Daily Murli for Tuesday 7 July 2026

07-07-2026 praatahmurli om shanti "baapdaada"' madhuban

“meethe bachche - tumhein nasha hona chaahiye ki hamaara baba aaya hai, humein vishwa ka maalik banaane, ham unke sammukh baithe hain''

prashn:- karmon ki guhya gati ko jaanne vaale kaun sa purushaartha avashya karenge?

uttar:- yaad mein rahne ka kyonki unhein pata hai ki yaad se hi puraane hisaab-kitaab chuktu hone hain। ve jaante hain ki aatma agar puraane hisaab-kitaab, karmabhog chuktu nahin karegi to use sajaayen khaani padengi aur pad bhi bhrashta ho jaayega। punarjanma bhi aisa hi hoga।

om shanti। bachchon ko apaar khushi ka paara chadhta hai jab dekhte ho baapdaada sammukh aaye hain aur yeh bhi bachche jaante hain ki 5 hajaar varsha baad phir se shivbaaba brahma tan mein aaya hua hai। kya karne? bachchon ko yeh nasha chadha hua hai। sab bachche jaante hain ki svarga ka maalik banaane baap aaya hua hai। hamko laayak bana rahe hain। hamko tamopradhaan se satopradhaan banne ki yuktiyaan baar-baar bata rahe hain। yukti hai bahut sahaj। bilkul sahaj yaad bachchon ko sikhlaate hain। agyaan kaal mein baap ko bachcha hota hai to samajhte hain hamaara vaaris paida hua। tum jaante ho is samay baap aakar ham bachchon ko adopt karte hain। yoon to tum sab shivbaaba ke bachche ho। parantu baba apna kaise banaayen, jo hamko suna sake aur ham unse sun saken। shivbaaba is brahma tan se kehte hain main tumhaara baap hoon। tumko svarga ka maalik banaata hoon। sirf tumhaari aatma jo patit hai woh na mukti mein, na jeevanmukti dhaam mein ja sakti hai। tum sab ek baap ke bachche ho। sabko baap ki milkiyat leni hai। dher ke dher bachche hain, vriddhi hoti jaati hai। adopt karte jaate hain। he aatmaayen ab tum meri santaan ho। apne ko rooh aatma samjho, hamko baba mila hai, jisko aadhaakalpa yaad karte the। yeh kabhi bhoolo mat। aadhaakalpa aatma is shareer dvaara yaad karti aai hai - he patit-paavan, he duhkh harta sukh karta kyonki raavan raajya hai na। bhal jo abhi samajhte hain ham bahut sukhi hain, hamko itne padam hain, itne mills hain, kaarkhaane aadi hain, yeh to sab alpakaal ke liye hain। ant mein to bahut traahi-traahi karne lag padenge। duhkh ke pahaad girenge। itni saari milkiyat second mein khalaas ho jaayegi। baap se tumko second mein varsa milta hai। kehte hain tumko second mein svarga ki baadshaahi deta hoon। yeh puraani duniya khatma ho jaayegi। ladaaeeyaan lagengi, natural calamities hogi। saphaai to chaahiye na। tumhaari aatma bhi ab pavitra ban rahi hai।

