Daily Murli for Monday 16 March 2026

16-03-2026 praatahmurli om shanti "baapdaada"' madhuban

“meethe bachche - tumhein sadgati ki sabse nyaari mat mili hai ki deh ke sab dharma tyaag aatma abhimaani bhav, maamekam yaad karo''

prashn:- jo paramatma ko naam roop se nyaara kehte hain, unse tum kaun sa prashn poochh sakte ho?

uttar:- unse poochho - geeta mein jo dikhaate hain arjun ko akhanda jyoti swaroop ka saakshaatkaar hua, bola bas karo ham sahan nahin kar sakte। to phir naam roop se nyaara kaise kehte ho। baba kehte hain main to tumhaara baap hoon। baap ka roop dekhkar bachcha khush hoga, woh kaise kahega main sahan nahin kar sakta।

geet:- tere dvaar khada…

om shanti। bhakta kehte hain ham bahut kangaal ban gaye hain। he baba ham sabki jholi bhar do। bhagat gaate rehte hain janma by janma। satayug mein bhakti hoti nahin। vahaan paavan devi devta hote hain। bhakton ko kabhi devta nahin kaha jaata। jo svargavaasi devi devta hote hain woh phir punarjanma lete-lete narkavaasi, pujaari, bhagat, kangaal bante hain। baap baith bachchon ko samjhaate hain। baap ko ek bhi manushya nahin jaante। baap jab aaye tab aakar apna parichay deve। bhagwan ko hi baba kaha jaata hai। sab bhakton ka hai ek bhagwan। baaki sab hain bhagat। church aadi mein jaate hain to zaroor bhakta thahre na। is samay sab patit tamopradhaan hain, isliye sab pukaarte hain he patiton ko paavan banaane vaale aao। he baba ham bhakton ki jholi bhar do। bhakta bhagwan se dhan maangate hain। tum bachche kya maangate ho? tum kehte ho baba hamko svarga ka maalik banaao। vahaan to athaah dhan hota hai। heere javaahraat ke mahal hote hain। abhi tum jaante ho ham bhagwan dvaara raajaai ka varsa pa rahe hain। yeh sachchi geeta hai। woh geeta nahin। woh to pustak aadi bhaktimaarga ke liye banaaye hain। unko bhagwan ne gyaan nahin diya। bhagwan to is samay nar se naaraayan banaane ke liye raajayog sikhaate hain। raaja ke saath praja bhi zaroor hogi। sirf lakshmi-naaraayan to nahin banenge। saari raajdhaani banti hai। ab tum bachche jaante ho ki bhagwan kaun hai aur koi bhi manushya maatra nahin jaante। baap kehte hain tum kehte ho O god father, to bataao tumhaare god father ka naam, roop, desh, kaal kya hai? na bhagwan ko jaante hain, na unki rachna ko jaante hain। baap aakar kehte hain kalpa-kalpa ke sangam par aata hoon। saari rachna ke aadi-madhya-ant ka raaz main “rachta'' hi aakar samjhaata hoon। kai to kehte hain - woh naam roop se nyaara hai, woh aa nahin sakta। tum jaante ho baap aaya hai। shiv jayanti bhi niraakaar ki gaai jaati hai to shreekrishna jayanti bhi gaai jaati hai। ab shiv jayanti kab hoti hai, woh maaloom hona chaahiye na। jaise Christian ko maaloom hai ki Christ ka janma kab hua, Christian dharma kab sthaapan hua। yeh to hai bhaarat ki baat। bhagwan bhaarat ki jholi kab bharte hain? bhagat pukaarte hain he bhagwan jholi bhar do। sadgati mein le jaao kyonki ham durgati mein pade hain, tamopradhaan hain। aatma hi shareer ke saath bhogti hai। kai manushya saadhu santa aadi kehte hain ki aatma nirlep hai। kehte bhi hain ki achhe va bure sanskaar aatma mein rehte hain। us aadhaar par aatma janma leti hai। phir kehte aatma to nirlep hai। koi bhi buddhivaan manushya nahin jo samjhaaye। ismen bhi anek mat hain। jo ghar se roothte woh shaastra bana dete। shreemat bhagvat geeta hai ek। vyaas ne jo shlok aadi banaaye woh koi bhagwan ne nahin gaaye hain। bhagwan niraakaar jo gyaan ka saagar hai, woh baith bachchon ko samjhaate hain ki bhagwan ek hai। bhaaratvaasiyon ko yeh pata nahin hai। gaate bhi hain eeshvar ki gat mat nyaari hai। achha kaun si gat mat nyaari hai? eeshvar ki gat mat nyaari hai yeh kisne kaha? aatma kehti hai, uski sadgati ke liye jo mat hai, usko shreemat kaha jaata hai। kalpa-kalpa tumko aakar samjhaata hoon - manamnaabhav। deh ke sab dharma tyaag aatma-abhimaani bhav। maamekam yaad karo। abhi tum manushya se devta ban rahe ho। is raajayog ki em object hai hi lakshmi-naaraayan banna। padhaai se koi raaja bante nahin hain। aisa koi school nahin hai। geeta mein hi hai, tum bachchon ko raajayog sikhaata hoon। aata bhi tab hoon jabki koi bhi raaja ka raajya nahin rehta। mujhe ek bhi manushya bilkul nahin jaante। baba kehte hain ki tum bachchon ne itna bada ling jo banaaya hai, woh mera koi yeh roop nahin hai। manushya kah dete ki akhanda jyoti roop paramatma, tejomay hai। arjun ne dekhkar kaha bas karo, main sahan nahin kar sakta hoon। are bachcha baap ka roop dekh sahan na kar sake, yeh kaise ho sakta hai। bachcha to baap ko dekh khush hoga na। baap kehte hain ki mera koi aisa roop thode hi hai। main hoon hi parampita arthaat pare te pare rahne vaala param aatma maana paramatma। phir gaate hain paramatma manushya srishti ka beejroop hai। unki bhagat mahima karte hain। satayug treta mein koi mahima nahin karte kyonki vahaan to hai sukh। gaate bhi hain duhkh mein simran sab karen, sukh mein kare na koi। inka bhi arth nahin samajhte hain। tote muaaphik sab kehte rehte hain। sukh kab hota hai, duhkh kab hota hai। bhaarat ki hi to baat hai na। 5 hajaar varsha pahle svarga tha phir treta mein do kala kam hui। satayug treta mein duhkh ka naam nahin rehta। hai hi sukhdhaam। svarga kahne se mukh meetha hota hai। heaven mein phir duhkh kahaan se aaya। kehte hain ki vahaan bhi kans jaraasandhi aadi the, parantu yeh ho nahin sakta।

