Daily Murli for Thursday 12 March 2026

12-03-2026 praatahmurli om shanti "baapdaada"' madhuban

“meethe bachche - yeh padhaai source oph income hai, isse tum manushya se devta bante ho, 21 janmon ke liye sachchi kamaai ho jaati hai''

prashn:- baap jo meethi-meethi baaten sunaate hain woh dhaaran kab hongi?

uttar:- jab buddhi par parmat va manmat ka prabhaav nahin hoga। jo bachche suni sunaai baaton par chalte hain, unki buddhi mein dhaarna ho nahin sakti। sivaae gyaan ke aur kuchh bhi koi sunaata hai to woh jaise dushman hai। jhoothi baaten sunaane vaale bahut hain isliye hear no evil, si no evil, manushya se devta banne ke liye ek baap ki shreemat par hi chalna hai।

geet:- hamaare teertha nyaare hain …

om shanti। is geet mein jaise ki apni mahima karte hain। apni mahima vaastav mein ki nahin jaati hai। yeh to sab samajhne ki baaten hain jo bhaaratvaasi bahut samajhdaar the, abhi besmajh bane hain। ab prashn uthta hai, samajhdaar kaun the? yeh kahaan bhi likha hua nahin hai। tum ho gupta। kitni wonderful baaten hain। ek to baap kehte hain mere dvaara hi bachche mujhe jaan sakte hain। phir mere dvaara sab kuchh jaan jaate hain। srishti ke aadi madhya ant ka jo khel hai, unko samajh jaate hain। aur koi bhi nahin jaante aur ek mukhya bhool ki hai jo niraakaar parampita paramatma shiv ke badle shreekrishna ka naam daal diya hai। pahla number shaastra jinko shreemat bhagvat geeta kehte vahi wrong ho gaya hai isliye pahle-pahle to siddha karna hai ki bhagwan ek hai। phir poochhna hai geeta ka bhagwan kaun? bhaarat ka aadi sanaatan devi devta dharma hai। agar naya dharma kahen to brahman dharma hi kahenge। pahle choti hai brahman phir devtaayen। oonch te oonch brahman dharma hai। jo brahman brahma dvaara parampita paramatma rachte hain, vahi brahman phir devta bante hain। mukhya baat hai bhagwan sabka baap hai, nai duniya ka rachayita। zaroor nai duniya hi rachenge na। nai duniya mein naya bhaarat hota hai। janma bhi bhaarat mein liya hai। bhaarat ko hi svarga bana rahe hain brahma dvaara। tumko apna banaakar phir padhaate hain manushya se devta banaane। pahle tum shoodra varna ke the phir aaye brahman varna mein phir daivi varna mein। peechhe vriddhi hoti rehti hai। ek dharma se anek dharma ho jaate hain। taal taaliyaan bhi sab dharmon ki ban jaati hain, har ek dharma se nikalti hain। teen tubes hoti hain na। yeh hai mukhya। har ek se apni-apni shaakhaayen nikalti hain। mukhya hai foundation phir teen tubes hain mukhya। thur hai aadi sanaatan devi devta dharma ka। jo abhi sab raajayog seekh rahe ho। delvaada mandir bada achha bana hua hai, unmein saari samjhaani hai। bachche yahaan baithe hain kalpa pahle bhi tumne raajayog ki tapasya ki thi। jaise Christ ka yaadgaar Christian desh mein hai। vaise tum bachchon ne yahaan tapasya ki hai tab tumhaara bhi yaadgaar yahaan hai। hai bada sahaj। parantu koi bhi jaante nahin hain। sannyaasi log to kah dete hain yeh sab kalpana hai, jaisi jo kalpana kare। tumhaare liye bhi kehte hain yeh chitra aadi sab kalpana se banaaye hain। jab tak baap ko jaanen, kalpana hi samajhte hain। knowledgeful to ek baap hai na। to mukhya hai baap ka parichay dena। woh baap svarga ka varsa dete hain, kalpa pahle bhi diya tha। phir 84 janma lena pade। bhaaratvaasiyon ke hi 84 janma hote hain। phir sangamayug par baap aakar raajdhaani ki sthaapna karte hain। tum bachchon ne baap dvaara samjha hai। jab achhi reeti samjhen, buddhi mein baithe tab khushi bhi rahe।

