Daily Murli for Monday 1 June 2026

01-06-2026 praatahmurli om shanti "baapdaada"' madhuban

“meethe bachche - baap ki shreemat hai, is puraani duniya se apna mukh mod lo, jeevanmukti ke liye tum daivi manners dhaaran karo''

prashn:- kaun se manners baap ke sivaae koi bhi sikhla nahin sakta hai?

uttar:- pavitra banna aur banaana - yeh hai sabse bada daivi manners। tum ghar-grihastha mein rehte pavitra raho, yeh shiksha ek baap hi dete hain, doosra koi de nahin sakta। tum bachchon ka behad ka sannyaas hai। tum is puraani duniya ko hi buddhi se bhoolte ho। tum jaante ho pavitrata ki dhaarna se baaki sab manners svatah aa jaate hain।

geet:- aaj andhere mein hain ham insaan…

om shanti। bachchon ne geet ki ek line suni। ek taraph hai saari duniya - bhakti maarga vaale aur doosre taraph ho tum bachche gyaan maarga vaale। woh bhakti ki seedhi chadhte rehte hain aur tum bachche phir gyaan ki seedhi chadhte ho। bhakti ki seedhi utarte ho। bachche jaante hain - aadhaakalpa se bhakti ki seedhi chadhni hoti hai। bhakti bhi pahle avyabhichaari hoti hai, peechhe vyabhichaari banti hai। bilkul hi andhashraddha mein aa jaate hain। kuchh bhi nahin samajhte। gaate bhi hain - ham andhiyaare mein hain। satguru bigar ghor andhiyaara। guru to yahaan bahut hain। ab sachcha guru kaun hai? saadhu-santa, mahaatma, bhagat aadi sab saadhna karte hain athva yaad karte hain। shaastra, ved, upnishad aadi padhte hain phir bhi kehte hain, bhagwan jab aaye tab hi aakar hamaari sadgati kare। sadgati daata ko hi patit-paavan kaha jaata hai। abhi tum bachche ghor andhiyaare mein nahin ho। tum gyaan ki roshni mein aaye ho। patit-paavan baap ko jaante ho aur unko yaad karte ho। jitna jo bachcha yaad karta hai aur gyaan ki dhaarna karta hai utna uska agyaan andhiyaara vinaash ho jaata hai। ab roshni mein le jaane vaala ek hi baap hai। gyaan anjan satguru diya... koi surma nahin hai। yeh gyaan ki baat hai। gyaan ke saath yog bhi rehta hai। zaroor jo manushya bhakti sikhlaate hain, to usse bhi yog rehta hai। ab tum bachchon ka buddhiyog laga hua hai, niraakaar parampita paramatma ke saath। tumhaare mein bhi nambarvaar hain। aur koi manushya maatra ka parampita paramatma sarvashaktimaan ke saath yog hai hi nahin sivaae tum bachchon ke। tumko baap se aur mukti, jeevanmuktidhaam se yog lagaana padta hai। jeevanmukti ke liye daivi manners bhi bahut achhe chaahiye। is samay to sabke manners aasuri hain। parampita paramatma ke bhi gun gaaye jaate hain na। manushya srishti ka beejroop hai, sat hai, chaitanya hai, aanand ka saagar, gyaan ka saagar hai। pavitrata ka saagar hai for ever। unka yeh pad avinaashi hai aur koi manushya ka yeh avinaashi pad ho na sake। bhal abhi tum gyaan ka saagar, pavitrata ka saagar bante ho, parantu limited bante ho। baap kehte hain - main unlimited hoon। tumko unlimited bana nahin sakta। nahin to phir srishti ka khel kaise chale? 84 janma kaise bhogenge? tum for ever ban nahin sakte। tumko limited banaata hoon, 21 janmon ke liye tum bante ho। 21 peedhi bhi likha hua hai। tum for ever bano, yeh drama mein kaayda nahin। main to hoon hi ever pure। main rehta heen hoon paramdham mein। mere paas gyaan, pavitrata aadi hai hi hai। tum bhool jaate ho to is samay baap aakar bachchon ko ghor andhiyaare se nikaal gyaan aur yog se pavitra banaate hain aur koi aise kah na sake ki main paramdham se aaya hoon, ab mujhe yaad karo। yeh mere mahaavaakyon ki koi copy nahin kar sakte। main aata hi hoon tum bachchon ko 21 janmon ke liye raajaaon ka raaja banaane। to banna chaahiye na। banenge bhi woh jo kalpa pahle bane hain।

