Daily Murli for Friday 14 August 2026

14-08-2026 praatahmurli om shanti "baapdaada"' madhuban

“meethe bachche - roz apne aapse poochho ki main aatma kitna shuddh bana hoon, jitna shuddh banenge utna khushi rahegi, seva karne ka umang aayega''

prashn:- heere jaisa shreshtha banne ka purushaartha kya hai?

uttar:- dehi-abhimaani bano, shareer mein jara bhi moh na rahe। phikar se phaarig ho ek baba ki yaad mein raho - yahi shreshtha purushaartha heere jaisa bana dega। agar deh-abhimaan hai to samjho avastha kachchi hai। baba se door ho। tumhein is shareer ki sambhaal bhi karni hai kyonki is shareer mein rehte karmaateet avastha ko paana hai।

geet:- mukhda dekh le praani…

om shanti। baap bachchon ko samjhaate hain ki jiske yogbal se paap katte hain, unko khushi ka paara chadh jaata hai। apni avastha ko aapehi bachche jaan sakte hain। jab avastha achhi hoti hai to service ka shauk bahut achha hota hai। jitna-jitna shuddh hote jaayenge utna auron ko bhi shuddh athva yogi banaane ka umang aayega kyonki tum raajayogi va raajarishi ho। hathayog rishi tatva ko bhagwan maante hain। raajayog rishi bhagwan ko baap maante hain। tatva ko yaad karne se unhon ke koi paap nahin katte hain। tatva ke saath yog lagaane se koi bal nahin milta hai। koi bhi dharma vaale yog ko jaante nahin hain isliye koi bhi sachcha yogi ban vaapis nahin ja sakte। abhi tum bachche apni avastha khud bhi jaan sakte ho। aatma jitna baap ko yaad karegi utna khushi hogi। apni jaanch rakhni hai। bachche bhi ek do ki avastha ko, apni avastha ko jaan sakte hain। dekhna hai hamaara koi shareer mein bhaan to nahin hai! deh-abhimaan hai to samjho ham bahut kachche hain। baba se bahut door hain। baap pharmaan karte hain bachche tumhein ab heere jaisa banna hai। baap dehi-abhimaani banaate hain। baap ko deh-abhimaan hota nahin। deh-abhimaan hota hai bachchon ko। baap ki yaad se tum dehi-abhimaani banenge। apni jaanch karte raho, ham kitna samay yaad karte hain। jitna yaad karenge utna khushi ka paara chadhega aur apne ko laayak banaayenge। aise bhi mat samajhna ki koi bachche karmaateet avastha ko pahunch gaye hain। nahin, race chal rahi hai। race jab poori hogi tab final result hogi। phir vinaash bhi shuru ho jaayega। tab tak yeh rehearsal hoti rahegi jab tak karmaateet avastha aa jaae। ham kisi ki buraai nahin kar sakte। ant mein hi sabka pata padega। abhi to thoda time pada hai। yeh daada bhi kehte hain meethe bachche, abhi thoda samay pada hai। is samay ek bhi karmaateet avastha ko pa na sake। beemaari aadi hoti hai - isko karmabhog kaha jaata hai। bhogna ka aur kisko pata nahin padta hai। woh andar ki peeda hoti hai।

