Daily Murli for Monday 28 September 2026

28-09-2026 praatahmurli om shanti "baapdaada"' madhuban

meethe bachche - abhi tum amarlok ki yaatra par ho, tumhaari yeh buddhi ki roohaani yaatra hai, jo tum sachche-sachche brahman hi kar sakte ho“

prashn:- apne aapse va aapas mein kaun si vaartaalaap karna hi shubh sammelan hai?

uttar:- apne aapse baaten karo ki ham aatma ab is puraane chhi-chhi shareer ko chhod vaapis ghar jaayenge। yeh tan koi kaam ka nahin, ab to baba ke saath jaayenge। aapas mein jab milte ho to yahi vaartaalaap karo ki service vriddhi ko kaise paaye, sabka kalyaan kis tarah ho, sabko raasta kaise bataayen… yahi shubh sammelan hai।

geet:- dil ka sahaara toot na jaaye...

om shanti। meethe-meethe roohaani bachche, sabhi centres ke brahma mukh vanshaavli sarvottam brahman kul bhooshan apne kul ko jaante hain, jo jis kul ke hote hain woh apne kul ko jaante hain। chaahe kam kul vaale hon va achhe kul vaale hon, har ek apne kul ko jaante hain aur samajhte hain ki iska kul achha hai। kul kaho va jaati kaho, duniya mein tum bachchon ke sivaae aur koi nahin jaante ki braahmanon ka hi sarvottam kul hai। pahla number kul kahenge tum braahmanon ka। brahman kul arthaat eeshvareey kul। pahle hai niraakaari kul phir aate hain saakaari srishti mein। sookshm vatan mein to kul hota nahin। oonche se ooncha saakaar mein hai - tum braahmanon ka kul। tum brahman aapas mein bhaai-behen ho। behen aur bhaai hone kaaran vikaar mein ja nahin sakte। tum anubhav se kah sakte ho ki yeh pavitra rahne ki badi achhi yukti hai। har ek kehte hain - ham brahmaakumaar-kumaari hain। shiv vanshi to sab hain phir jab saakaar mein aate hain to prajaapita ka naam hone ke kaaran bhaai-behen ho jaate hain। prajaapita brahma hai to zaroor rachta hai, adopt karte hain। tum kukh vanshaavli nahin ho, mukh vanshaavli ho। to manushya kukh vanshaavli aur mukh vanshaavli ka arth bhi nahin jaante। mukh vanshaavli arthaat adopted bachche। kukh vanshaavli arthaat janma lene vaale। tumhaara yeh janma alaukik hai। baap ko laukik, alaukik, paarlaukik kaha jaata hai। prajaapita brahma ko alaukik baap kaha jaata hai। laukik baap to sabhi ko hai। woh to common hai। paarlaukik baap bhi sabhi ka hai। bhakti maarga mein to he bhagwan, he parampita sabhi kehte rehte hain। parantu is baba (prajaapita brahma) ko kabhi koi pukaarte nahin hain। yeh baba bhi hota hai brahman bachchon ka। un donon ko to sab jaante hain। baaki brahma mein moonjh padte hain kyonki brahma to hai hi sookshm vatan mein। yahaan to dikhaate nahin hain। chitron mein bhi brahma ko daadhi moonchh vaala dikhaate hain kyonki prajaapita brahma yahaan srishti mein hai। sookshm vatan mein to praja rach nahin sakte। yeh bhi kiski buddhi mein nahin aata hai। yeh sab baaten baap samjhaate hain।

