Daily Murli for Sunday 15 March 2026

15-03-26 praatahmurli om shanti ''avyakt-baapdaada'' revise 24-03-09 madhuban

baapdaada dvaara mile hue khajaanon ko svayan mein samaakar kaarya mein lagaao, anubhav ki authority bano

aaj chaaron or ke sarva khajaane jama karne vaale sampanna bachchon ko dekh rahe hain। saath-saath har ek bachche ne kahaan tak sarva khajaane jama kiye hain, uski result dekh rahe the। khajaane to baapdaada dvaara bahut avinaashi praapta hue hain। sabse pahle bade te bada khajaana hai gyaan dhan, jisse mukti aur jeevanmukti ki praapti hui hai। puraani deh aur puraani duniya se mukta jeevanmukta sthiti aur muktidhaam mein jaane ki, sabhi bachchon ko praapta hai। saath mein ek gyaan ka khajaana nahin lekin yog ka bhi khajaana hai jisse sarva shaktiyon ki praapti hoti hai। saath-saath dhaarna karne ka khajaana, jisse sarva gunon ki praapti hoti hai। saath saath seva ka khajaana jisse duaaon ka khajaana, khushi ka khajaana praapta hota hai। saath-saath sabse bade te bada khajaana vartamaan sangamayug ka hai, samay ka hai kyonki saare kalpa mein yeh sangam ka samay amoolya khajaana hai। is sangam ke samay ka ek ek sankalp va ek ek ghadi bahut amoolya hai kyonki sangam samay par hi baapdaada aur bachchon ka madhur milan hota hai aur koi bhi yug mein parmaatma baap aur parmaatma bachchon ka milan nahin hota। saath-saath sangam samay hi hai jismen baapdaada dvaara sarva khajaane praapta hote hain। khajaana jama hone ka samay sangamayug hi hai aur koi bhi yug mein jama ka khaata, jama karne ki bank hi nahin hai। sirf ek sangamayug hai jismen jitna khajaane jama karne chaaho utna kar sakte ho aur is sangam samay ka jo mahatva hai woh yahi hai ki ek janma mein anek janmon ke liye khajaana jama kar sakte hain isliye yeh chhote se yug ka bahut mahatva hai aur khajaane bhi baapdaada dvaara sabhi bachchon ko praapta hote hain। baap sabhi ko dete hain lekin khajaane ko jama karne mein har ek bachcha apne purushaartha anusaar karta hai। baap dene vaala bhi ek hai aur ek jaisa sabko deta hai, ek hi samay par deta hai lekin dhaaran karne mein kya dekha ki baap ne ek jaisa diya lekin dhaaran karne mein har ek ka apna-apna purushaartha raha kyonki khajaane ko dhaaran karne ke liye ek to apne purushaartha se praalabdha bana sakte hain, doosra sada svayan santushta rehna aur sarva ko santushta karna, santushtata ki visheshta se khajaana jama kar sakte ho aur teesra seva se kyonki seva se sarva aatmaon ko khushi ki praapti hoti hai to khushi ka khajaana praapta kar sakte ho। apna purushaartha aur sarva ko santushta karne ka purushaartha aur teesra seva ka purushaartha। in teenon prakaar se khajaane jama kar sakte ho। khajaane jama karne mein vishesh sambandh-samparka mein aane mein ek to nimitta bhaav, nirmaan bhaav, nihsvaartha bhaav, har aatma prati shubh bhaavna aur shubh kaamna rakhne ki aavashyakta hai। agar seva mein va sambandh-samparka mein yeh sab hai to punya ka khaata aur duaaon ka khaata bahut sahaj jama kar sakte hain।