baapdaada donon samajh sakte hain, bachche kitni mehnat karte hain। baap se varsa paane ki mehnat bilkul thodi dete hain। apne ko aatma samajh baap ko yaad karo। woh roohaani baap hai niraakaar, ham aatmaayen unko bulaate hain na। baap kehte hain tumhaari aatma jo patit hai woh paavan kaise banen। patit-paavan to ek baap hai na। paani ki nadi patit-paavni hai to jhat se jaae gota khaakar chale aana chaahiye। ganga snaan bahut karte hain phir bhi patit kyon? raat-din yahi dhun lagaate rehte hain - patit-paavan seetaaraam arthaat sab jo bhaktiyaan hain athva seetaayen hain, sabka rakshak ek raam parampita paramatma hai। patit-paavan, patiyon ka pati vahi hai। woh jab aaye tab aakar paavan banaaye। to ab baap kehte hain meri shreemat par tumko chalna hai aur kiski mat par na chalo। woh to samajhte hain bhakti se bhagwan milega, jabki bhakti se bhagwan milega to aise kyon kehte ki bhakton ki raksha karne aayega। bhakton par kya aapda padi hai jo raksha karega? raksha tab ki jaati hai jab kuchh aapda hoti hai। baap kehte hain tumne kitna durgati ko paaya hai। yeh hai raurav narka, sab duhkhi rogi hain। ghar-ghar mein dekho kya laga pada hai। duhkh hi duhkh, isliye pukaarte hain baba hamaare duhkh haro, sukh do। bhaarat mein hi sada sukh tha, ab duhkh hai। bhaarat ki baat hai aur khanda to hain hi alag। woh to aate hi baad mein hain। koi 60 janma, koi inse bhi kam janma lete hain। 84 janma devta dharma vaale lete hain। to is hisaab se aadhaakalpa ke baad jo aayenge unko 84 se aadhe janma lene padenge। aise nahin ki sab 84 ka chakra khaate hain। manushyon ko to jo aata hai so bol dete hain। ab tum bachche baap dvaara avinaashi gyaan ratnon ki jholi bhar rahe ho। ratna to bahut valuable hain। baap samjhaate bhi bahut sahaj hai। baap kehte hain tum bulaate aaye ho he patit-paavan aakar humein paavan banaao to baap aaye hain। ab tum samajhte ho ham paavan banenge to svarga ke maalik banenge। shivbaaba hamko pattharbuddhi se paarasbuddhi, pattharnaath se paarasnaath banaane aaye hain। bhakti maarga ke chitra sab pattharon ke bane hue hain। pattharon se maatha maarte hain। baap kehte hain - tum bhal kitni bhi mehnat karo, phaayda kuchh nahin hona hai। aage to tum bali chadhte the। phir bhi kya phaayda hua? karke devi ka deedaar hoga phir jaise ke taise। patit-paavan baap aate hain - ek baar sangam par। satayug mein to bhakti maarga ki baaten hoti hi nahin। baap to kehte nahin ki gala kaato। yeh karo। bhakti maarga mein anek prakaar se kya-kya karte hain। aage deviyon par manushya ki bali chadhaate the। baap kehte hain tum sudhrele the to devta the। ab kitne pattharbuddhi ban pade ho। tumko svarga ki baadshaahi di thi। kitne sone, heere-javaahron ke mahal the, athaah dhan tha। woh kya kiya? ab tum kitne duhkhi ho pade ho। tum asul devi-devta dharma ke the na। ab sirf tum rajo tamo mein aaye ho। tum to devta dharma ke the phir apne ko hindu kyon kahlaate? aur sab dharma vaale apne-apne dharma ko hi maante hain। dharma to ek hi hota hai na। musalmaanon ka muslim dharma, Christian ka Christian dharma chala aata hai। tumko kya hua? tum bahut sukhi, pavitra, sampoorn nirvikaari the। abhi kitne vikaari ban pade ho। kisko pata hi nahin - barobar ham sampoorn nirvikaari the phir sampoorn vikaari kaise banen? 84 janma lete sato se tamo banen, ab bilkul hi tamopradhaan patit hain। satayug se kaliyug zaroor aana hai। sab dharmon ko sato-rajo-tamo mein aana hi hai। vriddhi ko paana hai। tum bhi jhaad mein ho na। jhaad mein dekho - ant mein brahma khada hai, jhaad ke oopar choti mein brahma hi 84 janma le jaakar ant mein khada hai। tum bhi jo neeche brahman baithe ho vahi phir ant mein patit shoodra bane ho। phir neeche raajayog seekh rahe ho। tum bhi shoodra the, ab brahman bane ho। yeh badi samajhne ki baaten hain। abhi jhaad mein bahut achhi samjhaani hai। abhi tum raajayog ki tapasya kar rahe ho, tumhaara hi yaadgaar khada hai। yeh chaitanya delvaada mandir, woh jad। satayug mein yeh nahin tha। is samay tum apna yaadgaar dekhte ho। tum practical mein sachche-sachche delvaada mandir mein chaitanya mein baithe ho। svarga ki sthaapna ho rahi hai। phir svarga mein aayenge to yeh mandir aadi kuchh honge nahin। yeh mama baba aur ham bachche baithe hain। hoobhu yeh tumhaara mandir hai। naam hi rakha hai madhuban, chaitanya delvaada mandir। phir jab bhakti maarga shuru hoga to phir yeh mandir banaayenge। baap ne tumko bahut dhanvaan banaaya tha to tum hi phir unka mandir banaate ho। shiv ka mandir ek nahin banaate hain, sab banaate hain, yatha yogya yatha shakti।

