Daily Murli for Sunday 7 June 2026

07-06-26 praatahmurli om shanti ''avyakt-baapdaada'' revise 31-03-10 madhuban

poorvaj aur poojya ke svamaan mein rah mansa dvaara sarva ki paalna karo, poore vriksha ko sakaash do

aaj baapdaada apne chaaron or ke poorvaj aur poojya aatmaon ko dekh rahe hain। poorvaj aatmaayen apne ko samajhte ho na। poojya aatmaon ka nivaas kahaan hai? apne jhaad ko saamne laao, usmein dekho aapka sthaan kahaan hai? jaante ho ki aap poorvajon ka sthaan jad mein hai। jhaad ke jad mein bhi hai, tana mein bhi hai। to jad ke dvaara hi saare vriksha ko paalna milti hai। to aap is saare vriksha ke taal taaliyaan va patton ki paalna karne vaale, sakaash dene vaale poorvaj ho। poorvaj ke saath poojya bhi ho। tana dvaara last patte ko bhi sakaash milti hai। to apne ko saare vriksha ko sakaash dene vaale anubhav karte ho? nasha rehta hai ki ham poorvaj sarva aatmaon roopi taal taaliyaan ya patton ko sakaash de rahe hain! jaise brahma baap ko great great grand father kehte hain to unke aap saathi bachche bhi master great great grand father ho। saare vriksha ke aatmaon ki aap poorvaj aatmaon ki taraph aakarshan hai। aap poorvaj aatmaayen unhon ki paalna shaktiyon dvaara karte ho। jaise aap sabhi poorvaj aatmaon ki paalna baap ne ki to baap ne kaise ki? shaktiyon dvaara। vaise aap bhi poorvaj ke naate se shaktiyon dvaara unhon ki paalna karne vaale ho। aajkal dekhte ho ki sabhi aatmaayen duhkhi hain, pukaar rahi hain, apne-apne devi devtaaon ko, aao hamaari raksha karo, humein shanti do, humein shakti do। O kshama ke saagar poorvaj humein paalna do। to yeh aavaaj aap poorvaj aatmaon ke kaanon mein sunaai de raha hai? anubhav karte ho ki ham hi poorvaj hain? saare vriksha mein dekho jo anya dharma vaali aatmaayen bhi hain to vriksha mein taal taaliyaan hone ke kaaran woh bhi aapko usi nazar se dekhte hain। unhon ke bhi poorvaj aap hi ho। koi bhi dharma vaali aatmaon se aap jab milte ho to yeh samajhte ho ki yeh bhi hamaare hi vriksha ki taal taaliyaan hain! woh bhi jab aapse milte hain to samajhte hain ki yeh apne hain! apnepan ka anubhav un aatmaon ko bhi ho raha hai aur hona hai। to itna nasha, itna andar se aap logon ke paas raham aata hai? woh chilla rahe hain raham karo… to abhi samay anusaar aap sabhi poorvaj aatmaon ko mansa dvaara shaktiyon ki paalna karni hai। unhon ko aavashyakta hai। to jitna aap apne poorvaj ke nashe mein rahenge utna hi aap dvaara unhon ki paalna hogi। vaise bhi dekho kisi ki bhi paalna laukik mein bhi badon se hoti hai। vahi unhon ke shareer ke khaane peene, padhaai jo source aaph income hai, unka prabandha karte hain। to jaise baap ne aap sabhi bachchon ki bhinna-bhinna shaktiyon se paalna ki hai vaise abhi aapka kaarya hai saare vriksha ke taal taaliyon aur patton ki paalna karna। aisa umang aap poorvaj aatmaon ko aata hai? nasha hai? poojya bhi ho। dekho, saare drama mein jitni aap aatmaon ki kaayde pramaan pooja hoti hai utni pooja koi bhi mahaatma, dharma pita ki nahin hoti। aapki pooja niyam pramaan aarti hona, bhog lagna, aisi kiski bhi nahin hoti। gaayan dekho aapka kaayde pramaan keertan hota hai। kisi ka bhi aise gaayan nahin hota। to aap poorvaj ke saath poojya bhi ho। drama mein aap jaisa poojan aur gaayan kisi ka bhi nahin hai।

baapdaada aisi aap poojya aur poorvaj aatmaon ko dekh kitna khush hote hain! baap ke dil se baar-baar yeh geet bajta vaah mere sarva vriksha ke poorvaj aur poojya aatmaayen vaah! to aajkal baapdaada aap sabhi bachchon ko jo aapka svamaan hai, baap samaan sampanna sampoorn banne ka, vahi roop dekhne chaahte hain। uske liye ek baat bachchon ko dhyaan mein rakhni hai, baapdaada ne dekha ki sabhi bachche purushaartha bahut achha bhi karte hain lekin sada shabd har ek ko apne purushaartha mein add karna hai। attention dena hai। baapdaada bachchon se poochhte hain ki jaise baapdaada aap sabhi bachchon ko shreshtha svamaandhaari aatma ke roop se dekhte hain, vaise aap apne ko bhi aise svamaandhaari samajhte ho?