baapdaada sabke potaamel dekh rahe the to kya dekha? chaaron or ke bachchon mein nambarvaar dekha। baap ek hai, ek hi samay par dete hain lekin jama karne mein do prakaar ke bachche dekhe - ek bachche to jama hua khajaana khaaya, jama bhi kiya aur khaake khatma kar dete hain। doosre khaaya, jama kiya aur jama karne mein attention deke badhaaya bhi। khajaane badhaane ka saadhan kya hai? badhaane ka saadhan hai jo khajaane mile woh samay par jo paristhiti aati hai us paristhiti anusaar kaarya mein lagaana। jo kaarya mein lagaate hain sthiti dvaara paristhiti ko badal sakte hain uska jama hota hai। jo kaarya mein nahin lagaate to jama nahin hota hai। to har ek apne aapse poochho ki samay par apne prati va doosron ke prati kaarya mein lagaate ho! jitna kaarya mein lagaayenge utna badhta jaayega kyonki kaarya mein lagaane se anubhav hota jaata hai। to anubhav ki authority add hoti jaati hai। to check karo apne aapse poochho ki yeh saare khajaane jama hain? aur badhaane ka saadhan samay par kaarya mein lagaate hain? anubhav ki authority badhti jaati hai? kyonki authorities mein sabse jyaada anubhav ki authority gaai jaati hai। to har ek ko apna khaata badhaana hai। check karna hai kyonki abhi samay hai check karke abhi bhi khajaane badha sakte ho। abhi chance hai phir chance bhi khatma ho jaayega। chaahenge khajaana badhaayen lekin badha nahin sakenge।

baapdaada ne dekha khajaana milta hai, khushi-khushi se apne mein samaane ka prayatna bhi karte hain lekin khajaana jab milta hai, murli dvaara hi khajaane milte hain to do prakaar ke bachche hain - ek sunne vaale aur doosre hain samaane vaale। kai bachche sunke bahut khush hote hain lekin sunna aur samaana, donon mein bahut pharka hai। samaane vaale anubhvi bante jaate hain kyonki samaaya hua samay par kaarya mein lagaate, khajaane ko badhaate rehte hain। sunne vaale varnan karte hain, bahut achha sunaaya, baba ne bahut achhi baat boli, lekin samaane ke bina samay par kaam mein nahin la sakte hain। to aap sabhi check karo samaane vaale hain! thoda bhi agar kam hoga, bharpoor nahin hoga to halchal hogi। lekin samaaya hua full hoga to halchal nahin hogi। isliye aaj baapdaada ne sabke khajaane check kiya। sunaaya na - ki do prakaar ke bachche hain, abhi apne aapko check karo main kaun? khajaane ko badhaana arthaat samay par kaarya mein lagaana। jitna kaarya mein lagaate jaate utna khajaana badhta jaata hai kyonki jo bhi khajaana hai, khajaane ka maalik khajaane ko kaarya mein laata hai, khajaana apne ko kaarya mein nahin laata। to aap sabhi ko sarva khajaane baap ne varse mein diya hai। to baap ke khajaane ko apna khajaana banaana yeh har ek ko apna attention dena hai kyonki jitna khajaana bharpoor hoga utna hi bharpoor avastha mein achal adol honge।

baapdaada yahi chaahta hai ki ek ek bachcha sampanna ho, kam nahin ho kyonki yeh chance baap dvaara avinaashi khaata jama hona, yeh sirf abhi ho sakta hai iseelie kaha hua bhi hai abhi nahin to kabhi nahin। yeh sangam samay ke liye hi gaayan hai। bhavishya mein to jo jama kiya hai uska phal praapta karenge lekin praapti ka samay sirf ab hai। to har ek ko apna khaata dekhna hai। jiska jitna bhandaara bharpoor hai uske naynon se, chalan se, chehre se maaloom hota hai, uski chalan aur chehra aise lagega jaise khila hua gulaab ka pushpa। baapdaada har ek ke chalan aur chehre se dekhta rehta ki kitna harshit, kitna khushmijaaz rehta hai! naynon se roohaaniyat, chehre se muskaraahat aur karma se har ek gun sabhi ko anubhav hota hai! to har ek apne aapko check kare।

