Daily Murli for Monday 22 June 2026

22-06-2026 praatahmurli om shanti "baapdaada"' madhuban

“meethe bachche - baap aaye hain tum bachchon ki khidmat (seva) karne, tum bhi baap samaan ban sabki khidmat (seva) karo''

prashn:- brahma baap ka kaun sa ek vichaar chalta, jis par shivbaaba kehte wait and si, phikar mat karo?

uttar:- baba ka vichaar chalta, samay bada naazuk hota jaata, bachchon ko avinaashi gyaan ratna lene baap ke paas aana hi hai, itne dher bachche kahaan aakar rahenge। kitne makaan banaane padenge। shivbaaba kehte wait and si। kalpa pahle jaise aakar rahe the vaise hi rahenge। tum phikar mat karo, tum sirf padhte raho, manamnaabhav। tumhein karmaateet banne ka purushaartha karna hai।

geet:- tumhein paake hamne…

om shanti। baap bhi kehte hain bachche om shanti। aur kya kahenge! bachchon ko kehte hain - bachche om shanti, tattvam। he bachchon tum bhi shant swaroop ho। tum bhi master patit-paavan ho। aise aur koi kah nahin sakenge। kaha jaata hai - jaise kaag vaise bachche। tum bachche bhi jaante ho jaise baba vaise ham। baap kehte hain main gyaan ka saagar hoon। tum bachche bhi samjhenge ham master gyaan saagar hain, goya nadiyaan thahre। saagar ke baal-bachche bhi honge na। badi-badi nadiyaan bhi hain। bade-bade talaav, bade-bade sarovar bhi hain। woh hain jad, tum ho chaitanya। saagar se hi nikle hue hain। kai bachche bhi in baaton ko samajhte nahin hain kyonki padhi likhi to bachchiyaan hain nahin। baba ne ek baar poochha tha - cheeni kisse banti hai? gud kisse banta hai? to bola laal ganne se gud banta hai, saphed ganne se cheeni banti hai। bichaari padhi hui to hain nahin। ab tumko kitni badi baaten samjhaate hain। paani ke saagar se paani ki hi nadiyaan nikalti hain। manushya bahut badhte jaate hain to paani bhi bahut chaahiye na। kitne canals aadi banaate rehte hain। to tum bachchon ko uthte-baithte, chalte-phirte yahi khyaal rakhna hai ki ham is patit duniya ko paavan banaate hain। geet mein bhi kehte hain baba ham aapse vishwa ki baadshaahi ka varsa lete hain। yeh hamse koi chheen nahin sakega। 21 janma yeh raajaai kaayam rahegi। behad ka baap aakar behad ka raajya bhaagya dete hain। raajya bhaagya chalaane ke laayak banaate hain, pavitra banaate hain। bulaate bhi hain, he patit-paavan aao। yeh koi shreekrishna ko nahin bulaate hain। niraakaar bhagwan ko bulaate hain। jab kehte hain, he patit-paavan, to shreekrishna buddhi mein yaad nahin aata hai, paramatma yaad aata hai। baap aakar har ek baat samjhaate hain। abhi tum bachche sammukh baithe ho। yeh koi saadhu-santa nahin hai। tum jaante ho niraakaar shivbaaba is brahma tan mein pravesh kar hamko padhaate hain। gaayan bhi hai - parampita paramatma, brahma tan dvaara aadi sanaatan devi-devta dharma ki sthaapna karte hain। vinaash, sthaapna ke baad hi hua hai। isse siddha hai ki puraani duniya mein aate hain। brahma dvaara sthaapna nai duniya ki, shankar dvaara anek dharmo ka vinaash। satayug mein ek dharma tha, abhi to anek dharma hain। ek dharma vaale devi-devtaaon ki nishaani chakra aadi hai। in lakshmi-naaraayan ko kehte hi hain vishwa ka maalik। svarga ka maalik so vishwa ka maalik ho gaya। yeh baaten abhi tum bachchon ki buddhi mein baithi hain। baap kehte hain - bachche, manamnaabhav। yeh bachchon ko ghadi-ghadi saavdhaani milti hai। baap ko aur varse ko yaad karo। yeh bhoolo mat aur points bhool jaati hain, yeh to mukhya hain na। baap hi patit-paavan hai। yeh yukti bataate hain paavan hone ki। baap kehte hain, tum satopradhaan the। ab tamopradhaan patit ban gaye ho। 84 janma poore liye hain। ab tumko phir satopradhaan banna hai। satopradhaan bano tab hi tum chal sakenge pavitra duniya mein। niraakaari duniya bhi pavitra hai, saakaari duniya bhi pavitra hai। apvitra patit duniya yeh hai। aatma bhi tamopradhaan to shareer bhi tamopradhaan hai। yeh to srishti ka naatak hai, ismen brahmaanda aur sookshm vatan bhi aa jaata hai। srishti ka chakra yahaan phirta hai। satayug treta yahaan hai। yeh koi sookshm-vatan va mool vatan mein nahin hote। yeh yahaan hi hain। inko manushya srishti kaha jaata hai। woh hai aatmaon ki niraakaari duniya। woh hai brahma, vishnu, shankar ki aakaari duniya। yeh saakaari srishti kitni badi hai। satayug mein kitni chhoti srishti hoti hai। vahaan hai hi ek dharma। baaki manushya jo kehte hain ki vahaan bhi daitya aadi the, yeh sab hai jhooth।