baapdaada ne dekha ki bachche bhi chaahte hain ki ham bhi abhi apne raajya mein chalen। “ab ghar jaana hai''। yeh bhi geet man mein gaate rehte hain - ab ghar jaana hai, ab return journey karni hai। iske liye baapdaada ne pahle hi kaha ki saara samay apne ko koi na koi seva mein busy rakho। baapdaada ne dekha hai seva ki roochi, seva ka umang-utsaah abhi bhi bachchon mein hai। achhi seva ke samaachaar bhi baapdaada sunte hain। lekin baapdaada teevragti mein aage badhne ke liye bachchon ko vishesh attention dilaate hain ki sirf ek vaacha ki seva nahin, seva karte ho to ek hi samay par teen sevaayen ikatthi karo - mansa dvaara sakaash do, vaacha dvaara gyaan do aur karmana arthaat apne samparka dvaara, sambandh dvaara, chehre dvaara aisi seva karo jo uska bhi prabhaav saath-saath seva mein ho। ek samay mein teen seva ikatthi karo kyonki abhi aatmaayen seva ke liye chaahti hain, kuchh pharka ho। kuchh badalna chaahiye। to ek samay par teenon seva kar sakte ho? kar sakte ho? check karte ho ki jis samay vaani ki service karte us samay mansa dvaara aur karmana arthaat samparka-sambandh dvaara bhi seva ho rahi hai! hoti hai saath-saath? jo samajhte hain ki ham ek hi samay mein teen seva karte hain, woh haath uthaao। ek hi samay teen seva। to abhi attention please। kabhi kabhi nahin। kya hota hai? seva to karte hain lekin seva mein saath-saath apne mein aur saathiyon mein santushtata kyonki seva ka phal hai santushtata va khushi। to check karo seva to ki lekin pahle bhi sunaaya ki seva ki khushi tab hoti hai jab svayan, saathi aur vaayumandal sabhi santushtata ke vibration mein ho। seva ke saphalta ki teen baaten vishesh sunaai thi, yaad hongi। pahla number seva arthaat nimitta bhaav। doosra - nirmaan bhaavna। teesra - nirmal vaani। bhaav, bhaavna aur svabhaav। yeh sabhi saath-saath seva mein hain to svayan bhi santushta aur saathi bhi santushta aur jinhon ki seva ki woh bhi aage badhte jaayen। nimitta bhaav vaale baap ke taraph sambandh jodenge। agar nimitta bhaav nahin to baap ke najdeek itne nahin aayenge। to jab bhi seva karte ho to yeh check karo ki bhaav, bhaavna aur svabhaav theek raha? aur aajkal baapdaada ne dekha ki jo mool baat hai baapdaada ki ki har ek ko aur apne ko chaahe kahaan bhi seva ke liye jaate ho, to yeh check karo ki saathi santushta rahe? kyonki seva ki saphalta hai - santushtata ka phal praapta hona। khushi praapta ho। saath-saath ek baat baapdaada ishaara dete hain ki chalte phirte, sangathan mein bhi rehte ho, koi na koi ka saath seva mein hota hi hai, to ek do ko aatma ke roop mein dekho। aatma ke roop mein dekhte bhi hain, abhyaas bhi karte hain, lekin jab aatma dekhte ho to aatma ke original sanskaar se dekhte ho? ya jo mix sanskaar hain, woh bhi dikhaai dete hain? aatma dekho, ismen paas ho, lekin kis sanskaar se dekhte ho? kya aatma ke original sanskaar se connection mein aate ho? ya vartamaan sanskaar bhi saamne aate hain? to baap kehte hain ki aaj se kisi ko bhi ek to aatma roop mein dekho lekin aatma ke jo original sanskaar hain us roop mein dekho। to kabhi bhi aapas mein jo kabhi kabhi baaten ho jaati hain, woh nahin hongi। abhi aatma roop mein dekhte ho lekin saath mein vartamaan sanskaar bhi saamne aa jaata hai। to aapas mein jo sampoorn sthiti honi chaahiye, usmein doori pad jaati hai। to original sanskaar vaali aatma dekho। to yeh jo abhi sangathan mein rukaavat aati hai woh rukaavat khatma ho jaayegi।

