Daily Murli for Wednesday 8 July 2026

08-07-2026 praatahmurli om shanti "baapdaada"' madhuban

“meethe bachche - is sabha mein baaharmukhi bankar nahin baithna hai, baap ki yaad mein rehna hai, mitra sambandhi athva dhandhe aadi ko yaad karne se vaayumandal mein vighna padta hai''

prashn:- tum bachchon ke roohaani drill ki visheshta kya hai, jise manushya nahin kar sakte?

uttar:- tumhaari roohaani drill buddhi ki hai, uski visheshta yahi hai jo tum aashik ban apne maashuk ko yaad karte ho। iska hi ishaara geeta mein bhi aaya hai - manamnaabhav। parantu manushya apne maashuk paramatma ko jaante hi nahin to drill kaise kar sakenge। ve to ek do ko jismaani drill sikhlaate hain।

om shanti। bachche bhi samajhte hain, baap bhi samajhte hain ki bachche (yog karaane vaale) yahaan kya kar rahe hain! yaad ke yaatra ki drill kara rahe hain। mukh se kuchh bhi kahne ka nahin hai। kiski yaad hai? parampita paramatma shivbaaba ki। unki yaad mein rahne se hamaare jo bhi vikarma hain, woh bhasma ho jaayenge aur vikarmaajeet ban jaayenge, jitna jo yaad ki drill mein rahenge। yeh aatma ki drill hai, shareer ki nahin। bhaarat mein jo bhi drill sikhaate hain, woh sab hain jismaani, yeh hai roohaani drill। is roohaani drill ko tum bachchon ke sivaae koi jaante hi nahin।

