Daily Murli for Tuesday 14 April 2026

14-04-2026 praatahmurli om shanti "baapdaada"' madhuban

“meethe bachche - devta banna hai to amrit piyo aur pilaao, amrit peene vaale hi shreshthaachaari bante hain''

prashn:- is samay satayugi praja kis aadhaar par taiyaar ho rahi hai?

uttar:- jo is gyaan se prabhaavit hote hain, bahut achha, bahut achha kehte hain lekin padhaai nahin padhte, mehnat nahin kar sakte, woh praja ban jaate hain। prabhaavit hona maana praja banna। sooryavanshi raaja-raani banne ke liye to mehnat chaahiye। padhaai par poora attention ho। yaad karte aur karaate rahen to oonch pad mil sakta hai।

geet:- toone raat gavaai so ke…

om shanti। bachchon ne geet suna ki hamaara jeevan heere jaisa tha। ab kaudi jaisa ho pada hai। yeh to common baat hai। baba bahut sahaj reeti se samjhaate hain, jo koi chhota bachcha bhi samajh sake। satya naaraayan ki katha sunaate hain to chhote-chhote bachche bhi baith jaate hain। parantu woh satsangon aadi mein jo sunaate hain woh sab hain kathaayen। katha koi gyaan nahin, bani banaai kahaaniyaan hain। geeta ki kahaani, raamaayan ki kahaani bhinna-bhinna shaastra hain, jinki kahaaniyaan baith sunaate hain। woh sab hain kathaayen। kahaaniyon se koi phaayda hota hai kya! yeh hai satya naaraayan ki arthaat nar se naaraayan banne ki sachchi kahaani। yeh sunne se tum nar se naaraayan ban jaayenge। yeh amraktha bhi hui। tum nimantran dete ho ki aao amraktha tumko sunaayen to tum amarlok mein chale jaayenge। to bhi koi nahin samajhte hain। shaastron ki kahaani sunte aate hain। milta kuchh bhi nahin। jaayenge lakshmi-naaraayan ke mandir mein, chalo darshan karke aayen। mahaatma ka darshan kar aayen। yeh ek rasam-rivaaj chali aai hai। rishi-muni aadi jo hokar gaye hain unko maatha tekte aaye hain। poochho, rachta aur rachna ki kahaani ka pata hai? to kahenge nahin। abhi tum bachche samajhte ho ki yeh rachta aur rachna ki kahaani to bahut sahaj hai। alpha aur be ki kahaani hai। bhal pradarshani mein jo aate hain ve kahaani to theek sun lete hain parantu pavitra nahin bante। samajhte hain yeh vikaaron mein jaane ki rasam-rivaaj bhi anaadi hai। mandir mein devtaaon ke aage jaakar gaate hain aap sampoorn nirvikaari ho... phir baahar aakar kehte hain vikaar mein jaana to anaadi hai। is bigar duniya kaise chalegi? lakshmi-naaraayan aadi ko bhi to bachche the na, aise kah dete hain to aison ko kya kahen! manushya ka lakab (martaba) to de na saken। devtaayen bhi manushya the, kitne sukhi the - lakshmi-naaraayan ke raajya mein। tum bachchon ko baba bahut sahaj baat bataate hain, barobar yahaan bhaarat mein hi svarga tha। lakshmi-naaraayan ka raajya tha। chitra bhi hain, yeh to sab maanenge ki satayug mein unhon ka raajya tha। vahaan koi duhkhi nahin tha, sampoorn nirvikaari the, unhon ke mandir bhi bade-bade bane hue the। unhon ko 5 hajaar varsha hue। abhi woh nahin hain। abhi to kaliyug ka ant hai। manushya aapas mein ladte-jhagadte rehte hain। bhagwan to oopar hi rehte hain nirvaandhaam mein। asul mein ham aatmaayen bhi vahaan rehti hain, yahaan part bajaane aati hain। pahle ham lakshmi-naaraayan ke raajya mein the। vahaan bahut sukh-aananda tha phir hamko 84 janma lene pade। gaaya bhi jaata hai 84 ka chakra। hamne sooryavanshi mein 1250 varsha raajya kiya। vahaan athaah sukh tha, sampoorn nirvikaari the, heere-javaahraat ke mahal the। hamne raajya kiya phir 84 janmon mein aana pade। yeh world ki history-geography ka chakra phirta rehta hai। aadhaakalpa sukh tha। raamraajya mein the phir manushyon ki vriddhi hoti gai। satayug mein 9 laakh the। satayug ant mein vriddhi hokar 9 laakh se do karod ho gaye, phir 12 janma treta mein bahut sukh chain mein the। ek hi dharma tha। phir kya hua? phir raavan raajya shuru hua। raamraajya aur raavan raajya dekho bahut sahaj reeti se samjhaata hoon। chhote-chhote bachchon ko bhi aise bataana chaahiye aur kya hua? bade-bade sone heere javaahraaton ke mahal earthquake mein andar chale gaye। bhaaratvaasiyon ke vikaari banne se hi earthquake hui, phir raavan raajya shuru hua। pavitra se apvitra ho gaye। kehte bhi hain sone ki lanka andar chali gai। kuchh to bacha hoga na, jisse phir mandir aadi banaaye honge। bhakti maarga shuru hua - manushya vikaari hone lage। phir raavan raajya chala to aayu bhi kam ho gai। ham nirvikaari yogi se vikaari bhogi ban gaye, yatha raaja raani tatha praja sab vikaari ban gaye। yeh kahaani kitni sahaj hai। chhoti-chhoti bachchiyaan bhi yeh kahaani sunaayen to bade-bade aadmiyon ka munh neecha ho jaae। abhi baap baith sunaate hain, vahi gyaan ka saagar patit-paavan hai। achha dvaapar mein bhogi patit ban gaye phir aur dharma bhi shuru hote gaye। amrit ka jo nasha tha woh khalaas ho gaya। ladaai-jhagde hone lage। dvaapar se lekar ham gire, kaliyug mein ham aur hi vikaari banen। patthar ki moortiyaan banaate rahe। hanoomaan, ganesh ki....। pattharbuddhi hone lage to patthar ki pooja karne lage। samajhte the ki bhagwan patthar-thikkar mein hai। aise karte-karte bhaarat ki yeh haalat ho gai ab phir baap kehte hain vish chhod amrit peekar pavitra bano aur phir raajaai lo। vish chhodo to phir tum manushya se devta ban jaayenge। parantu vish chhodte nahin hain। vish ke liye kitna maarte, tang karte hain tab to dropdi ne pukaara na। tum samajhte ho ki amrit peene bigar ham devta kaise banenge। satayug mein to raavan hota hi nahin। baap kehte hain, jab tak shreshthaachaari nahin banenge, svarga mein nahin aa sakenge। jo shreshthaachaari the, woh ab bhrashtaachaari bane hain। phir ab amrit peekar shreshthaachaari banna hai। baap kehte hain maamekam yaad karo। kya geeta bhool gaye ho? geeta rachi mainne, naam daal diya krishna ka। in lakshmi-naaraayan ko yeh raajaai kisne di? zaroor bhagwan ne di hogi। agle janma mein bhagwan ne raajayog sikhaaya, naam phir daala hai krishna ka। to samjhaane ki practice karni chaahiye। bahut sahaj kahaani hai। baba ko kitna samay laga? aadha ghante mein itni sahaj baat bhi samajh nahin sakte isliye baap kehte hain sirf ek chhoti kahaani baith kisko samjhaao। haath mein chitra lo। satayug mein lakshmi-naaraayan ka raajya, phir treta mein raam-seeta ka raajya ....phir dvaapar mein raavan ka raajya hua। kitni sahaj kahaani hai। barobar ham devta the phir kshatriy, vaishya, shoodra bane। abhi apne ko devta na samajhne kaaran hindu kah dete hain। dharma shreshtha, karma shreshtha se dharma bhrashta, karma bhrashta ban pade hain। aisi chhoti-chhoti bachchiyaan baith bhaashan karen to saari sabha mein hear-hear ho jaae।

