Daily Murli for Saturday 2 May 2026

02-05-2026 praatahmurli om shanti "baapdaada"' madhuban

“meethe bachche - is drama ke andar vinaash ki bhaari noondh hai, tumhein vinaash ke pahle karmaateet banna hai''

prashn:- baap ke kin shabdon ki kashish sammukh mein bahut hoti hai?

uttar:- baap jab kehte - tum mere bachche ho, to in shabdon ki kashish sammukh mein bahut hoti hai। sammukh sunne se bahut achha lagta hai। madhuban sab bachchon ko aakarshit karta hai kyonki yahaan hai eeshvareey parivaar। yahaan braahmanon ka sangathan hai। brahman aapas mein gyaan ki hi len-den karte hain।

geet:- hamaare teertha nyaare hain…

om shanti। bachche jaante hain ki ham avinaashi yaatra athva roohaani yaatra par ja rahe hain, jis yaatra se ham lautkar mrityulok mein nahin aayenge। manushya to yeh baat jaante hi nahin ki aisi yaatra bhi koi hoti hai, jahaan se kabhi lautkar aana na pade। tum lucky stars ko abhi pata pada hai। yeh pakka yaad karna hai। ham aatmaayen part bajaati hain। us naatak mein aise nahin kahenge ki mujh aatma ne yeh vastra pahankar part bajaaya, ab ghar jaate hain। vo to apne ko shareer hi samajhte hain। yahaan tum bachchon ko gyaan hai - ham aatma hain, yeh shareer roopi kapda chhod phir doosra jaakar lenge। yeh 84 janmon ke puraane kapde hain, yeh chhodkar nai duniya mein phir naye kapde lenge। yeh lakshmi-naaraayan ne naye kapde pahne hain na! tumhaari hi raajdhaani ke hain। tum bhi jaae aise naye daivi kapde pahnenge। yahaan to kehte hain - mujh nirgun haare mein koi gun naaheen। baap hi phir aisa gunvaan banaate hain। baap kehte hain - mera bhi part hai, aakar phir tumko viceless banaata hoon। yahaan yeh hai jeevanbandha dhaam, raavanraajya hai। yeh tumhaari buddhi mein hai, ham patit se paavan phir paavan se patit kaise bante hain। tum bachche jaante ho - kaliyug hai andhiyaara। raavanraajya ka ab ant hai, raamraajya ki ab aadi honi hai। abhi hai sangam। kalpa ke sangamayuge baap ko hi aana padta hai। duniya vaale bhi ab yeh samajh rahe hain ki ab vinaash ka samay hai aur sthaapna-arth bhagwan kahaan gupta vesh mein hai। ab gupta vesh mein to tum aatmaayen bhi ho। aatma alag hai, shareer alag hai। yeh manushya chola gupta vesh hai। baap ko bhi ismen aana hai। tumhaare shareer par naam padte hain, unko to shareer hai nahin। tum bhi aatma ho, woh bhi aatma hai। aatma ka aatma ke saath ab moh hua hai। gaate bhi hain - aur sang tod, tum sang jodenge। jaise aap mohjeet ho, vaise ham bhi banenge। baba bahut mohjeet hai। kitne dher bachche hain, jo kaam chita par baith jal gaye hain। parampita paramatma aate hi hain - puraani duniya ka vinaash karaane, phir moh kaise hoga। patiton ka jab vinaash ho tab to shanti ka raajya ho। is samay sukh to koi ko bhi hai nahin। sabhi tamopradhaan duhkhi ban gaye hain। yeh hai hi patit duniya। shivbaaba hi aakar svarga ki sthaapna karte hain, jiska naam shivaalay pada hai। shivbaaba ne devtaaon ki raajdhaani sthaapan ki। woh hai chaitanya shivaalay aur woh shivaalay jismen shiv ka chitra hai vo to jad ho gaya।

