Daily Murli for Friday 1 May 2026

01-05-2026 praatahmurli om shanti "baapdaada"' madhuban

“meethe bachche - tumne raavan ki mat par baap ki glaani ki to bhaarat kaudi tulya bana, ab use pahchaan kar yaad karo to dhanvaan ban jaayenge''

prashn:- seedhi ke chitra mein kaun sa wonderful raaz samaaya hua hai?

uttar:- aadhaakalpa hai bhakti ki dance aur aadhaakalpa hai gyaan ki dance। jab bhakti ki dance hoti hai to gyaan ki nahin aur jab gyaan ki hoti to bhakti ki nahin। aadhaakalpa raavan ki praalabdha chalti aur aadhaakalpa tum bachche praalabdha bhogte ho। yeh guhya raaz seedhi ke chitra mein samaaya hua hai।

geet:- om namo shivaae…

om shanti। baap baith samjhaate hain - bhakti maarga mein bahut hi bhakti ki dance ki, gyaan ki dance nahin ki। bhakti ki dance jab hoti hai to gyaan ki nahin। jab gyaan ki hoti hai to bhakti ki nahin kyonki bhakti ki dance utarti kala mein le jaati hai। satayug-treta mein bhakti hoti nahin। bhakti shuru hoti hai dvaapar se। jab bhakti shuru hoti hai to gyaan ki praalabdha poori ho jaati hai phir utarti kala hoti hai। kaise utarte hain, so baap baith samjhaate hain। main kalpa-kalpa aakar bachchon ko kehta hoon - tum bachchon ne hamaari bahut hi glaani kar di hai। jab-jab bhaarat mein is aadi sanaatan devi-devta dharma ki bahut glaani hoti hai tab main aata hoon। glaani kisko kaha jaata hai, woh bhi samjhaate hain। baap kehte hain - main vikaari narkavaasi bhaarat ko aakar kalpa-kalpa svargavaasi banaata hoon। tum meri glaani, aasuri mat par karne ke kaaran kitne kangaal ban gaye ho। raamraajya tha, abhi hai raavan raajya, jisko haar aur jeet, din aur raat kaha jaata hai। ab vichaar karo main kab aaoon! jinhon ko raajya diya, vahi raajya ganva baithe hain। hisaab-kitaab to saara samjhaaya hi hai। main aakar varsa deta hoon phir raavan aakar tumko shraapit karte hain - bhaarat ko khaas, duniya ko aam। bhaarat ki mahima ka bhi kisko pata nahin hai। pahle-pahle bhaarat hi tha, kab tha, kaise tha, kaun raajya karte the, kisko bhi kuchh pata nahin hai। kuchh bhi samajhte nahin hain। jo devta the, shakla manushya ki, seerat devtaaon ki thi। ab soorat bhal manushya ki hai, seerat aasuri hai, jisko samjhaate hain woh samajhte nahin hain kyonki paarlaukik baap ko hi nahin jaante। aur hi baith gaali dete hain। baap ki glaani karte-karte bilkul hi kaudi-tulya ban gaye hain। bhaarat ka down fall ho gaya hai। aisi haalat jab hoti hai, baap kehte hain, tab main aata hoon। abhi tum bachchon ko sammukh samjha raha hoon। kalpa pahle bhi aise hi samjhaaya tha। yeh daivi-sampradaay ki sthaapna ho rahi hai, manushya se devta ban rahe hain। manushyon ko yeh pata hi nahin hai ki baap kab aate hain, satayug, treta mein tum badi khushi mein praalabdha bhogte ho। phir dvaapar se raavan ka shraap paate-paate bilkul hi khatma ho jaate। jaise devtaayen praalabdha bhogte-bhogte treta ke ant mein khatma ho jaate hain phir raavan ki aasuri praalabdha shuru hoti hai। bhakti bhi pahle avyabhichaari hoti hai phir vyabhichaari hoti hai। seedhi theek bani hui hai। har ek cheez satopradhaan, sato-rajo-tamo banti hai। khaad padti jaati hai। tum bachchon ko samjhaaya to bahut achhi reeti jaata hai, parantu dhaarna kam hoti hai। koi mein to samjhaane ka bilkul akla hi nahin hai। koi achhe anubhvi hain, jinki dhaarna badi achhi hoti hai। nambarvaar to hote hain na। students ek samaan nahin hote। kuchh na kuchh number zaroor rakhenge। koi ko bhi samjhaana hai bahut sahaj। baap kehte hain - mujhe yaad karo। main tumhaara behad ka baap, srishti ka rachayita hoon। mujhe yaad karne se tumko behad ka varsa milega। yaad se hi khaad niklegi। sirf yeh samjhaao ki tum bhaaratvaasi satayug mein satopradhaan the, abhi kaliyug mein tamopradhaan bane ho। aatma mein khaad padti hai। pavitra hone bigar koi vahaan ja nahin sakte। nai duniya mein hain hi satopradhaan। kapda naya hai to kahenge satopradhaan, phir puraana tamopradhaan ho jaata hai। abhi sabka kapda phatne laayak hai। sab jad-jadeebhoot avastha ko paaye hue hain। jo vishwa ke maalik the, vahi bilkul gareeb bane hain। phir unko hi saahookaar banna hai। in baaton ko manushya nahin jaante। bhaarat svarga tha, in lakshmi-naaraayan ka raajya tha aur sab dharma vaale to baad mein aaye hain। baap tumko real baat baith samjhaate hain। geeta ka dekho kitna maan hai। padhte-padhte bilkul hi neeche gir gaye hain, tab pukaarte hain - he patit-paavan aao। ham bhrashtaachaari ban gaye hain। sadgati to bhagwan hi de sakte hain। baaki shaastron mein to sab hai bhakti maarga। tumhaari buddhi mein baitha hua hai - ham baba ke gyaan se devta bante hain। ab saari duniya se vairaagya hai। sannyaasi bhi bhakti karte hain, ganga snaan aadi karte hain na। bhakti bhi satopradhaan, phir rajo, tamo hoti hai। yeh bhi aise hai। aadhaakalpa brahma ka din aur aadhaakalpa raat gaai jaati hai। brahma ke saath zaroor braahmanon ka bhi hoga। tum abhi din mein jaate ho, bhakti ki raat poori hoti hai। bhakti mein to bahut duhkh hai, unko raat kaha jaata hai। andhere mein dhakke khaate rehte hain - bhagwan se milne ke liye। bhakti maarga mein sadgati dene vaala koi hota nahin। tumhaare sivaae koi bhi yathaartha reeti bhagwan ko nahin jaante hain। aatma bhi bindi, paramatma bhi bindi hai, yeh baat koi bhi samajh na sake। paramatma hi svayan aakar brahma tan se samjhaate hain। unhonne phir bhaageerath, bail ke roop mein dikhaaya hai। ab bail ki to baat hi nahin hai। baap sab baaten achhi reeti samjhaate hain parantu kiski buddhi mein poori reeti baithta nahin।

