Daily Murli for Tuesday 13 January 2026

13-01-2026 praatahmurli om shanti "baapdaada"' madhuban

“meethe bachche - baap ki shreemat ka regard rakhna maana murli kabhi bhi miss nahin karna, har aagya ka paalan karna''

prashn:- agar tum bachchon se koi poochhe raazi-khushi ho? to tumhein kaun-sa javaab falak se dena chaahiye?

uttar:- bolo - parvaah thi paar brahm mein rahne vaale ki, woh mil gaya, baaki kya chaahiye। paana tha so pa liya…। tum eeshvareey bachchon ko kisi baat ki parvaah nahin। tumhein baap ne apna banaaya, tumhaare par taaj rakha phir parvaah kis baat ki।

om shanti। baap samjhaate hain bachchon ki buddhi mein zaroor hoga ki baba - baap bhi hai, teacher bhi hai, supreme guru bhi hai, isi yaad mein zaroor honge। yeh yaad kabhi koi sikhla bhi nahin sakte। baap hi kalpa-kalpa aakar sikhlaate hain। vahi gyaan saagar patit-paavan bhi hai। woh baap bhi hai, teacher bhi hai, guru bhi hai। yeh ab samjha jaata hai , jabki gyaan ka teesra netra mila hai। bachche bhal samajhte to honge parantu baap ko hi bhool jaate hain to teacher guru phir kaise yaad aayega। maaya bahut hi prabal hai jo teen roop mein mahima hote hue bhi teenon ko bhula deti hai, itni sarvashaktimaan hai। bachche bhi likhte hain baba ham bhool jaate hain। maaya aisi prabal hai। drama anusaar hai bahut sahaj। bachche samajhte hain aisa kabhi koi ho nahin sakta। vahi baap teacher satguru hai - sach-sach, ismen gapode aadi ki koi baat nahin। andar mein samajhna chaahiye na! parantu maaya bhula deti hai। kehte hain ham haar kha lete hain, to kadam-kadam mein padma kaise honge! devtaaon ko hi padma ki nishaani dete hain। sabko to nahin de sakte। eeshvar ki yeh padhaai hai, manushya ki nahin। manushya ki yeh padhaai kabhi ho nahin sakti। bhal devtaaon ki mahima ki jaati hai parantu phir bhi oonch te oonch ek baap hai। baaki unki badaai kya hai, aaj gadaai kal raajaai। abhi tum purushaartha kar rahe ho aisa (lakshmi-naaraayan) banne ka। jaante ho is purushaartha mein bahut fail hote hain। padhte phir bhi itne hain jitne kalpa pahle paas hue the। vaastav mein gyaan hai bhi bahut sahaj parantu maaya bhula deti hai। baap kehte hain apna chart likho parantu likh nahin paate hain। kahaan tak baith likhen। agar likhte bhi hain to jaanch karte hain - do ghanta yaad mein rahe? phir woh bhi unhon ko maaloom padta hai, jo baap ki shreemat ko amal mein laate hain। baap to samjhenge in bichaaron ko lajja aati hogi। nahin to shreemat amal mein laani chaahiye। parantu do percent mushkil chart likhte hain। bachchon ko shreemat ka itna regard nahin hai। murli milte hue bhi padhte nahin hain। dil mein lagta zaroor hoga - baba kehte to sach hain, ham murli hi nahin padhte to baaki auron ko samjhaayenge kya?