roohaani drill ka ishaara geeta mein hai zaroor। bhagvaanuvaach athva bhagwan ke bachchon ka bhi vaach hai। tum abhi bhagwan shivbaaba ke bachche bane ho na। bachchon ko pharmaan mila hai - maamekam yaad karo। baap bhi drill sikhlaate hain। bachche bhi yahi drill sikhlaate hain। kalpa pahle bhi baap ne yahi kaha tha ki mujh baap ko yaad karo। ismen ghadi-ghadi kahne ki darkaar nahin hai, parantu kehna padta hai। yahaan baithe koi apne mitra-sambandhiyon, dhandhe aadi ko yaad karte rehte hain to vaayumandal mein vighna daalte hain। baap kehte hain - jaise yahaan tum yaad mein baithe ho aise hi chalte phirte, karma karte hue yaad mein rehna hai। jaise aashik maashuk ek do ko yaad karte hain। unhon ki yaad hai jismaani। tumhaari hai roohaani yaad। aatmaayen bhakti maarga mein bhi aashik hoti hain parampita paramatma maashuk ki। parantu maashuk ko jaante nahin hain, na apni aatma ko jaante hain। maashuk baap aaya hua hai। bhakti maarga se lekar aatmaayen aashik bani hain। yeh hai hi aatmaon aur paramatma ki baat। baap bachchon ko sammukh kehte hain - tum aashik mujh maashuk ko yaad karte ho ki baba aao। hamko aakar duhkh se liberate karo aur apne saath shantidham mein le chalo। tum jaante ho ab is duhkhadhaam, mrityulok ka vinaash hona hai। amarlok jindaabaad, mrityulok murdaabaad। tum abhi brahman bachche bane ho, tumhaare mein bhi nambarvaar purushaartha anusaar hain। tum bachchon ko poora nishchay hona chaahiye ki ham ab narkavaasi se svargavaasi 21 janma liye bante hain। koi marta hai to kehte hain svargavaasi hua। parantu kitne samay ke liye svargavaasi hua… yeh koi bhi nahin jaante hain। ab tum purushaartha kar rahe ho - svargavaasi banne ke liye। yeh kaun nishchay karaate hain! woh hai geeta ka bhagwan। parantu woh to ek hi niraakaar hota hai। manushya samajhte hain - niraakaar to niraakaar hi hai। woh kaise yahaan aakar sikhaayenge? baap ko na jaanne ke kaaran drama anusaar shreekrishna ka naam bhool se daal diya hai। shreekrishna aur shiv ka sambandh is samay najdeek hai। shiv jayanti hoti hai sangam par। phir kal hogi shreekrishna jayanti। shiv jayanti hai raat mein, shreekrishna jayanti hai savere, usko prabhaat kahenge। jab shivraatri poori hoti hai tab phir shreekrishna jayanti hoti hai। yeh baaten bachche hi samajh sakte hain, kaayda hai - yahaan sabha mein koi baaharmukhi na ho। baap ki yaad mein rehna hai। manushya pukaarte bhi hain he patit-paavan aao, aakar paavan banaao। parantu drama anusaar pattharbuddhi kuchh bhi samajhte nahin। agar jaante hote to bataate। unko yeh bhi pata nahin hai ki abhi kaliyug ka ant hai phir jab baap aate hain tab aadi hoti hai। manushya to bilkul ghor andhiyaare mein hain। log samajhte hain kaliyug mein ajun 40 hajaar varsha pade hain। behad ka baap samjhaate hain had ka baap kab patit-paavan ho na saken। baapu naam to bahuton ke rakh diye hain। bujurga ko bhi baapu athva pitaaji kehte hain। yeh roohaani pitaashri to ek hi hai jo patit-paavan, gyaan ka saagar hai। bachchon ko paavan hone ke liye gyaan chaahiye। paani mein snaan karne se koi paavan thode hi banenge। tum jaante ho shivbaaba hamaare saamne is tan mein pratyaksha hai। brahma dvaara braahmanon ko raajayog sikha rahe hain। woh to kah dete hain bhagvaanuvaach arjun prati। braahmanon ka naam nishaan nahin hai। gaaya jaata hai brahma dvaara sthaapna, vishnu dvaara paalna। sthaapna to brahma dvaara hi karenge, na ki vishnu dvaara, na shankar dvaara। tum bachchon ko yeh samjhaani ab mili hai। baap ko yahaan aana padta hai, vaapis to koi bhi aatma ja nahin sakti। jo bhi aate hain unko sato rajo tamo se paas karna hi hai। shreekrishna bhi poore 84 janma lete hain aur poore 5 hajaar varsha part bajaaya। jab aatma pet mein hai to bhi janma to hai। shreekrishna ki aatma jab satayug mein aati hai, garbha mein pravesh kiya tab se lekar 5 hajaar varsha mein 84 janmon ka part bajaana hai। jaise shivjayanti manaate hain to ismen baitha hai na। shreekrishna ki aatma bhi garbha mein aai churpur hui, us samay se lekar 5 hajaar varsha ka hisaab shuru hota hai। agar kam jaasti ho to phir 5 hajaar varsha mein kam ho jaae। yeh badi sookshm samajhne ki baaten hain। bachche jaante hain shreekrishna ki aatma phir se yeh gyaan le rahi hai, phir se shreekrishna banne ke liye। tum bhi kansapuri se krishnapuri mein jaate ho। yeh baaten baap baith bachchon ko samjhaate hain।