tum jaante ho ham poojya the phir dvaapar mein pujaari bane hain। shivbaaba jo itna saahookaar banaate hain, bhakti mein phir tum hi unka mandir banaayenge। in baaton ko abhi tum hi jaante ho। to ab purushaartha kar phir raajaaon ka raaja banna chaahiye। satayug mein kaha jaata hai mahaaraajaayen। treta mein kaha jaata hai raaja। phir duniya patit banti hai to mahaaraajaayen bhi patit, raajaayen bhi patit hote hain। woh nirvikaari, mahaaraajaaon ka mandir banaakar poojte hain। pahle-pahle shiv ka mandir banaate hain phir devtaaon ka banaate, khud hi mandir banaakar poojte hain, 84 janma to bhogte hain na। aadhaakalpa tum poojya phir aadhaakalpa pujaari bante ho। manushya phir samajhte hain bhagwan aapehi poojya aapehi pujaari hai। sab kuchh aapehi dete hain, aapehi chheen lete hain। achha jabki usne diya aur liya phir tumko kyon chinta lagti hai। tum to trustee ho gaye। phir rone ki kya darkaar hai! baap baith aatmaon ko samjhaate hain। ab tum aatma-abhimaani bante ho, nambarvaar। koi to bilkul baap ko yaad karte hi nahin hai। dehi-abhimaani rehte hi nahin hain। yahaan kitna samjhaaya jaata hai - are tum aatma ho, paramatma tumko padhaate hain। aatma mein hi sanskaar rehte hain। aatma hi barrister aadi banti hai, aatma maijistret banti hai। kal kya banenge? agar aatma baap ko achhi reeti yaad karti rahegi to phir amarlok mein jaakar janma legi। mrityulok mein phir doosra janma nahin lenge। agar kuchh hisaab-kitaab raha hua hoga to saza khaani padegi। karmabhog, bhog kar chuktu karna hoga phir pad oonch nahin milega। yeh karmon ki guhya gati baap bachchon ko hi baith samjhaate hain। yeh bhi bachche jaante hain - satayug hai satopradhaan। har cheez vahaan satopradhaan hoti hai। kehte hain krishna gau sambhaalte the। raajaayen gau sambhaalte hain kya? aisi baat to ho nahin sakti hai। yeh dikhaate hain - satayug mein gaooyen bhi badi first class hoti hain, unko kaamdhenu kaha jaata hai। jagat amba sarasvati bhi kaamdhenu hai। 21 janma liye sabki manokaamnaayen poori karti hai। tum bhi kaamdhenu ho। vahi naam phir gau par rakh diya hai, jo bahut doodh deti hai। raajaaon ke ghar mein badi first class gaayen hoti hain। jabki yahaan bhi raajaaon ke paas aisi achhi-achhi hain to svarga mein kaisi sundar hongi! vahaan koi baans (badbu) aadi bilkul nahin hoti hai।

ab baap bachchon ko kehte hain ki main aaya hoon tumko gul-gul banaakar saath le jaaoonga। mujhe bulaate hi hain he patit-paavan aao। patit duniya, patit shareer mein aao। yeh hai patit, woh hai paavan pharishta। bhent dikhlaate hain। tum bhi patit se aisa paavan pharishta banenge। satayugi devtaaon ko deity kehte hain। sookshmavtanvaasi hain pharishte। ab tum pharishte pavitra bante ho। baap kitni sahaj shiksha dete hain। yahaan jab aate hain to koi bhi baahar vaale mitra sambandhi, gharghaat dhandhaadhori aadi yaad nahin karna hai। baap ke sammukh aaye ho na। yahaan aaye hi ho - yog ki kamaai karne to ismen lag jaana chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sajaaon se mukta hone ke liye puraane sab hisaab-kitaab yogbal se chuktu karne hain। trustee hokar sab kuchh sambhaalna hai। kisi bhi baat ki chinta nahin karni hai। aatma-abhimaani banna hai।

2) yeh kamaai ka samay hai, ismen gharghaat, dhandhaadhori aadi yaad nahin karna hai। pharishta banne ke liye ek baap ki yaad mein rahne ka poora-poora purushaartha karna hai।

vardaan:- yaad ki searchlight dvaara vaayumandal banaane vaale vijayi ratna bhav

serviceable aatmaon ke mastak par vijay ka tilak laga hua hai hi lekin jis sthaan ki service karni hai, us sthaan par pahle se hi search light ki roshni daalni chaahiye। yaad ki searchlight se aisa vaayumandal ban jaayega jo anek aatmaayen sahaj sameep aa jaayengi। phir kam samay mein saphalta hajaar guna hogeeiske liye dridh sankalp karo ki ham vijayi ratna hain to har karma mein vijay samaai hui hai।

slogan:- jo seva svayan ko va doosre ko disturb kare vo seva, seva nahin bojh hai।

ye avyakt ishaare - jvaalaasvaroop sthiti mein rah shaktishaali yaad ka anubhav karo

jvaala-roop banne ke liye yahi dhun sada rahe ki ab vaapis ghar jaana hai। jaana hai arthaat upraam। jab apne niraakaari ghar jaana hai to vaisa apna vesh banaana hai। to jaana hai aur sabko vaapas le jaana hai - is smriti se svatah hi sarva-sambandh, sarva prakriti ki aakarshan se upraam arthaat saakshi ban jaayenge। saakshi banne se sahaj hi baap ke saathi va baap-samaan ban jaayenge।