baap baith samjhaate hain - bachche main tum aatmaon ka baap hoon। tum mujhe yaad karo aur varse ko yaad karo to tumhaare vikarma vinaash honge। phir bhi kehte ho, bhool jaate hain। vaah! aise saajan va baap ko bhoolna chaahiye। stri, pati ko athva bachche kabhi baap ko bhoolte hain kya? yahaan tum kyon bhoolte ho? kehte bhi ho baba aap hamko svarga ka maalik bana rahe hain phir bhi bhool jaata hoon। baap kehte hain - yaad nahin karenge to andar jo kat chadhi hai, woh kaise niklegi। mukhya baat hai hi yaad ki। apna koi doosre dharma se tailuk nahin hai। school mein to history-geography samjhaate ho। koi to bilkul samajhte nahin। baap padhaate hain, yeh buddhi mein baithta nahin hai। achha baap aur varsa to yaad karo ki yeh bhi bhool jaate ho! jiske liye aadhaakalpa se bhakti karte aaye, us baba ko yaad nahin karte। tum bachchon ki buddhi mein hai, ab ham yeh shareer chhod raajaai mein jaayenge, yeh antim janma hai। sookshm vatan mein unke features to vahi dekhte ho, vaikuntha mein bhi dekhte ho। jaante ho yeh mama-baba hi lakshmi-naaraayan bante hain, tum jab satayug mein rehte ho to samajhte ho ki yeh ek shareer chhod doosra lena hai। vahaan unko yeh pata nahin rehta ki satayug ke baad treta aayega, dvaapar aayega, ham utarte jaayenge। gyaan ki baat nahin rehti hai। punarjanma lete rehte hain। vahaan aatma-abhimaani rehte hain phir aatma-abhimaani se deh-abhimaani ban jaate hain। yeh knowledge sirf tum braahmanon ko hai aur koi ke paas nahin hai। yeh gyaan-gyaaneshvar, jo gyaan ka saagar baap hai, vahi sunaate hain। zaroor brahma ke bachche, braahmanon ko hi sunaayenge। brahma ke bachche hain - brahman sampradaay। raat-din ka farka hai। tum purushaartha kar sampoorn gunvaan bante ho। sampoorn nirvikaari, grihastha vyavhaar mein rehte bhi tum baap ko yaad karo, karma to karna hi hai। buddhi ka yog baap ke saath laga rahe। karma bhal koi bhi karo, badhai ka kaam karo va raajaai ka karo। raaja janak ka bhi gaayan hain na। raajaai karte raho parantu buddhi ka yog baap ke saath lagaao to varsa mil jaayega। baap kehte hain manamnaabhav, maamekam yaad karo। shivbaaba kehte hain sirf shiv kahne se ling yaad aayega। aur to sabke shareer ka naam liya jaata hai, part shareer se bajaate hain। abhi tumko aatma-abhimaani banaaya jaata hai, jo aadhaakalpa chalta hai। is samay sabhi hain deh-abhimaan mein। vahaan aatma-abhimaani honge yatha raaja-raani tatha praja। aayu to sabki badi hoti hai। yahaan sabki aayu kam hai। to baap sammukh baith bachchon ko kitna achhi reeti samjhaate hain - he aatmaon, kyonki aatma gyaan leti hai, dhaarna aatma mein hoti hai। baba ko shareer to hai nahin। aatma mein saara gyaan hai। aatma bhi star hai, baba bhi star hai। woh punarjanma nahin lete hain, aatmaayen punarjanma leti hain isliye baba ne kaam diya tha ki paramatma ki mahima aur bachche ki mahima likhkar aao। donon ki alag-alag hai। shreekrishna ki alag mahima hai। woh saakaar, woh niraakaar। itna gunvaan kisne banaaya? zaroor kahenge paramatma ne banaaya।

