Daily Murli for Thursday 21 May 2026

21-05-2026 praatahmurli om shanti "baapdaada"' madhuban

“meethe bachche - shreemat par chalkar sabko sukh do, aasuri mat par duhkh dete aaye, ab sukh do, sukh lo''

prashn:- buddhivaan bachche kis raaz ko samajhne ke kaaran oonch pad paane ka purushaartha karte hain?

uttar:- ve samajhte hain ki yeh duhkh aur sukh, haar aur jeet ka khel hai। abhi aadhaakalpa sukh ka khel chalne vaala hai। vahaan kisi bhi prakaar ka duhkh nahin hoga। ab nai raajdhaani aane vaali hai, uske liye baap apna paramdham chhodkar ham bachchon ko padhaane aaye hain, ab purushaartha kar oonch pad lena hi hai।

geet:- badal jaaye duniya na badlenge ham…

om shanti। meethe-meethe bachchon ne arth samjha। yahaan koi kasam khaane ki darkaar nahin hai। yeh to aatma mein samajh chaahiye। aatma tamopradhaan hone ke kaaran bilkul hi besmajh ho gai hai। bachche jaante hain - ham kitne besmajh the। ab kitne samajhdaar bane hain। doosre satsang aadi mein yeh baaten hoti nahin। woh shaastra, raamaayan aadi padhte hain। ek kaan se suna, doosre kaan se nikal jaata hai। koi praapti nahin। yagya, tap, daan-punya aadi bahut karte hain, dhakke khaate rehte hain। praapti kuchh bhi nahin। is duniya mein koi ko sukh hai nahin। ab baap saari samajh dete hain। sabko sukh-shanti dene vaala ek hi baap hai। manushya to bilkul hi ghor andhiyaare mein hain। bhakti maarga vaale bhi yaad karte rehte hain - he duhkh harta, sukh karta, sadgati daata। dekho, duniya mein kya laga pada hai। sabko duhkh laga hi rehta hai। jo bhi manushya maatra hain, kisko bhi yeh pata nahin hai ki baap kaun hai? baap se kya varsa milta hai? behad ke baap ko jaante hi nahin। dhakke khaate rehte hain, shanti ke liye। ab yeh kisne kaha ki man ki shanti chaahiye? aatma kehti hai, yeh bhi manushya nahin jaante hain। deh-abhimaan hai na। saadhu-santa aadi sab duhkhi hain, sab shanti chaahte hain। beemaari aadi to saadhu-santon ko bhi hoti hai। accident hote hain। duniya mein duhkh ke sivaae aur kuchh to hai nahin। abhi tum buddhivaan bane ho। baap ne samjhaaya hai drama ke andar nai duniya aur puraani duniya, sukh aur duhkh ka khel bana hua hai। baap ne tumhaari buddhi ka taala khola hai aur sab manushya maatra ki buddhi ko godrej ka taala laga hua hai, bilkul hi tamopradhaan buddhi hain। tum bachche nambarvaar purushaartha anusaar jaante ho। barobar behad ka baap mila hai, woh hamko srishti ke aadi-madhya-ant ka raaz sunaate hain ki yeh khel kaise bana hua hai। jab sukh hota hai, tab duhkh ka naam nahin hota। tum bachchon ki buddhi mein hai ki ham baap se sukh-shanti-sampatti ka varsa le rahe hain। satayug se lekar treta ant tak koi duhkh nahin hoga। ab tum roshni mein ho। tum