baapdaada ki har ek bachche mein yahi shubh bhaavna hai ki har ek bachcha anek aatmaon ko aisa khajaanon se sampanna banaave। aaj vishwa ki aatmaayen sabhi yahi chaahti hain ki kuchh na kuchh aadhyaatmik shakti mil jaae। aur aadhyaatmik shakti ke daata aap brahman aatmaayen hi hain kyonki holiest, highest aur richest aap aatmaayen hi hain। holiest bhi sab aatmaon se jyaada aap ho। aap aatmaon ki pooja jaise vidhipoorvak hoti hai, vaise aur kiski bhi nahin hoti। abhi last janma mein bhi aap aatmaon ki pooja aur koi bhi dharmapita va mahaan aatmaayen jo nimitta bani hain unhon ki nahin hai। vidhipoorvak pooja bhale yaadgaar banaate hain lekin vidhipoorvak pooja nahin hoti। aur aap jaisa khajaana richest in di world, aap brahman aatmaon ka ek janma ka khajaana guarantee hai 21 janma chalna hi hai kyonki baap dvaara, baap ka varsa mila hai। to jaise baap avinaashi hai, vaise hi baap dvaara mila hua khajaana bhi avinaashi ho jaata hai isliye richest in di world, holiest in di world।

to sabhi apne ko aise vishesh sevaadhaari samajhte ho na! aaj ke samay anusaar vishwa ki aatmaon ko aavashyakta kis cheez ki hai, jaante ho na! aaj vishwa ko khushi, shakti aur sneh ki aavashyakta hai। aatmik sneh chaahte hain lekin aap brahman aatmaayen abhi samay anusaar daata bano। mansa se shaktiyaan do, vaacha se gyaan do aur karmana se gundaan do। brahma baap ne ant mein teen shabd sabhi bachchon ko saugaat mein diye, yaad hai na - in teen shabdon ko agar seva mein lagaao to bahut aatmaon ko santushta kar sakte ho। woh teen shabd hain - niraakaari, nirhankaari aur nirvikaari। to mansa dvaara niraakaari, vaacha dvaara nirhankaari aur karmana dvaara nirvikaari। yeh teenon shabd seva mein lagaao। abhi vishwa ko aapke shakti dvaara thoda sa dil ka aanand, sukh ki praapti ho, sab niraash hain aur aap vishwa ke liye aashaaon ke sitaare ho aur baapdaada sabhi bachchon ko baap ke aashaaon ke sitaare dekhte hain। sirf ummeedon ke sitaare nahin lekin aashaayen poorn karne vaale aashaaon ke sitaare ho।

baapdaada ke paas bachchon ka sneh sada pahunchta hai aur sabse sahaj purushaartha kaun sa hai? bhinna bhinna purushaartha hai lekin sabse sahaj purushaartha sneh hai। sneh mein mehnat bhi muhabbat ke roop mein badal jaati hai। to baap ke snehi banna arthaat sahaj purushaartha karna। sneh mein aap sabhi apne ko snehi samajhte hain, kabhi kabhi nahin, sada snehi। jo apne ko sada sneh ke saagar mein samaaye hue samajhte hain, sada sneh ke saagar mein samaaya hua। dubki lagaane vaale nahin, samaaye hue। jo apne ko aisa sneh ke saagar mein samaaya hua samajhte hain woh haath uthaao। sada? sada shabd ko underline karo। haath uthaao, sada, sada? haath to achha uthaaya hai। baapdaada haath ko dekhke khush hote hain kyonki himmat rakhte hain। agar kuchh kam bhi hoga to yaad to aayega ki haath uthaaya hai kyonki baapdaada ka ek ek bachche se ati sneh hai। kyon? kyonki baapdaada jaante hain ki yeh ek ek aatma anek baar snehi bani hai, abhi bhi bani hai aur har kalpa yahi aatmaayen snehi banengi। nasha hai, khushi hai ki ham hi har kalpa ke adhikaari aatmaayen hain?