bhakta samajhte hain ki ham naudha bhakti karte hain to deedaar hota hai। deedaar hona goya hamko bhagwan mila। lakshmi ki pooja ki, unka darshan hua bas ham to paar ho gaye, ismen hi khush ho jaate hain। parantu hai kuchh bhi nahin। alpakaal ke liye sukh milta hai। darshan hua khalaas। aise to nahin mukti jeevanmukti ko pa liya, kuchh bhi nahin। baba ne seedhi par bhi samjhaaya hai - bhaarat oonch te oonch tha। bhagwan bhi oonch te oonch hai। bhaarat mein oonch te oonch varsa hai in lakshmi-naaraayan ka। jab svarga tha, satopradhaan the phir kaliyug ant mein sab tamopradhaan hote hain। pukaarte hain ham bilkul patit ho gaye hain। baap kehte hain ki main kalpa ke sangamayug par aata hoon, tumko raajayog sikhaane। main jo hoon jaisa hoon mujhe yathaartha reeti koi nahin jaante। tumhaare mein bhi nambarvaar purushaartha anusaar jaante hain। seedhi vaala chitra dikhaana hai। yeh bhaarat ki seedhi hai। satayug mein devi devta the। 5 hajaar varsha pahle bhaarat aisa tha। shaastron mein laakhon varsha ka kalpa likh diya hai। baap kehte hain ki laakhon varsha ka nahin, kalpa 5 hajaar varsha ka hai। satayug treta nai duniya, dvaapar kaliyug puraani duniya। aadha-aadha hota hai na। nai duniya mein tum bhaaratvaasi the। baap samjhaate hain meethe bachche abhi tum apne janmon ko jaante ho baaki koi rath aadi ki baat nahin hai। shreekrishna to satayug ka prince hai। shreekrishna ka woh roop sivaae divya drishti ke dekha nahin jaata। yeh chaitanya roop se to satayug mein the phir kab woh roop mil nahin sakta। phir to naam roop desh kaal badal jaata hai। 84 janma lete hain। 84 janmon mein 84 maa baap milte hain। bhinna-bhinna naam roop occupation hota hai। ab yeh bhaarat ki hi seedhi hai। tum ho abhi brahman kul bhooshan। baap ne kalpa pahle bhi aakar tumko devi devta banaaya tha। vahaan tum sarvottam karma karte the। tum sada sukhi the 21 janma। phir tumko is durgati mein kisne pahunchaaya? mainne kalpa pahle tumko sadgati di thi phir 84 janma lete zaroor utarna pade। sooryavanshi mein 8 janma, chandravanshi mein 12 janma phir aise utarte aaye ho। tum hi so poojya devta the, tum hi pujaari patit bane ho। bhaarat ab kangaal hai। bhagvaanuvaach, tum jo 100 pratishat pavitra aur solvent, ever healthy, ever wealthy the। koi rog duhkh ki baat nahin thi, sukhdhaam tha। unko kehte hain garden aaph allaah। allaah ne bageecha sthaapan kiya। jo devi-devta the woh ab kaante bane hain। ab jangal ban gaya hai। jangal mein kaante lagte hain। baap kehte hain kaam mahaashatru hai, in par jeet pahno। isne aadi-madhya-ant tumko duhkh diya hai। ek do par kaam kataari chalaana yeh sabse bada paap hai। baap baith apna parichay dete hain ki main paramdham mein rahne vaala param aatma hoon। mujhe kehte hain main srishti ka beejroop param aatma, main sabka baap hoon। sabhi aatmaayen baap ko pukaarti hain ki he parampita paramatma। jaise tumhaari aatma star misal hai, baba bhi param aatma star hai। chhota bada nahin hai। baap kehte hain main angushthe misal bhi nahin hoon। main param aatma hoon। tum sabka baap hoon। usko kaha jaata hai supreme soul, knowledgeful। baap samjhaate hain main knowledgeful, manushya srishti ke jhaad ka beejroop hoon। mujhe bhakta log kehte hain ki paramatma sat chit aanand swaroop hai, woh gyaan ka saagar hai, sukh ka saagar hai। mahima kitni hai। agar naam roop desh kaal nahin to pukaarenge kisko। saadhu santa aadi sab tumko bhakti maarga ke shaastra sunaate hain। main tumko aakar raajayog sikhaata hoon।

