Daily Murli for Tuesday 2 December 2025

02-12-2025 praatahmurli om shanti "baapdaada"' madhuban

“meethe bachche - tumhaara vaayda hai ki jab aap aayenge to ham vaari jaayenge, ab baap aaye hain - tumhein vaayda yaad dilaane''

prashn:- kis mukhya visheshta ke kaaran poojya sirf devtaaon ko hi kah sakte hain?

uttar:- devtaaon ki hi visheshta hai jo kabhi kisi ko yaad nahin karte। na baap ko yaad karte, na kisi ke chitron ko yaad karte, isliye unhein poojya kahenge। vahaan sukh hi sukh rehta hai isliye kisi ko yaad karne ki darkaar nahin। abhi tum ek baap ki yaad se aise poojya, paavan bane ho jo phir yaad karne ki darkaar hi nahin rehti hai।

om shanti। meethe-meethe roohaani bachche… ab roohaani aatma to nahin kahenge। rooh athva aatma ek hi baat hai। roohaani bachchon prati baap samjhaate hain। aage kabhi bhi aatmaon ko parampita paramatma ne gyaan nahin diya hai। baap khud kehte hain main ek hi baar kalpa ke purushottam sangamayug par aata hoon। aise aur koi kah na sake - saare kalpa mein sivaae sangamayug ke, baap khud kabhi aate hi nahin। baap sangam par hi aate hain jabki bhakti poori hoti hai aur baap phir bachchon ko baith gyaan dete hain। apne ko aatma samajh aur baap ko yaad karo। yeh kai bachchon ke liye bahut mushkil lagta hai। hai bahut sahaj parantu buddhi mein theek reeti baithta nahin hai। to ghadi-ghadi samjhaate rehte hain। samjhaate hue bhi nahin samajhte hain। school mein teacher 12 maas padhaate hain phir bhi koi naapaas ho padte hain। yeh behad ka baap bhi roz bachchon ko padhaate hain। phir bhi koi ko dhaarna hoti hai, koi bhool jaate hain। mukhya baat to yahi samjhaai jaati hai ki apne ko aatma samjho aur baap ko yaad karo। baap hi kehte hain maamekam yaad karo, aur koi manushya maatra kabhi kah nahin sakenge। baap kehte hain main ek hi baar aata hoon। kalpa ke baad phir sangam par ek hi baar tum bachchon ko hi samjhaata hoon। tum hi yeh gyaan praapta karte ho। doosra koi lete hi nahin। prajaapita brahma ke tum mukh vanshaavli brahman is gyaan ko samajhte ho। jaante ho kalpa pahle bhi baap ne is sangam par yeh gyaan sunaaya tha। tum braahmanon ka hi part hai, in varnon mein bhi phirna to zaroor hai। aur dharma vaale in varnon mein aate hi nahin, bhaaratvaasi hi in varnon mein aate hain। brahman bhi bhaaratvaasi hi bante hain, isliye baap ko bhaarat mein aana padta hai। tum ho prajaapita brahma ke mukh vanshaavli brahman। braahmanon ke baad phir hain devtaayen aur kshatriy। kshatriy koi bante nahin hain। tumko to brahman banaate hain phir tum devta bante ho। vahi phir dheere-dheere kala kam hoti to unko kshatriy kehte hain। kshatriy automatically banna hai। baap to aakar brahman banaate hain phir brahman se devta phir vahi kshatriy bante hain। teenon dharma ek hi baap abhi sthaapan karte hain। aise nahin ki satayug-treta mein phir aate hain। manushya na samajhne ke kaaran kah dete satayug-treta mein bhi aate hain। baap kehte hain main yuge-yuge aata nahin hoon, main aata hi hoon ek baar, kalpa ke sangam par। tumko main hi brahman banaata hoon - prajaapita brahma dvaara। main to paramdham se aata hoon। achha brahma kahaan se aata hai? brahma to 84 janma lete hain, main nahin leta hoon। brahma sarasvati jo hi vishnu ke do roop lakshmi-naaraayan bante hain, vahi 84 janma lete hain phir unke bahut janmon ke ant mein pravesh kar inko brahma banaata hoon। inka naam brahma main rakhta hoon। yeh koi inka naam apna nahin hai। bachche ka janma hota hai to chhathi karte hain, janma din manaate hain, inki janma patri ka naam to lekhraaj tha। woh to chhotepan ka tha। abhi naam badla hai jabki inmen baap ne pravesh kiya hai sangam par। so bhi naam badalte tab hain jabki yeh vaanaprastha avastha mein hain। woh sannyaasi to gharbaar chhod chale jaate hain tab naam badalta hai। yeh to ghar mein hi rehte hain, inka naam brahma rakha, kyonki brahman chaahiye na। tumko apna banaakar pavitra brahman banaate hain। pavitra banaaya jaata hai। aise nahin ki tum janma se hi pavitra ho। tumko pavitra banne ki shiksha milti hai। kaise pavitra banen? woh hai mukhya baat।

