Daily Murli for Monday 13 April 2026

13-04-2026 praatahmurli om shanti "baapdaada"' madhuban

“meethe bachche - abhi tum aisi duniya ke maalik bante ho jahaan koi had nahin, yogbal se saare vishwa ki raajaai lena yeh bhi wonder hai''

prashn:- drama ke kis bandhan mein baap bhi bandha hua hai?

uttar:- baba kehte, mujhe tum bachchon ke sammukh aana hi hai, main is bandhan mein bandha hua hoon। jab tak main na aaoon tab tak moonjha hua soot sulajh nahin sakta। baaki main tumhaare par koi kripa va aasheervaad karne nahin aata hoon। main koi mare hue ko jinda nahin karta। main to aata hoon, tumhein patit se paavan banaane।

geet:- tumhein paake hamne…

om shanti। geet ke akshar sun karke tum bachchon ke romaanch khade ho jaane chaahiye kyonki sammukh baithe hain। saari duniya mein bhal kitne bhi vidvaan, pandit, aachaarya hain, koi bhi manushya maatra ko yeh pata nahin ki behad ka baap har 5000 varsha ke baad aate hain। bachche hi jaante hain। bachche kehte bhi hain, jaisa hoon, vaisa hoon, tumhaara hoon। baap bhi aise kehte hain - jaise ho vaise ho - mere bachche ho। tum bhi jaante ho woh sab aatmaon ka baap hai। sab pukaarte hain। baap samjhaate hain - dekho raavan ka kitna parchhaaya hai। ek bhi samajh nahin sakte ki jisko ham parampita paramatma kehte hain, phir pita kahne se khushi kyon nahin hoti hai, yeh bhool gaye hain। woh baba hi humein varsa dete hain। baap khud hi samjhaate hain, yeh itni sahaj baat bhi koi samajh nahin sakte। baap samjhaate hain yeh to vahi hai, jisko saari duniya pukaarti hai - O khuda, he raam....aise pukaarte-pukaarte praan chhod dete hain। yahaan woh baap tumko padhaate hain। tumhaari buddhi ab vahaan chali gai hai। baba aaya hua hai - kalpa pahle muaaphik। kalpa-kalpa baba aakar patit se paavan banaae durgati se sadgati mein le jaate hain। gaate bhi hain sarva ka patit-paavan baap। abhi tum bachche unke sammukh baithe ho। tum ho most beloved sweet children। bhaaratvaasiyon ki hi baat hai। baap bhi bhaarat mein hi janma lete hain। baap kehte hain, main bhaarat mein janma leta hoon to zaroor vahi pyaare lagenge। yaad bhi sab unko karte hain, jo jis dharma ke hain woh apne dharma sthaapak ko yaad karte hain। bhaaratvaasi hi nahin jaante ki ham aadi sanaatan dharma ke the। baba samjhaate hain - bhaarat hi praacheen desh hai to kah dete kaun kehte hain ki bhaarat hi sirf tha। anekaanek baaten sunte hain। koi kya kahenge, koi kya। koi kehte hain kaun kehta hai ki geeta shiv paramatma ne hi gaai hai। shreekrishna bhi to paramatma tha, usne gaai। paramatma sarvavyaapi hai। unka hi saara khel hai। bhagwan ke yeh sab roop hain। bhagwan hi anek roop dhar leela karte hain। bhagwan jo chaahe so kar sakte hain। abhi tum bachche jaante ho, maaya bhi kitni prabal hai। aaj kehte hain, baba ham varsa zaroor lenge, nar se naaraayan banenge। kal honge nahin। tum jaante bhi ho kitne chale gaye, phaarakti de di। mama ko motor mein ghumaate karte the। aaj hain nahin। aise achhe-achhe bhi maaya ke sang mein aakar aisa girte hain jo ekdam neeche pad jaate hain। jinhonne kalpa pahle samjha hai vahi samjhenge। aajkal duniya mein kya laga hua hai aur tum bachche apne ko dekho kya bante ho! geet suna na। kehte hain, ham aisa varsa lete hain jo ham saare vishwa ke maalik ban jaate hain। vahaan koi had ki baat hi nahin। yahaan haden lagi hui hain। kehte hain, hamaare aasmaan mein tumhaara aeroplane aayega to shoot kar denge। vahaan to koi had ki baat hi nahin rehti। yeh bhi geet gaate hain parantu arth thode hi samajhte hain। tum to jaante ho barobar baba se phir se ham vishwa ke maalik ban rahe hain। anek baar yeh 84 ka chakra lagaaya hai। thoda samay karke duhkh paaya hai, sukh to bahut hai isliye baba kehte hain tum bachchon ko apaar sukh deta hoon। ab maaya se haaro mat। baap ke bachche dher hain। sab to ek jaise sapoot ho nahin sakte। koi ko 5-7 bachche hote hain - unmein ek do kapoot hote hain to maatha hi kharaab kar dete hain। laakhon-karodon roopaya uda dete hain। baap ekdam dharmaatma, bachche bilkul chat khaate mein। baba ne aise bahut misaal dekhe hain।