purushaartha kar rahe ho - apni raajdhaani mein ek do se oonch pad paayen। yeh school hai behad ka। behad ka baap padhaate hain। tum jaante ho woh hamaara most beloved baap hai, jiski aparmaapaar mahima hai। woh oonch te oonch baap shreemat dete hain। baaki sab manushya maatra aasuri mat par ek do ko duhkh hi dete hain। tumhein shreemat par sabko sukh dena hai। is drama mein ham actors hain, yeh koi bhi nahin jaante। tum bachche ab samajhte ho is drama mein bhaaratvaasiyon ka hi all-round part hai। aage to tum kuchh bhi nahin jaante the। ab to mool vatan se lekar sookshm vatan, sthoolavtan sabko tum jaan gaye ho। tumko sachcha gyaan hai। parampita paramatma hamko in dvaara padha rahe hain। baba hamko trilok ka saara gyaan de rahe hain। yeh hai hi kaanto ka jangal। bachche jaante hain - abhi ham kaanton se phool arthaat manushya se devta bante hain। yahaan to chhote-bade sab duhkh dete hain। garbha mein maata ko bachche duhkh dete hain। yeh bahut hi chhi-chhi puraani duniya hai। is srishti chakra ko koi bhi nahin jaante hain। ham kahaan se aaye, kitne janma liye, phir kahaan jaana hai?... kuchh bhi nahin jaante, behad ka baap arthaat sab seetaaon ka ek raam woh niraakaar hai। tum sabhi seetaayen ho। baap hai bridegroom। ek saajan ki sab sajniyaan, bhaktiyaan hain। jo bhi seetaayen hain, sab raavan ki jel mein phans shokvaatika mein aa gai hain। saari duniya ke sab manushya maatra ek bhagwan ko yaad karte hain। bhakton ka rakshak bhagwan ko kehte hain। tum sab abhi brahma mukh vanshaavli brahman ho। brahman jaante hain - hamko shivbaaba padha rahe hain। baba se varsa zaroor milta hai। shivbaaba hai svarga ka rachayita। svarga kaho athva daivi raajdhaani kaho - yeh svarga ki raajdhaani hai na। lakshmi-naaraayan svarga ke maalik hain। yeh bhi abhi tum samajhte ho। yahaan jab satayug tha to lakshmi-naaraayan ka raajya tha। abhi hai kaliyug। manushya to bichaare ghor andhiyaare mein hone ke kaaran kuchh nahin jaante ki abhi kaliyug ka ant hai। vinaash saamne khada hai। tum sab seetaaon ka sadgati daata ek raam hai। seetaayen sab durgati mein hain, parantu yeh koi samajhte thode hi hain ki ham durgati mein hain। apne saahookaari ka hi nasha hai। hamko itne makaan hain, itna dhan hai, itne mahal hain, kisko pata nahin ki duhkh ki duniya ab badalni hai। maut saamne khada hai। sab mitti mein mil jaana hai। yeh jo kuchh puraani duniya mein dekhte ho, vinaash ho jaayega। vinaash ke liye poori taiyaariyaan ho rahi hain। yeh vahi mahaabhaarat ladaai hai। vahi geeta ka bhagwan hai। parantu baap ki biography mein bachche ka naam daal diya hai। ab shivbaaba tumko raajayog sikha rahe hain। bade te badi bhool hi yeh hai jo bhagwan ka naam gum kar diya hai।

