Daily Murli for Sunday 31 May 2026

31-05-26 praatahmurli om shanti' 'avyakt-baapdaada'' revise 15-03-10 madhuban

parmaatma pyaar ki paatra aatmaayen duhkhiyon ko sukh ki anchali do, vyartha ko samaapta kar samartha bano aur samay ko sameep laao

aaj baapdaada apne chaaron or ke parmaatma pyaare bachchon ko dekh rahe hain। aise parmaatma pyaare koton mein koi bachche hain kyonki is samay hi parmaatma pyaar ka anubhav kar sakte, saare kalpa mein aatmaon ka pyaar, mahaatmaaon ka, dharmaatmaaon ka pyaar anubhav kiya lekin parmaatma pyaar sirf ab sangamayug par hota hai, jo aap sabhi bachche anubhav kar rahe hain। koi aapse poochhe paramatma kahaan hai? to kya javaab denge? mere saath hai। mere saath hi rehte hain। mere dil mein hi rehte hain। aisa anubhav kar rahe ho na! aap hi jaante ho aur aapko hi is pyaar ka anubhav hai ki hamaare dil mein baap rehte aur baap ke dil mein ham rehte। jaante ho ki yeh parmaatma pyaar ka nasha humein hi anubhav karne ka bhaagya praapta hua hai। jab kisi se bhi pyaar ho jaata hai to uski nishaani kya hoti hai? uski nishaani hai uske oopar kurbaan hona। to parampita paramatma aap bachchon se kya chaahte hain, woh to aap sab jaante ho। baap ki har ek bachche ke prati yahi chaahna hai ki mera ek ek bachcha baap samaan bane। jaise baap vaise bachchon ki bhi shreshtha sthiti bane। woh shreshtha sthiti kya hai? sampoorn pavitrata ki sthiti। aisi pavitrata jo svapna mein bhi apvitrata aa nahin sake। aisi sampoorn pavitra sthiti bana rahe ho? jis sampoorn pavitrata mein apvitrata ka naamnishaan nahin।

vartamaan samay sameep aane ke kaaran baapdaada abhi yahi ishaara de rahe hain ki samay ki sameepta anusaar vyartha sankalp yeh bhi apvitrata ki nishaani hai। saare din mein yeh bhi check karo ki koi bhi vyartha sankalp abhimaan ka va apmaan ka apne taraph kheenchata to nahin hai? kyonki chalte chalte agar baap ki di hui visheshtaaon ko apni visheshta samajh abhimaan mein aate hain to yeh bhi vyartha sankalp hua aur merepan ke ashubh sankalp main kam nahin hoon, main bhi sab jaanta hoon, yeh mera sankalp hi yathaartha hai, ooncha hai…, yeh merepan ka abhimaan ka sankalp yeh bhi sookshm apvitrata ka ansh hai। to apne ko check karo kisi bhi prakaar ka apvitrata ke vyartha sankalp ka koi ansh to nahin rah gaya hai? kyonki abhi pavitra duniya ki sthaapna ka samay sameep laane vaale aap parmaatma pyaare bachche nimitta ho। to jo nimitta aatmaayen hain unhon ka vibration chaaron or phailta hai। to check karo kisi bhi prakaar ka vyartha sankalp bhi apne taraph kheenchata to nahin hai? kyonki abhi pavitra duniya, pavitra raajya sameep aa raha hai। duhkh aur ashaanti chaaron or bhinna-bhinna swaroop mein badh rahi hai। uske liye pavitrata ka vibration aavashyak hai। duhkh ashaanti ka kaaran apvitrata hai। to abhi apvitra aatmaon ki aur bhakta aatmaon ki double seva chaahiye। vaani ki seva to baapdaada ne dekha ki chaaron or dhoomdhaam se chal rahi hai, apna ulhana bhi nikaal rahe ho। lekin abhi aatmaon ko extra sakaash chaahiye। woh hai mansa seva dvaara sakaash dena, himmat dena, umang-utsaah dena। to is samay double seva ki aavashyakta hai। iske liye baapdaada ne kaha ki har ek bachcha apne ko poorvaj samjho। aap is kalpa vriksha ka foundation poorvaj aur poojya aap aatmaayen ho। baapdaada to duhkhi bachchon ka aavaaj sunte rehte hain। aap bachchon ke paas unhon ke pukaar ka aavaaj pahunchna chaahiye। jitna sampoorn pavitra aatma banenge। ban rahe hain, bane bhi hain lekin saath-saath abhi mansa seva ko badhaana hai।

