Daily Murli for Saturday 4 July 2026

04-07-2026 praatahmurli om shanti "baapdaada"' madhuban

“meethe bachche - gyaan saagar baap tumhein gyaan ka teesra netra dene aaye hain, jisse aatma ki jyoti jag jaati hai''

prashn:- baap ko karnakraavanhaar kyon kaha gaya hai? woh kya karte aur kya karaate hain?

uttar:- baba kehte - main tum bachchon ko murli sunaane ka kaarya karta hoon। murli sunaata, mantra deta, tumhein laayak banaata aur phir tumhaare dvaara svarga ka udghaatan karaata hoon। tum paigambar ban sabko paigaam dete ho। main tum bachchon ko direction deta, yahi meri kripa va aasheervaad hai।

geet:- kaun aaj aaya savere-savere…

om shanti। bachchon ne geet suna। ham bachchon ko savere-savere jagaane kaun aaya hai - jo hamaara teesra gyaan ka netra ekdam khul gaya? gyaan saagar, parampita paramatma dvaara hamaara teesra netra gyaan ka khula hai। kehte bhi hain baap jyoti jagaane vaala hai। parantu woh baap hai - yeh koi nahin jaante hain। brahm-samaaji kehte hain woh shama hai, jyoti hai। mandir mein hamesha woh jyoti hi jagaate hain kyonki woh paramatma ko jyoti swaroop maante hain, isliye vahaan mandir mein deeva jagaate hi rehte hain। ab yeh baap koi maachis se deeva nahin jagaate hain। yeh to baat hi nyaari hai। gaaya bhi jaata hai - eeshvar ki gati mat nyaari hai। tum bachche ab samajhte ho baap sadgati ke liye aakar gyaan-yog sikhlaate hain। sikhlaane vaala to zaroor chaahiye na। shareer to nahin sikhlaayega। aatma hi sab kuchh karti hai। aatma mein hi achhe bure sanskaar rehte hain। is samay raavan ki praveshta ke kaaran manushyon ke sanskaar bhi bure hain arthaat 5 vikaaron ki praveshta hai। devtaaon mein yeh 5 vikaar hote nahin। bhaarat mein jab daivi svaraajya tha to yeh bure sanskaar nahin the। sarvagun sampanna the, kitne achhe sanskaar the devi-devtaaon ke, jo abhi tum dhaaran kar rahe ho। baap hi aakar second mein sarva ko sadgati dete hain। baaki guru gosaai aadi yeh to bhakti maarga mein chalte aaye hain, jo ek ki bhi gati sadgati nahin kar sakte। baap ke aane se hi sarva ki sadgati hoti hai। parampita paramatma ko bulaate hi isliye hain ki aakar patit duniya ka vinaash kar paavan duniya ka udghaatan karo va darvaaza kholo। baap aakar get khulvaate hain - shiv shakti maataaon dvaara। vande maatram gaai hui hain। is samay ki koi bhi maata ki vandana nahin ki jaati kyonki koi bhi shreshthaachaari maata nahin hai। shreshthaachaari unko kaha jaata hai jo yogbal se paida ho। lakshmi-naaraayan ko shreshthaachaari kaha jaata hai। bhaarat mein devi-devta jab the to bhaarat shreshthaachaari tha। in baaton ko manushya to jaante hi nahin। woh apne hi plan bana rahe hain। gaandhi bhi raamraajya chaahte the, isse siddha hai ki raavan raajya hai। bhaarat patit hai। parantu raamraajya sthaapan karne ke liye to behad ka baapu ji chaahiye, jo raamraajya ki sthaapna aur raavan raajya ka vinaash kare। bachche jaante hain - raavan raajya ko ab aag lagni hai। sabhi aatmaayen agyaan andhere mein soye hue hain। tum jaante ho ham bhi soye hue the, baap ne aakar jagaaya hai। bhakti ki raat poori hui, din shuru hota hai। raat poori ho ab din ho raha hai। baap sangam par aaya hua hai। bachchon ko divya drishti aur gyaan ka teesra netra dete hain, jisse tum saare vishwa ko jaan chuke ho। tumhaari buddhi mein baitha hua hai ki yeh bana banaaya avinaashi drama hai, jo phirta hi rehta hai। abhi tum kitna jaag gaye ho, saari duniya soi hui hai।