(yaad ki yaatra) om shanti। roohaani baap roohaani bachchon ko samjhaate hain, yeh to bachche samajhte hain barobar ham aatma hain, hamko parampita paramatma padha rahe hain। aur kya kehte hain? mujhe yaad karo to tum svarga ke maalik bano। ismen baap bhi aa gaya, padhaai aur padhaane vaala bhi aa gaya। sadgati daata bhi aa gaya। thode akshar mein saara gyaan aa jaata hai। yahaan tum aate hi ho isko revise karne liye। baap bhi yahi samjhaate hain kyonki tum khud kehte ho ham bhool jaate hain isliye yahaan aate hain revise karne। bhal koi yahaan rehte hain to bhi revise nahin hota hai। takdeer mein nahin hai। tadbeer to baap karaate hi hain। tadbeer karaane vaala ek baap hi hai। ismen koi ki paas khaatiri bhi nahin ho sakti hai। na special padhaai hai। us padhaai mein special padhne liye teacher ko bulaate hain। yeh to takdeer banaane liye sabko padhaate hain। ek-ek ko alag kahaan tak padhaayenge। kitne dher bachche hain। us padhaai mein koi bade aadmi ke bachche hote hain to unhon ko special padhaate hain। teacher jaante hain ki yeh dull hai isliye unko scholarship laayak banaate hain। yeh baap aise nahin karte hain। yeh to ekras sabko padhaate hain। woh hua teacher ka extra purushaartha karaana। yeh to extra purushaartha kisko alag se karaate nahin। extra purushaartha maana hi master kuchh kripa karte hain। aise to bhal paise lete hain, khaas time de padhaate hain jisse woh jaasti padhkar hoshiyaar hote hain। yahaan to jaasti kuchh padhne ki baat hai hi nahin। inki to baat hi nai hai। ek hi mahaamantra dete hain - “manamnaabhav''। yaad se kya hota hai, yeh to samajhte ho baap hi patit-paavan hai। jaante ho unko yaad karne se hi paavan banenge।

ab tum bachchon ko gyaan hai, jitna yaad karenge utna paavan banenge। kam yaad karenge to kam paavan banenge। yeh tum bachchon ke purushaartha par hai। behad ke baap ko yaad karne se hamko yeh (lakshmi-naaraayan) banna hai। unhon ki mahima to har ek jaante hain। kehte bhi hain aap punya aatma ho, ham paap aatma hain। dher mandir bane hue hain। vahaan sab kya karne jaate hain? darshan se faayda to kuchh bhi nahin। ek-do ko dekh chale jaate hain। bas darshan karne jaate hain। phalaana yaatra par jaata hai, ham bhi jaaven। isse kya hoga? kuchh bhi nahin। tum bachchon ne bhi yaatraaen ki hain। jaise aur tyohaar manaate hain, vaise yaatra bhi ek tyohaar samajhte hain। abhi tum yaad ki yaatra bhi ek tyohaar samajhte ho। tum yaad ki yaatra mein rehte ho। akshar hi ek hai manamnaabhav। yeh tumhaari yaatra anaadi hai। woh bhi kehte hain - woh yaatra ham anaadi karte aae hain। parantu tum abhi gyaan sahit kehte ho ham kalpa-kalpa yeh yaatra karte hain। baap hi aakar yeh yaatra sikhlaate hain। woh chaaron dhaam janma baay janma yaatra karte hain। yeh to behad ka baap kehte hain - mujhe yaad karo to tum paavan ban jaayenge। aise to aur koi kabhi nahin kehte ki yaatra se tum paavan banenge। manushya yaatra par jaate hain to woh us samay paavan rehte hain, aajkal to vahaan bhi ganda laga pada hai, paavan nahin rehte। is roohaani yaatra ka to kisko pata nahin hai। tumko abhi baap ne bataaya hai - yeh yaad ki yaatra hai sachchi। woh yaatra ka chakra lagaane jaate hain phir bhi vaise ka vaisa ban jaate hain। chakra lagaate rehte hain। jaise Vasco da Gama ne srishti ka chakra lagaaya। yeh bhi chakra lagaate hain na। geet bhi hai na - chaaron taraph lagaaye phere..... phir bhi hardam door rahe। bhaktimaarga mein to koi mila nahin sakte। bhagwan koi ko mila nahin। bhagwan se door hi rahe। phere lagaakar phir bhi ghar mein aakar 5 vikaaron mein phansate hain। woh sab yaatraayen hain jhoothi। abhi tum bachche jaante ho yeh hai purushottam sangamayug, jabki baap aaye hain। ek din sab jaan jaayenge baap aaya hua hai। bhagwan aakhreen milega, lekin kaise? yeh to koi bhi jaante nahin। yeh to meethe-meethe bachche jaante hain ki ham shreemat par is bhaarat ko phir se svarga bana rahe hain। bhaarat ka hi tum naam lenge। us samay aur koi dharma hota nahin। saari vishwa pavitra ban jaati hai। abhi to dher dharma hain। baap aakar tumko saare jhaad ka knowledge sunaate hain। tumko smriti dilaate hain। tum so devta the, phir so kshatriy, so vaishya, so shoodra bane। abhi tum so brahman bane ho। yeh ham so ka arth baap kitna sahaj samjhaate hain। om arthaat main aatma phir ham aatma aise chakra lagaati hain। woh to kah dete ham aatma so paramatma, paramatma so ham aatma। ek bhi nahin jisko ham so ka arth yathaartha maaloom ho। to baap kehte hain yeh jo mantra hai yeh hardam yaad rakhna chaahiye। chakra buddhi mein nahin hoga to chakravarti raaja kaise banenge? abhi ham aatma brahman hain, phir ham so devta banenge। yeh tum koi se bhi jaakar poochho, koi nahin bataayenge। woh to 84 ka arth bhi nahin samajhte। bhaarat ka utthaan aur patan gaaya hua hai। yeh theek hai। satopradhaan, sato, rajo, tamo, sooryavanshi, chandravanshi, vaishyavanshi.... abhi tum bachchon ko sab maaloom pad gaya hai। beejroop baap ko hi gyaan ka saagar kaha jaata hai। woh is chakra mein nahin aate hain। aise nahin, ham jeev aatma so paramatma ban jaate hain। nahin, baap aapasmaan knowledgeful banaate hain। aap samaan god nahin banaate hain। in baaton ko bahut achhi reeti samajhna hai, tab buddhi mein chakra chal sakta hai, jiska naam svadarshan chakra rakha hai। tum buddhi se samajh sakte ho - ham kaise is 84 ke chakra mein aate hain। ismen sab aa jaata hai। samay bhi aata hai, varna bhi aa jaate hain, vanshaavli bhi aa jaati hai।