yeh padhaai badi source oph income hai। padhaai se hi manushya barrister aadi bante hain। lekin yeh padhaai manushya se devta banne ki hai। praapti kitni bhaari hai। in jaisi praapti koi kara na sake। granth mein gaaya hua hai - manushya se devta kiye karat na laagi vaar। parantu manushyon ki buddhi chalti nahin। zaroor woh devi-devta dharma praayahlop ho gaya hai, tab to likhte hain manushya se devta banen। devtaayen satayug mein the। unhon ko zaroor bhagwan ne sangam par racha hoga। kaise racha? yeh nahin jaante। guru naanak ne bhi paramatma ki mahima gaai hai। un jaisi mahima koi ne nahin gaai hai isliye granth ko bhaarat mein padhte hain। guroonaanak ka kaliyug mein avtaar hota hai। woh hai dharma sthaapak। raajaai to peechhe hui hai। baap ne to yeh devi devta dharma sthaapan kiya hai। vaastav mein nai duniya braahmanon ki hi kahen। choti bhal braahmanon ki hai parantu raajdhaani devi devtaaon se shuru hoti hai। tum brahman rache hue ho। tumhaari raajdhaani nahin hai। tum apne liye raajdhaani sthaapan karte ho। badi wonderful baaten hain। manushya to kuchh nahin jaante hain। pahle-pahle apne ko maaloom hua to apne dvaara doosron ko maaloom hota hai। tum shoodra se brahman bane ho। brahma ko bhi abhi baap dvaara maaloom padta hai। ek ko bataaya to bachchon ko bhi bataana hota hai। unke tan dvaara tum bachchon ko baith samjhaate hain। yeh hai anubhav ki baaten। shaastron se to koi kuchh bhi samajh na sake। baap kehte hain saare kalpa mein ek hi baar main aise hi aakar samjhaata hoon। aur anek dharmon ka vinaash, ek dharma ki sthaapna karaata hoon। yeh 5 hajaar varsha ka khel hai। tum bachche jaante ho hamne 84 janma liye hain। vishnu ki naabhi se brahma dikhaate hain। brahma aur vishnu yeh kiske bachche hain? donon bachche thahre shiv ke। woh hai rachayita, woh rachna। in baaton ko koi samajh na sake। bilkul nai baat hai। baba bhi kehte hain yeh nai baaten hain। koi shaastron mein yeh baaten ho na sake। gyaan ka saagar baap hai, vahi geeta ka bhagwan hai। bhakti maarga mein shiv jayanti bhi manaate hain। satayug treta mein nahin manaate। to zaroor sangam par hi aate honge। yeh baaten tum samajhte jaate ho aur samjhaate rehte ho। jo samjhaane vaale baap ki mahima hai, woh bachchon ki honi chaahiye। tumko bhi master gyaan ka saagar banna hai। prem ka saagar, sukh ka saagar yahaan banna hai। kisko duhkh nahin dena hai। bahut meetha banna hai। tum jo kaduve ekdam jahar misal the, so tum viceless brahman ban rahe ho। eeshvar ki santaan ban rahe ho। vicious se viceless devta ban rahe ho। aadhaakalpa tum patit bante-bante abhi bilkul jadajdeebhoot avastha ko paaye hue ho। sade hue kapdon ko satka lagaane se phatkar cheer-cheer ho jaate hain। yahaan bhi gyaan ke satke lagaao to purja-purja ho jaate hain। koi kapda aisa maila hai jo saaph karne mein bahut time lagta hai। phir vahaan bhi halka pad mil jaata hai। baba dhobi hai। tum bhi saath mein madadgaar ho। dhobi bhi nambarvaar hote hain। yahaan bhi nambarvaar hain। dhobi achhe kapde saaph na kare to kahenge na ki yeh to jaise hazaam hai। aajkal kapde saaph dhulaane seekhe hain। aage gaanvadon mein to bahut maile kapde dhulaai hote the। yeh hunar bhi baahar vaalon se aaya hai। baahar vaale kuchh ijjat dete hain। paise aadi ki madad karte hain। jaante hain yeh bahut badi biraadri vaale hain। ab neeche gire hain। girne vaalon par taras padta hai na। baap kehte hain tumko kitna dhanvaan banaaya tha। maaya ne kya haalat kar di hai। tum abhi samajhte ho ham vijay maala ke the, phir 84 janma le kya jaakar bane hain। wonder hai na। tum samjha sakte ho, tum bhaaratvaasi to svargavaasi the। bhaarat hi svarga tha phir neeche girte-girte narkavaasi bhi banna pade। ab baap kehte hain - pavitra ban svargavaasi bano। manamnaabhav। shiv bhagvaanuvaach maamekam yaad karo। yaad ki yaatra se tumhaare sab paap nashta ho jaayenge। shaastron mein likha hai - shreekrishna ne bhagaaya, patraani banaane। tum sab padh rahe ho, patraani ban rahe ho। parantu in baaton ko koi samajh nahin sakte hain। ab baap ne aakar bachchon ko samjhaaya hai। baap kehte hain main kalpa-kalpa tumko samjhaane aata hoon to pahle bhagwan ek hai, yeh siddha kar phir bataao geeta ka bhagwan kaun hai। raajayog kisne sikhaaya hai? bhagwan hi brahma dvaara sthaapna karaate hain aur vinaash phir paalna karaate hain। yeh jo brahman hain vahi phir devta bante hain। yeh baaten bhi samajh mein unhon ko aayengi jinhonne kalpa pahle samjha hai। second by second jo hua is samay tak samjhenge। drama mein tumhein bahut purushaartha karna hai। yeh to bachche samajhte hain abhi hamaari woh avastha nahin hui hai। time lagega। karmaateet avastha ho jaae to phir sab number one paas ho jaaen phir to ladaai bhi lag jaati। aapas mein khitpit chalti hi rahegi। tum jaante ho jahaan tahaan dekho ladne ki taiyaariyaan kar rahe hain। sab taraph taiyaariyaan kar rahe hain। tumne jo kuchh divya drishti se dekha hai woh phir in aankhon se dekhna hai। vinaash ka saakshaatkaar kiya hai phir vaise aankhon se dekhenge। sthaapna ka bhi saakshaatkaar kiya hai phir practical mein raajaai bhi dekhenge। tum bachchon ko to bahut khushi honi chaahiye। yeh to puraana tan hai। yog se aatma pavitra ban jaayegi, phir yeh puraana shareer bhi chhodna hai। 84 janmon ka chakra poora hota hai phir zaroor sabko naye shareer milenge। yeh bhi samajhne ki bahut sahaj baaten hain। samjha bhi sakte hain, kaliyug ke baad satayug zaroor hoga। anek dharmon ka vinaash zaroor hoga। phir aadi sanaatan devi devta dharma ki sthaapna arth baap ko aana pade। abhi tum brahman bane ho devta banne ke liye। doosre koi ho na sake। tum jaante ho ham shivbaaba ke bane hain, shivbaaba hamko varsa de rahe hain।