abhi tum bachchon ko saare vishwa ke aadi-madhya-ant, mool vatan, sookshm vatan, sthoolavtan ka pata hai। baaki saari duniya kumbhakran ki agyaan neend mein soi hui hai। yeh kisko pata nahin ki patit-paavan kaun hai। pukaarte hain he patit-paavan aao। yeh nahin kehte ki aakar srishti ke aadi-madhya-ant ka raaz samjhaao। baap kehte hain - tum is srishti chakra ko samajhne se hi chakravarti raaja bante ho। yaad se hi paavan bante ho। yeh bhi jaante ho vinaash saamne khada hai, ladaai bhi honi hai। baaki kaurvon, paandavon ki ladaai nahin hui। paandav kaun the! yeh bhi kisko pata nahin। sena aadi ki koi baat hi nahin। tumhaari taraph hai saakshaat paarlaukik parampita। us baap se hi varsa milta hai। tum jaan gaye ho shreekrishna ki aatma 84 janma bhog ab phir baap se varsa le rahi hai। world ki history-geography repeat hoti hai। ab tum bachchon ko vinaash ke pahle satopradhaan zaroor banna hai। grihastha vyavhaar mein rehte kamal phool samaan pavitra rehna hai। gaaya bhi hua hai bhagvaanuvaach, grihastha vyavhaar mein rehte yeh ek janma pavitra bano। past is past। yeh to drama mein noondh hai। srishti ko satopradhaan banna hi hai, yeh drama ki bhaavi hai। eeshvar ki bhaavi nahin, drama ki bhaavi aisi bani hui hai। so baap baith samjhaate hain। aadhaakalpa jab poora hota hai tab baap aate hain। baap kehte hain - jab raat poori ho din shuru hota hai tab hi main aata hoon। shivraatri bhi kehte hain na। shiv ke pujaari shivraatri ko maante hain। government ne to holiday bhi banda kar diya hai। nahin to kam se kam ek maas holiday chalni chaahiye। koi ko bhi pata nahin - shivbaaba sarva ki sadgati karne vaala hai। vahi sarva ka duhkh harta sukh karta hai। unki jayanti to bade dhoomdhaam se ek maas sab dharma vaalon ko manaani chaahiye। khaas bhaarat ko baap direct aakar sadgati dete hain। jab bhaarat svarga tha to devi-devtaaon ka raajya tha, us samay aur koi dharma hi nahin the, devtaayen vishwa ke maalik the। koi partition aadi nahin the isliye kaha jaata hai atal, akhanda, sukh-shanti, sampatti ka daivi raajya phir se ham praapta kar rahe hain। behad ke baap se behad ka varsa 5 hajaar varsha pahle bhi mila tha। sooryavanshi chandravanshi raajya mein koi duhkh ka naam nahin tha। gaaya bhi jaata hai - raam raaja, raam praja, raam... vahaan adharma ki koi baat nahin।