tum jaante ho - kitne bachche pavitra bante hain, kitne ajaamil jaise paapi ban jaate hain। kitne ashuddha maile ban jaate hain। baap ko aakar maile kapde saaph karna padta hai। aatma hi maili banti hai। aatma ko samjhaate hain tumko maaya ne kitna maila banaaya hai, sirf ek is janma ki baat nahin। yeh to janma-janmaantar ki baat hai, jo aatma ko saaph karne ke liye lakshya-soap deta hoon। mujhe yaad karo to tumhaari aatma jo bujhi hui hai, woh is yog se jag jaayegi - jitna-jitna mujh baap ko yaad karenge। smriti dilaate hain, tumko hamne svarga mein bheja tha phir maaya ne maila bana diya hai। ab phir main tumko svarga ka maalik banaane aaya hoon। main is brahma tan se shiksha de raha hoon। aatma se baat karte hain, he bachche laukik baap ki vismriti karo। deh sahit deh ke sab sambandhi bhoolkar mujh apne baap ko yaad karo to tumhaari aatma saaph hoti jaayegi। phir tumko shareer bhi bhavishya mein naya milega। phir tatva aadi sab naye satopradhaan ho jaate hain। baap kehte hain - ab is puraani duniya ko bhoolte jaao। mujhe yaad karo to tum mere paas aakar phir svarga mein jaayenge। yeh puraani duniya hai। ismen koi cheez banaate hain to us par naya naam rakh dete hain। jaise nai dehli, puraani dehli kehte hain। parantu duniya to puraani hai na। ab tum bachchon ka is puraani duniya se buddhiyog bilkul hat jaana chaahiye। ham aatmaon ka sweet hom va nirvaandhaam hai, vahaan jaana hai। apne ko aatma nishchay karna pade। baap kehte hain - mujhe yaad karo to ant mati so gati ho jaayegi। manushya jo anekon ko yaad karte hain। koi kisi guru ko, koi shreekrishna ko। shreekrishna aadi kahaan gaye? yeh koi nahin jaante। yeh nahin samajhte - punarjanma mein sabko aana hai। yeh rasam-rivaaj srishti ke aadi se chali aati hai। satayug aadi mein devi-devtaayen hain, zaroor punarjanma vahaan se hi shuru hua hoga। pahle-pahle hai shreekrishna first pavitra manushya, unki mahima jaasti hai। lakshmi-naaraayan ki itni nahin hai kyonki bachche pavitra satopradhaan hote hain to mahima bachchon ki gaai jaati hai। shreekrishna ki bahut mahima hai। parantu yeh nahin jaante ki krishnapuri hai kahaan। vaikuntha kehte bhi hain satayug ko phir pata nahin shreekrishna ko dvaapar mein kyon kah diya hai। vahi cheez doosre koi naam, roop, desh mein aa na sake। vahi naam roop doosre janma mein ho nahin sakta। shreekrishna to satayug mein tha। tum jaante ho, yeh jagat amba, jagatpita jaakar lakshmi-naaraayan bante hain। satayug ko krishnapuri kaha jaata hai। ab hai kansapuri। yeh sab aasuri naam hain। vahaan the daivi sampradaay, yahaan hain aasuri sampradaay। baap baith bachchon ko sangam par samjhaate hain, woh baap hai rachayita। unko kaha jaata hai, manushya srishti ka beejroop। to zaroor nai manushya srishti rachenge। tum gaate bhi ho - baba aap patit-paavan ho। is patit srishti ko aakar paavan banaao। paavan srishti rach patit srishti ka vinaash karaao। barobar brahma dvaara paavan srishti rach shankar dvaara patit srishti ka vinaash karaate hain। yeh baaten aur koi nahin jaante hain। abhi tum bachche baap ke saath yog lagaate ho। tum dekhte ho baba maile kapdon ko satka lagaate hain। koi to phat jaate hain, koi toot padte hain। koi to bahut maile, ajaamil jaise paapi hain, jo bilkul dhaarna nahin hoti hai। baap kitni achhi baaten samjhaate hain। meethe laadle bachche - mujh most beloved baap ko yaad karo। most beloved sukhdhaam ko yaad karo। yeh bhi tum ab jaante ho। duniya mein koi ko pata nahin। yeh to ab hai ati duhkhadhaam। manushya traahi-traahi karte rehte hain, ek do ko maarte rehte hain। phir kehte hain bhagwan raksha karo, yeh zaroor mukh se niklega। baap to liberator hai।