baba sabhi centres vaalon ko suna rahe hain। ab yeh bade-bade nahin seekhte hain to chhoti-chhoti kumaariyon ko sikhaao। kumaariyon ka naam bhi hai। dehli, baambe mein bahut achhi-achhi kumaariyaan hain। padhi likhi hain। unko to khada ho jaana chaahiye। kitna kaam kar sakti ho। agar kumaariyaan khadi ho jaaen to naam baala ho jaae। saahookaar ghar ki jo hain woh mushkil himmat rakhti hain। saahookaari ka nasha rehta hai। dahej aadi milta hai to bas। kumaariyaan shaadi kar kaala munh kar deti aur sabke aage jhukna padta hai। to baap kitna sahaj samjhaate hain। parantu paarasbuddhi banne ka khyaal hi nahin aata। dekho jo nahin padhte hain woh bhi aajkal em. pi., em. L. A. aadi ban gaye hain। padhaai se to kya-kya ban jaate hain। yeh padhaai to bahut sahaj hai। auron ko bhi jaakar sikhaana chaahiye। parantu shreemat par nahin chalte to padhte bhi nahin hain। bahut achhi-achhi kumaariyaan hain parantu apna hi nasha chadha hua hai। thoda kaam kiya to samajhti hain hamne bahut kaam kiya hai। abhi to bahut kaam karna hai। aajkal fashion mein hi kumaariyaan rehti hain। vahaan to natural shrringaar rehta hai। yahaan to kitna artificial shrringaar karte hain। sirf baal banaane mein hi kitne paise dete hain। yeh hai maaya ka pomp। fall oph maaya raavan raajya, phir rise oph raamraajya। ab raamraajya sthaapan hota hai। parantu tum mehnat to karo na। tum kya banenge! agar padhenge nahin to vahaan jaakar paai-paise ki praja banenge। aajkal ke bade-bade aadmi vahaan ki sab praja mein aa jaayenge। saahookaar log sirf achha-achha kah apne dhandhe mein lag jaate hain। bahut achha prabhaavit hote hain phir kya! aakhreen kya hoga? vahaan jaakar praja banenge। prabhaavit maana praja। jo mehnat karte hain woh raamraajya mein aa jaayenge। samjhaani to bahut sahaj hai। is kahaani ke nashe mein koi rahe to beda paar ho jaae। ham shantidham mein jaayenge phir sukhdhaam mein aayenge bas yaad karte-karaate rehna hai, tab hi oonch pad paayenge। attention padhaai par dena hai। chitra haath mein ho। jaise baba jab lakshmi-naaraayan ki pooja karte the to chitra jeb mein pada rehta tha। chitra chhote bhi hain, locket mein bhi hain। un par samjhaana hai। yeh hai baba, un dvaara varsa mil raha hai। ab pavitra bano, baap ko yaad karo। kitni knowledge hai in medals (badge) mein। inmen saara gyaan hai। in par samjhaana bahut sahaj hai। second mein baap se svarga ke jeevanmukti ka varsa। koi bhi samjhaaye to jeevan-mukti pad ka adhikaari ban jaaye। baaki padhaai anusaar oonch pad paayenge। svarga mein to aayenge na। pichhaadi mein aayenge to sahi na। vriddhi to honi hai। devi-devta dharma oonch hai, woh bhi to banenge na। praja to laakhon banengi। sooryavanshi banne mein mehnat hai। service karne vaale hi achha pad paayenge। unka naam bhi baala hai - kumaarka hai, janak hai achha centre sambhaal rahi hain। koi khitpit nahin hai।