baba ne tumhein brahma aur vishnu ke baare mein bhi samjhaaya hai ki in donon ka aapas mein kya sambandh hai। brahma ki naabhi se vishnu nikla... yeh kaisa wonderful chitra banaaya hai। baap samjhaate hain - yeh lakshmi-naaraayan hi ant mein aakar brahma sarasvati, jagat-amba, jagat-pita bante hain, jo donon phir vishnu arthaat lakshmi-naaraayan bante hain। baap baith samjhaate hain jo bhi chitra dekhte ho - inmen koi bhi yathaartha nahin hai। shiv ka bada chitra banaate hain, woh bhi aythaartha hai। bhakti ke kaaran bada banaaya hai। nahin to bindi ki pooja kaise ho sakti। achha phir brahma, vishnu, shankar ke liye bhi samajh nahin sakte। trimoorti brahma kah dete hain। brahma dvaara sthaapna, vishnu dvaara paalna... yeh bhi kehte hain parantu brahma to sthaapna karte nahin hain। svarga ki sthaapna brahma karenge? nahin। svarga ki sthaapna to parampita paramatma hi karte hain। yeh aatma to patit hai, inko vyakta brahma kaha jaata hai। yahi aatma paavan ban jaayegi aur chali jaayegi। phir satayug mein jaakar naaraayan bante hain। to prajaapita brahma zaroor yahaan chaahiye na। chitra phir vahaan de diye hain। jaise yeh gyaan ke alankaar vaastav mein hain tumhaare parantu vishnu ko de diye hain। naudha bhakti mein bhi saakshaatkaar hota hai। meera ka bhi naam gaaya hua hai na। purushon mein number one bhakta hai naarad। maataaon mein meera gaai hui hai। tum abhi naaraayan athva lakshmi ko varne ke liye yeh gyaan sun rahe ho। tumhaara hi svayanvar hota hai। naarad ke liye bhi dikhaate hain - sabha mein aakar kaha ham lakshmi ko var sakte hain! abhi lakshmi ko varne laayak tum ban rahe ho। baaki woh to sab hain bhakti maarga ki kathaayen। baap real baat baith samjhaate hain। lakshmi satayug mein, naarad bhagat dvaapar mein। satayug mein phir naarad kahaan se aaya। raadhe-krishna ka hi svayanvar ke baad naam lakshmi-naaraayan padta hai। yeh bhi bhaaratvaasi nahin jaante hain। kitna agyaan andhiyaara hai। baap hai kalyaankaari। tumko bhi kalyaankaari banaate hain। ab vichaar saagar manthan karna chaahiye auron ko bhi kaise samjhaayen। to baap samjhaate hain ki chitra aadi kaise baith banaaye hain। gaandhi ki naabhi se nehru nikla, ab kahaan woh vishnu devta, kahaan yeh manushya... in sab baaton ko tum bachche ab samajhte ho। nambarvaar tumko khushi rehti hai। behad ka baap hamko padha rahe hain। yeh to kabhi suna nahin tha kyonki geeta mein to shreekrishna bhagvaanuvaach likh diya hai। bhagwan kab aaya, kab aakar geeta sunaai! tithi taareekh kuchh hai nahin। kalpa ki aayu hi laakhon varsha kah dete hain। koi ki bhi buddhi mein aata nahin hai। ab baap baith bachchon ko samjhaate hain। braahmanon ka jhaad vriddhi ko paata rehta hai। paate-paate anginat ho jaayenge। tum bachche jaante ho varna kaise pa lagaate hain। ham braahmanon ka varna sabse oonch hai। ham hain bhaarat ke gupta sachche roohaani social worker। parampita paramatma ham se seva kara rahe hain। ham roohaani seva karte hain, woh jismaani seva karte hain। tumko kehte hain tum bhaarat ki kya seva karte ho? bolo ham hain roohaani sevaadhaari। svarga ka udghaatan kara rahe hain, sthaapna kara rahe hain। shivbaaba hai karnakraavanhaar, jo kara rahe hain। woh karta bhi hai। murli kaun chalaata hai? to karma karta hai! tumko bhi sikhlaate hain ki aise chalaao। mahaamantra dete hain manamnaabhav। karma sikhlaaya na। phir tumko kehte hain auron ko sikhlaao, isliye karnakraavanhaar kaha jaata hai। tum bachche bhi yahi shiksha dete ho। baap ko yaad karo aur varse ko yaad karo। yahi tum bachchon ko paigaam pahunchaana hai। aise nahin doosre ko paigaam de aur khud yaad mein na rahe phir kya hoga। doosre purushaartha kar oonch chadh jaayenge, message dene vaale rah jaayenge। yaad ka purushaartha na karne se itna oonch pad nahin paate hain। doosre yaad ki yaatra se paavan ban jaate hain। jaise baba baandheliyon ka misaal dete hain। woh yaad mein jaasti rehti hain, bigar dekhe bhi patra likhti hain। baba ham aapke ho chuke hain, ham pavitra zaroor rahenge। tum bachchon ki hai baap se preet buddhi। tumhaari hi maala bani hui hai। vishnu ki maala aur rudraaksha ki maala mein oopar hai meru। maala uthaate hi pahle phool aur do daane haath mein aate hain, unko namaskaar karte hain। phir hai maala। tum bhaarat ko svarga bana rahe ho to yeh maala tumhaara hi yaadgaar hai। baap ne yeh geeta gyaan yagya racha hai, inmen saari puraani duniya svaaha hogi। baap hai most beloved father। tumko bhavishya ke liye sada sukh ka varsa dete hain - 21 janma ke liye। jinhonne kalpa pahle varsa liya hai woh zaroor aayenge, drama plan anusaar। baap kehte hain bachche sukhdhaam chalna hai to pavitra banna hai। mere ko yaad karo, maangana kuchh bhi nahin hai ki kripa karo va madad karo। nahin। ham to sabko madad karte hain। purushaartha to tumko karna hai। aasheervaad ki baat nahin। baap kehte hain maamekam yaad karo। yaad karna tumhaara kaam hai। direction dena - yahi kripa hai। baaki to bhal khaao, piyo, ghoomo, phiro... tumhein pavitra bhojan hi khaana hai। ham devi-devta bante hain, vahaan pyaaj aadi thode hi hoga। yeh sab yahaan chhodna hai। yeh cheejen vahaan hoti nahin। beej hi nahin hai। jaise satayug mein beemaari aadi hoti nahin। abhi dekho kitni beemaariyaan nikli hain। vahaan tamoguni koi cheez hoti nahin। har cheez satopradhaan। yahaan dekho manushya kya-kya khaate hain। ab baap bachchon ko kehte hain - mujhe yaad karo aur sang tod mujh sang jodo to tum paavan ban jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) past is past, jo beeta use bhoolkar, grihastha vyavhaar mein rehte satopradhaan banne ka purushaartha karna hai। vinaash ke pahle paavan zaroor banna hai।

