Daily Murli for Thursday 13 November 2025

13-11-2025 praatahmurli om shanti "baapdaada"' madhuban

“meethe bachche - tumne duhkh sahan karne mein bahut time vesta kiya hai, ab duniya badal rahi hai, tum baap ko yaad karo, satopradhaan bano to time saphal ho jaayega''

prashn:- 21 janmon ke liye lottery praapta karne ka purushaartha kya hai?

uttar:- 21 janmon ki lottery leni hai to mohjeet bano। ek baap par poora-poora kurbaan jaao। sada yeh smriti mein rahe ki ab yeh puraani duniya badal rahi hai, ham nai duniya mein ja rahe hain। is puraani duniya ko dekhte bhi nahin dekhna hai। sudaama misal chaaval mutthi saphal kar satayugi baadshaahi leni hai।

om shanti। roohaani bachchon prati roohaani baap baith samjhaate hain, yeh to bachche samajhte hain, roohaani bachche maana aatmaayen। roohaani baap maana aatmaon ka baap। isko kaha jaata hai aatmaon aur paramatma ka milan। yeh milan hota hi hai ek baar। yeh sab baaten tum bachche jaante ho। yeh hai vichitra baat। vichitra baap vichitra aatmaon ko samjhaate hain। vaastav mein aatma vichitra hai, yahaan aakar chitradhaari banti hai। chitra se part bajaati hai। aatma to sabmen hai na। jaanvar mein bhi aatma hai। 84 laakh kehte hain, usmein to sab jaanvar aa jaate hain na। dher jaanvar aadi hain, baap samjhaate hain in baaton mein time vesta nahin karna hai। sivaae is gyaan ke manushyon ka time vesta hota rehta hai। is samay baap tum bachchon ko baith padhaate hain phir aadhaakalpa tum praalabdha bhogte ho। vahaan tumko koi takleeph nahin hoti hai। tumhaara time vesta hota hi hai duhkh sahan karne mein। yahaan to duhkh hi duhkh hai isliye sab baap ko yaad karte hain ki hamaara duhkh mein time vesta hota hai, isse nikaalo। sukh mein kabhi time vesta nahin kahenge। yeh bhi tum samajhte ho - is samay manushya ki koi value nahin hai। manushya dekho achaanak hi mar padte hain। ek hi toofaan mein kitne mar jaate hain। raavan raajya mein manushya ki koi value nahin hai। abhi baap tumhaari kitni value banaate hain। worth not A penny se worth pound banaate hain। gaaya bhi jaata hai heere jaisa janma amolak। is samay manushya kaudi pichhaadi lage hue hain। karke lakhapti, karodapti, padmapti bante hain, unhon ki saari buddhi usmein hi rehti hai। unko kehte hain - yeh sab bhool ek baap ko yaad karo parantu maanenge hi nahin। unki buddhi mein baithega, jinki buddhi mein kalpa pahle bhi baitha hoga। nahin to kitna bhi samjhaao, kabhi buddhi mein baithega nahin। tum bhi nambarvaar jaante ho ki yeh duniya badal rahi hai। baahar mein bhal tum likh do ki duniya badal rahi hai phir bhi samjhenge nahin। jab tak tum kisko samjhaao। achha, koi samajh jaae phir unko samjhaana pade - baap ko yaad karo, satopradhaan bano। knowledge to bahut sahaj hai। yeh sooryavanshi-chandravanshi…। abhi yeh duniya badal rahi hai, badlaane vaala ek hi baap hai। yeh bhi tum yathaartha reeti jaante ho so bhi nambarvaar purushaartha anusaar। maaya purushaartha karne nahin deti phir samajhte hain yeh bhi drama anusaar itna purushaartha nahin chalta hai। abhi tum bachche jaante ho ki shreemat se ham apne liye is duniya ko badla rahe hain। shreemat hai hi ek shivbaaba ki। shivbaaba, shivbaaba kehna to bahut sahaj hai aur koi na shivbaaba ko, na varse ko jaante hain। baba maana hi varsa। shivbaaba bhi sachcha chaahiye na। aajkal to mayor ko bhi father kah dete hain। gaandhi ko bhi father kehte hain, koi ko phir jagadguru kah dete hain। ab jagat maana saari srishti ka guru। woh koi manushya ho kaise sakta! jabki patit-paavan sarva ka sadgati daata ek hi baap hai। baap to hai niraakaar phir kaise liberate karte hain? duniya badalti hai to zaroor act mein aayenge tab to pata padega। aise nahin ki pralay ho jaati hai, phir baap nai srishti rachte hain। shaastron mein dikhaaya hai bahut badi pralay hoti hai, phir peepal ke patte par krishna aata hai। parantu baap samjhaate hain aise to hai nahin। gaaya jaata hai world ki history-geography repeat to pralay ho na sake। tumhaare dil mein hai ki abhi yeh puraani duniya badal rahi hai। yeh sab baaten baap hi aakar samjhaate hain। yeh lakshmi-naaraayan hain nai duniya ke maalik। tum chitron mein bhi dikhlaate ho ki puraani duniya ka maalik hai raavan। raam raajya aur raavan raajya gaaya jaata hai na। yeh baaten tumhaari buddhi mein hain ki baba puraani aasuri duniya ko khatma kar nai daivi duniya sthaapan kara rahe hain। baap kehte hain main jo hoon, jaisa hoon, koi virla hi samajhte hain। woh bhi tum nambarvaar purushaartha anusaar jaante ho jo achhe purushaarthi hain unko bada achha nasha rehta hai। yaad ke purushaarthi ko real nasha chadhega। 84 ke chakra ki knowledge samjhaane mein itna nasha nahin chadhta jitna yaad ki yaatra mein chadhta hai। mool baat hai hi paavan banne ki। pukaarte bhi hain - aakar paavan banaao। aisa nahin pukaarte ki aakar vishwa ki baadshaahi do। bhakti maarga mein kathaayen bhi kitni sunte hain। sachchi-sachchi satya naaraayan ki katha to yeh hai। woh kathaayen to janma-janmaatar sunte-sunte neeche hi utarte aaye ho। bhaarat mein hi yeh kathaayen sunne ka rivaaj hai, aur koi khanda mein kathaayen aadi nahin hoti। bhaarat ko hi religious maante hain। dher ke dher mandir bhaarat mein hain। Christian ki to ek hi church hoti hai। yahaan to kisma-kisma ke dher mandir hain। vaastav mein ek hi shivbaaba ka mandir hona chaahiye। naam bhi ek ka hona chaahiye। yahaan to dher naam hain। vilaayat vaale bhi yahaan mandir dekhne aate hain। bichaaron ko yeh pata nahin ki praacheen bhaarat kaisa tha? 5 hazaar varsha se to puraani koi cheez hoti nahin। woh to samajhte hain ki laakhon varsha ki puraani cheez mili। baap samjhaate hain yeh mandir mein chitra aadi jo bane hain unko 2500 varsha hi hue hain, pahle-pahle shiv ki hi pooja hoti hai। woh hai avyabhichaari pooja। vaise hi avyabhichaari gyaan bhi kaha jaata hai। pahle avyabhichaari pooja, phir hai vyabhichaari pooja। ab to dekho paani, mitti ki pooja karte rehte hain।