baba kehte hain - maaya badi dushtar hai। achhe-achhe mahaarthiyon ko bhi hara deti hai। gyaan lete-lete kahaan grahchaari baith jaati hai। aashcharyavat hamaara bananti, kathanti... aho maaya phir bhi bhaaganti ho jaate hain। kamaai mein grahchaari baith jaati hai। raahu ka grahan sabko laga hua hai। abhi tumhaare par brahaspati ki dasha baithi hai phir chalte-chalte koi par raahu ka grahan baith jaata hai, tab kehte hain mahaan kambakhta is duniya mein dekhna ho to yahaan dekho। tumhaari aatma kehti hai - ham baap se sada sukh ka varsa le rahe hain। baba aap se kalpa pahle bhi yeh varsa liya tha। phir se ab baap ke paas aaye hain। baap ne samjhaaya hai - baahar tumhaare centres par bahut aayenge samajhne ke liye। yahaan yeh hai indra sabha। indra shivbaaba hai na, jo gyaan varsha barsaate hain। to aisi sabha mein patit koi aa nahin sakta। sabja pari, pukhraaj pari jo braahmaniyaan panda ban aati hain, unko kahenge apne saath koi bhi vikaar mein jaane vaale ko nahin la sakte ho। nahin to donon responsible ho jaate hain। kisi vikaari ko saath le aaye to un par bahut daag lag jaate hain। phir bahut bhaari saja mil jaati hai। pariyon ke oopar bahut responsibility hai। kehte hain - maanasrovar par snaan karne se pari ban jaate hain। vaastav mein yeh hai gyaan maanasrovar। baba manushya tan mein aakar gyaan varsha barsaate hain। gyaan saagar hai na। tum nadi bhi ho, sarovar bhi ho, gyaan saagar ismen baith bachchon ko laayak banaate hain - svarga mein jaane ke liye। svarga mein hai shri lakshmi-naaraayan ka raajya। yeh hai pravritti maarga ka em object। kehte hain ham donon gyaan chita par baith lakshmi-naaraayan banne vaale hain। oonch pad paana hai na। aadhaakalpa aatmaayen tadapti rehti hain। baba aao aakar hamko raajayog sikhlaae paavan banaao। baap ishaara dete hain। bhaaratvaasi jo devi-devtaaon ko maanne vaale hain unhonne zaroor 84 janma bhoge hain। jo devi-devtaaon ke bhagat hain, koshish kar unko samjhaao। baap kaise aakar 3 dharma sthaapan karte hain। brahman, sooryavanshi, chandravanshi, teenon dharma baap sthaapan karte hain। aadhaakalpa phir aur koi dharma sthaapan nahin hota hai। phir aadhaakalpa mein kitne math panth aadi dharma dher ke dher sthaapan hote hain। kahaan aadhaakalpa mein ek dharma so bhi sangamayug par bhavishya ke liye raajdhaani sthaapan karte hain। woh sab puraani duniya mein hi apna dharma sthaapan karte hain। yahaan baap aadhaakalpa ke liye ek dharma ki sthaapna karte hain। koi aur mein power nahin। baap tumko apna banaakar, sooryavanshi chandravanshi gharaana sthaapan kar baaki sabka vinaash kara dete hain। sabhi aatmaayen shanti mein chali jaati hain। tum sukh mein aate ho, us samay duhkh koi hai nahin, jo god ko yaad kare। yeh gyaan bhi tumhaari buddhi mein hai। tum jaante ho - baap jo gyaan ka saagar hai, woh knowledge de rahe hain। saagar to ek hi hai। tum apne ko saagar nahin kahlaayenge। tum unke madadgaar bante ho isliye tumhaara naam hai gyaan gangaayen। baaki woh hain paani ki nadiyaan। baap kehte hain - mujh saagar ke tum bachche kaam chita par baith jal mare ho arthaat patit ban pade ho। ab phir mujhe yaad karne se hi tum paavan banenge। yeh srishti ka chakra 5 hajaar varsha ka hai। yeh bhi kisko pata nahin hai। srishti ka chakra poore 4 bhaag mein hai। 4 yug hain na। yeh sangamayug hai kalyaankaari। kumbha kehte hain na। kumbha kaha jaata hai - mele ko। nadi aakar saagar se milti hai। aatma aakar paramatma se milti hai, isko kumbha kehte hain। aatma aur paramatma ka mela bhi tum dekhte ho। tum aapas mein milte ho, seminar karte ho, isko kumbha nahin kahenge। saagar to apni jagah par baithe hain। is tan mein hain na। jahaan inka tan vahaan gyaan ka saagar hai। baaki tum aapas mein gyaan gangaayen milti ho। nadiyaan chhoti-badi to hoti hain na। vahaan snaan karne jaate hain। ganga jamuna sarasvati aadi to hain hi। dehli jamuna ka kantha hai - svarga। dehli ke liye kehte hain - paristaan tha, jab lakshmi-naaraayan ka raajya tha। aise nahin ki shreekrishna ka raajya tha। raadhe-krishna yugal hon tab raajya kar saken।