yeh brahman parivaar shreshtha parivaar hai। parivaar ki bahut mahima hai। yeh eeshvareey parivaar baar-baar nahin milta। kalpa mein ek hi baar yeh eeshvareey parivaar mila hai, itna bada parivaar saare kalpa mein kabhi nahin milta। parivaar ki bhi visheshta ko jaanna aur parivaar mein chalna, ek mahaan subject hai। pahle bhi sunaaya tha ki is gyaan ka foundation hai nishchay aur nishchay mein chaar baaten hain। baap, daada saath mein hai hi aur knowledge mein, drama mein, parivaar mein sabhi mein nishchay ho। to nishchay buddhi ho, sahaj purushaarthi ban jaate ho। jaise baapdaada mein nishchay hai, aise parivaar mein bhi nishchay aavashyak hai। jaise dekho jab aap koi bhi baat ki packing karte ho to kya karte ho? chaar hi taraph tight karte ho na, ek taraph bhi agar tight nahin kiya to halchal hoti hai। aise hi baap, knowledge, knowledge mein bhi vishesh drama aur parivaar। agar chaar hi baaten majboot nahin hain to vighna aate hain। vighnon ko paar karne mein attention dena padta hai isliye parivaar ki pahchaan, parivaar se pyaar, ek do ko samajhna, yeh bahut aavashyak hai।

poorvaj ho, poojya ho, to yeh baaten bhi apne mein ya saathiyon mein laani hai। kya bhi ho, nambarvaar to hain na! lekin brahman parivaar ka vishesh kaarya hai dua dena, dua lena। kai bachche kehte hain ki doosra krodh karta hai, abhi dua lega kaise! dua to lega nahin, krodh karega। baapdaada kehte hain achha sanskaar vash woh baddua deta hai, aap dua dene chaahte ho lekin woh baddua deta hai, lekin usne baddua di, lene vaala kaun? lene vaale aap ho ya woh hai? woh dene vaala hai, aap lene vaale hain। to uski baddua aapne li kyon? agar aatma ko original sanskaar se dekho to aapko raham aayega। svayan bhi safe raho, baddua lo nahin, lene vaale aap ho। na do, na lo।

baapdaada aaj sabhi bachchon ko homework dete hain ki kabhi bhi kisi ko aatma roop mein dekho, vartamaan sanskaar ke roop mein nahin dekho। aatma kaha to us aatma ke jo nizi sanskaar hain, us niji sanskaar ke roop mein, sambandh mein bhi aao aur drishti mein bhi usi drishti se dekho to yeh jo vighna padte hain jiske kaaran purushaartha mein teevrata nahin aati hai, to abhi vritti badlenge, drishti badlenge to baaten samaapta ho jaayengi। kisi ki kya bhi baaten dekhte ho, baapdaada ne pahle bhi kaha hai to sada aap brahman parivaar ka ek ek ka pharja hai - shubh bhaavna, shubh kaamna dena aur shubh bhaavna, shubh kaamna lena। us sanskaar se dekho aur chalo। ek aur bhi baat bataate hain - pahle bhi bataaya hai to kahaan kahaan sangathan mein kabhi-kabhi pardarshan, parchintan aur parmat ke taraph aakarshit ho jaate hain। abhi in teen par ko kaat do, ek par rakho - woh ek par hai par upkaar। par upkaar karna hai, par upkaari hain। braahmanon ka svabhaav hai par upkaari। pardarshan nahin, yeh par kaat do। yeh teenon bahut nuksaan dete hain। iseelie apna svamaan sada yahi yaad rakho ki mujh brahman aatma ka svamaan hi hai “par upkaari''। to doosri season mein baapdaada har ek bachche mein yeh parivartan dekhne chaahte hain। ho sakta hai? baapdaada mubaarak dete hain, ek do ko attention dilaate rehna। kya karna? roz raat ko sone ke pahle baapdaada ko good night karne ke pahle apne saare din ka pota-mel dena। achha kiya ya bura kiya? jo bhi kiya woh baap ko potaamel deke, apne buddhi ko khaali karke good night karna aur baap ki yaad mein hi so jaana। phir aapki neend bahut achhi hogi। pahle apne ko khaali karna, buddhi mein koi baat nahin rakhna, baap ke roop mein saara potaamel sachchi dil ka de diya to aapko dharmaraajpuri mein jaane ki aavashyakta nahin padegi। sachchi dil par saaheb raazi ho jaayega। to hom work mila! ek to apne poorvaj aur poojya swaroop ki seva chalte phirte kar sakte ho। baap ne dekha yeh janak bachchi ne tabiyat kharaab hote, karaachi ki seva mein vishesh mansa sakaash di, chaahe nimitta koi bhi hai lekin isne practical mein kiya। vahaan ki aatmaon ko sakaash mili। aur aage-aage umang mein badh rahe hain। to aise baapdaada ne practical example dekha। to aap sabhi bhi kar sakte ho। duhkhi ko, chillaane vaale ko khushi ki lahar pahuncha sakte ho। aapke bhakta aapko hi pukaar rahe hain - hamaari devi hamaara devta kab aake raham karenge। aapko sunaai nahin deta lekin baap ko bahut sunaai deta hai। har ek eeshta ko pukaar rahe hain। aap nahin jaante ho ki hamaare bhakta kaun se hain lekin bhakta to jaante hain na। woh to pukaarte hain aur aap har brahman aatma ke bhakta hain। chaahe dheele hon chaahe hoshiyaar hon, bhakta aapke bhi hain kyonki jad mein baithe ho na, to aapka sakaash ka part hai। to abhi mansa seva ko badhaao। aur jitna busy rahenge na utna nirvighna rahenge। kar sakte ho na! mansa seva karna jaante ho na! achha niyam poorvak karte ho ya kabhi kabhi? agar kabhi kabhi karte hain to usko regular karo aur agar thodi karte hain to usko aur badhaao kyonki saare kalpa ka aadhaar abhi ki seva ka phal hai। chaahe pujaari banenge, chaahe raajya adhikaari banenge donon ka aadhaar abhi ki seva, abhi ki avastha, abhi ka bol, abhi ka sambandh-samparka hai isliye baapdaada yahi chaahte hain ki jitni percent abhi hai, usse badhni chaahiye। vaise to baapdaada pahle se hi kehte hain - karna hai to abhi karo। kabhi nahin। baapdaada ko kabhi ke geet bahut sunaate hain। bahut achhe achhe karke sunaate hain lekin baapdaada ko kabhi ke geet achhe nahin lagte। abhi abhi ke geet achhe lagte। turat daan mahaapunya। to samjha abhi kya karna hai? achha।