tum bachche jaante ho, hamko koi manushya, saadhu-santa aadi nahin padhaate hain, shivbaaba hamko padhaate hain। woh baap bhi hai, teacher bhi hai, satguru bhi hai। sab kuchh hai। yeh to nahin bhoolna chaahiye na। baap kehte hain - hamaare sab bachche hain parantu sabhi ko thode hi padhaayenge। baap kehte hain - ham bhaaratvaasiyon ko phir se raajayog sikhaane aaye hain। bhaaratvaasi svargavaasi the, heere misal the, ab kaudi misal ban pade hain। ghar mein kitni ashaanti hai। kehte hain - baba hamko krodh aata hai, bachchon ko maarna padta hai। dar lagta hai, hamne 5 vikaar shivbaaba ko daan de diya hai phir ham yeh kyon karte hain? baap samjhaate hain - is samay sabhi par 5 vikaaron ka grahan laga hua hai। deh-abhimaan ka bhoot aane se phir sab bhoot lag jaate hain। ab baap kehte hain - dehi-abhimaani bano। abhi tumko samajh mili hai। satayug mein bhi ham aatma-abhimaani the। samajhte hain - aatma ka yeh shareer ab puraana hua hai। aayu poori hui hai isliye yeh shareer chhod ab naya lena hai। (sarpa ka misaal) sarpa ki ek khaal puraani hoti hai to phir doosri nai le lete hain। yeh drishtaanta hai satayug ke liye। vahaan tum aise shareer chhodte ho, duhkh ki koi baat nahin rehti। yahaan kitna duhkh hota hai। rona-peetna aadi rehta hai। ab tum bachche jaante ho - yeh puraani khaal hai। yahaan koi nai khaal nahin milni hai। yeh antim puraani jutti hai। abhi tum unse tang ho gaye ho। vahaan to khushi se ek shareer chhod doosra lete hain। in baaton ko bhi tum samajhte ho। yahaan kitne naye aate hain, samajhte thode hi hain। do-chaar roz yahaan se samajhkar jaate hain phir bhool jaate hain। haan, achhi reeti suna, khushi hui to praja mein aa jaayenge। praja bhi to dher banni hai na। yeh hai eeshvar ka dar athva ghar tum eeshvar ke ghar mein baithe ho। param-pita apna paramdham chhod yahaan saadhaaran tan mein aakar baitha hai। vahaan to baap ke paas aatmaayen rehti hain। yahaan sangam par baba khud aaya hai - patiton ko paavan banaane। unko shiv niraakaar hi kehte hain। niraakaar baba ko aatmaayen O god father kah pukaarti hain। manushya bigar samajh ke kah dete hain O god father। in lakshmi-naaraayan ko bhi european log bhagavti-bhagwan kehte hain। inhon ko aisa kisne banaaya? in devtaaon ko kehte hain aap sarvagun sampanna, 16 kala sampoorn ho phir khud ko kya kehte hain? yeh nahin jaante ki yeh bhi manushya hain। bhaarat mein hi raajya karke gaye hain। unke aage jaakar mahima gaate hain। apne ko neench paapi kehte rehte hain। shreekrishna ke mandir mein bhi jaakar mahima karenge। shiv ki yeh mahima nahin karenge। unki mahima alag hai। aksar karke shiv ke paas jaate hain to kehte hain bhar do jholi। phir kah dete hain woh bhaang peene vaala hai, dhatoora khaane vaala hai। are vahaan bhaang-dhatoora kahaan se aai? kuchh bhi samajh nahin। maangate rehte hain - pati chaahiye, yeh chaahiye....deepmaala par bhi lakshmi ka aahvaan karte hain। woh hai kaun, yeh kisko bhi pata nahin। 8-10 bhujaayen kabhi hoti hain kya? yeh chaturbhuj roop dikhaate hain kyonki pravritti maarga hai। unka naam vishnu rakh diya hai। lakshmi-naaraayan to satayug mein rehte hain। manushya ko yeh pata nahin ki vishnu ke do roop lakshmi-naaraayan dvaara paalna hoti hai। chitron mein lakshmi ko 4 bhujaayen de dete hain। 4 bhuja vaale ko bachcha hoga to unko bhi 4 bhuja honi chaahiye। kuchh bhi samajhte nahin hain। tum abhi samajhte ho - baba jab tak nahin aaye the to ham bhi kuchh nahin jaante the। abhi saare vishwa ke aadi-madhya-ant ko jaan gaye hain। baap aakar patit duniya ko paavan banaate hain। bulaate bhi hain - he patit-paavan aao। ab paramatma kaise aaye? kaise aakar patiton ko paavan banaaye? baap kehte hain 5 hajaar varsha pahle hamne daivi svaraajya banaaya tha phir tumne 84 janma kaise liye? yeh samajh aage tumhaari buddhi mein bilkul nahin thi। is brahma ko bhi pata nahin tha। raadhe-krishna, lakshmi-naaraayan ki pooja karte rehte। parantu yeh bhi pata nahin ki raadhe-krishna hi svayanvar ke baad lakshmi-naaraayan bane hain isliye princess raadhe, prince shreekrishna kaha jaata hai। svayanvar ke baad mahaaraaja-mahaaraani bante hain। yeh jo khud ban rahe hain, unko bhi pata nahin tha। bhal koi ko deedaar bhi hota hai parantu kuchh bhi samajhte nahin। phir bhi bhakton ki bhaavna alpakaal ke liye poori karne main saakshaatkaar karaata hoon। yahaan to dhyaan-deedaar ki baat hi nahin। baap to samjhaate hain - saakshaatkaar mein maaya pravesh kar legi to tum pad bhrashta ho padenge। bahut aakar kehte hain - hamko shivbaaba ka saakshaatkaar ho। are tumko samjhaaya jaata hai - firefly kitna chhota hota hai, aankhon se dekha jaata hai। aatma to usse bhi chhoti bindi hai। jaise aatma hai vaise hi paramatma ka roop hai। saakshaatkaar bhi hoga to usi chhoti bindi ka hoga। yeh to chhoti si bindi hai jo bhrakuti ke beech mein rehti hai। aatma ka saakshaatkaar ho to bhi samjhenge kuchh nahin।