tum samajhte ho ki nai duniya ki sthaapna, puraani duniya ka vinaash gaaya hua hai। sabka vinaash hoga aur satayug heaven ki sthaapna hogi। tum bhi baap ke saath khidmat kar rahe ho। baap bhi aate hi hain bachchon ki khidmat karne। yeh hai behad ka baap। dekhte hain hamaare bachche bahut duhkhi hain to zaroor taras padega na। woh hai hi merciful baap। abhi to saari duniya mein ashaanti hai। ek baap ke sivaae aur koi shanti de na sake। hathayogi bhi athaah hain। aatma ke liye kah dete woh nirlep hai। manushyon ko ulti baaten suna dete hain। vaastav mein aatma ki saphaai chaahiye। aatma mein hi khaad padi hai aur kisko pata nahin hai। kehte bhi hain yeh paap aatma hai। bahut paap karte hain। yeh mahaatma hai, punyaatma hai। aise nahin kahenge mahaan paramatma hai। sannyaasiyon ke liye kahenge pavitra aatma hai kyonki sannyaas kiya hua hai। ab baap samjhaate hain - aatma ko pavitra banaane vaala sivaae ek paramatma baap ke aur koi ho nahin sakta। patit duniya mein paavan aatma koi ho na sake। abhi sapling lagta hai। dheere-dheere vriddhi hoti jaayegi। yeh to chhote-chhote math, panth aadi taal taaliyaan hai। unmein koi mehnat thode hi lagti hai। anek prakaar ke mantra dete hain। kisam-kisam ke mantra dete hain। yeh bhi vasheekran mantra hai, jisse tum 5 vikaaron par jeet paate ho। raam-raam ka mantra japte hain, isse phaayda to kuchh bhi nahin hai। yahaan to baap kehte hain mujhe yaad karo to tumhaare paap naash ho jaayenge। tum pavitra aatma ban jaayenge। yaad ko hi yog kehte hain। bhaarat ka praacheen yog bahut mashhoor hai। is yog se hi tum vishwa par jeet paate ho। bhaarat ka raajayog bahut naameegraami hai। yeh baap ke sivaae aur koi sikha na sake। tum ho brahmaakumaar, kumaariyaan। bi.ke. to yahaan hi honge na। prajaapita brahma ke bachche to zaroor brahma ke saath hi honge। brahman kul bhi zaroor chaahiye। isko kaha jaata hai - sarvottam oonche te ooncha brahman kul। abhi tum brahman ho phir uthal khaayenge। baajoli khelte hain na। shoodra se brahman bane ho phir devta, kshatriy... to ab baap samjhaate hain meethe-meethe bachchon - bahut thodi baat hai, baap ki yaad mein raho। yeh bhi to buddhi mein hai - baba hamko 84 janmon ka raaz bata rahe hain। 84 laakh athva 84 janmon ka hisaab to chaahiye na। koi ko pata nahin। 84 laakh ka to hisaab koi bata na sake। manushya 84 janmon ka chakra lagaate hain। aatmaayen oopar se aati hain part bajaane ke liye। satayug se lekar kaliyug ant tak aati hi rehti hain। har ek apna-apna part bajaate rehte hain। in baaton ko manushya maatra nahin jaante। ek baap hi jaan sakte hain। manushya ko kabhi parampita, god father nahin kaha jaata। god father kahne se phir niraakaar shiv taraph buddhi jaati hai। jeev aatma ka baap to hoga na। aatma ek shareer chhod doosra leti hai। niraakaar baap ka