is samay tum eeshvareey sampradaay ho। tumko baap sikhla rahe hain। peechhe phir praalabdha bhogte hain। satayug mein to koi nahin sikhlaayenge। bhaktimaarga ki saamagri hi khatma ho jaati hai। is duniya se vairaagya bhi chaahiye arthaat deh sahit deh ke sab sambandh chhod apne ko ashareeri aatma samajhna hai। nange aaye the, nange jaana hai। yeh puraani duniya khalaas ho jaani hai, ham sab nai duniya mein jaane vaale hain। bas yeh yaad ki mehnat karte raho, ismen hi fail hote hain। yaad karte nahin hain। jo bhi samajhne ke liye aate hain unko bhi yahi samjhaana hai - shivbaaba brahma dvaara kehte hain ki mujhe yaad karo to yaad se tumhaari khaad nikal jaayegi, tum vishnupuri ke maalik ban jaayenge। vishnupuri hi svargapuri hai। to jitna ho sake baap ko yaad karo, jis baap ko aadhaakalpa yaad kiya hai ab woh sammukh aaye hain। kehte hain - mujhe yaad karo, unko koi bhi jaante nahin। khud hi aakar apna parichay dete hain। main jo hoon, jaisa hoon, aisa koi virla jaante aur nishchay karte hain। nishchay kar lete hain to purushaartha kar varsa pa lete hain। shivbaaba kehte hain - mujhe yaad karne se hi tumhaare vikarma vinaash honge aur tum pavitra ban pavitra duniya ke maalik banenge। vikarma koi bhi nahin karna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) purushaartha kar sampoorn gunvaan banna hai। karma koi bhi ho lekin baap ki yaad mein rahkar karna hai। koi bhi vikarma nahin karna hai।