tum jaante ho - baap aaye hain ham bachchon ko in particular aur sabko in general sukhdhaam mein le chalne ke liye। tum bachchon mein bhi nambarvaar hain jinko yeh nasha hai। yeh padhaai koi kam nahin, padhaate bhi dekho kisko hain। ajaamil jaisi paap aatmaon ko padhaakar svarga ka maalik bana dete hain। tamopradhaan to sab hain, unko satopradhaan duniya mein le jaana padta hai। bachchon ko baar-baar samjhaate hain ki yahaan daiveegun dhaaran karne hain। yahaan tumko em-object buddhi mein hai। yeh pavitrata ke manners aur koi nahin sikhaate। sannyaasi to gharbaar chhudvaate hain। yahaan baap kehte hain - tumko gharbaar nahin chhodna hai। tumko to is puraani duniya ko chhodna hai। woh hai had ka sannyaas, yeh hai behad ka sannyaas। un sannyaasiyon ko bhi kitna maan milta hai। saadhu samaaj government ko bhi mat (raay) dete hain। aage chalkar yeh sannyaasi aadi bhi tum maataaon ke charnon mein girenge। maataaon bigar unhon ka uddhaar nahin ho sakta kyonki tum knowledge dete ho। baaki charnon mein girne ki baat nahin hai। haan koi namaste va raam-raam karte hain to respond to dena hota hai। baba bhi kehte hain, bachche namaste। main tum bachchon ko apne se bhi oonch banaata hoon। tumko brahmaanda aur srishti donon ka maalik banaata hoon aur main vaanaprastha mein chala jaata hoon। parantu tumhein shreemat par bhi chalna pade। is puraani duniya se mukh modna pade। raam, raavan aur seeta ka khilauna hai na। seeta raavan ko peeth kar deti hai, raam ko munh kar deti hai। shreekrishna ka bhi chitra hai - narka ko laat maar raha hai aur svarga ka gola haath mein hain। baap bahut achhi reeti samjhaate hain parantu virla vyaapaari yeh vyaapaar kare। baap ko apna puraana tan-man-dhan de naya le। yeh bada first class insurance hain। baap kehte hain - tum apni aatma pavitra banaayenge to phir shareer bhi pavitra milega। phir tum svarga ki raajaai karenge isliye unko saudaagar, jaadoogar kehte hain। patit ko paavan banaana - yeh eeshvareey jaadoogri kahenge na। baap kehte hain narkavaasiyon ko svargavaasi banaao, kaisa first class jaadu hai। ismen praapti bahut hai। baap kehte hain - raajaaon ka raaja bano, follow karo। baap baithe hain na। yeh adharkumaar hai, mama kunvaari kanya hai। to follow karna pade। varsa baap se milna hai। tum kahenge ham bhaai-behen baap se varsa lete hain। vaise to laukik reeti behen ko varsa nahin milta hai, bhaai ko varsa milta hai। yahaan to tum sabko milna hai kyonki tum sab aatmaayen ho na। baap kehte hain - tum sabko mere paas aana hai। phir to yeh bhaai-behen ka naata bhi toot jaayega। vahaan hai baap aur bachchon ka naata, nirvaandhaam mein isliye kehte hain vi aar all brothers। agar eeshvar ko sarvavyaapi kahen to phir fatherhood ho jaata hai। is sarvavyaapi ke gyaan ne kitna nuksaan kiya hai।

ab tum bachchon paas baap ki yaad hai। baap ko yaad karne mein hi mehnat jaasti hai। aise bhi nahin ki tumko koi neshtha mein bithaaye। tumko to lakshya mila hua hai। yahaan to tum murli sirf baith sunaate ho। yog to tumhaara sadaiv rehta hai। murli suna phir chalte-phirte yaad mein rehna hai। ham yaatra par ja rahe hain। jitna ho sake yaad mein rehna hai। 8 ghanta service karo, woh bhi chhoot hai। baaki time dena hai। mool baat hai hi pavitrata ki। tum jaante ho yeh hai kaanton ka forest। ek do ko kaanta lagaate rehte hain। ab baap kehte hain - shreemat par chalo। shivbaaba bhi baat karte hain। brahma bhi baat karte hain parantu tum jaante ho shivbaaba hamko padhaate hain, tum students ho। tum kehte ho woh hamaara baap bhi hai, teacher aur satguru bhi hai। guarantee karte hain tumko vaapis le jaaoonga। aise koi guarantee kar na sake। yeh baap hi kehte hain - god father hi sukh dene vaala dharma sthaapan karte hain। us baap ko koi jaante nahin hain। agar baap ko jaanen to baap ki property ko bhi jaan jaayen। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) em object ko sada saamne rakh daiveegun dhaaran karne hain। satopradhaan duniya mein chalne ke liye pavitrata ke manners apnaane hain। buddhi se behad ka sannyaas karna hai।

2) most beloved baap ko aur apne sukhdhaam ko yaad karna hai। is duhkhadhaam se buddhi ka yog nikaal dena hai।

vardaan:- sarva ke gun dekhne va santushta karne ki utkantha dvaara sada ekras utsaah mein rahne vaale gunmoorta bhav

sada ekras umang-utsaah mein rahne ke liye jo bhi sambandh mein aate hain unhein santushta karne ki utkantha ho। jisko bhi dekho usse har samay gun uthaate raho। sarva ke gunon ka bal milne se utsaah sadaakaal ke liye rahega। utsaah kam tab hota hai jab auron ke bhinna-bhinna swaroop, bhinna-bhinna baaten dekhte, sunte ho। lekin gun dekhne ki utkantha ho to ekras utsaah rahega aur sarva ke gun dekhne se svayan bhi gunmoorta ban jaayenge।

slogan:- behad ke vairaagya vritti ka foundation majboot ho to second mein ashareeri banna sahaj hai।

ye avyakt ishaare - sada harshit rahne ke liye apni nature ko saral banaao, sahansheel bano।

apne is chehre ko sadaiv harshit banaana - yeh sangamayug ki sabse badi gift hai। chehre par kabhi bhi koi pareshaani ki rekha na ho। jaise sampoorn chandrama kitna sundar lagta hai, vaise apna chehra sadaiv harshit rahe। chehra aisa chamakta hua ho jo aur bhi aap ke chehre mein apna roop dekh saken, iske liye apni nature ko saral banaao, sahansheel bano।