abhi ekras avastha kisi ki bani nahin hai। jitni koshish karte hain utna vikalpa, toofaan bahut aate hain। to bachchon ko kitni khushi rahni chaahiye। vishwa ka maalik banna koi kam baat hai kya? manushya saahookaar hain bade-bade bangale hain, to khushi rehti hai kyonki sukh bahut hai। abhi bhi tum baap se athaah sukh lete ho। jaante ho baba se ham raajaai lenge। shanti mein itna khushi nahin hoti, jitni dhan mein khushi hoti hai। sannyaasi gharbaar chhod jaae jangal mein rehte the। kabhi paisa haath mein nahin rakhte the, sirf roti lete the। abhi to kitne dhanvaan ho gaye hain। sabko paise ki chinta bahut hai। vaastav mein raaja ko praja ka ona rehta hai isliye ladaai ka saamaan rakhte hain। satayug mein to ladaai aadi ki baat hoti nahin। abhi tum bachchon ko khushi hoti hai - ham apni raajaai mein jaate hain। vahaan dar ki koi baat nahin hoti। tax aadi ki baat nahin। yeh shareer ki phikraat yahaan rehti hai। gaaya jaata hai phikar se phaarig svaami... tum jaante ho phikar se phaarig hone ke liye abhi ham itna purushaartha karte hain। phir 21 janma liye koi phikraat nahin rahegi। baba ko yaad karne se tum bahut adol rahenge। raamaayan ki katha bhi tumhaare par hai। tum hi mahaaveer bante ho। aatma kehti hai hamko raavan hila nahin sakta। woh avastha pichhaadi ko aayegi। abhi to koi bhi hil jaayenge। phikraat rahegi। jab vishwa mein ladaai lagegi tab samjhenge ab time aa gaya hai। jitna baap ko yaad karne ka purushaartha karenge utna phaayda hoga। purushaartha karne ka abhi hi samay hai। phir to vinaash ki dhoomdhaam hogi। abhi to shareer mein bhi moh rehta hai na। baba khud kehte hain shareer ki sambhaal rakho। antim shareer hai, ismen hi purushaartha kar karmaateet avastha ko paana hai। jeete rahenge, baap ko yaad karte rahenge। baap samjhaate hain bachche jeete raho। jitna jiyenge utna baap ko yaad kar oonch varsa lenge। abhi tumhaari kamaai hoti rehti hai। shareer ko nirogi tandaroosta rakho, gaphlat nahin karni hai। khaan-paan ki sambhaal rakhenge to kuchh nahin hoga। ekras chalan se shareer bhi tandaroosta rahega। yeh amoolya tan hai। ismen purushaartha kar devi-devta bante ho to balihaari is samay ki hai। khushi rahni chaahiye। jitna baap aur varse ko yaad karenge utna naaraayni nasha chadha rahega। baap ki yaad se hi tum oonch te oonch pad paayenge। dekhna hai ham kitna khushi mein, kitna phakhur mein rehte hain। gareebon ko to aur hi khushi rahni chaahiye। saahookaaron ko to dhan ka phikar rehta hai। tumhaare mein kumaariyon ko to koi phikar nahin hai। haan koi ke mitra-sambandhi gareeb hain, to sambhaal rakhni padti hai। jagaate bhi rehna hai। agar nahin jagte hain to phir kahaan tak madad karte rahenge। baba kehte hain na - tum serviceable khud bano va stri ko roohaani service mein do।