baap kehte hain si no evil, talk no evil phir bhi aisi-aisi baaten karte rehte hain। aise-aise kya jaakar banenge। itni sahaj service bhi nahin karte hain। chhoti-chhoti bachchiyaan bhi yeh samjha sakti hain। suna sakti hain। bandar sena bhi mashhoor hai। seetaayen jo raavan ki jel mein phansi hui hain unhon ko chhudaana hai। kathaayen to kya-kya bana di hain। aise-aise koi bhaashan karen। baaki sirf kehte hain phalaana bahut prabhaavit hua। poochho, tum kya banna chaahte ho? sirf doosron ko kahenge inka gyaan bahut achha hai। khud samajhte kuchh bhi nahin, isse kya phaayda। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) paarasbuddhi banne ke liye padhaai par poora-poora dhyaan dena hai। shreemat par padhna aur padhaana hai। had ki saahookaari ka nasha, fashion aadi chhod is behad seva mein lag jaana hai।

2) hear no evil, si no evil....koi bhi vyartha baaten nahin karni hain। kisi par prabhaavit nahin hona hai। sabko satya naaraayan ki chhoti si kahaani sunaani hai।

vardaan:- naye jeevan ki smriti se karmendriyon par vijay praapta karne vaale marjeeva bhav

jo bachche poora marjeeva ban gaye unhein karmendriyon ki aakarshan ho nahin sakti। marjeeva bane arthaat sab taraph se mar chuke, puraani aayu samaapta hui। jab naya janma hua, to naye janma, nai jeevan mein karmendriyon ke vash ho kaise sakte। brahmaakumaar-kumaari ke naye jeevan mein karmendriyon ke vash hona kya cheez hoti hai - is knowledge se bhi pare। shoodra pan ka jara bhi saans arthaat sanskaar kahaan atka hua na ho।

slogan:- amritvele dil mein parmaatma sneh ko sama lo to aur koi sneh aakarshit nahin kar sakta।

ye avyakt ishaare - mahaan banne ke liye madhurta aur namrata ka gun dhaaran karo

sangathan mein saphalta praapta karne ke liye sada namrachitta ke takhta par viraajmaan raho। isi takhta par baith, zimmevaari ka taaj dhaaran kar bhavishya ki padvi banaao। takhta se utarna nahin, isi par baithkar kaam karo to saphalta milti rahegi। iske liye ‘pahle aap' ka paath pakka ho, isse aapke sanskaar sabke saath sahaj hi mil jaayenge।