tum bachche jaante ho, saari duniya is behad baap ke bachche hain। baap kehte hain, mera birth place yeh bhaarat hai। har ek ko apni dharti ka kadar rehta hai। doosri koi jagah shareer chhodte hain to phir unko apne gaanv mein le aate hain। baap bhi bhaarat mein hi aate hain। tum bhaaratvaasiyon ko phir se behad ka varsa dete hain। tum bachche kahenge ham phir se so devta vishwa ke maalik ban rahe hain। ham maalik the, ab to kya haal ho gaya hai। kahaan se kahaan aakar pade hain। 84 janma bhogte-bhogte yeh haal aakar hua hai। drama ko to samajhna hai na। isko kaha jaata hai haar aur jeet ka khel। bhaarat ka hi yeh khel hai, ismen tumhaara part hai। tum braahmanon ka sabse oonch te oonch part hai - is drama mein। tum saare vishwa ke maalik bante ho, bahut sukh bhogte ho। tumhaare jitna sukh aur koi bhog nahin sakte। naam hi hai svarga। yeh hai narka। yahaan ke sukh kaag vishta samaan hain। aaj lakhapti hai, doosre janma mein kya banenge? kuchh pata thode hi hai। yeh hai hi paap aatmaon ki duniya। satayug hai punya aatmaon ki duniya। tum punya aatma ban rahe ho, to kabhi bhi paap nahin karna chaahiye। hamesha baba se seedha chalna chaahiye। baap kehte hain mere saath dharmaraaj sadaiv hai hi hai, dvaapar se lekar। satayug treta mein mere saath dharmaraaj nahin rehta। dvaapar se tum mere arth daan punya karte aa rahe ho। eeshvar arpan kehte hain na। geeta mein shreekrishna ka naam daalne se likh diya hai - shreekrishna arpanam। return dene vaala to ek baap hi hai isliye shreekrishna arpanam kehna wrong hai। eeshvar arpan kehna theek hai। shreegnesh arpan kahne se kuchh bhi milega nahin। phir bhi bhaavna ka kuchh na kuchh deta aaya hoon sabko। mujhe to koi jaante hi nahin hain। abhi tum bachche hi jaante ho ham sab kuchh shivbaaba ko samarpan kar rahe hain। baba bhi kehte hain, ham aaye hain aapko 21 janma ka varsa dene। abhi hai hi utarti kala। raavan raajya mein jo bhi daan punya aadi karte hain, paap aatmaon ko hi dete hain। kala utarti hi jaati hai। karke kuchh milta bhi hai to bhi alpakaal ke liye। ab to tumko 21 janma ke liye milta hai। unko kehte hain raamraajya। aise nahin kahenge vahaan eeshvar ka raajya hai। raajya to devi devtaaon ka hai। baap kehte hain, main raajya nahin karta hoon। tumhaara jo aadi sanaatan devi devta dharma tha, jo ab praayahlop hai। so abhi phir se sthaapan ho raha hai। baap to kalyaankaari hai hi, unko kaha jaata hai sachcha baba। tumko sach knowledge de rahe hain, apni aur rachna ke aadi-madhya-ant ki। baba tumko behad ki history-geography sunaate hain। kitni jabardasta kamaai hai। tum chakravarti raaja bante ho। unhonne phir woh hinsa ka chakra de diya hai। asul yeh hai gyaan ka chakra। parantu yeh gyaan to praayahlop ho jaata hai। tumhaare yeh mukhya chitra hain। ek taraph trimoorti, doosre taraph jhaad aur chakra। baba ne samjhaaya hai - shaastron mein to kalpa ki aayu laakhon varsha likh di hai। saara soot hi moonjha hua hai। baap ke sivaae koi se soot sulajh nahin sakta। baap sammukh khud aaye hain। kehte hain mujhe drama anusaar aana hi padta hai। main is drama mein bandha hua hoon। yeh ho nahin sakta ki main aaoon hi nahin। aise bhi nahin ki aakar mare hue ko jinda kar doon ya koi ko beemaari se chhuda doon। bahut bachche kehte hain - baba hamaare par kripa karo। lekin yahaan kripa aadi ki baat nahin hai। tumne mujhe isliye thode hi bulaaya hai ki aasheervaad karo - humein koi ghaata na pade। tum bulaate hi ho, he patit-paavan aao। duhkh-harta sukh-karta aao। shareer ke duhkh-harta to doctor log bhi hote hain। main koi isliye aata hoon kya! tum kehte ho nai duniya svarga ke maalik banaao va shanti do। aise nahin kehte ki hamko beemaari se aakar achha karo। hamesha ke liye shanti va mukti to mil na sake, part to bajaana hi hai। jo peechhe aate hain, unko shanti kitni milti hai। abhi tak aate rehte hain। itna samay to shantidham mein rahe na। drama anusaar jinka part hai, vahi aayenge। part badal nahin sakta। baba samjhaate hain - shantidham mein to bahut-bahut aatmaayen rehti hain, jo pichhaadi mein aati hain। yeh drama bana hua hai। pichhaadi vaalon ko pichhaadi mein hi aana hai। yeh jhaad bana hua hai। yeh chitra aadi jo banaaye hain sab tumko samjhaana hai। aur bhi chitra nikalte rahenge, kalpa pahle misal hi niklenge। 84 ka vistaar jhaad mein bhi hai। drama chakra mein bhi hai। ab phir seedhi nikaali hai। manushya to kuchh bhi jaante nahin। bilkul hi jaise buddhu hain। ab tum bachchon ki buddhi mein hai parampita paramatma jo gyaan ka saagar, shanti ka saagar hai, woh hamko is tan dvaara padha rahe hain। baap kehte hain, main aata hi unmein hoon jo pahle-pahle vishwa ka maalik tha। tum bhi jaante ho - barobar ham bhi brahma dvaara brahman bante hain। geeta mein to yeh baaten hain nahin। baap kehte hain yeh khud hi naaraayan ki pooja karne vaala tha, train mein bhi musaaphiri karte, geeta padhte the। manushya samjhenge, yeh to bada dharmaatma hai। abhi woh sab baaten bhoolte jaate hain। phir bhi isne geeta aadi padhi hai na। baba kehte hain main yeh sab jaanta hoon। abhi tum yeh vichaar karo ki ham kiske aage baithe hain, jisse vishwa ke maalik bante ho phir unko ghadi-ghadi bhool kyon jaate ho? baap kehte hain tumko 16 ghanta free deta hoon, baaki apni service karo। apni service karte ho goya vishwa ki service karte ho। itna purushaartha karo jo karma karte kam se kam 8 ghanta baap ko yaad karo। abhi saare din mein 8 ghanta yaad kar nahin sakte। woh avastha jab hogi tab samjhenge yeh bahut service karte hain। aise mat samjho ham bahut service karte hain। bhaashan bahut first class karte hain parantu yog bilkul nahin hai। yog ki yaatra hi mukhya hai।

