavan hone bigar aa na saken। rachna ke aadi-madhya-ant ko bhi samajhna hai। poora samajhne se hi oonch pad paayenge। thodi bhakti ki hogi to thoda gyaan samjhenge। bahut bhakti ki hogi to bahut gyaan uthaayenge। baap jo samjhaate hain usko dhaaran karna hai। vaanaprasthiyon ke liye aur hi sahaj hai। grihastha vyavhaar se kinaara kar lete hain। vaanaprastha avastha 60 varsha ke baad hoti hai। guru bhi tab karte hain। aajkal to chhotepan mein hi guru kara dete hain। nahin to pahle baap, phir teacher phir 60 varsha ke baad guru kiya jaata। sadgati daata to ek hi baap hai, yeh anek guru log thode hi hain। yeh to sab paise kamaane ki yuktiyaan hain, satguru hai hi ek - sabki sadgati karne vaala। baap kehte hain main tumko sab vedon-shaastron ka saar samjhaata hoon। yeh sab hai bhakti maarga ki saamagri। seedhi utarna hota hai। gyaan, bhakti phir bhakti ka hai vairaagya। jab gyaan milta hai tab hi bhakti ka vairaagya hota hai। is puraani duniya se tumko vairaagya hota hai। baaki duniya ko chhod kahaan jaayenge? tum jaante ho yeh duniya hi khatma honi hai isliye ab behad ki duniya ka sannyaas karna hai। pavitra banne bigar ghar ja na saken। pavitra banne ke liye yaad ki yaatra chaahiye। bhaarat mein rakta ki nadiyaan hone ke baad phir doodh ki nadiyaan bahengi। vishnu ko bhi ksheer saagar mein dikhaate hain। samjhaaya jaata hai - is ladaai se mukti-jeevanmukti ke get khulte hain। jitna tum bachche aage badhenge utna hi aavaaz nikalta rahega। ab ladaai lagi ki lagi। ek chingaari se dekho aage kya hua tha। samajhte hain ki ladenge zaroor। ladaai chalti hi rehti hai। ek-do ke madadgaar bante rehte hain। tumko bhi nai duniya chaahiye to puraani duniya zaroor khatma honi chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yeh puraani duniya ab khatma honi hai isliye is duniya ka sannyaas karna hai। duniya ko chhodkar kahaan jaana nahin hai, lekin ise buddhi se bhoolna hai।

2) nirvaandhaam mein jaane ke liye poora paavan banna hai। rachna ke aadi-madhya-ant ko poora samajhkar nai duniya mein oonch pad paana hai।

vardaan:- kisi bhi aatma ko praaptiyon ki anubhooti karaane vaale yathaartha sevaadhaari bhav

yathaartha seva bhaav arthaat sada har aatma ke prati shubh bhaavna, shreshtha kaamna ka bhaav। seva bhaav arthaat har aatma ko bhaavna pramaan phal dena। seva arthaat kisi bhi aatma ko praapti ka meva anubhav karaana। aisi seva mein tapasya saath-saath hai। jahaan yathaartha seva bhaav hai vahaan tapasya ka bhaav alag nahin। jis seva mein tyaag tapasya nahin woh hai naamdhaari seva, isliye tyaag tapasya aur seva ke combined roop dvaara sachche yathaartha sevaadhaari bano।

slogan:- namrata aur dhairyata ka gun dhaaran karo to krodhaagni bhi shant ho jaayegi।

avyakt ishaare - ab lagan ki agni ko prajvalit kar yog ko jvaala roop banaao

abhi nirbhay jvaalaamukhi ban prakriti aur aatmaon ke andar jo tamogun hai use bhasma karo। tapasya arthaat jvaala swaroop yaad, is yaad dvaara hi maaya va prakriti ka vikraal roop sheetal ho jaayega। aapka teesra netra, jvaalaamukhi netra maaya ko shaktiheen kar dega।