Daily Murli for Wednesday 10 June 2026

10-06-2026 praatahmurli om shanti "baapdaada"' madhuban

“meethe bachche - shivbaaba aur brahma baba donon ki mat mashhoor hai, tumhein donon ki mat par chalkar apna kalyaan karna hai''

prashn:- number one trustee kaun hai aur kaise?

uttar:- shivbaaba hai number one trustee, usmein bilkul aasakti nahin। bhakti maarga mein bhi tum unke arth jo bhi daan-punya aadi karte ho, woh sab insure ho jaata hai, jiska phal doosre janma mein milta hai। abhi bhi jo baap ke arth apna sab kuchh insure karte unka poora return baap deta hain kyonki baba kehte - main khud to sukh bhogta nahin। main tumhaara lekar kya karoonga।

geet:- dar par aaye hain kasam leke…

om shanti। meethe-meethe sikeeldhe bachchon ne geet suna। bachche unko kaha jaata hai jo baap ke bante hain। baap ne samjhaaya hai yeh hai antim marjeeva janma। jeete ji baap ka banna hai। yeh to bachche jaante hain, shreemat gaai hui hai। shreemat bhagvaanuvaach। geeta mein shreekrishna ka naam daal diya hai parantu hai shivbaaba। unke baad brahma phir shreekrishna। shreemat shreekrishna ki nahin kahenge। shreshtha te shreshtha hamaara shiv baap hai। patit-paavan shreekrishna athva raadhe aadi ko nahin kahenge। woh daiveegun vaale manushya hain। manushya ko patit-paavan nahin kaha jaata। satayug mein aise nahin kahenge patit-paavan aao। patiton ko paavan banaane vaala ek hi baap hai, jiski shreemat par tum chal rahe ho। prajaapita brahma ki bhi mat mashhoor hai। shreemat bhi mashhoor hai। shivbaaba aakar tumko apna banaate hain। kehte hain, sir hatheli par rakh baap ke bane hain। unke direction par chalna pade। tumhein baap ko apni mat dene ki darkaar nahin rehti। woh khud mat dene vaala hai। yeh to sab bachche hain। shivbaaba naameegraami hai। woh jo mat denge, jo kuchh karenge right। is brahma ko bhi mat dete hain ki yeh karo। tumhaara connection hi shivbaaba se hai। koi ka bhi avgun nahin dekhna hai, shreemat par chalna hai। shivbaaba to hai niraakaar। unka yeh ghar to hai nahin। tum yahaan puraane ghar mein rehte ho phir svarga mein jaakar apne ghar mein rahenge। shivbaaba kehte hain main to nahin rahoonga। main to is samay thode time ke liye aata hoon।