tum jaante ho ki bhakti maarga mein poojya ek bhi ho nahin sakta। manushya gurooon aadi ko maatha tekte hain kyonki gharbaar chhod pavitra bante hain, baaki unko poojya nahin kahenge। poojya woh jo kisko bhi yaad na kare। sannyaasi log brahm tatva ko yaad karte hain na, praarthana karte hain। satayug mein koi ko bhi yaad nahin karte। ab baap kehte hai tumko yaad karna hai ek ko। woh to hai bhakti। tumhaari aatma bhi gupta hai। aatma ko yathaartha reeti koi jaante nahin। satayug-treta mein bhi shareerdhaari apne naam se part bajaate hain। naam bigar to paartadhaari ho na saken। kahaan bhi ho shareer par naam zaroor padta hai। naam bigar part kaise bajaayenge। to baap ne samjhaaya hai bhakti maarga mein gaate hain - aap aayenge to ham aapko hi apna banaayenge, doosra na koi। ham aapka hi banenge, yeh aatma kehti hai। bhakti maarga mein jo bhi dehdhaari hain jinke naam rakhe jaate hain, unko ham nahin poojenge। jab aap aayenge to aap par hi kurbaan jaayenge। kab aayenge, yeh bhi nahin jaante। anek dehdhaariyon ki, naam dhaariyon ki pooja karte rehte hain। jab aadha-kalpa bhakti poori hoti hai tab baap aate hain। kehte hain tum janma-janmaantar kehte aaye ho - ham tumhaare bigar kisko bhi yaad nahin karenge। apni deh ko bhi yaad nahin karenge। parantu mujhe jaante hi nahin hain to yaad kaise karenge। ab baap bachchon ko baith samjhaate hain meethe-meethe bachchon, apne ko aatma samjho aur baap ko yaad karo। baap hi patit-paavan hai, unko yaad karne se tum paavan satopradhaan ban jaayenge। satayug-treta mein bhakti hoti nahin। tum koi ko bhi yaad nahin karte। na baap ko, na chitron ko। vahaan to sukh hi sukh rehta hai। baap ne samjhaaya hai - jitna tum nazdeek aate jaayenge, karmaateet avastha hoti jaayegi। satayug mein nai duniya, naye makaan mein khushi bhi bahut rehti hai phir 25 percent puraana hota hai to jaise svarga hi bhool jaata hai। to baap kehte hain tum gaate the aapke hi banenge, aap se hi sunenge। to zaroor aap paramatma ko hi kehte ho na। aatma kehti hai paramatma baap ke liye। aatma sookshm bindi hai, unko dekhne ke liye divya drishti chaahiye। aatma ka dhyaan kar nahin sakenge। ham aatma itni chhoti bindi hain, aisa samajh yaad karna mehnat hai। aatma ke saakshaatkaar ki koshish nahin karte, paramatma ke liye koshish karte hain, jiske liye suna hai ki woh hazaar soorya se tejomay hai। kisko saakshaatkaar hota hai to kehte hain bahut tejomay tha kyonki vahi suna hua hai। jiski naudha bhakti karenge, dekhenge bhi vahi। nahin to vishvaas hi na baithe। baap kehte hain aatma ko hi nahin dekha hai to paramatma ko kaise dekhenge। aatma ko dekh hi kaise sakte aur sabke to shareer ka chitra hai, naam hai, aatma hai bindi, bahut chhoti hai, unko kaise dekhen। koshish bahut karte hain, parantu in aankhon se dekh na saken। aatma ko gyaan ki avyakt aankhen milti hain।