tum bachchon ki yeh roohaani yaatra bhi gaai hui hai। roohaani yaatra woh, jahaan se phir laut nahin aana hai। doosri yaatraayen to sab janma-janmaantar karte rehte hain aur jaakar laut aate hain। woh hai jismaani yaatra, yeh tumhaari hai roohaani yaatra। is roohaani yaatra karne se tum mrityulok mein nahin lautte ho। baap tumko amarlok ki yaatra sikhlaate hain। woh kashmeer taraph amarnaath ki yaatra par jaate hain। woh koi amarlok nahin hai। amarlok ek hai aatmaon ka, doosra hai manushyon ka, jisko svarga athva amarlok kah sakte hain। aatmaon ka hai nirvaandhaam। baaki amarlok satayug aur mrityulok hai kaliyug aur nirvaandhaam hai shanti lok, jahaan aatmaayen rehti hain। baap kehte hain - tum amarpuri ki yaatra par ho। paidal jaane ki woh shaareerik yaatraayen hai। yeh hai roohaani yaatra, jo sikhlaane vaala ek hi roohaani baap hai aur ek hi baar aakar sikhlaate hain। woh to janma-janmaantar ki baat hai। yeh hai mutyulok ke ant ki yaatra। yeh tum brahman kul bhooshan hi jaante ho। roohaani yaatra arthaat yaad mein ho। gaaya bhi jaata hai ant mati so gati। tumko yaad aata hi hai baba ka ghar। samajhte ho ki ab naatak poora hota hai। yeh puraana vastra, puraana tan hai। aatma mein khaad padne se shareer mein bhi khaad padti hai। jab aatma pavitra banti hai to hamko shareer bhi pavitra milta hai। yeh bhi tum bachche samajhte ho। baahar vaale to kuchh nahin samajhte। tum dekhte ho ki koi-koi samajhte bhi hain। koi ki buddhi mein yeh gyaan nahin। samajhne vaala hoga to zaroor kisko samjhaayega। manushya jab yaatra par jaate hain to pavitra rehte hain। phir ghar mein aakar apvitra bante hain। maas do maas pavitra rehte hain। yaatra ki bhi season hoti hai। sadaiv to yaatra par ja na saken। thandi va barsaat ke samay koi ja na saken। tumhaari yaatra mein to thandi va garmi ki koi baat nahin hai। buddhi se khud samajh sakte ho ki ham ja rahe hain baap ke ghar। jitna ham yaad karte hain utna vikarma vinaash hote hain। baap ke ghar mein jaakar phir ham nai duniya mein aayenge। yeh baba hi samjhaate hain। yahaan bhi nambarvaar bachche hain। vaastav mein yaatra ko bhoolna nahin chaahiye lekin maaya bhula deti hai isliye likhte bhi hain baba aapki yaad bhool jaati hai। are yaad ki yaatra - jisse tum ever healthy-wealthy bante, aisi davaai ko tum bhool jaate ho। woh yeh bhi kehte hain ki baap ko yaad karna to bada hi sahaj hai। apne saath baaten karni hoti hain ki ham aatma pahle satopradhaan thi, ab tamopradhaan ban gai hain। ab shivbaaba hamko yukti to bahut achhi bataate hain। baaki abhyaas karna hai। aankh banda kar vichaar nahin kiya jaata। (baba ne act karke dikhaai) aise apne saath baaten karo ki ham satopradhaan the, ham hi raajya karte the। woh duniya golden ej thi phir silver copper iron ej mein aa gaye। ab iron ej ka ant hai, tab baba aaya hua hai। baba ham aatmaon ko kehte hain ki mujhe yaad karo aur apne ghar ko yaad karo। jahaan se aaye ho, to phir ant mati so gati ho jaayegi। tumko vahaan hi jaana hai। yeh yukti baap batlaate hain ki savere uthkar apne se baaten karo। baba act karke dikhaate hain ki ham bhi savere uth vichaar saagar manthan karta hoon। sachchi kamaai karni chaahiye na। subah ka saani... to us saani ko yaad karne se tumhaara beda paar ho jaayega। baba jo karte hain, jaise karte hain, woh bachchon ko bhi samjhaate hain। ismen khitpit ki baat nahin hai। yeh kamaai ki bahut achhi yukti hai। alpha ko yaad karne se be ki baadshaahi to mil hi jaayegi।