tum ho baba ke madadgaar। madad to sabko chaahiye na। akela baap bhi kya karega, kitnon ko mantra de! ham tumko dete hain - tumko phir auron ko dena hai, kalam lagaana hai। bachchon ko kehte rehte hain jitna ho sake madadgaar bano, mantra dete jaao। tumhaare shaastron mein bhi hai ki sabko paigaam diya tha ki baap aaye hain varsa lena hai to baap ko yaad karo। dehdhaariyon ko yaad nahin karo। apne ko aatma samajh baap ko yaad karenge to tumhaare vikarma vinaash honge aur varsa mil jaayega। geeta to bahut sunte sunaate hain। usmein prasiddha akshar hai manamnaabhav। baap ko yaad karo to mukti ko paayenge। sannyaasi bhi yeh pasanda karenge। madhyaaji bhav arthaat jeevanmukti। bachche baap ke bante hain to baap kehte hain - bachche tumhaari aatma patit hai, patit chal nahin sakenge। yeh samajhne ki baaten hain। tum bhaaratvaasi satopradhaan the, tamopradhaan bane ab phir satopradhaan banna hai to baap kehte hain purushaartha karo to oonch pad milega। bhakti to janma-janmaantar karte aaye ho। tum jaante ho - pahle-pahle avyabhichaari bhakti shuru hui। abhi kitni vyabhichaari bhakti hai। shareeron ki bhi pooja hoti hai, woh hai bhoot pooja। devtaayen phir bhi pavitra hain। parantu is samay to sab tamopradhaan hain। to pooja bhi tamopradhaan hoti jaati hai। abhi baap ko yaad karna hai। bhakti ka akshar koi nahin bolna hai। haay raam - yeh bhi bhakti ka akshar hai। aise koi pukaar nahin karni hai। ismen kuchh bhi uchchaaran karne ki baat nahin। om shanti bhi ghadi-ghadi nahin kehna hai। shanti maana aham aatma shant swaroop hain। so to hain hi। ismen bolne ki baat nahin rehti। doosre koi manushya ko kahenge om shanti, woh to arth jara bhi nahin samjhenge। vo log to om ki badi-badi mahima karte hain। tum to arth samajhte ho phir om shanti kehna bhi phaaltu hai। haan ek do se aise poochh sakte ho - shivbaaba ki yaad mein ho? jaise ham bhi bachchi se poochhta hoon yeh kiska shrringaar karti ho? bolti hai shivbaaba ke rath ka। yeh shivbaaba ka rath hai na। jaise husain ka rath hota hai na। ghode ko shrringaar karte hain। ghode ka arth nahin samajhte hain। dharma sthaapan karne vaale jo aate hain unki aatmaayen pavitra hoti hain। puraani patit aatma dharma sthaapan kar na sake। tum dharma sthaapan nahin karte ho, shivbaaba tumhaare dvaara karte hain। tumko pavitra banaate hain। vo log bhakti maarga mein bahut shrringaar aadi karte hain। yahaan shrringaar pasanda nahin karte। baap kitna nirhankaari hai। khud kehte hain ham bahut janmon ke ant ke bhi ant mein aata hoon। pahle satayug mein hoga shri naaraayan। shri lakshmi se bhi pahle shri naaraayan aayega। woh to bada hoga na isliye shreekrishna ka naam gaaya hua hai। shreenaaraayan se bhi shreekrishna ki mahima jaasti karte hain। shreekrishna ki hi janmaashtami manaate hain। shri naaraayan ka birth de nahin manaate। yeh koi nahin jaante ki shreekrishna so shreenaaraayan। naam to bachpan ka hi chalega na। phalaane ne janma liya, uska birth de manaate hain isliye shreekrishna ka hi manaate hain। shreenaaraayan ka kisko pata nahin। pahle-pahle shivjayanti phir hai shreekrishna jayanti phir raam ki... shiv ke saath geeta ka bhi janma hota hai। shivbaaba aate hi hain bahut janmon ke ant ke janma mein। bujurga anubhvi rath mein hi aate hain। kitna achha samjhaaya hua hai, to bhi kiski buddhi mein nahin aata।