ab tum bachchon ki buddhi mein yeh saara gyaan hona chaahiye। knowledge se hi oonch pad milta hai। knowledge hogi to auron ko bhi denge। yahaan tumse koi paper aadi nahin bharaaye jaate hain। un school mein jab imtahaan hote hain to papers vilaayat se aate hain। jo vilaayat mein padhte honge unhon ki to vahaan hi result nikaalte honge। unmein bhi koi bada education authority hoga jo jaanch karte honge papers ki। tumhaare papers ki jaanch kaun karenge? tum khud hi karenge। khud ko jo chaaho so banaao। purushaartha se jo chaahe so pad baap se le lo। pradarshani aadi mein bachche poochhte hain na - kya banenge? devta banenge, barrister banenge.... kya banenge? jitna baap ko yaad karenge, service karenge utna phal milega। jo achhi reeti baap ko yaad karte hain woh samajhte hain hamko service bhi karni hai। praja banaani hai na! yeh raajdhaani sthaapan ho rahi hai। to usmein sab chaahiye। vahaan vajeer hote nahin। vajeer ki darkaar unko rehti jisko akla kam hota hai। tumko vahaan raay ki darkaar nahin rehti hai। baba ke paas raay lene aate hain - sthool baaton ki raay lete hain, paise ka kya karen? dhandha kaise karen? baba kehte hain yeh duniyaavi baaten baap ke paas nahin le aao। haan, kahaan dilshikasta ban na jaaen to kuchh na kuchh aathat dekar bata dete hain। yeh koi mera dhandha nahin hai। mera to eeshvareey dhandha hai tumko raasta bataane ka। tum vishwa ka maalik kaise bano? tumko mili hai shreemat। baaki sab hain aasuri mat। satayug mein kahenge shreemat। kaliyug mein aasuri mat। woh hai hi sukhdhaam। vahaan aise bhi nahin kahenge ki raaji-khushi ho? tabiyat theek hai? yeh akshar vahaan hote nahin। yeh yahaan poochha jaata hai। koi takleeph to nahin hai? raaji-khushi ho? ismen bhi bahut baaten aa jaati hain। vahaan duhkh hai hi nahin, jo poochha jaae। yeh hai hi duhkh ki duniya। vaastav mein tumse koi poochh nahin sakta। bhal maaya giraane vaali hai to bhi baap mila hai na। tum kahenge - kya tum khush-khairaaphat poochhte ho! ham eeshvar ke bachche hain, hamse kya khush-khairaaphat poochhte ho। parvaah thi paar brahm mein rahne vaale baap ki, woh mil gaya, phir kiski parvaah! yeh hamesha yaad karna chaahiye - ham kiske bachche hain! yeh bhi buddhi mein gyaan hai ki jab ham paavan ban jaayenge to phir ladaai shuru ho jaayegi। to jab bhi tumse koi poochhe ki tum khush raazi ho? to bolo ham to sadaiv khushraazi hain। beemaar bhi ho to bhi baap ki yaad mein ho। tum svarga se bhi jaasti yahaan khush-raazi ho। jabki svarga ki baadshaahi dene vaala baap mila hai, jo hamko itna laayak banaate hain to hamko kya parvaah rakhi hai! eeshvar ke bachchon ko kya parvaah! vahaan devtaaon ko bhi parvaah nahin। devtaaon ke oopar to hai eeshvar। to eeshvar ke bachchon ko kya parvaah ho sakti hai। baba hamko padhaate hain। baba hamaara teacher, satguru hai। baba hamaare oopar taaj rakh rahe hain, ham taajdhaari ban rahe hain। tum jaante ho hamko vishwa ka taaj kaise milta hai। baap nahin taaj rakhte। yeh bhi tum jaante ho satayug mein baap apna taaj apne bachchon par rakhte hain, jisko angreji mein kehte hain crown prince। yahaan jab tak baap ka taaj bachche ko mile tab tak bachche ko utkantha rahegi - kahaan baap mare to taaj hamaare sir par aave। aash hogi prince se mahaaraaja banoon। vahaan to aisi baat nahin hoti। apne samay par kaayde anusaar baap bachchon ko taaj dekar phir kinaara kar lete hain। vahaan vaanaprastha ki charcha hoti nahin। bachchon ko mahal aadi banaakar dete hain, aashaayen sab poori ho jaati hain। tum samajh sakte ho satayug mein sukh hi sukh hai। practical mein sab sukh tab paayenge jab vahaan jaayenge। woh to tum hi jaano, svarga mein kya hoga? ek shareer chhod phir kahaan jaayenge? abhi tumhein practical mein baap padha rahe hain। tum jaante ho ham sach-sach svarga mein jaayenge। woh to kah dete ham svarga mein jaate hain, pata bhi nahin hai svarga kisko kaha jaata hai। janma-janmaantar yeh agyaan ki baaten sunte aaye, abhi baap tumko satya baaten sunaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada raazi-khushi rahne ke liye baap ki yaad mein rehna hai। padhaai se apne oopar raajaai ka taaj rakhna hai।