abhi tum samajh gaye ho ki lakshmi-naaraayan barobar svarga ke maalik the। poojya the, ab phir poojya ban rahe hain। tumko abhi gyaan hai। tum lakshmi-naaraayan ke mandir mein jaakar unko maatha nahin tekenge। tum to unki raajdhaani mein chaitanya mein jaate ho। jaante ho ham devta the, ab nahin hain। jo past hokar gaye hain unke chitra bante hain। lakshmi-naaraayan ke mandir sabse jaasti bidla banaate hain। to unki bhi service karni chaahiye। tum jo yeh lakshmi-naaraayan ke mandir banaate ho, ham aapko inhon ke 84 janmon ki kahaani sunaate hain। yukti se yeh saugaat deni chaahiye। baba service ki yuktiyaan to bataate hain। maataayen jaakar bolen aap unke mandir to banaate ho parantu unki jeevan kahaani ko jaante nahin। ham jaante hain aur samjha bhi sakte hain। samjhaane vaali badi raseeli chaahiye। baap bhi baith samjhaate hain na। baba kehte - agar chhutti nahin milti hain to ghar baithe yaad karo। yeh to jaante ho ham shivbaaba ki santaan hain। murli to mil jaati hai। aise nahin ki yahaan aane se yaad ki yaatra achhi hogi, ghar mein baithne se yaad ki yaatra kam ho jaayegi। baadal aate hain refresh hone। tum bhi aate ho, refresh hone। baba paas sammukh jaayen। aatma ko gyaan hai, sammukh sunne se achha lagta hai। baat to vahi hai, dekhte ho - shivbaaba, kaise baith bachchon ko samjhaate hain। “bachche tum mere ho'', tumne 84 janmon ka part bajaaya hai। tum janma-maran mein aate ho, main nahin aata hoon, main punarjanma nahin leta hoon। ajanma bhi nahin hoon। aata hoon parantu boodhe tan mein pravesh karta hoon। tum aatma chhote bachche ke shareer mein pravesh karti ho, main paramdham se aata hoon, neeche part bajaane। main vikaari ke garbha mein nahin aata hoon। mujhe kehte ho - tvamev maataashcha pita... mera koi maa baap ho na sake। main sirf shareer ka aadhaar le part bajaata hoon। tum mujhe bulaate ho duhkh harkar, sukh dene ke liye। ab sammukh aaya hoon, aatmaon se baat kar rahe hain। yahaan to sab brahman hi hain। tum baahar jaate ho to hans aur bagule ho jaate ho, yahaan (madhuban mein) tumko sang hi braahmanon ka hai। aapas mein gyaan ki chit-chat hi karenge। ham apni raajdhaani sthaapan kar rahe hain।

baba aaya hua hai, ek do ko yeh yukti - baap ko yaad karne ki bataate raho। bhojan par bhi ek do ko eeshaara dete raho ki baap ko yaad karo। bahut bada sangathan hai na। vahaan to vikaari saath mein rehte hain, to unki kashish hoti hai। yahaan to kiski kashish nahin hoti। warriors, warriors ke saath rehte hain। tumhaara kutumba yeh hai। buddhi mein yahi rehta hai, jo koi mile unko baap ka parichay den ki bhagwan ko yaad karte raho। do baap hain na। laukik baap hote bhi bhagwan ko yaad karte ho na। vo laukik father hai। laukik father ko god-father nahin kahenge। yeh hai paarlaukik baap, zaroor god-father se varsa milta hoga। aise-aise bhoon-bhoon karte raho। tum brahman ho na। sannyaasi bhi bhoon-bhoon karte hain na। is duniya ka sukh kaag-vishta ke samaan hai, kitna duhkh hai। woh to hain hathayogi, nivritti maarga vaale, unka dharma hi alag hai। tum jaante ho - satayug mein ham kitna sukhi pavitra rehte hain।bhaarat pravritti maarga ka tha, devi-devtaaon ka raajya tha। jo pavitra the vahi patit bane hain। pukaarte bhi rehte hain - he patit-paavan aao aur phir kah dete paramatma sarvavyaapi hai। ham jaakar jyoti-jyot samaayenge। punarjanma ko bhi nahin maante hain। anek mat hain na। din-pratidin vriddhi hoti rehti hai। yeh bhi bataana hai ki sannyaasiyon ki vriddhi kaise hoti hai। naangon ki bhi vriddhi hoti hai, jiska jo dharma hai, usmein hi rahne se phir ant mati so gati ho jaati hai। jiska jo jaasti abhyaas karte hain jaise koi shaastra aadi padhte hain to ant mati so gati, phir chhotepan mein hi shaastra kantha ho jaate hain। abhi baap kehte hain - main phalaana hoon, yeh hoon, yeh sab deh-abhimaan ki baaten chhod do। apne ko ashareeri aatma samjho aur baap ko yaad karo। is shareer ko dekhte hue bhi nahin dekho। deh sahit deh ke jo sambandh aadi hain, sabko chhodo। apne ko aatma nishchay karo, paramatma ko yaad karo। ismen time bahut lagta hai। maaya yaad karne nahin deti hai। nahin to vaanaprasthi ke liye bahut sahaj hai। baap khud kehte hain abhi tum chhote-bade sabki vaanaprastha avastha hai। ek taraph vinaash bhi hota rahega doosre taraph janma bhi lete rahenge। punarjanma lena hoga to aa jaayenge। bachche bhi paida honge। phir vinaash bhi ho jaayega। yeh to tum jaante ho - koi garbha mein honge, koi kahaan, sab khatma ho jaayenge। sab apna hisaab chuktu kar vaapis jaayenge। hisaab-kitaab raha hua hoga to achhi reeti sajaayen khaani padengi। phir woh bhi halka ho jaayega। aise nahin ki yog mein bhi raho aur paap bhi karte raho। kai bachche ek taraph chart bhi likhte rehte aur phir kehte maaya ne munh kaala kar diya। maaya ne hara diya to kachcha kahenge na। to baap samjhaate hain ki tum aise samjho ki ham thode din yahaan hain phir chale jaayenge। in sabka vinaash ho raha hai। baap kehte hain - mujhe yaad karo to vikarma vinaash honge, apna chart dekhte raho - ham kitnon ko raasta bataate hain aur purushaartha karaate hain। tan-man-dhan se roohaani seva mein madadgaar banna pade। kehte hain man ko aman nahin kar sakte। aatma to hai hi shant। ham aatma apne paramdham mein jaakar baithengi। koi duniya ka sankalp nahin aayega। aise nahin ki aankhen banda kar unconscious hona hai। aise bahut seekhte bhi hain। 10-15 din unconscious bhi ho jaate hain। yeh abhyaas karte hain phir itne samay baad jaag jaayenge। jaise time bombs hote hain to unka bhi time hota hai, yeh itne ghante baad phatenge।