tum ho sachche-sachche roohaani salvation army। supreme rooh (baap) direction de rahe hain, hoobhu drama plan anusaar kalpa pahle muaaphik। kalpa-kalpa jo direction dete honge vahi dete hain। raat-din guhya sunaate rehte hain। naya koi yeh samajh na sake। bhal koi 35-40 varsha se rehte hain parantu bahut hain jo in gambheer baaton ko samajhte nahin hain। baba to roz naya sunaate rehte hain। karaachi se lekar murli nikalti aai hai। pahle baba murli chalaate nahin the। raat ko 2 baje uthkar 10-15 page likhte the। baba likhvaate the phir unki kaapiyaan nikalti thi। bhaktimaarga mein to shaastra aadi ke kaagaj sambhaalte hain। din-pratidin badi-badi kitaaben banaate aate hain। kitni biography banaate jaate hain। woh phir padhkar rakhte hain। tum to murli padhkar phenk dete ho। nahin to yeh versions rakhne chaahiye hamesha ke liye। parantu nahin, jaante hain ki yeh sab vinaash ho jaayenge। chitra aadi jo bhi tum banaate ho thode samay ke liye hain। phir yeh dab jaayenge phir vahaan na shaastra, na chitra aadi kuchh bhi nahin rehte hain phir yeh jo kuchh chal raha hai, kalpa baad bhi hoga। shaastra aadi phir dvaapar se shuru honge। granth bhi aage to haath se likha hua bahut chhota tha। ab bada banaaya hai। din-pratidin bada banaate jaayenge। nahin to shivbaaba ki jeevan kahaani kitni likhni chaahiye। abhi tum bachche kehte ho - parampita paramatma ki jeevan kahaani ham jaante hain। baap baith samjhaate hain - main bhaktimaarga mein kya karta hoon। bhakti maarga mein bhi insurance karta hoon। eeshvar arth manushya daan-punya karte hain na। kehte hain isne daan punya kiya hai eeshvar arth। eeshvar ne bade ghar mein janma diya hai। bhaktimaarga mein dharmaatma bahut hote hain। eeshvar arth, shreekrishna arth daan punya karte hain। to phir baap samjhaate hain - main bachchon ko doosre janma mein alpakaal ke liye phal deta aaya hoon। achha va bura phal milta to hai na। kitna insurance hua। jo jaise karma karte hain, us anusaar phal milta hai। maaya ulta kaam karaati hai, jisse tum duhkh ko paate ho। ab main tumko aise karma sikhaata hoon jo kabhi duhkh nahin hoga aur maaya bhi vahaan nahin hoti। baaki hai martaba, jo jitna insure kare। shivbaaba bhi trustee hai na। number one trustee hai। doosre ki aasakti jaayegi, koi trustee to kiska khaana hi kharaab kar dete hain। baap to dekho kaisa trustee hai, kehte hain yeh sab kuchh bachchon ke liye hai। tumhaara saara connection shivbaaba se hai। baap kehte hain main sachcha trustee hoon। main khud sukh nahin leta hoon, bachchon ko saari raajdhaani deta hoon। laukik baap bhi bachchon ko sab kuchh varse mein de jaate hain। main to svarga mein kuchh bhi leta nahin hoon। tumko hi sab deta hoon। to tumhaara connection saara shivbaaba se hai। yeh baba kehte hain mainne bhi full insure kar liya। tan-man-dhan sab baap ki service mein hai। sindhi mein ek kahaavat hai - haath jiska aise (daata roop mein) pahla poor woh pahunchenge। baap ko sab insure karna hai। do mutthi chaaval diye to mahal mil gaye। abhi dekho makaan bana hai, koi ne ek roopaya bheja, hamaari eet bhi lag jaae। baap ne likha tumko to sabse achhe mahal milenge kyonki tum gareeb ho। main hoon hi gareeb nivaaz। gareeb ka ek roopaya to saahookaar ka 10 hajaar। donon ko ek hi martaba mil jaata hai। saahookaar bahut mushkil aate hain। sabse kanyaayen to bilkul free hain। number one dekho mama gai। unke paas to kuchh bhi nahin tha। gareeb ke ghar ki thi phir bhi number one chali gai। isne sab kuchh diya phir bhi pahle lakshmi phir naaraayan। kitna wonderful khel hai। to kabhi kisi baat mein sanshay nahin hona chaahiye। baapdaada koi kam thode hi hai। jara bhi sanshay ismen nahin laana chaahiye। bahut meetha bhi banna hai। kadam-kadam par shreemat leni hai। nahin to maaya bahut nuksaan kara deti hai। bachchon ko kitne direction dene padte hain। baba kehte hain - poora samaachaar likho। baba har prakaar ki sambhaal karenge। baba ko bahut khyaal rehta hai। kahaan yeh bachcha chadh jaae। padhaai par poora attention chaahiye। ham hain most beloved god fatherly student। bhagvaanuvaach bhi likha hua hai parantu shreekrishna ka naam daal diya hai। shreekrishna bhi sabhi manushyon se oonch te oonch thahra na। first prince hai। shreekrishna ka naam dete hain, shreenaaraayan ka kyon nahin! shreekrishna hai baalak। chhote-pan se baalak satopradhaan hota hai। phir bachpan se yuva, phir vriddha avastha aati hai। bachchon ki hi mahima karte hain kyonki pavitra hain na। baalak brahmagyaani samaan kehte hain। bachche se koi paap nahin hota hai। to shreekrishna bhi chhota bachcha hone ke kaaran unka birth de manaate hain। phir bhi shreekrishna ko dvaapar mein dikha diya hai। yeh sab baap baith samjhaate hain। sivaae tum braahmanon ke duniya mein aisa koi nahin hoga jise yeh sab baaten pata hon। brahman hain uttam। tum brahman ho eeshvareey santaan। satayug mein eeshvareey santaan nahin kahenge। eeshvar se zaroor svarga ki praapti hogi। yeh hai tumhaara ati durlabh amoolya jeevan। sabka to ho nahin sakta। yeh drama aisa bana hua hai। kalpa pahle jinhonne padha, woh padh rahe hain। bhagwan ne zaroor bhagwan-bhagavti paida kiye। parantu bhagwan-bhagavti kah nahin sakte। god is one। niraakaar ki mahima hai। saakaar ki thode hi mahima hoti hai। in lakshmi-naaraayan ko niraakaar ne aisa banaaya। ab raajayog seekh rahe hain। raajaai sthaapan hui, to us samay vinaash bhi hua। baap zaroor svarga ka varsa denge। ab to hai sangam ki baat। shivbaaba aate hain, tab khel poora hota hai, phir shreekrishna ka janma hota hai। manushya to bichaare moonjh gaye hain, tab to baap aakar samjhaate hain। parampita paramatma brahma dvaara sab shaastron ka saar bataate hain। abhi tum jaise master knowledgeful ho gaye ho। aatma ki hi mahima hai। gyaan ka saagar, aanand ka saagar, blissful, yeh baap ki mahima hai। baap kehte hain - yeh bhaarat to sabse bada teertha sthaan hai। parantu shreekrishna ka naam daalne se saari mahima gum kar di hai। nahin to sabhi shiv ke mandir mein phool chadhaate, sabka sadgati daata woh ek hai। aadhaakalpa tum praalabdha bhog phir neeche aate ho। sabko tamopradhaan banna hi hai। ab baap kehte hain - tum bachchon ke liye nai duniya sthaapan kar raha hoon। usmein khud nahin aata, sab kuchh tum bachchon ke liye hai। saaph baat hai। manushya to apne liye karte hain phir kehte hain ki ham nishkaam karte hain। parantu nishkaam to koi kar na sake। har cheez ka phal zaroor milta hai। main to tum bachchon ko avinaashi gyaan ratna deta hoon। tumhaare liye hi vaikuntha laaya hoon। bachchon ko sovereignty ka soveeniyar dete hain। to woh lene liye aisa laayak banna chaahiye। svarga ka maalik banna hai। hatheli par bahishta milta hai। second mein jeevanmukti athva second mein baadshaahi। divya drishti daata shivbaaba hai। second mein vaikuntha mein le jaate hain, is baba ke haath mein kuchh bhi chaabi nahin hai। baap kehte hain main tum bachchon ko raajaai deta hoon। main nahin karta hoon। phir jab tum bhakti maarga mein jaayenge tab tumko divya drishti se bahlaana padega। kitna achhi reeti samjhaate hain। aisa baba kalpa-kalpa, kalpa ke sangamayuge ek hi baar aate hain। bani banaai ban rahi ab kuchh banni naahi... jo kuchh hota hai, drama mein noondh hai। usko saakshi ho dekho। baba bahut achhi reeti samjhaate hain। bachche main tumhaara insurance magnate hoon। tumhaari ek paai bhi nahin ganvaata hoon। kaudi se tumko heere tulya banaata hoon। yeh sab shivbaaba karte hain inke dvaara, karnakraavanhaar hain। niraakaar, nirhankaari woh hai। god father kaise baith padhaate hain। aise nahin kehte charnon mein pado। baap obedient servant hai। baap kehte hain - jinko maalik banaaya, woh sukh bhog-bhog kar abhi duhkhi hue hain। sukh bhi bahut milta hai। itna sukh koi dharma ko nahin milta hai। aise nahin kah sakte ki bhaaratvaasiyon ko kyon, auron ne kya kiya? are itne dher manushya hain, sab to nahin aa sakte hain। yeh drama bana hua hai। bhaarat mein hi aadi sanaatan devi-devta dharma tha। bhagwan ne aakar sahaj raajayog sikhaaya tha। baap kehte hain - main phir se aaya hua hoon। tum bhi jaante ho 84 janmon ka part bajaaya ab phir se ham ghar jaate hain। yeh bahut puraana chola ho gaya hai (sarpa ka misaal)। sannyaasi log phir kehte hain aatma so paramatma mein leen ho jaati hai। aisi avastha mein rehte-rehte phir shareer chhod dete hain। parantu brahm mein leen to koi hota nahi hai। unmein bhi koi-koi bahut teekhe hote hain। shanti mein baithkar shareer chhod chale jaate hain to unka vaayumandal mein 2-3 din tak sannaata ho jaata hai। to tum jaante ho ki yeh puraana shareer chhod baba ke paas jaate hain। brahm to baba nahin, yeh un bichaaron ka bhram hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is drama ki har scene saakshi hokar dekhna hai kyonki bani banaai ban rahi। kabhi kisi baat mein sanshay nahin uthaana hai।