baap samjhaate hain ki tum patit-paavan mujh gyaan saagar baap ko kehte ho। tum bhi master gyaan saagar bante ho। gyaan se sadgati mil jaati hai। bhaarat ko sadgati baap hi denge। sarva ka sadgati daata ek hai। sarva ki durgati phir kaun karta hai? raavan। ab tumko yeh kaun samjha rahe hain? yeh hai param aatma। aatma to ek star misal ati sookshm hai। paramatma bhi drama mein part bajaata hai। creator, director, mukhya actor hai। baap samjhaate hain ki oonch te oonch paartadhaari kaun hai? oonch te oonch bhagwan। jiske saath tum aatmaayen bachche sab rehte ho। kehte bhi hain ki paramatma sabko bhejne vaala hai। yeh bhi samajhne ki baat hai। drama to anaadi bana hua hai। baap kehte hain ki mujhe tum kehte ho gyaan ka saagar, saari srishti ke aadi madhya ant ko jaanne vaala। abhi yeh jo shaastra aadi padhte hain, inko baap jaante hain। baap kehte hain ki main prajaapita brahma ke dvaara sabhi shaastron ka saar aakar bataata hoon। dikhaate hain ki vishnu ki naabhi se brahma nikla। to kahaan nikla? manushya to zaroor yahaan hi honge na। inki naabhi se brahma nikla phir bhagwan ne baith inke dvaara sabhi vedon shaastron ka saar sunaaya। apna bhi naam roop desh kaal samjhaaya hai। manushya srishti ka beejroop hai na। is vriksha ki utpatti, paalna, vinaash kaise hota hai, woh koi bhi nahin jaante। isko variety jhaad kaha jaata hai। sabhi nambarvaar apne samay par aate hain। pahle number mein devi devta dharma ki sthaapna karaata hoon jabki woh dharma nahin hai। baap kehte hain ki kitne tuchchha buddhi ho gaye hain। devtaaon ki, lakshmi-naaraayan ki pooja karte hain parantu unhon ka raajya srishti par kab tha woh kuchh nahin jaante hain। abhi bhaarat ka woh devta dharma hi nahin hai, sirf chitra rah gaye hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ka namaste।

dhaarna ke liye mukhya saar:-

1) master gyaan saagar ban patit se paavan banaane ki seva karni hai। baap ne jo sab shaastron ka saar sunaaya hai woh buddhi mein rakh sada harshit rehna hai।

2) ek baap ki shreemat har pal paalan karna hai। deh ke sab dharma tyaag aatma-abhimaani banne ki mehnat karni hai।

vardaan:- vistaar ko saar mein samaakar apni shreshtha sthiti banaane vaale baap samaan light might house bhav

baap samaan light, might house banne ke liye koi bhi baat dekhte va sunte ho to uske saar ko jaankar ek second mein sama dene va parivartan karne ka abhyaas karo। kyon, kya ke vistaar mein nahin jaao kyonki kisi bhi baat ke vistaar mein jaane se samay aur shaktiyaan vyartha jaati hain। to vistaar ko samaakar saar mein sthit hone ka abhyaas karo - isse anya aatmaon ko bhi ek second mein saare gyaan ka saar anubhav kara sakenge।

slogan:- apni vritti ko powerful banaao to seva mein vriddhi svatah hogi।

ye avyakt ishaare- “nishchay ke foundation ko majboot kar sada nirbhay aur nishchint raho"

yadi nishchay roopi foundation pakka hai to sahaj yogi, nirmal svabhaav, shubh bhaavna ki vritti aur aatmik drishti vaale honge। chalan aur chehre se har samay saralta ki jhalak anubhav hoti rahegi। to harek ki visheshta ko smriti mein rakh ek do mein faithful raho to unki baaton ka bhaav badal jaayega।