tum bachchon ko pata hai - ham yog laga rahe hain। jab tamopradhaan kichda niklega ham satopradhaan ban jaayenge to phir is shareer ko chhod denge। ham abhi yog ki yaatra par hain। time mila hua hai phir yeh shareer chhodna hi hai phir sab khatma ho jaayega। time noondha hua hai phir pichhaadi mein machchharon sadrishya shareer chhodenge। vinaash hoga, tum karmaateet avastha ko paayenge phir vinaash shuru ho jaayega। vinaash ka bada bhaari scene hai। yeh drama mein bhaari noondh hai। tum jaante ho - hamaari avastha ekras rahegi। khushi mein sadaiv harshit rahenge। yeh duniya to khalaas honi hi hai। jaante hain, kalpa-kalpa sangamayug hota hai, tab vinaash hota hai। sirf bombs nahin, natural calamities bhi madad karti hain। to bachchon ko yeh buddhi mein rehna chaahiye - abhi hamko jaana hai। jitna baba ko yaad karenge to vikarma vinaash honge, oonch pad paayenge। charity begins at hom। koshish karna chaahiye। kanya woh jo piyar ghar aur sasurghar ka uddhaar kare। to charity begins at hom hua na। service mein laga rehna chaahiye bolo, shivbaaba kehte hain - mujhe yaad karo to varsa milega। seedhi baat hai। mujh alpha ko yaad karoge to svarga ka varsa tumhaara hai। vishwa ke maalik tum ban jaayenge। ab varsa paana hai to mujhe yaad karo। bachchon ka pharja hai, yeh paigaam dena। aage bhi diya tha। bataana hai vinaash saamne khada hai। kaliyug ke baad satayug aayega। baap hi aakar varsa dete hain। raavan narkavaasi banaate hain। baap aakar svargavaasi banaate hain। kahaani bhaarat ki hai। bhaaratvaasiyon ko khada karna hai। pahle shiv ke mandir mein jaakar samjhaana hai। yeh baap nai srishti rachne vaala hai। kehte hain - mujhe yaad karo to tumhaare vikarma vinaash hon। yeh niraakaar baba aaye hue hain। brahma dvaara svarga ki sthaapna kar rahe hain। ab baap aur varse ko yaad karo। 84 janma poore hue hain। ab ham aapko bataate hain। ab maano na maano, tumhaari marji। baaten to badi achhi hain। baap hi duhkh-harta, sukh-karta hai। thoda hi samjhaaya - yeh chala। yeh hai tumhaara dhandha। mehnat to kuchh hai nahin। sirf mukh se bolna hai - baap kehte hain mujhe yaad karo। dehi-abhimaani bano। shiv ke pujaariyon paas jaao phir lakshmi-naaraayan ke pujaariyon ke paas jaao। unhein unki jeevan kahaani sunaao। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) tan, man, dhan se roohaani seva mein madadgaar banna hai। sabko alpha ka parichay de varse ka adhikaari banaana hai। vinaash ke pahle karmaateet banne ke liye baap ki yaad mein rehna hai।

2) baap samaan moh jeet banna hai। aatma ka aatma se jo moh ho gaya hai use nikaal ek baap se lagan lagaani hai।

vardaan:- sarvashaktimaan ke saath ki smriti dvaara samasyaaon ko door bhagaane vaale parmaatma snehi bhav

jo bachche parmaatma snehi hain ve snehi ko sada saath rakhte hain isliye koi bhi samasya saamne nahin aati। jinke saath svayan sarvashaktimaan baap hai unke saamne samasya thahar nahin sakti। samasya paida ho aur vahaan hi khatma kar do to vriddhi nahin hogi। ab samasyaaon ka birth control karo। sada yaad rakho ki sampoornata ko sameep laana hai aur samasyaaon ko door bhagaana hai।

slogan:- slogan:- pyaare banne ka purushaartha nahin, nyaare banne ka purushaartha karo to pyaare svatah ban jaayenge।

ye avyakt ishaare - sada achal, adol, ekras sthiti ka anubhav karo

samay prati samay anek prakaar ke vighna aate hain, koi achhe ananya student maaya ke vasheebhoot ho anti ho jaate aur seva mein disturb karte hain। aise samay par ghabraate to nahin ho! ek hota hai unke prati kalyaan ke bhaav se taras rakhna, lekin uske kaaran halchal mein aana athva vyartha sankalp chalaana, yeh hai hilna। jo har aatma ke part ko saakshi-drishta sthiti mein rah dekhte hain, woh achal adol ekras rehte hain।