bachche jaante hain ki ham raajayog seekh rahe hain। baba beejroop, knowledgeful hai to ham bhi jhaad ko poora samajh gaye hain। yeh bhi mote roop mein knowledge hai। aadi mein yeh jhaad kaise vriddhi ko paata hai phir kaise unki aayu poori hoti hai aur jhaad to toofaanon aadi ke lagne se gir jaate hain। parantu is manushya srishti jhaad ka pahla foundation devi-devta dharma praayahlop ho jaata hai। yeh bhi hona hi hai। yeh jab gum ho jaae tab kaha jaae ki ek dharma ki phir se sthaapna aur anek dharmo ka vinaash। kalpa-kalpa yeh dharma praayah lop hota hai। aatma mein khaad pad jaati hai to jevar jhootha ho jaata hai। bachche samajhte hain hamaare mein khaad thi, ab jab ham svachchha bante hain to auron ko raasta bataate hain। duniya to tamopradhaan hai। pahle satopradhaan heaven tha। to bachchon ko savere-savere uth apne se baaten arthaat roohrihaan karni chaahiye। vichaar saagar manthan karna chaahiye। phir kisko samjhaana hota hai ki yeh 84 janmon ka chakra hai। 84 janma kaise lete hain, kaun lete hain। zaroor jo pahle aayenge vahi lenge। baap bhi bhaarat mein aate hain। aakar 84 ka chakra samjhaate hain। baap kahaan aaye hain, yeh bhi nahin jaante hain। baap aakar apna parichay khud dete hain। kehte hain ki main tumko raajayog sikhlaata hoon, manamnaabhav। mujhe yaad karo to vikarma vinaash honge। aisi samjhaani koi de na sake। bhal geeta aadi sunaate hain। vahaan bhi log jaate rehte hain। parantu bhagwan kabhi to aaya hoga, gyaan sunaaya hoga। phir jab aaye tab sunaaye na। vo log to geeta pustak uthaakar baith sunaate hain। yahaan to bhagwan hai gyaan ka saagar, inko kuchh haath mein le padhna nahin hai। yeh seekhta nahin hai। kalpa pahle bhi aakar tum bachchon ko sangam par sikhaaya tha। baap hi aakar raajayog sikhlaate hain। yeh hai yaad ki yaatra। tumhaari buddhi hi jaanti hai - sivaae brahma mukh vanshaavli aisa koi manushya nahin hoga jiske paas yeh gyaan hoga। sabmen sarvavyaapi ka gyaan bhara hua hai। yeh koi nahin jaante ki paramatma bindi hai। gyaan saagar patit-paavan hai। sirf aise hi gaate rehte hain। guru log jo sikhaate hain woh sat-sat karte rehte। arth kuchh bhi nahin samajhte। na us par kabhi vichaar chalaate to yeh satya hai va nahin।