abhi behad ka baap kehte hain tumne kitna dhan bhakti maarga mein ganvaaya hai। kitne athaah shaastra, athaah chitra hain। geetaayen kitni dher ki dher hongi। in sab par kharcha karte-karte dekho tum kya ho gaye ho। kal tumko double sirtaaj banaaya tha phir tum kitne kangaal ho gaye ho। kal ki hi to baat hai na। tum bhi samajhte ho barobar hamne 84 ka chakra lagaaya hai। abhi ham phir se yeh ban rahe hain। baba se varsa le rahe hain। baba ghadi-ghadi taakeed karte (purushaartha karaate) hain, geeta mein bhi akshar hai manamna-bhav। koi-koi akshar theek hain। ‘praayah' kaha jaata hai na, yaani devi-devta dharma hai nahin, baaki chitra hain। tumhaara yaadgaar dekho kaise achha banaaya hua hai। tum samajhte ho abhi ham phir se sthaapna kar rahe hain। phir bhakti maarga mein hamaare hi accurate yaad-gaar banenge। earthquake aadi hoti hai, usmein sab khatma ho jaata hai। phir vahaan sab tum naya banaayenge। hunar to vahaan rehta hai na। heere kaatne ka bhi hunar (kala) hai। yahaan bhi heeron ko kaatte hain phir banaate hain। heere kaatne vaale bhi bade expert hote hain। woh phir vahaan jaayenge। vahaan yeh sab hunar jaayega। tum jaante ho vahaan kitna sukh hoga। in lakshmi-naaraayan ka raajya tha na। naam hi hai svarga। 100 percent solvent। abhi to hai insolvent। bhaarat mein javaahraat ka bahut fashion hai, jo parampara chala aata hai। to tum bachchon ko kitni khushi rahni chaahiye। tum jaante ho yeh duniya badal rahi hai। ab svarga ban raha hai, uske liye hamko pavitra zaroor banna hai। daivi gun bhi dhaaran karne hain isliye baba kehte hain chart zaroor likho। ham aatma ne koi aasuri act to nahin kiya? apne ko aatma pakka samjho। is shareer se koi vikarma to nahin kiya? agar kiya to register kharaab ho jaayega। yeh hai 21 janmon ki lottery। yeh bhi race hai। ghode ki daud hoti hai na। isko kehte hain raajasva ashvamedh........ svaraajya ke liye ashva yaani tum aatmaon ko daudi lagaani hai। ab vaapis ghar jaana hai। usko sweet silence hom kaha jaata hai। yeh akshar tum abhi sunte ho। ab baap kehte hain bachche khoob mehnat karo। raajaai milti hai, kam baat thode hi hai। main aatma hoon, hamne itne janma liye hain। ab baap kehte hain tumhaare 84 janma poore hue। ab phir pahle number se shuru karna hai। naye mahlon mein zaroor bachche hi baithenge। puraane mein to nahin baithenge। aise to nahin, khud puraane mein baithe aur naye mein kiraaye vaalon ko bithaayenge। tum jitni mehnat karenge, nai duniya ke maalik banenge। naya makaan banta hai to dil hoti hai puraane ko chhod naye mein baithen। baap bachchon ke liye naya makaan banaate hi tab hain jab pahla makaan puraana hota hai। vahaan kiraaye par dene ki to baat hi nahin। jaise vo log moon par plat lene ki koshish karte hain, tum phir svarga mein plat le rahe ho। jitna-jitna gyaan aur yog mein rahenge utna pavitra banenge। yeh hai raajayog, kitni badi raajaai milegi। baaki yeh jo moon aadi par plat dhoondhate rehte hain woh sab vyartha hai। yahi cheezen jo sukh dene vaali hain vahi phir