shiv jayanti maana hi bhaarat ko varsa mila। shivbaaba aaya, kya aakar kiya। islaami, bauddhi aadi ne to aakar apna dharma sthaapan kiya। baap ne aakar kya kiya? zaroor svarga ki sthaapna ki। kaise sthaapna ki, kaise sthaapna hoti hai so tum abhi jaante ho। phir satayug mein yeh sab bhool jaayenge। yeh bhi samajhte ho 21 janmon ka varsa abhi ham le lete hain। yeh drama mein noondh hai। bhal vahaan samjhenge yeh baap hai, yeh bachcha hai। bachche ko varsa milta hai। parantu yeh praalabdha hai abhi ki। sachchi kamaai kar 21 janmon ke liye tum varsa abhi pa rahe ho। 84 janma to lene hi hain। satopradhaan se phir sato rajo tamo mein aayenge। yeh achhi reeti yaad karne se phir khushi mein bhi rahenge। samjhaane mein badi mehnat lagti hai। jab samajh jaate hain to unko badi khushi hoti hai। jo bachche achhi reeti samajhte hain woh phir bahuton ko samjhaate rehte hain। kaanton ko phool banaate rehte hain। yeh hai behad ki padhaai। varsa bhi behad ka milta hai। phir ismen tyaag bhi behad ka hai। grihastha vyavhaar mein rehte saari duniya ka tyaag karna hai kyonki tum jaante ho yeh puraani duniya khatma honi hai। ab nai duniya mein jaana hai isliye behad ka sannyaas karaate hain। sannyaasiyon ka hai had ka sannyaas aur unka hai hathayog। ismen hath ki baat nahin rehti। yeh to padhaai hai। paathshaala mein padhna hai, manushya se devta banne ke liye। shiv bhagvaanuvaach - shreekrishna ho na sake। unko heavenly god father nahin kahenge। heavenly prince kahenge to kitni meethi-meethi baaten samajhne aur dhaaran karne ki hain। daivi lakshan bhi chaahiye। kabhi bhi suni sunaai baaton par nahin lagna chaahiye। vyaas ki likhi hui baaton par lagte-lagte buri gati hui hai na। sivaae gyaan ke aur kuchh sunaate hain to samjho yeh hamaara dushman hai। durgati mein le jaate hain। kabhi bhi parmat par nahin lagna chaahiye। manmat, parmat par chala to yeh mara। baap samjhaate rehte hain jhoothi baaten bolne vaale to bahut hain। tumko baap se hi sunna hai। hear no evil, si no evil..... baapdaada aaye hi hain manushya se devta banaane to unki shreemat par chalna chaahiye। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yahaan baap samaan sukh ka saagar, prem ka saagar banna hai। sarvagun dhaaran karne hain। kisi ko bhi duhkh nahin dena hai।