abhi tum jaante ho ham aatma kitni chhoti hain। mujh aatma mein 84 janmon ka part noondha hua hai, jo mujhe repeat karna hai। baap ki shreemat milti hai shreshtha banaane ke liye, to us par chalna chaahiye। tumhein daivi gun dhaaran karne hain। khaan-paan bhi royal hona chaahiye, chalan badi royal chaahiye। tum devta bante ho। devtaayen khud poojya hain, yeh kabhi kiski pooja nahin karte। yeh to double sirtaaj hain na। yeh kabhi kise poojte nahin, to poojya thahre na। satayug mein kisko poojne ki darkaar hi nahin। baaki haan ek do ko regard zaroor denge। aise naman karna, inko regard kaha jaata hai। aise nahin dil mein unko yaad karna hai। regard to dena hi hai। jaise president hai, sab regard rakhte hain। jaante hain yeh bade martabe vaala hai। naman thode hi karna hai। to baap samjhaate hain - yeh gyaan maarga bilkul alag cheez hai, ismen sirf apne ko aatma samajhna hai jo tum bhool gaye ho। shareer ke naam ko yaad kar liya hai। kaam to zaroor naam se hi karna hai। bigar naam kisko bulaayenge kaise। bhal tum shareerdhaari ban part bajaate ho parantu buddhi se shivbaaba ko yaad karna hai। shreekrishna ke bhakta samajhte hain hamko shreekrishna ko hi yaad karna hai। bas jidhar dekhta hoon - krishna hi krishna hai। ham bhi krishna, tum bhi krishna। are tumhaara naam alag, unka naam alag.... sab krishna hi krishna kaise ho sakte। sabka naam krishna thode hi hota hai, jo aata so bolte rehte hain। ab baap kehte hain bhaktimaarga ke sab chitron aadi ko bhool ek baap ko yaad karo। chitron ko to tum patit-paavan nahin kehte, hanoomaan aadi patit-paavan thode hi hain। anek chitra hain, koi bhi patit-paavan nahin hai। koi bhi devi aadi jisko shareer hai unko patit-paavan nahin kahenge। 6-8 bhujaaon vaali deviyaan aadi banaate hain, sab apni buddhi se। yeh hain kaun, woh to jaante nahin। yeh patit-paavan baap ki aulaad madadgaar hain, yeh kisko bhi pata nahin hai। tumhaara roop to yeh saadhaaran hi hai। yeh shareer to vinaash ho jaayenge। aise nahin ki tumhaare chitra aadi rahenge। yeh sab khatma ho jaayenge। vaastav mein deviyaan tum ho। naam bhi liya jaata hai - seeta devi, phalaani devi। raam devta nahin kahenge। phalaani devi va shreemti kah dete, woh bhi wrong ho jaata। ab paavan banne ke liye purushaartha karna hai। tum kehte bhi ho patit se paavan banaao। aise nahin kehte ki lakshmi-naaraayan banaao। patit se paavan bhi baap banaate hain। nar se naaraayan bhi woh banaate hain। vo log patit-paavan niraakaar ko kehte hain। aur satya naaraayan ki katha sunaane vaale phir aur dikhaaye hain। aise to kehte nahin baba satya naaraayan ki katha sunaakar amar banaao, nar se naaraayan banaao। sirf kehte hain aakar paavan banaao। baba hi satya naaraayan ki katha sunaakar paavan banaate hain। tum phir auron ko satya katha sunaate ho। aur koi jaan na sake। tum hi jaante ho। bhal tumhaare ghar mein mitra, sambandhi, bhaai aadi hain parantu woh bhi nahin samajhte। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan ko shreshtha banaane ke liye baap ki jo shreemat milti hai, us par chalna hai, daiveegun dhaaran karne hain। khaan-paan, chalan sab royal rakhna hai।

2) ek-do ko yaad nahin karna hai, lekin regard zaroor dena hai। paavan banne ka purushaartha karna aur karaana hai।

vardaan:- neeras vaataavran mein khushi ki jhalak ka anubhav karaane vaale ever happy bhav

ever happy arthaat sada khush rahne ka vardaan jin bachchon ko praapta hai woh duhkh ki lahar utpanna karne vaale vaataavran mein, neeras vaataavran mein, apraapti ka anubhav karaane vaale vaataavran mein sada khush rahenge aur apni khushi ki jhalak se dukh aur udaasi ke vaataavran ko aise parivartan karenge jaise soorya andhakaar ko parivartan kar deta hai। andhakaar ke beech roshni karna, ashaanti ke andar shanti laana, neeras vaataavran mein khushi ki jhalak laana isko kaha jaata hai ever happy। vartamaan samay isi seva ki aavashyakta hai।

slogan:- ashareeri woh hai jise shareer ki koi bhi aakarshan apni taraph aakarshit na kare।

avyakt ishaare - ab sampanna va karmaateet banne ki dhun lagaao

karmaateet ka arth yeh nahin hai ki karma se ateet ho jaao। karma se nyaare nahin, karma ke bandhan mein phansane se nyaare - isko kehte hain karmaateet। karmayog ki sthiti karmaateet sthiti ka anubhav karaati hai। yeh karmayogi sthiti ati pyaari aur nyaari sthiti hai, isse koi kitna bhi bada kaarya mehnat ka ho lekin aise lagega jaise kaam nahin kar rahe hain lekin khel kar rahe hain।