ab tum bachche kitne khushi mein ho। maaya ke toofaan to bahut aayenge। behad ki boxing hain। har ek ki 5 vikaaron ke saath yuddha chalti hai। ham chaahte hain baba ko nirantar yaad karen। maaya hamaara yog uda deti hai। ek khel bhi dikhaate hain - paramatma apni taraph kheenchate hain, maaya apni taraph। aisa ek naatak banaaya hai। bioscope ka fashion abhi nikla hai। tumko drama anusaar bioscope par hi samjhaana tha। naatak mein to badli-sadli hoti hai। yeh to anaadi avinaashi drama bana banaaya hai। bani banaai ban rahi... phalaana mar gaya itna hi part tha, ham chinta kyon karen। drama hai na। shareer chhod diya phir thode hi aa sakta। rone se phaayda hi kya? iska naam hi hai duhkhadhaam। satayug mein mohjeet raajaayen hote hain। is par kahaani bhi hai। satayug mein moh ki baat hoti nahin। yahaan to manushyon ka kitna moh hai। kisko rona na aaye to rokar bhi unko rula denge। to samjhen ki yeh aphsos karte hain। nahin to glaani ho jaae। bhaarat mein hi yeh sab rivaaj hai। bhaarat mein hi sukh, bhaarat mein hi bahut duhkh hota hai। bhaarat mein god goddess raajya karte the। videshi log puraane chitra badi khushi se lete hain। puraani cheez ka maan hota hai। sabse puraana shiv to yahaan aaya tha na, unki kitni pooja karte hain। ab to shivbaaba aaya hai, tum pooja nahi karenge। woh hokar gaya hai to unki pooja karte rehte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) drama ke gyaan ko buddhi mein rakh nishchint banna hai। kisi bhi prakaar ki chinta nahin karni hai kyonki jaante hain bani banaai ban rahi... nirmohi banna hai।

2) baap dvaara jabki brahaspati ki dasha baithi hai to sambhaal karni hai, raahu ka grahan na lag jaae। koi bhi grahchaari ho to use gyaan daan se samaapta karna hai।

vardaan:- svayan ke tension par attention dekar vishwa ka tension samaapta karne vaale vishwa kalyaankaari bhav

jab doosron ke prati jaasti attention dete ho to apne andar tension chalta hai, isliye vistaar karne ke bajaae saar swaroop mein sthit ho jaao, quantity ke sankalpon ko samaakar quality vaale sankalp karo। pahle apne tension par attention do tab vishwa mein jo anek prakaar ke tension hain unko samaapta kar vishwa kalyaankaari ban sakenge। pahle apne aapko dekho, apni service first, apni service ki to doosron ki service svatah ho jaayegi।

slogan:- yog ki anubhooti karni hai to dridhta ki shakti se man ko control karo।

ye avyakt ishaare - jvaalaasvaroop sthiti mein rah shaktishaali yaad ka anubhav karo

jitna sthaapna ke nimitta bane hue jvaala-roop honge utna hi vinaash-jvaala pratyaksha hogi। sangathan roop mein jvaala-roop ki yaad vishwa ke vinaash ka kaarya sampanna karegi। iske liye har sevaakendra par vishesh yog ke programme chalte rahen to vinaash jvaala ko pankha lagega। yog-agni se vinaash ki agni jalegi, jvaala se jvaala prajjavlit hogi।