baap samjhaate hain ki tum bachchon ko chalte-phirte yaad ki yaatra mein zaroor rehna hai। nahin to vikarma vinaash ho nahin sakte। kuchh bhi karma karte raho parantu buddhi mein baap ki yaad rahe। shreenaath dvaare mein bhojan banaate hain to buddhi mein woh shreenaath rehta hai na। baithe hi mandir mein hain। jaante hain ki ham shreenaath ke liye banaate hain। bhojan banaaya, bhog lagaaya phir ghar vaale bachche aadi yaad aate rahenge। vahaan bhojan banaate hain mukh banda, baat nahin karenge। mansa se koi vikarma nahin banta hai। woh shreenaath ke mandir mein baithe hain। yahaan to shivbaaba ke paas baithe ho। yahaan bhi baba yukti bataate rehte hain। bachche koi phaaltu baat nahin karna। sadaiv baap se meethi-meethi baaten karni hain। jaisa baap vaise bachche। baap ki smriti mein rehta hai ki chakra kaise phirta hai, tab tum bachchon ko aakar sunaate hain। tum bachche jaante ho ki hamaara baba manushya srishti ka beejroop, chaitanya hai। kitni sahaj baat hai। parantu phir bhi samajhte nahin hain kyonki pattharbuddhi hain na। us beej ko ham chaitanya nahin kahenge। yeh knowledgeful, chaitanya hai। yeh ek hi hai। woh beej to anek prakaar ke hote hain। bhagwan ko kaha jaata hai - manushya srishti ka beej roop। to baap ho gaya na। aatmaon ka baap paramatma hai to sabhi brothers thahre, baap bhi vahaan rehte hain jahaan tum aatmaayen nivaas karti ho। nirvaandhaam mein baap aur bachche rehte hain। is samay tum prajaapita brahma ki santaan bhaai aur behen ho, isliye kahlaate ho - shiv vanshi brahmaakumaar-kumaariyaan। yeh bhi tumko likhna hai ki ham brahmaakumaar-kumaariyaan bhaai-behen hain। baap brahma dvaara srishti rachenge to bhaai-behen thahre na। kalpa-kalpa aise hi create karte hain। adopt karte jaate hain। manushya ko prajaapita brahma nahin kaha jaata। bhal baba kehte hain parantu woh hai had ka, inko prajaapita kahenge kyonki bahut praja hai arthaat dher bachche hain। to behad ka baap bachchon ko sabhi baaten baith samjhaate hain। yeh duniya bilkul bigdi hui chhi-chhi hai। ab tumko vaah-vaah ki duniya mein le jaate hain। tumhaare mein bhi bahut hain jo bhool jaate hain। agar yeh yaad ho to baap bhi yaad rahe aur guru bhi yaad rahe ki ab vaapis jaana hai। puraana shareer chhod denge kyonki yeh tan ab kaam ka nahin hai। aatma ab pavitra hoti jaati hai to shareer bhi pavitra hona hai। aapas mein aisi-aisi baaten baith karni chaahiye, isko kaha jaata hai - shubh sammelan, jismen achhi-achhi baaten hon। service kaise vriddhi ko paaye। kalyaan kaise karen! unhon ka to chhi-chhi sammelan hai, gapode maarte rehte hain। yahaan gapode aadi ki baat nahin। sachcha-sachcha sammelan ise kaha jaata hai। tumko yeh kahaani sunaai hai ki yeh kaliyug hai, satayug ko svarga kaha jaata hai। bhaarat svarga tha, bhaaratvaasi hi 84 janma bhogte hain। ab ant mein hain। ab tum tamopradhaan se satopradhaan bante ho। ismen koi ganga snaan aadi nahin karna hai। bhagvaanuvaach ki main sabhi ka baap hoon। shreekrishna sabka baap ho nahin sakta। ek do bachche ka baap shri naaraayan hai, na ki shreekrishna। shreekrishna to kumaar hai। is prajaapita brahma ko to bahut bachche hain। kahaan shreekrishna bhagvaanuvaach, kahaan shiv bhagvaanuvaach। bhool kitni badi kar di hai। kahaan bhi pradarshani karo to mukhya baat yeh hai ki geeta ka bhagwan yeh hai va woh? pahle-pahle yeh samjhaana chaahiye ki bhagwan shiv ko kaha jaata hai। yeh buddhi mein bithaana hai। is par probe hona chaahiye। geeta ke bhagwan ka chitra bhi bada permanent hona chaahiye। neeche mein likh dena chaahiye ki judge karo aur aakar samjho। phir likhaakar sahi leni chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aapas mein shubh sammelan kar service ki vriddhi ke plan banaane hain। apne aur sarva ke kalyaan ki yukti rachni hai। kabhi bhi koi vyartha (phaaltu) baaten nahin karni hain।

2) savere-savere uthkar apne aapse baaten karni hain, vichaar saagar manthan karna hai। bhojan banaate ek baap ki yaad mein rehna hai। mansa bhi baahar na bhatke, yeh dhyaan rakhna hai।

vardaan:- sarva aatmaon par sneh ka raajya karne vaale vishwa raajya adhikaari bhav

jo bachche vartamaan samay sarva aatmaon ke dil par sneh ka raajya karte hain vahi bhavishya mein vishwa ke raajya ka adhikaar praapta karte hain। abhi kisi par order nahin chalaana hai। abhi se vishwa mahaaraajan nahin banna hai, abhi vishwa sevaadhaari banna hai, sneh dena hai। dekhna hai ki apne bhavishya ke khaate mein sneh kitna jama kiya hai। vishwa mahaaraajan banne ke liye sirf gyaan daata nahin banna hai iske liye sabko sneh arthaat sahayog do।

slogan:- jab thakaavat feel ho to khushi mein dance karo, isse mood change ho jaayegi।

ye avyakt ishaare - ab apne daata swaroop ko pratyaksha karo

baapdaada ab bachchon se yahi chaahte hain ki mera har ek bachcha master daata banen। ab merciful ban apne gunon ka, shaktiyon ka sabko sahayog do, phraakdil bano। jitna doosron ko dete jaayenge utna badhta jaayega। vinaashi khajaana dene se kam hota hai aur avinaashi khajaana dene se badhta hai - ek do, hajaar paao।