baap kehte yeh gyaan praayah lop ho jaata hai। jab main aakar sunaaoon tab tum bhi suna sakte ho। abhi tum bachche jaante ho ham bhavishya mein accurate yeh (devi-devta) banenge। baba ne 2-3 prakaar ke saakshaatkaar kiye the। yeh banoonga, taaj vaala banoonga, pagdi vaala banoonga। 2-4 raajaai ke janmon ka saakshaatkaar kiya tha। abhi tum samajh sakte ho - in baaton ko duniya mein aur koi samajh nahin sakte। haan, itna samajhte hain achha karma karenge to achha janma milega। abhi tum purushaartha hi bhavishya ke liye kar rahe ho। nar se naaraayan banne ka। tum jaante ho - ham yeh pad paayenge। yeh khushi jaasti unko rahegi jo karmaateet avastha ko paane ka purushaartha karte rehte honge। kehte hain baba ham to mama baba ko follow karenge tab to takhta par baith sakenge। yeh bhi samajh chaahiye, kitni ham service karte hain aur kitna khushi mein rehte hain। khud khushi mein rahenge to doosron ko bhi khushi mein laayenge। andar koi kharaabi hogi to dil khaati rahegi। koi-koi aakar kehte hain - baba hamaare mein krodh hai। yeh bhoot hai hamaare mein। phikar ki baat hui na। bhoot ko rahne nahin dena chaahiye। krodh kyon karen! pyaar se samjhaana hota hai। baba koi par krodh thode hi karenge। shivbaaba ki mahima hai na। bahut phaaltu jhoothi mahima bhi karte hain। main karta kya hoon! mujhe kehte hain aakar patit se paavan banaao। jaise doctor ko kehte hain hamaari beemaari door karo। woh davaai de injection lagaate hain, so to unka kaam hi hai। badi baat thode hi hai। padhte hi hain service ke liye। jaasti padhte hain to jaasti kamaai karte hain। baap ko to koi kamaai nahin karni hai। unko to kamaai karaana hai। baba kehte mujhe tum avinaashi surgeon bhi kehte ho, yeh jaasti mahima kar di hai। patit-paavan ko koi surgeon nahin kaha jaata। yeh sirf mahima hai। baap to sirf kehte hain mujhe yaad karo to tumhaare vikarma vinaash honge। bas। mera part hi hai tumko yeh samjhaane ka ki maamekam yaad karo, jitna yaad karenge utna oonch pad paayenge। yeh hai hi raajayog ka gyaan। geeta jinhonne padhi hai, unko samjhaana sahaj hota hai। tum poojya raajaaon ke raaja bante ho, phir pujaari banenge। tumko mehnat karni hai। tum vishwa ko pavitra banaate ho। kitna bhaari martaba hai। tum sab anguli dete ho - kaliyugi pahaad ko paltaane। baaki pahaad aadi kuchh bhi hai nahin। ab tum jaante ho - nai duniya aani hai, isliye raajayog zaroor seekhna hai। baap hi aakar sikhlaate hain। satopradhaan banna hai। jo kalpa pahle bane honge unko samjhaane se janchega। baat to theek kehte hain। barobar baap ne kaha tha - manamnaabhav। akshar sanskrit hai। baap to hindi mein kehte hain mujhe yaad karo। abhi tum samajhte ho ham kitne oonch dharma, oonch karma vaale the tab to gaayan hai 16 kala... ab phir aisa banna hai। apne ko dekhna hai kahaan tak ham satopradhaan bane hain, paavan bane hain। kahaan tak narkavaasiyon ko svargavaasi banaane ki seva karte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan nirhankaari banna hai। is shareer ki sambhaal karte hue shivbaaba ko yaad karna hai। roohaani service mein baap ka madadgaar banna hai।

2) andar mein koi bhi bhoot ko rahne nahin dena hai। kabhi kisi par krodh nahin karna hai। sabse bahut pyaar se chalna hai। maat-pita ko follow kar takhtansheen banna hai।

vardaan:- svaartha shabd ke arth ko jaan sada ekras sthiti mein sthit hone vaale sahaj purushaarthi bhav

aajkal ek do mein jo lagaav hai woh sneh se nahin lekin svaartha se hai। svaartha ke kaaran lagaav hai aur lagaav ke kaaran nyaare nahin ban sakte isliye svaartha shabd ke arth mein sthit ho jaao arthaat pahle sva ke rath ko svaaha karo। yeh svaartha gaya to nyaare ban hi jaayenge। is ek shabd ke arth ko jaanne se sada ek ke aur ekras ban jaayenge, yahi sahaj purushaartha hai।

slogan:- pharishta roop mein rahne se koi bhi vighna apna prabhaav daal nahin sakta।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

sampoorn pavitrata aap braahmanon ka shrringaar hai, sada shrringaar ki hui moorta aarthaat sada pavitra swaroop mein sthit rah behad ki stage par hero part bajaao। sada brahmachaari arthaat sankalp mein bhi kisi prakaar ki apvitrata vritti ko chanchal nahin banaaye। vritti ki chanchalta bhi register ko daagi bana deti hai - isliye vritti se bhi sada brahmachaari bano।