2) baap insurance magnate hai, isliye tan-man-dhan baap ki service mein saphal kar apna bhavishya banaana hai। baap se poora-poora connection rakhna hai। poora samaachaar dena hai।

vardaan:- marjeeva sthiti dvaara himmat aur hullaas ki avinaashi stamp lagaane vaale praapti sampanna bhav

jo praaptiyon se sampanna hote hain unke har chalan, nain chain se umang-utsaah dikhaai deta hai। lekin himmat aur hullaas ki avinaashi stamp lagaane ke liye apne past ke va eeshvareey maryaadaaon ke vipreet jo sanskaar, svabhaav, sankalp va karma hote hain unse marjeeva bano। pratigya roopi switch ko set kar practical mein pratigya pramaan chalte raho। himmat ke saath hullaas ho to praapti ki jhalak door se hi dikhaai degi।

slogan:- mele va jhamele mein double light rahne vaala hi dhaarnaamoorta hai।

ye avyakt ishaare - sada harshit rahne ke liye apni nature ko saral banaao, sahansheel bano।

aapke har sankalp, har bol mein visheshta ho। sada saral svabhaav, saral bol, saralta sampanna karma hon, aise saral swaroop raho। sada ek ki mat par, ek se sarva sambandh, ek se sarva praapti, aise ek dvaara sada ekras rahne ke sahaj abhyaasi raho। sada khush raho, khushi ka khajaana baanto। khushi ki lahar sarva mein phailaao, yahi sachchi seva hai।