baap kehte hain sir par vikarmon ka bojh bahut hai isliye savere uthkar baap ko yaad karo। 2 se 5 tak hai first class vaayumandal। aatma raat ko aatma-abhimaani ban jaati hai, jisko neend kaha jaata hai isliye baap kehte hain jitna ho sake baap ko yaad karo। ab baap kehte hain, manamnaabhav। yeh hai chadhti kala ka mantra। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se seedha aur sachcha hokar chalna hai। kalyaankaari baap ke bachche hain isliye sarva ka kalyaan karna hai। sapoot banna hai।

2) karma karte bhi kam se kam 8 ghanta yaad mein zaroor rehna hai। yaad hi mukhya hai - isse hi vikarmon ka bojh utaarna hai।

vardaan:- daata ban har second, har sankalp mein daan dene vaale udaarchit, mahaadaani bhav

aap daata ke bachche lene vaale nahin lekin dene vaale ho। har second har sankalp mein dena hai, jab aise daata ban jaayenge tab kahenge udaarchit, mahaadaani। aise mahaadaani banne se mahaan shakti ki praapti svatah hoti hai। lekin dene ke liye svayan ka bhandaara bharpoor chaahiye। jo lena tha woh sab kuchh le liya, baaki rah gaya dena। to dete jaao dene se aur bhi bhandaara bharta jaayega।

slogan:- har subject mein full marks jama karni hai to gambheerta ka gun dhaaran karo।

ye avyakt ishaare - mahaan banne ke liye madhurta aur namrata ka gun dhaaran karo

namrachit aatma sahaj hi sukhdaata ban sakti hai lekin abhimaan namrachit banne nahin deta। namrachit nahin to seva ho nahin sakti। sevaadhaari ki visheshta sada namrachit, svayan jhuka hua hoga tab auron ko jhuka sakega। jitna namrachit honge utna nirmaan karenge। jahaan nirmaanta hogi vahaan rob nahin hoga, roohaaniyat hogi। jaise baap kitna namrachit bankar aate hain, aise follow father।