baapdaada sabhi chaaron or ke bachchon ko dekh khush bhi hote hain kyonki baapdaada bachchon ke sivaae akela kuchh nahin karne chaahta isliye har roz bachchon ka aahvaan karte rehte hain। teevra purushaarthi bachche, meethe bachche, pyaare bachche ab chalo। achha।

chaaron or ke bachchon ko baapdaada dekhkar chaahe sammukh baithe hain, chaahe kahaan bhi baithe hain lekin sabhi ko baap yaad hai। aur baap ko bhi kaun yaad hai? chaaron or ke bachche yaad hain kyonki baap har bachchon ke liye yahi aasha rakhte hain ki har bachcha baap samaan banna hi hai। baap ki har ek bachche mein jo aashaayen hain, woh jaanta hai ki nambarvaar hain lekin phir bhi apne number anusaar bhi sampanna to banna hai na। har ek ke purushaartha ko bhi dekhte hain kya-kya kar rahe hain, baap ko bahut pyaar aata hai, bachche jab mehnat karte hain na to bahut pyaar aata hai ki mehnat se chhoot jaaen। pyaar mein kho jaayen। pyaar mein majority paas hain lekin baaton mein aa jaate to baap ko bhool jaate।

chaaron or ke bachchon ko baapdaada ka padam padam guna pyaar aur dil ka dulaar sveekaar ho। sabhi ko, maalik bachchon ko baap laakh-laakh badhaaeeyaan de rahe hain। udte chalo, udaate chalo। achha।

vardaan:- sva-sthiti dvaara sarva paristhitiyon ko paar karne vaale niraakaari, alankaari bhav

jo alankaari hain ve kabhi deh-ahankaari nahin ban sakte। niraakaari aur alankaari rehna - yahi hai manmanaabhav, madhyaajeebhav। jab aisi sva-sthiti mein sada sthit rehte to sarva paristhitiyon ko sahaj hi paar kar lete, isse anek puraane svabhaav samaapta ho jaate hain। sva mein aatma ka bhaav dekhne se bhaav-svabhaav ki baaten samaapta ho jaati hain aur saamna karne ki sarva shaktiyaan svayan mein aa jaati hain।

slogan:- sankalp ka ek kadam aapka to sahayog ke hajaar kadam baap ke।

ye avyakt ishaare - sada harshit rahne ke liye apni nature ko saral banaao, sahansheel bano।

jo apni va doosron ki beeti ko nahin dekhte hain, second mein fullstop lagaate hain woh saralchit hote hain aur jo saralchit hote hain unke naynon se, mukh se, chalan se madhurta va harshitmukhta pratyaksha roop mein dekhne mein aati hai। aisi saralchit sthiti vaale doosron ko bhi saralchit bana dete hain। saralchit maana jo baat suni, dekhi, ki, woh saar-yukta ho aur saar ko hi uthaaye।