tum bachche jaante ho - abhi ham shivbaaba ki santaan hain। sab brahmaakumaar-kumaariyaan shivbaaba se varsa le rahe hain। hamaari em object hi yeh hai। student hain na। tum kehte ho - baap se sahaj raajayog seekhne aaye hain। yeh em-object hai। yeh bachchon ko bhoolna nahin chaahiye। bhakti maarga mein bhakta log devtaaon ke chitra saath mein rakhte hain। phir tumko yeh trimoorti ka chitra pocket mein rakhna chaahiye। is shivbaaba dvaara ham yeh lakshmi-naaraayan ban rahe hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shivbaaba ko vikaaron ka daan dekar phir kabhi vaapas nahin lena hai। deh-abhimaan ke bhoot se bachna hai। is bhoot se sab bhoot aa jaate hain isliye aatma-abhimaani banne ka abhyaas karna hai।

2) dhyaan deedaar ki aash nahin rakhni hai। em-object ko saamne rakh purushaartha karna hai। shreemat par sabko sukh dena hai।

vardaan:- karaavanhaar ki smriti se seva mein sada nirmaan ka kaarya karne vaale karmayogi bhav

koi bhi karma, karmayogi ki stage mein parivartan karo, sirf karma karne vaale nahin lekin karmayogi hain। karma arthaat vyavhaar aur yog arthaat parmaartha donon ka balance ho। shareer nirvaah ke peechhe aatma ka nirvaah bhool na jaae। jo bhi karma karo woh eeshvareey seva arth ho। iske liye sevaaon mein nimitta maatra ka mantra va karanhaar ki smriti ka sankalp sada yaad rahe। karaavanhaar bhoole nahin to seva mein nirmaan hi nirmaan karte rahenge।

slogan:- seva va sambandh-samparka mein vighna padne ka kaaran hai puraane sanskaar, un sanskaaron se vairaagya ho।

ye avyakt ishaare - sada achal, adol, ekras sthiti ka anubhav karo

sabhi se shreshtha takhta baapdaada ke dil takhtansheen banna hai। lekin is takhta par baithne ke liye pahle achal, adol, ekras sthiti ka takhta chaahiye। ekras sthiti ke takhta par tab sthit rah sakenge jab akaal takhta nasheen banne ka abhyaas hoga। jaise woh tapasvi sadaiv aasan par baithte hain, aise aap apni ekras aatma ki sthiti ke aasan par viraajmaan raho। is aasan ko nahin chhodo tab sinhaasan milega।