aaj vishwa mein sukh-shanti, santosh aatmaon mein kam ho raha hai। to aap parmaatma pyaar ke paatra aatmaon ko abhi pyaar ki, santushtata ki, khushi ki anchali dene ki aavashyakta hai। duhkhiyon ko sukh ki anchali deni hai। ek to mansa seva dvaara sakaash do aur doosra apne chehre aur chalan dvaara baap ko pratyaksha karo। abhi jo seva kar rahe ho aur ki hai baapdaada khush hai ki seva mein chaaron or umang-utsaah hai lekin abhi ek seva rahi hui hai। abhi tak yeh aavaaj to hua hai ki brahmaakumaariyaan manushya aatma ko achha bana deti hain, yeh jo ashuddha vyavhaar hai, ashuddha vyavhaar se mukta kar deti hain, jo government chaahti hai youth group ke liye, woh seva bahut achhi karte ho। lekin abhi baap aaya hai, paramatma aa gaya hai, parmaatma gyaan yeh de rahi hain, mera baap varsa dene aa gaya hai, abhi baap ki taraph nazar jaane se unhon ko bhi parmaatma pyaar, paramatma ki aakarshan aakarshit karegi। achha-achha to ho gaya hai lekin paramatma baap ki pratyakshata aakarshit kar achha banaayegi। to abhi baap ko pahchaanen ki jisko yaad karte hain woh gyaan de raha hai, unse varsa mil raha hai। to abhi mansa dvaara baap ke sameep laao। apne chehre aur chalan dvaara, aapke naynon mein baap pratyaksha ho। to abhi yeh aapas mein plan banaao।

baapdaada ne dekha jo plan baapdaada ne samay prati samay diya hai woh bachchon ne bade vidhi poorvak, umang-utsaah se kiya hai, kar rahe hain, iski baapdaada sabhi bachchon ko padam padam guna mubaarak de rahe hain। abhi addition karo ki bhagwan varsa de raha hai। abhi varsa nahin liya to kab lenge! baap ko duhkh, ashaanti ka vaayumandal dekh karke bachchon par raham aata hai। aur baap aur aap jaante ho ki yeh to ati mein jaana hi hai। bina ati ke ant nahin hota hai। aise samay par aatmaon ko yeh anubhav karaao, sirf sunaao nahin, anubhav karaao ki bhagwan varsa de raha hai। aap sabhi bhi yahi poochhte ho na ki yeh baap ki pratyakshata kab aur kaise hogi! to brahmaakumaariyon tak pahunche hain lekin brahmaakumaariyon ko sikhaane vaala kaun! brahmaakumaariyon ka, brahmaakumaaron ka daata kaun! abhi samay ko sameep laana hai, samaapti karni hai। samaapti ko sameep laane vaale kaun hain? har ek bachcha samajhta hai na ki main hi nimitta hoon। baap ne yeh jimmevaari apne saath bachchon ko di hai। san shows father। koi-koi jab baap ko jaante, to dekho aap sabne baap ko jaana to kya kiya? pahchaan liya, jaan liya, to bachcha ban varse ke adhikaari ban gaye। abhi varsa lene vaali aatmaon ki queue lagni chaahiye। aur queue ruki hui kyon hai? kyonki koi koi bachche abhi vyartha sankalpon ki queue mein lage hue hain। kyon, kya, kaise, abhi is samaapti mein samay dete hain lekin vyartha samaapta nahin hua hai। vyartha samartha banne mein rookaavat daalta hai।

aaj baapdaada vyartha sankalpon ki samaapti karne ke liye sabhi chaaron or ke bachchon ko himmat de rahe hain ki abhi se vyartha ko samaapta kar sada samartha ban samartha banaao। sirf sandesh nahin do samartha banaao, samartha bano, samartha banaao। vyartha ka samaapti divas manaao। ho sakta hai? to samajhte ho ki vyartha sankalp apne ko bhi nuksaan pahunchaate hain, samay barbaad karte hain, chehre par sada khushnuma, khushkismat ka anubhav kam karaate hain! isliye abhi samaapti ka samay sameep laana hai, kisko? aapko na! jo samajhte hain ki abhi samaapti ke samay ko sameep laana hai, uske liye vyartha ko samaapta karna hi hai, karna hai nahin, karna hi hai, svapna mein bhi nahin aave, sankalp to chhodo lekin svapna mein bhi nahin aaye, aise himmat vaale bachche jo apne ko samajhte hain woh haath uthaao। man ka haath utha rahe ho na! baanhon ka haath to bahut easy hai lekin man ka haath utha rahe ho? jo man ka haath utha rahe hain woh haath uthaao, man ka haath। achha।

