Daily Murli for Thursday 11 June 2026

11-06-2026 praatahmurli om shanti "baapdaada"' madhuban

“meethe bachche - poora varsa lene ke liye ek baap se poori preet rakho, tumhaari preet kisi bhi dehdhaari se nahin honi chaahiye''

prashn:- jo apne daivi sampradaay ke honge unke saamne kaun se akshar ghoomte rahenge?

uttar:- jab tum unhein bataayenge ki baap ko yaad karne se vikarma vinaash hote hain aur devi-devta dharma ki sthaapna hoti hai to yeh akshar unke saamne ghoomte rahenge। unki buddhi mein aayega humein devta banna hai isliye hamaara khaan-paan shuddh hona chaahiye।

geet:- bholenaath se niraala…

om shanti। bholaanaath ke bachche sun rahe hain। kisse? bholaanaath se। bholaanaath shiv ko hi kaha jaata hai। unka naam hi shiv hai। bholaanaath ke bachche arthaat shiv ke bachche। aatmaayen sun rahi hain in kaanon se। abhi tum bachche aatma-abhimaani bane ho। bachche tape par bhi murli sunte hain to samajhte hain shivbaaba hamko apna parichay dete hain, main sabhi aatmaon ka baap hoon। jisko tum parampita param aatma yaani paramatma kehte ho। unko sadaiv father hi kehte hain। kaun kehte hain ki woh father hai? aatma। aatma ko ab gyaan mila hai aur koi manushya maatra ko yeh gyaan nahin hai। ham aatma ko do baap hain। ek saakaar, ek hai niraakaar। woh parampita hai, yeh samjhaani aur koi de na sake। baap ke sivaae aur koi yeh poochh na sake। baap hi poochhte hain tum jo kehte ho parampita paramatma, god father, woh tum kiske liye kehte ho? kya laukik baap ke liye va paarlaukik baap ke liye? laukik father ko god father kahenge? hindi mein akshar bhi hai parampita। woh to ek hi niraakaar hai। eeshvar, prabhu va bhagwan kahne se baap siddha nahin hota। god father akshar achha hai। aatma ne kaha woh hamaara god father hai। laukik father to sirf shareer ka baap hai। tum sabse poochha jaata hai, tumko kitne fathers hain? ek hai laukik, doosra hai paarlaukik। donon mein bada kaun? zaroor kahenge paarlaukik father। unki mahima hai - sab patiton ko paavan banaane vaala paarlaukik baap। yeh bhi abhi tum samajhte ho। duniya mein yeh koi bhi nahin samajhte। baap ne samjhaaya hai - tumko paarlaukik baap se preet hai। auron ki hai vinaash kaale vipreet buddhi। vinaash ka abhi samay hai। vahi mahaabhaarat ki ladaai ab lagni hai। aeroplane, tanks aadi ek do ko supply kar rahe hain। sabko dete jaate hain। paise se jisko jo chaahe unko dete jaate hain। udhaar par bhi lete hain। to plen, baarood aadi yeh sab khareed karte hain। yeh sab cheeze badi mahangi hoti hain। vilaayat vaale banaate hain, woh phir bechte rehte hain। bhaaratvaasi thode hi aeroplane aadi bechte hain। yeh sab cheeze baahar se aai hui hain। ab jo cheez khareed karenge so zaroor kaam mein laayenge। phenkane ke liye thode hi lenge। woh hai vinaash kaale vipreet buddhi yaadav sampradaay, jo Europe mein rehte hain। usmein sab aa gaye। bhaarat to avinaashi khanda hai kyonki avinaashi baap ka birth place hai। baap aate hi tab hain jab puraani duniya khatma honi hai aur janma vahaan lete hain jahaan kabhi khatma nahin hona hai। baap aaya tha tab to shiv jayanti manaate hain parantu unhon ko yeh pata nahin hai ki shivbaaba kab aate hain। aate bhi us samay hain jabki vinaash ke liye taiyaariyaan ho rahi hain।

ab baap kehte hain woh hai yooropvaasi yaadav sampradaay jo satayug mein hote nahin। na bauddhi, na Christian aadi hote hain। ab baap kehte hain unhon ki hai vinaash kaale vipreet buddhi kyonki paramatma baap ko sarvavyaapi kah dete hain। tum ho vinaash kaale preet buddhi। tum baap ko jaante ho। tum samajhte ho hamne 84 janma liye hain। 84 janmon mein paap aatma, tamopradhaan ban gaye hain। bhaarat-vaasiyon ne hi 84 janma liye hain। ab naatak poora hota hai, sabko vaapis jaana hai। tumko baap raajayog sikha rahe hain। yeh hai sabki kayaamat ka samay arthaat maut ka samay। to un yaadvon ki bhi eeshvar se preet nahin hai, isliye vinaash kaale vipreet buddhi kaha jaata hai। koi bhi dehdhaari manushya se preet nahin lagaani hai। woh to hai rachna, unse varsa mil na sake। bhaai ko bhaai se varsa thode hi milta hai। yeh to achhi reeti se samjhaaya hai।