vinaash karne, duhkh dene vaali ban jaayengi। aage chalkar lashkar aadi sab kam ho jaayega। bombs se hi phataaphat kaam hota jaayega। yeh drama bana hua hai, samay par achaanak vinaash hota hai। phir sipaahi aadi bhi mar jaate hain। tum ab pharishte ban rahe ho। tum jaante ho hamaare khaatir vinaash hota hai। drama mein part hai, puraani duniya khalaas ho jaati hai। jo jaisa karma karte hain aisa to bhogna hai na। ab samjho sannyaasi achhe hain, janma to phir bhi grihasthiyon paas lenge na। shreshtha janma to tumko nai duniya mein milna hai, phir bhi sanskaar anusaar jaakar woh banenge। tum abhi sanskaar le jaate ho nai duniya ke liye। janma bhi zaroor bhaarat mein lenge। jo bahut achhe religious minded honge unke paas janma lenge kyonki tum karma hi aise karte ho। jaise-jaise sanskaar, us anusaar janma hota hai। tum bahut oonch kul mein jaakar janma lenge। tumhaare jaisa karma karne vaala to koi hoga nahin। jaisi padhaai, jaisi service, vaisa janma। marna to bahuton ko hai। pahle receive karne vaale bhi jaane hain। baap samjhaate hain ab yeh duniya badal rahi hai। baap ne to saakshaatkaar karaaya hai। baba apna bhi misaal bataate hain। dekha 21 janmon ke liye raajaai milti hai, uske aage yeh 10-20 laakh kya hain। alpha ko mili baadshaahi, be ko mili gadaai। bhaageedaar ko kah diya jo chaahiye so lo। koi bhi takleeph nahin hui। bachchon ko bhi samjhaaya jaata hai - baba se tum kya lete ho? svarga ki baadshaahi। jitna ho sake centres kholte jaao। bahuton ka kalyaan karo। tumhaari 21 janmon ki kamaai ho rahi hai। yahaan to lakhapti, karodapti bahut hain। woh sab hain beggars। tumhaare paas aayenge bhi bahut। pradarshani mein kitne aate hain, aisa mat samjho praja nahin banti hai। praja bahut banti hai। achha-achha to bahut kehte hain parantu kehte hamko phursat nahin। thoda bhi suna to praja mein aa jaayenge। avinaashi gyaan ka vinaash nahin hota hai। baba ka parichay dena koi kam baat thode hi hai। koi-koi ke romaanch khade ho jaayenge। agar oonch pad paana hoga to purushaartha karne lag padenge। baba koi se dhan aadi to lenge nahin। bachchon ki boond-boond se talaab hota hai। koi-koi ek roopaya bhi bhej dete hain। baba ek eet laga do। sudaama ki mutthi chaaval ka gaayan hai na। baba kehte hain tumhaare to yeh heere-javaahar hain। heere jaisa janma sabka banta hai। tum bhavishya ke liye bana rahe ho। tum jaante ho yahaan in aankhon se jo kuchh dekhte hain, yeh puraani duniya hai। yeh duniya badal rahi hai। abhi tum amarpuri ke maalik ban rahe ho। mohjeet zaroor banna pade। tum kehte aaye ho ki baba aap aayenge to ham kurbaan jaayenge, sauda to achha hai na। manushya thode hi jaante hain, saudaagar, ratnaagar, jaadoogar naam kyon pada hai। ratnaagar hai na, avinaashi gyaan ratna ek-ek amoolya versions hain। is par roop-basanta ki katha hai na। tum roop bhi ho, basanta bhi ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab is shareer se koi bhi vikarma nahin karna hai। aisi koi aasuri act na ho jisse register kharaab ho jaae।