abhi baapdaada sabhi bachchon ko yeh vardaan de raha hai ki aap sabhi aane vaali nai duniya mein 21 janma sada khush rahenge। mehnat nahin karenge। duniya ki ulajhnon mein nahin padenge। jo jeevan mein chaahiye, tan man dhan sab mil jaayega। tan tandu-rusta, man khush, dhan athaah yeh aapko 21 janma ki guarantee hai। achha, aajkal ke jamaane ke hisaab se to baaten bahut badalti jaati hain। government ke kaayde bhi badalne hain, manushyon ki vritti bhi badalni hai। to har ek ke jeevan mein vyartha baaten to aani hi hain, to vyartha ko samaapta karne ke liye samartha sankalp chaahiye। vesta ko khatma karne ke liye best sankalp chaahiye। to roz ki murli mein jo vardaan, slogan aata hai use suno। yeh vardaan hi shreshtha sankalp hai। jab vyartha aave to shreshtha sankalp man ko chaahiye। man khaali nahin rah sakta hai। man ko kuchh na kuchh sankalp chaahiye। to vyartha vesta ko best karne ke liye aapko yeh vardaan aur slogan aadi ke shabd man ko change karne ke liye chaahiye। doosra - jab savere aankh khulti hai to pahle-pahle shivbaaba ko good morning karo। kar sakte ho? dekho kahaavat hai saare din mein agar koi achhe ko dekhte hain to saara din achha beetta hai, koi kharaab ko dekh lete hain na to kya kehte hain? kehte hain pata nahin kiski shakla dekhi jo saara din kharaab gaya। to achhe te achha kaun? shivbaaba। shivbaaba se pyaar hai na। to aankh khulte shivbaaba good morning aur aankh banda karte raatri ko, jab bed par jaao to shivbaaba goodnight। yeh to sahaj hai na। to saara din aapka achha hoga kyonki shubh sankalp bhi le liya na, vardaan sun liya। to aise karna। aap logon se baapdaada ka pyaar hai na। to yeh karne se aur aap aage badhte jaayenge। apne is jeevan mein bhi khushi ka anubhav karenge। kabhi duhkh ki lahar nahin aayegi। to manjoor hai aur sahaj yogi bano, bas। main aatma hoon, shivbaaba ka bachcha hoon, bas, yeh sahajyogi। chalte phirte yeh yaad karo main aatma hoon, shivbaaba ka bachcha hoon। yeh to yaad kar sakte ho na। bahut achha।

aap sabhi jo vaaris bhi hain aur vaaris banne vaale bhi hain। jo apne aapko baapdaada ka pakka vaaris samajhte hain, woh haath uthaao। vaaris hain? vi.aai.pi bhi sabhi haath utha rahe hain। taali to bajaao। achha। abhi vaaris quality aaj yeh sankalp apne se dridh karenge, baapdaada ko yeh sankalp denge ki ham abhi se, kab se nahin, ab se vyartha sankalp ko samaapta karke hi chhodenge। manjoor hai। hai manjoor? hai to haath uthaao। do kaam hain। ek sada samartha banna aur doosra samartha samay ko sameep laana। kyonki baapdaada ke paas pukaar aur duhkh ki aah bahut sunaai deti hai। aapke paas pata nahin kyon nahin sunaai deti hai। baapdaada jab aise sunte rehte hain to aap bachchon ko jo apne ko vaaris samajhte hain, varsa lene vaale hain, to varsa lene vaalon ko doosron ko varsa dilaane ke oopar raham aana chaahiye na। raham kyon nahin aata? vairaagya, behad ka vairaagya aur raham aana chaahiye। chhoti chhoti baaton mein kyon, kya ki queue mein time nahin dena hai। abhi he baapdaada ke sikeeldhe padam padam vardaanon ke vardaani bachche! abhi sankalp ko dridh karo aur dridhta ki chaabi lagaao। karmayogi bano। karmayogi life vaale ho। life sadaakaal hoti hai, kabhi kabhi nahin। to abhi apna kripaalu, dayaalu, duhkhaharta, sukh deta swaroop ko emerge karo। baapdaada ne achaanak ka samay bahutkaal se bataaya hai। to achaanak ke pahle bhakton ki pukaar to poori karo। duhkhiyon ke duhkh ki aavaaj to suno। abhi har ek chhota bada vishwa parivartak, vishwa ke duhkh parivartan kar sukh ki duniya laane vaale jimmevaar samjho।