tum bachche abhi samajhte ho - unki hai vinaash kaale vipreet buddhi aur tumhaari hai preet buddhi। ismen bhi jo teevra preet vaale hain, baap se poori preet rakhte hain। ham baba se 21 janma svarga ka varsa lete hain। woh baba hi satya bataate hain aur koi se preet nahin rakhni hai। jab naya makaan banaate hain to phir naye makaan se preet lag jaati hai। samjha jaata hai puraana makaan toot jaana hai। to ham bhi puraani duniya se dil todte jaate hain। baap samjhaate hain - din-pratidin vaayumandal kharaab hota jaayega। dekhte ho kitne hangaamen hote hain, to samjhenge ki bas abhi yeh khalaas hote hain। hamko jaana hai nai duniya mein। to nai duniya ko yaad karna pade। behad ke baap aur varse ko yaad karna hai aur koi ko yaad karne se kuchh milega nahin। manushya bhakti maarga mein to kitna yaad karte hain। maa baap mitra sambandhiyon ko yaad karte hue bhi phir devi-devtaaon ko kitna yaad karte hain। paani mein snaan karte hain, unko patit-paavni kehte hain। dikhaate hain, teer maara aur ganga nikal aai। ganga jal mukh mein dete hain। samajhte hain thoda bhi ganga jal milne se mukti ko pa lenge। baap kehte hain yahaan hain gyaan ki baaten। tum thoda bhi gyaan sunte ho to phal mil jaata hai। yeh gyaan sunne ki baat hai। amrit peene ki cheez nahin hai, yeh knowledge hai। aise nahin samjho ki bhog ke din amrit pilaate hain। nahin, woh to meetha paani hai। baaki yeh hai gyaan ki baat। gyaan arthaat baap aur srishti ke aadi-madhya-ant ko jaanna। yeh srishti chakra kaise phirta hai, kaun 84 janma lete hain। sab to le na saken। pahle-pahle bhaaratvaasi hi aate hain। vahi poore 84 janma lete hain। jo devta the vahi 84 janma bhog patit ban jaate hain। baap aakar phir kaanton se phool banaate hain। manushya deh-abhimaan mein aakar 5 vikaaron mein phans padte hain। ab hai raavan raajya। satayug tha daivi raajya। shivbaaba hi svarga ki puri rachte hain। sooryavanshi lakshmi-naaraayan ka raajya tha। abhi tum jaante ho sthaapna ho rahi hai। tumhaari vinaash kaale preet buddhi hai, isliye vijayi hain। saare vishwa par tum vijay paate ho। yeh achhi reeti yaad rakhna hai। ham bhaaratvaasi jo abhi kaliyug mein hain so phir badalkar svarga mein jaayenge। puraani duniya ko chhodna hai। yeh vikaari sambandh, isko bandhan kaha jaata hai। tum vikaari bandhan se nikal nirvikaari sambandh mein jaate ho phir doosre janma mein tum vikaari bandhan mein nahi aayenge। vahaan hai hi nirvikaari sambandh, is samay aasuri bandhan hai। aatma kehti hai hamaari shivbaaba se preet hai। tum braahmanon ki preet hai kyonki yathaartha reeti jaante ho। baap ko, srishti chakra ko jaan tum phir auron ko samjhaate ho। jitna jo auron ko samjhaayenge to bahuton ka kalyaan karenge। jo jaasti samajhte hain vahi hoshiyaar hain, oonch pad bhi vahi paate hain। service kam karte hain to pad bhi kam paayenge। patit to saari duniya hai। har ek ko patit se paavan hone ka raasta bataana hai aur koi upaay nahin hai। yaad se hi vikarma vinaash honge। jo daivi sampradaay ke hain unke saamne yeh akshar goonjenge, samjhenge yeh to theek baat hai। barobar ham devi-devta bante hain। hamaara bhojan bhi shuddh chaahiye। daiveegun bhi yahaan dhaaran karne hain, sarvagun sampanna banna hai। abhi tum ban rahe ho। yeh lakshmi-naaraayan devtaayen hain, inko bhog lagaate hain to kya cigarette aadi ka bhog lagaate hain? cigarette peene vaala oonch pad pa nahin sakta। yeh koi daivi cheez nahin hai। cigarette piyenge va lahsun pyaaz aadi khaayenge to aur hi gir jaayenge। kehte hain yeh chhodne se tabiyat kharaab ho jaati hai। baap kehte hain - shivbaaba ko yaad karo। yeh aadten sab chhod do to tumhaari sadgati hogi। cigarette ki aadat to bahuton mein rehti hai। samjhaani di jaati hai, devtaaon ko kabhi bhi yeh bhog nahin lagaaya jaata hai। to tumko in jaisa yahaan hi banna hai। tum chhi-chhi cheezen khaate rahenge to woh baans aati rahegi। cigarette va sharaab peene vaalon se door se hi baans aati hai। to tum bachchon ko daiveegun dhaaran karne hain, vaishnav banna hai। jaise vishnu ki santaan hain, tum vishnu arthaat daivi santaan bante ho। yahaan ho tum eeshvareey santaan। yeh tumhaara sarvottam janma hai। devtaaon se bhi uttam tum ho। tum auron ko bhi uttam banaane vaale ho। yeh hai behad ke baap ki missionary। Christian logon ki missionary hoti hai na। apne Christian dharma mein bahuton ko convert karte hain। yeh hai eeshvareey missionary। tum shoodra se brahman dharma mein convert ho phir devta dharma mein convert ho jaate ho। tum jaante ho ham shoodra se ab brahman bane hain। tum jeete ji mare ho phir jaakar devta banenge। garbha se janma milega।