naam shiv hai। tumhaara bhi ek hi naam hai, aatma। phir shareer mein bhinna-bhinna naam padte hain। parampita paramatma bhi shareer mein aakar gyaan sunaate hain। shareer bigar thode hi sunaayenge। to baap samjhaate hain ki inka to apna naam hai, mera shareer ka koi naam nahin hai, na main punarjanma mein aata hoon। main inmen pravesh karta hoon, inko bhi maaloom nahin padta hai। koi tithi taareekh nahin। haan main kalpa ke ant arthaat raat mein aata hoon। abhi raat hai na। yeh hai hi patiton ki duniya। main aata hoon paavan duniya arthaat din banaane। yeh bhi nahin jaante ki baba ne kab pravesh kiya। haan vinaash saakshaatkaar kiya। bahut dhyaan mein jaate the, woh koi tithi taareekh vela nahin nikaal sakte। shreekrishna ko bhi poojte hain, unka raatri ko janma dikhaate hain। kis samay, kitne minute aadi saara nikaalte hain। baap kehte hain - main to hoon hi niraakaar। jaise aur manushya janma lete hain vaise mera janma thode hi hota hai। mera to divya alaukik janma hai। main inmen pravesh karta hoon phir chala jaata hoon। bail par saara din savaari thode hi karte hain। mujhe jis samay bachche yaad karte hain, main haazir hoon। baap aakar bachchon se milte hain, good morning karte hain। jaise manushya ek do mein milte hain, raam-raam va namaste kehte hain। yeh to roohaani behad ka baap samjhaate hain। main tum sab bachchon ka baap hoon। to shivbaaba ki santaan tum sab aatmaayen bhaai-bhaai ho। yeh khushi ka paara chadhna chaahiye। behad ka baap aaya hua hai, hamko behad ka varsa de raha hai। bachchon ko dekh baap ko bhi khushi hoti hai, dher bachche hain। bachche jaante hain hamko baba svarga ka maalik bana rahe hain, raajaai dete hain। praja bhi to kahegi - hamaara raajya hai। jaise bhaaratvaasi kehte hain yeh hamaara bhaarat desh hai। raaja praja donon kehte hain hamaara desh hai। tum bachche narkavaasi ho phir svargavaasi banenge। baap ko aur varse ko yaad karna hai aur koi takleeph baba nahin dete hain। rehna bhi hai grihastha vyavhaar mein। yahaan aakar thode hi rehna hai। sab yahaan bhaagkar aayen to itne sabko baba kahaan rakh sakte hain। itne sab dher bachche ek hi baar kaise ikatthe ho sakte hain। sab centres ke bachche ek hi baar ikatthe mil kaise sakte hain। kahaan thahar sakenge। mushkil hai na। din-pratidin bachche vriddhi ko paate rehte hain, iski bhi kuchh yukti rachni pade। yeh sab aas-paas vaale makaan lene padenge। makaan vaalon se poochhenge, kitna maangate hain। samay par to lena padega na। paise ki to koi baat nahin। samay bada naazuk hota jaata hai। baap aur bachche donon avinaashi hain। avinaashi khajaana bachchon ko dete hain। bahut dher bachchon ko aana hoga। baba vichaar karte hain itne dher kahaan aakar rahenge। baba kehte hain tum phikar kyon karte ho - “wait and si''। tum padhte raho, manamnaabhav।