baapdaada ka yeh aana jaana bhi kab tak? isliye sab achaanak hona hai। to abhi vaaris quality, varsa dilaao, merciful banne ka part bajaao। aise nahin sochna kab tak hoga! achaanak hoga isliye vyartha ko samaapta karna hi hai। hona hai nahin, karna hi hai। baapdaada ne result dekhi sabhi ke karmon ke gati ko check kiya। purushaartha ki gati ko check kiya। khajaane jama ka khaata check kiya। to result mein kya dekha? jama karne ka purushaartha bahut achha karte hain lekin jo jama karte ho usmein percentage bhinna-bhinna hai। jitna sochte ho jama kiya, jama hota hai lekin percentage hai, thoda jama hota hai, sada ke liye jama nahin hota। jitna karte ho utna sada ke liye jama mein pharka hai isliye baapdaada abhi ek ek baat par dridh sankalp karaata hai। krodh par karaaya, ki man se bhi kiske prati halchal nahin ho। kyon, kya nahin ho। lekin mukh se koi koi ne control achha kiya hai, lekin man se thoda thoda chalta hai। mitaane ki koshish kar rahe hain phir bhi baapdaada khush hai ki attention gaya hai। samajhne lage hain ki ismen mere ko hi nuksaan hai। samjha। achha।

abhi chaaron or ke parmaatma premi bachchon ko jo sada baap ke pyaar mein udte rehte hain, teevra purushaarthi hain aur seva mein nirvighna sachche sevaadhaari hain, aise chaaron or ke bachchon ko baapdaada bhi dekh rahe hain, saath saath door vaalon ko bhi dekh rahe hain aur yahaan shaantivan mein bhi jo jagah jagah par screen par dekh rahe hain, sun rahe hain, un sabhi bachchon ko baapdaada sada ke liye khush raho aur khushi baanto, yeh vardaan de rahe hain। khush chehra, koi bhi aapka chehra dekhe woh chehra dekhke khush ho jaae। kaisa bhi ho aapka chehra khushnuma dekhke khud bhi khush ho jaae, yeh vardaan chaaron or ke bachche ya jo sammukh baithe hain un sabhi ke liye ek vardaan hai। kabhi chehra murjhaaya hua nahin। agar aap murjhaayenge to vishwa ka haal kya hoga! aapko sada khushnuma chehra aur khushnuma chalan mein rehna hai aur rahaana hai। aise sabhi teevra purushaarthi bachchon ko baapdaada ka yaadapyaar aur meethe meethe bachchon ko namaste।

vardaan:- apni moorta se baap aur shikshak ki soorat ko pratyaksha karne vaale anubhvi moorta bhav

apne asli position mein thaharna - yahi yaad ki yaatra hai, jo hoon, jiska hoon - usmein sthit raho, isi asli swaroop ke nishchay aur anek baar ke vijay ki smriti se sada nashe ki sthiti ke saagar mein lahraate rahenge। jab sukhdaata ke bachche hain to duhkh ki lahar aa kaise sakti, sarvashaktivaan ke bachche shaktiheen ho kaise sakte! isi position ke anubhvon mein raho to aapki moorta se baap va shikshak ki soorat svatah pratyaksha hogi।

slogan:- satyavaadi woh hai jiske chehre aur chalan mein divyata ho।

ye avyakt ishaare - sada achal, adol, ekras sthiti ka anubhav karo

jab aap bachche apne is bhrakuti ke takhta par, akaalmoortta ban sthit honge to ekras sthiti ke takhta par aur baapdaada ke dil takhta par viraajmaan ho sakenge। jab is daivi sangathan ki moorta mein ekras sthiti ka pratyaksha rup mein saakshaatkaar ho tab baapdaada ki pratyakshata sameep aaye iske liye har ek ko baapdaada ke sanskaaron mein samaan banna hoga।