2) bhaarat ko svarga banaane ki sachchi-sachchi seva mein tatpar rehna hai। khaan-paan bahut shuddh rakhna hai। pavitra bhojan hi khaana hai।

vardaan:- sthool kaarya karte bhi mansa dvaara vishwa parivartan ki seva karne vaali jimmevaar aatma bhav

koi bhi sthool kaarya karte sada yeh smriti rahe ki main vishwa ki stage par vishwa kalyaan ki seva arth nimitta hoon। mujhe apni shreshtha mansa dvaara vishwa parivartan ke kaarya ki bahut badi jimmevaari mili hui hai। is smriti se albelaapan samaapta ho jaayega aur samay bhi vyartha jaane se bach jaayega। ek-ek second amoolya samajhte hue vishwa kalyaan ke va jad-chaitanya ko parivartan karne ke kaarya mein saphal karte rahenge।

slogan:- abhi yoddha banne ke bajaae nirantar yogi bano।

ye avyakt ishaare - jvaalaasvaroop sthiti mein rah shaktishaali yaad ka anubhav karo

jaise duhkhi aatmaon ke man mein yeh aavaaj shuroohua hai ki ab vinaash ho, vaise hi aap vishwa-kalyaankaari aatmaon ke man mein yeh sankalp utpanna ho ki ab jaldi hi sarva ka kalyaan ho tab hi samaapti hogi। vinaashkaariyon ko kalyaankaari aatmaon ke sankalp ka ishaara chaahiye isliye apne ever ready banne ke powerful sankalp se jvaala roop yog dvaara vinaash jvaala ko tej karo।