tum bachchon ko yeh khyaal mein rakhna hai ki abhi hamko karmaateet avastha mein jaana hai, satopradhaan banna hai। yaad se hi paavan banenge। baba baat to bahut sahaj bataate hain। ati sahaj hai sirf baba ko yaad karna hai। dekho gaay ke bachche ko jab maa yaad aati hai to chillaata hai na। woh to hai jaanvar। tum bachchon ne bhi radiyaan maari na। aage chal bahut chillaayenge, bahut yaad karenge। tum bachche to ab jaante ho ki baba aaya hua hai, vinaash to hona hi hai। natural calamities aani hai। sab aapas mein ladte-jhagadte rehte hain। kitna kharcha kar bombs banaate hain, bahut paisa jaata hai। kharcha to hota hai na। itna kharcha kahaan se laayen। darte bhi hain - maut se। phir bhi bombs banaana to banda nahin karte। bombs ki ladaai chalegi। abhi banaate hi aise hain - jo bam gire aur manushya mar jaayen। cheez banaane mein pahle time lagta hai phir to minatmotar। jaldi-jaldi banaate jaate hain। bombs bhi koi thode banenge kya? tum bachche jaante ho is puraani srishti ka vinaash hona hai। ab behad ke baap se varsa lena hai।

geeta hai tum bhaaratvaasiyon ka, devi-devta dharma ka shaastra। baaki to chhote-chhote hain, unka koi gaayan nahin। brahman dharma hai sabse oonch। braahmanon ka kaam hai katha sunaana। tum kah sakte ho ham brahmaakumaar kumaariyaan hain brahma ke bachche, hamko daade ka varsa mil raha hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) drama ke har raaz ko jaante hue kisi bhi baat ki phikar nahin karni hai। padhaai padhte rehna hai। manamnaabhav hokar karmaateet banne ka khyaal rakhna hai। svayan ko satopradhaan banaana hai।

2) ham aatmaayen shivbaaba ki santaan aapas mein bhaai-bhaai hain। shivbaaba se varsa le rahe hain। is khushi mein rehna hai।

vardaan:- antar swaroop mein sthit rah apne va baap ke gupta roop ko pratyaksha karne vaale sachche snehi bhav

jo bachche sada antar ki sthiti mein athva antar swaroop mein sthit rah antarmukhi rehte hain, ve kabhi kisi baat mein lipta nahin ho sakte। puraani duniya, sambandh, sampatti, padaartha jo alpakaal aur dikhaava maatra hain unse dhokha nahin kha sakte। antar swaroop ki sthiti mein rahne se svayan ka shakti swaroop jo gupta hai woh pratyaksha ho jaata hai aur isi swaroop se baap ki pratyakshata hoti hai। to aisa shreshtha kartavya karne vaale hi sachche snehi hain।

slogan:- nishchay aur janma siddha adhikaar ki shaan mein raho to pareshaan nahin honge।

ye avyakt ishaare - sada harshit rahne ke liye apni nature ko saral banaao, sahansheel bano।

svachchhata bhi saralta ki nishaani hai। jitni saralta utna svachchhata hogi isliye sabhi ko apni taraph aakarshit karenge। sachchaai aur saphaai bhi tab hogi jab apne svabhaav ko saral banaayenge। saral svabhaav vaala bahuroopi bhi ban sakta hai। aise saral svabhaavi sada harshit rehte aur sarva ko aakarshit karte hain।