2) yeh puraana kapda (shareer) jadajdeebhoot hai, isse mamatva nikaal dena hai। aatma ko satopradhaan banaane ka poora-poora purushaartha karna hai।

vardaan:- sada ateendriy sukh ki anubhooti karne vaale atal akhanda svaraajya adhikaari bhav

jo bachche sangamayug par ateendriy sukh ka varsa sadaakaal ke liye praapta kar lete hain arthaat jinka baap ke will par poora adhikaar hota hai ve will power vaale hote hain। unhein atoot atal ateendriy sukh ki anubhooti hoti hai। aise vaaris arthaat sampoorn varse ke adhikaari hi bhavishya mein atal-akhanda svaraajya ka adhikaar praapta karte hain।

slogan:- jahaan meraapan aata hai vahaan buddhi ka phera ho jaata hai।

maateshvari ji ke anmol mahaavaakya “chadhti kala aur girti kala ki mukhya jad kya hai?''

bahut manushya yeh prashn poochhte hain ki jab itna purushaartha kar jeevanmukti pad ko paate hain to phir vahaan kya kaaran banta jo ham neeche girte hain? bhal ham kehte hain ki yeh haar aur jeet ka khel hai, ismen chadhti kala aur utarti kala hone ka bhi koi kaaran zaroor hai। jis kaaran ke aadhaar par yeh khel chalta hai, jaise purushaartha se ham chadh rahe hain vaise girne ka bhi kaaran jarur hai। ab kaaran bhi koi bada nahin hai jara si bhool hai jaise paramatma kehta hai mujhe yaad karo to main tumko mukti jeevanmukti pad doonga vaise hi jab body conscious ho paramatma ko bhoolte hain to girte hain। phir vaam maarga mein chale jaate hain phir 5 vikaaron mein phansane se duhkh uthaate hain to yeh hua apna dosh, na ki rachta ka dosh hai। jo log kehte hain duhkh sukh paramatma hi deta hai yeh kehna bilkul wrong hai। baba sukh rachta hai na ki duhkh rachta। baaki ham shreshtha karma se sukh uthaate hain aur bhrashta karma se duhkh bhogte hain, baaki achhe karma ka phal aur bure karmon ka danda paramatma dvaara avashya milta hai। parantu aise nahin kahenge ki sukh-duhkh donon paramatma deta hai, nahin। paramatma to chadhti kala mein hamaare saath hai, baaki giraane vaali maaya hai। common reeti mein bhi koi saath athva madad lete hain sukh ke liye। baaki duhkh uthaane ke liye koi kiska saath nahin lete। baaki to jaisa-jaisa karma vaisa-vaisa phal ki result। to is drama ke andar duhkh-sukh ka khel apne karmon ke oopar bana hua hai, parantu tuchchha buddhi manushya is raaz ko nahin jaante। achha - om shanti।

ye avyakt ishaare - sada achal, adol, ekras sthiti ka anubhav karo

samay pramaan ab sada achal-adol sarva khajaanon se sampanna raho। thoda bhi dagmag hue to sarva khajaanon ka anubhav nahin hoga। baap dvaara mile hue khajaanon ko sada kaayam rakhne ka saadhan hai sada achal adol rehna। achal rahne se sada hi khushi ki anubhooti hoti rahegi। jaise vinaashi dhan, naam-maan-shaan, kursi aadi milti hai to khushi hoti hai na। yeh to avinaashi khushi hai lekin yeh khushi use rahegi jo achal adol, ekras sthiti mein rahenge।