yahaan tumko baap ne dharma ka bachcha banaaya hai, dharmaatma banaane। baap ne tumko apna banaaya hai। bachchon ko baap sikhlaate hain, brahman se phir devta bante hain। yeh manushya kitne oonche hain, inmen sab daiveegun hain। jab tum aatma pavitra ban jaayengi, to phir shareer bhi pavitra chaahiye। puraane shareer ko khatma hona hai phir tumko shareer naya satopradhaan chaahiye। satayug mein 5 tatva bhi satopradhaan ban jaayenge। baap kehte hain - tum shoodra varna mein the। ab phir brahman varna ke bane ho phir daivi varna mein aayenge। 84 janma lenge na। brahman varna ko gum kar diya hai। ab baap shoodra se brahman banaae phir devta banaate hain। ab tum brahman ho choti। baajoli hoti hai na। abhi brahman hain phir devta, kshatriy.... phir brahman banenge। isko chakra kaha jaata hai। abhi tum brahman varna mein ho। yeh knowledge abhi hai phir to praalabdha mil jaayegi। vahaan sada sukhi rahenge, 21 janma nambarvaar is samay ke purushaartha anusaar। koi raajaai gharaane mein, koi praja mein jaayenge। raajaai gharaane mein sukh bahut hai phir kalaayen kam hoti hain। tumko 84 janmon ka gyaan mila hai। smriti aai hai। baap aakar samjhaate hain meethe-meethe bachchon, tumhaare ab 84 janma poore hue hain। koi ne 84 janma, 80, 50, ya 60 janma bhi liye hain। sabse jaasti tum bhaaratvaasi sukh dekhte ho। is drama mein tumhaara naam baala hai। devtaaon se bhi tum oonch ho। tum jaante ho ham so poojya bante hain। satayug mein ham kisko bhi poojte nahin, na hamko koi poojte hain। vahaan ham hain hi poojya phir kalaayen kam hoti jaati hain। ham poojya se phir pujaari ban maatha tekte hain। dvaapar mein ham pujaari banna shuru karte hain। ant mein phir sabhi vyabhichaari ban jaate hain। yeh shareer paanch tatvon ka bana hua hai, unki koi baith pooja karte hain to usko kaha jaata hai bhoot pooja। har ek mein 5 bhoot hain। deh-abhimaan ka bhoot phir kaam-krodh ka bhoot। bhoot sampradaay kaho athva aasuri sampradaay kaho, baat ek hi hai। baap aakar phir daivi sampradaay banaate hain। baap aate hain bhooton se chhudaane aur apne saath yog lagaae devta banaate hain। guroonaanak ne bhi mahima gaai hai ki parampita paramatma ne manushya ko devta banaaya। vahi patiton ko paavan banaane vaala hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) brahman se devta banne ke liye jo bhi chhi-chhi aadten hain un sabko chhodna hai। shoodron ko brahman dharma mein convert kar devta banaane ke liye eeshvareey mission ke kaarya mein sahayogi banna hai। sharaab, cigarette ya jo bhi gandi aadten hai woh nikaal deni hain।

2) is vinaash kaal ke samay mein ek baap se sachchi preet rakhni hai। puraana makaan tootne vaala hai isliye isse dil nikaal naye se lagaani hai।

vardaan:- shreshtha karma dvaara simran yogya banne vaale yogayukta, yuktiyukta bhav

aapka ek-ek karma jitna shreshtha hoga utna hi shreshtha aatmaon mein simran kiye jaayenge। bhakti mein naam ka simran karte hain, lekin yahaan jo shreshtha aatmaayen hain unke gunon aur karmo ko misaal banaane ke liye simran karte hain। to aap shreshtha karmo ke aadhaar par simran yogya bante jaayenge, iske liye yogayukta bano। yogayukta banne se har sankalp, shabd va karma yuktiyukta avashya hoga, unse ayukta karma va sankalp ho hi nahin sakta - yeh bhi connection hai।

slogan:- nimitta aur nirmaanchitta - yahi sachche sevaadhaari ke lakshan hain।

ye avyakt ishaare - sada harshit rahne ke liye apni nature ko saral banaao, sahansheel bano।

saralchit nature hogi to harshit rahne ke saath naynon se, mukh se aur chalan se madhurta pratyaksha roop mein dikhaai degi। kabhi mukh se katuvchan nahin niklenge। unka dil, dimaag, bol sab ek samaan hoga। dil mein ek, bol mein doosra - yeh saralta ki nishaani nahin hai। saral svabhaav vaale sada nirmaanchit, nirhankaari, nir-svaarthi hote hain।