2) ek baap ki yaad ke nashe mein rehna hai। paavan banne ka mool purushaartha zaroor karna hai। kaudiyon pichhaadi apna amoolya samay barbaad na kar shreemat se jeevan shreshtha banaani hai।

vardaan:- svayan ko vishwa seva prati arpit kar maaya ko daasi banaane vaale sahaj sampanna bhav

ab apna samay, sarva praaptiyaan, gyaan, gun aur shaktiyaan vishwa ki seva arth samarpit karo। jo sankalp uthta hai check karo ki vishwa seva prati hai। aise seva prati arpan hone se svayan sahaj sampanna ho jaayenge। seva ki lagan mein chhote bade papers ya pareekshaayen svatah samarpan ho jaayengi। phir maaya se ghabraayenge nahin, sada vijayi banne ki khushi mein naachte rahenge। maaya ko apni daasi anubhav karenge। svayan seva mein surrender honge to maaya svatah surrender ho jaayegi।

slogan:- antarmukhta se mukh ko banda kar do to krodh samaapta ho jaayega।

avyakt ishaare - ashareeri va videhi sthiti ka abhyaas badhaao

jaise ek second mein switch on aur aaph kiya jaata hai, aise hi ek second mein shareer ka aadhaar liya aur ek second mein shareer se pare ashareeri sthiti mein sthit ho gaye। abhi-abhi shareer mein aaye, abhi-abhi ashareeri ban gaye, aavashyakta hui to shareer roopi vastra dhaaran kiya, aavashyakta na hui to shareer se alag ho gaye। yeh practice karni hai, isi ko hi karmaateet avastha kaha jaata hai।