baapdaada aise adhikaari aatmaon ko dekh dil ki duaayen de rahe hain। sada athak ban udte chalo। kabhi bhi agar koi paristhiti aati hai to sva-sthiti ko neeche oopar nahin karo। sva-sthiti ke aage paristhiti kuchh nahin kar sakti।

achha, pahli baari kaun aaye hain, woh haath uthaao। bahut aate hain। baapdaada ko ek ek bachche ko dekh naaz hai - vaah mere bachche vaah! jaise aap dil mein geet gaate ho na automatic vaah baba vaah! mera baba vaah! aise hi baap bhi bachchon ke prati yahi geet gaate ki vaah har ek bachcha vaah! kyonki baap ko bhi kalpa ke baad aap bachche milte ho aur ek ek vishwa ke aage mahaan hai। to baap bhi geet gaate hain vaah bachche vaah! vaah vaah ho na! vaah! vaah! bachche ho na! vaah! vaah! bachche, haath uthaao।

to sada yahi yaad rakho ham vaah vaah! bachche hain। chaahe purushaarthi hain lekin hain vaah! vaah! bachche, baap ke vaah! vaah! bachche, baap ke saath hi chalenge। rah to nahin jaayenge na! baap to kehte hain har ek bachche ko sneh ki godi mein saath le jaayen। to taiyaar ho! taiyaar hain? raaste mein ruk to nahin jaayenge? saath chalenge kyonki vaayda hai, vaayda to nibhaane vaale ho।

abhi baapdaada yahi chaahte hain ki pharishta roop apna emerge karo। chalte phirte pharishta dress vaale anubhav karaao। baapdaada ne drill sunaai na। vastra badli karne ki aadat to hai na! to jaise shareer ki dress badli karte ho, aise hi aatma ka swaroop pharishta, baar-baar anubhav karo। pharishta ki dress pasanda hai na! jaise brahma baap avyakt pharishta roop mein vatan mein baithe hain aise baap samaan aap sab bhi chalte phirte pharishte roop mein anubhav karo kyonki pharishta roop hoga tabhi devta banenge। jaise baap ke teen roop yaad rehte hain na। baap, shikshak aur satguru, aise apne bhi teen roop yaad karo - brahman so pharishta aur pharishta so devta। yeh teen roop pakke hain na! kabhi brahman ki dress pahno, kabhi pharishte ki, kabhi devta ki। is teenon roop mein svatah hi trikaaldarshi ki seat mein baith saakshi hoke har kaarya karte rahenge। to sabhi se baapdaada yahi chaahte hain ki sada baap ke saath raho, akele nahin bano। saath rahenge tab saath chalenge। agar abhi kabhi kabhi rahenge to saath kaise chalenge! snehi, snehi ko kabhi bhool nahin sakta। saare din mein yeh abhyaas karte raho। abhi abhi brahman, abhi abhi pharishta, abhi abhi devta। achha।

chaaron or ke sarva bachchon ko jo sada khajaane se sampanna hain, sada apni chalan aur chehre se sevaadhaari hain kyonki aap sabka vaayda hai ki ham vishwa parivartak ban vishwa ka parivartan karenge, to chalte phirte bhi sevaadhaari seva mein tatpar rehte hain। aise vishwa sevaadhaari vishwa parivartak har ek ko baap ke khajaanon se bharpoor karne vaale baapdaada ke chaaron or ke bachchon ko baapdaada ka yaadapyaar aur dil se duaayen aur namaste। achha।

vardaan:- master trikaaldarshi ban har karma yuktiyukta karne vaale karmabandhan mukta bhav

jo bhi sankalp, bol va karma karte ho - woh master trikaaldarshi bankar karo to koi bhi karma vyartha va anartha nahin ho sakta। trikaaldarshi arthaat saaksheepan ki sthiti mein sthit hokar, karmon ki guhya gati ko jaan-kar in karmendriyon dvaara karma karaao to kabhi bhi karma ke bandhan mein nahin bandhenge। har karma karte karmabandhan mukta, karmaateet sthiti ka anubhav karte rahenge।

slogan:- jinke paas had ke ichchhaaon ki avidya hai vahi mahaan sampattivaan hain।

ye avyakt ishaare- “nishchay ke foundation ko majboot kar sada nirbhay aur nishchint raho"

jaise pahre vaala chaukeedaar agar shastradhaari hota hai aur usko nishchay hai ki mera shastra dushman ko bhagaane vaala hai, haar khilaane vaala hai to woh kitna nirbhay ho karke chalta rehta hai। to aap ke paas bhi sarva shaktiyon roopi shastra sada saath hain, sirf aavaahna karo arthaat maalik ban order karo to saphalta sada hui padi hai।