2) shreemat par bhaarat ko svarga banaane ki seva karni hai। sada shreemat ka regard rakhna hai।

vardaan:- shreshtha takdeer ki smriti dvaara apne samartha svarup mein rahne vaale sooryavanshi pad ke adhikaari bhav

jo apni shreshtha takdeer ko sada smriti mein rakhte hain woh samartha svarup mein rehte hain। unhein sada apna anaadi asli svarup smriti mein rehta hai। kabhi nakli face dhaaran nahin karte। kai baar maaya nakli gun aur kartavya ka svarup bana deti hai। kisko krodhi, kisko lobhi, kisko duhkhi, kisko ashaanta bana deti hai - lekin asli svarup in sab baaton se pare hai। jo bachche apne asli svarup mein sthit rehte hain woh sooryavanshi pad ke adhikaari ban jaate hain।

slogan:- sarva par raham karne vaale bano to aham aur vaham samaapta ho jaayega।

avyakt ishaare - is avyakti maas mein bandhanmukta rah jeevanmukta sthiti ka anubhav karo

jab aapki rachna kamal pushpa jal mein rehte jal ke bandhan se mukta hai। to jab rachna mein yeh visheshta hai to kya master rachta mein nahin ho sakti? jab kabhi bandhan mein phans jaao to apne saamne kamal pushpa ka drishtaanta rakho ki jab kamal pushpa nyaara-pyaara ban sakta hai to kya master sarvashaktivaan nahin ban sakte! to sada ban jaayenge।