2) suni-sunaai baaton par kabhi vishvaas nahin karna hai, parmat par nahin chalna hai। hear no evil, si no evil....

vardaan:- main pan ke bojh ko samaapta kar pratyakshaphal ka anubhav karne vaale baalak so maalik bhav

jab kisi bhi prakaar ka main pan aata hai to bojh sir par aa jaata hai। lekin jab baap offer kar rahe hain ki sab bojh mujhe de do aap sirf naachon, udo...phir yeh question kyon - ki service kaise hogi, bhaashan kaise karenge - aap sirf nimitta samajhkar connection power house se jodkar baith jaao, dilshikasta nahin bano to baapdaada sab kuchh svatah kara denge। baalak so maalik samajhkar shreshtha stage par sthit raho to pratyaksha phal ki anubhooti karte rahenge।

slogan:- gyaan daan ke saath-saath gundaan karo to saphalta milti rahegi।

ye avyakt ishaare- “nishchay ke foundation ko majboot kar sada nirbhay aur nishchint raho"

kaisi bhi kadi paristhiti ho lekin khel samajhne se kadi samasya bhi halki ban jaati hai। kai bachchon mein himmat hai isliye koi bhi baat hoti hai to kehte hain - haan karenge, sochenge। himmat to hai, lekin faith nahin hai। faithful ke bol aise nahin hote। faithful ka arth hi hai - man, vachan, karma har baat mein nishchaybuddhi, unke mukh se kabhi himmatheen banaane vaale shabd nahin nikal sakte।