Daily Murli for Tuesday 6 October 2026

06-10-2026 praatahmurli om shanti "baapdaada"' madhuban

“meethe bachche - ab seekhne ke saath-saath teacher ban sikhaana bhi hai, yeh padhaai is antim janma ke liye hi hai, isliye achhi reeti padho aur padhaao''

prashn:- satayugi raajdhaani kis aadhaar par sthaapan hoti hai?

uttar:- sangam ki padhaai ke aadhaar par। jo achhi reeti padhte hain athva jin par brahspati ki dasha hai woh sooryavanshi mein aate hain। jo padhte nahin, service nahin karte un par budh ki dasha baithti, woh jaise buddhu hain। woh praja mein aa jaate hain। oonch praja, naukar chaakar aadi sab is samay ki padhaai ke aadhaar par hi bante hain।

om shanti। roohaani bachchon prati athva aatmaon prati roohaani baap arthaat paramatma baith samjha rahe hain। roohaani baap ko paramatma kaha jaata hai। sabhi aatmaon ka baap ek parampita paramatma hai। woh baith brahma tan dvaara samjhaate hain। bhaktimaarga mein manushya kehte hain trimoorti brahma। abhi tum brahman aise nahin kahenge। tum to kehte ho trimoorti shiv arthaat brahma, vishnu, shankar ka rachayita shiv। trimoorti brahma ka koi arth nahin nikalta hai। in teenon devtaaon ka rachayita hai hi shiv, isliye trimoorti shiv kaha jaata hai। ek rachayita, baaki sab hain rachna। behad ka baap ek hi hai। laukik baap to har ek ka apna-apna hai। is samay to sab shivbaaba ke bachche bane hain। bachchon ko maaloom hai, ham aatmaayen 84 ka chakra lagaati hain। to 84 baap bante hain had ke। satayug mein bhi maa baap koi behad ka varsa nahin dete hain। satayug ke liye behad ka varsa to abhi tumko milta hai। vahaan lakshmi-naaraayan ki raajdhaani hai aur jo bhi raajaai vaale rajvaade honge unke bachchon ko apne baap ka varsa milega। phir bhi vahaan sukh bahut hai। is samay tumko behad ka baap behad vishwa ka maalik banaate hain। sada sukh ka 21 janmon ke liye varsa milta hai। vahaan duhkh ka naam nishaan nahin hota। vaam maarga shuru hone se hi duhkh shuru ho jaata hai। jo bhi aaye unhein yeh samjhaana hai ki tumhein do baap hain। 84 janmon mein to 84 baap had ke milte hain। behad ka baap to ek hi hai।

abhi tum bachchon ki buddhi mein yeh bhi samajh hai ki mool vatan kya hai! mool vatan jo chitra mein dikhaate ho woh bhi bada-bada banaana chaahiye, usmein chhoti-chhoti aatmaayen sitaare misal chamakti hon। jaise aage tum fire fly ka haar banaate the, vaise yeh mool vatan ka bhi banaana chaahiye। projector show dikhaate hain to usmein bhi mool vatan ka chitra aisa dikhaana chaahiye। jhaad bada ho to clear dikhaai pade ki ham aatmaayen vahaan rehti hain। bachchon ko samajhne mein bhi sahaj hoga। yeh hai behad ka baba, jo brahma dvaara daivi sampradaay ki sthaapna kar rahe hain। tum abhi brahman ho phir daivi gunon vaale devta banenge। abhi sabhi mein aasuri gun hain, unko aasuri avgun kahenge। vaam maarga se duhkh shuru hota hai। aise nahin ki rajopradhaan banne se phat duhkhi hote hain। nahin, thodi-thodi kala kamti hoti jaati hai। mukhya chitra hai hi trimoorti, gola aur narka-svarga ke gole। yeh pahle-pahle samjhaane ke liye bahut zaroori hai। jhaad ke chitra mein bhi aadha-aadha kalpa ka maap poora hai। accurate hone se poora samjhaane mein aayega। yeh gyaan sivaae baap ke aur koi samjha na sake। ghadi-ghadi samjhaane ke liye trimoorti ka chitra zaroor chaahiye। yeh hai niraakaar behad ka baap, jisko sab yaad karte hain। aatma jaanti hai woh hamaara behad ka baap hai, unko duhkh mein sab yaad karte hain। satayug mein yaad karne ki darkaar hi nahin। woh to hai hi sukhdhaam। devtaayen hi punarjanma lete aaye hain। yeh bhi kisko pata nahin।

tum jaante ho - satopradhaan se phir ham kaise sato rajo tamo mein aate hain। aatma mein khaad padti jaati hai। tumhaari aatma jaanti hai ki hamko 84 janmon ka part bajaana hai। woh accurate hamaari aatma mein noondh hai। kitni chhoti si aatma mein part saara noondha hua hai। yeh hai guhya te guhya samajhne ki baaten। koi bhi manushya maatra sannyaasi, udaasi aadi ki buddhi mein yeh baaten aa nahin sakti। bhal naatak kehte hain, naatak ko drama nahin kaha jaata। yeh drama hai। drama, bioscope aadi aage nahin the। pahle movie the, abhi talkie bane hain। ham aatmaayen bhi silence se talkie mein aati hain। talkie se phir movie mein jaae baad mein silence mein jaate hain isliye tum bachchon ko sikhaaya jaata hai ki jaasti talk na karo। royal manushya bahut aahiste bolte hain। tumko jaana hai - sookshm vatan mein। sookshm vatan ka gyaan abhi baap ne samjhaaya hai। yeh hai talkie duniya, woh hai movie। vahaan eeshvar se baatcheet chalti hai। vahaan saphed light ka roop hai, aavaaj nahin। vahaan ki movie bhaasha ek do mein samajh jaate hain। to abhi tumko jaana hai silence mein via movie। baap kehte hain mujhe pahle-pahle sookshm srishti rachni pade phir peechhe sthool। gaaya bhi jaata hai mool vatan, sookshm, sthool…manushyon ko yeh bhi pata nahin ki brahma, vishnu, shankar sookshmavtanvaasi hain। vahaan koi duniya nahin hai। sirf brahma, vishnu, shankar dekhne mein aate hain। vishnu 4 bhuja vaala dekhte ho, isse siddha hai, pravritti maarga hai। sannyaasiyon ka hai nivriti maarga। yeh bhi drama hai, jiska varnan karke baap samjhaate hain। mukhya baat to baap kehte hain manamnaabhav। baaki hai detail। woh samajhne mein time lagta hai। nutshell mein hai beej aur jhaad। beej ko dekhne se saara jhaad buddhi mein aa jaata hai। baap beej-roop hai, unko is jhaad ka aur srishti ke chakra ka saara knowledge hai, samjhaane ke liye srishti chakra alag hai। jhaad alag hai। jhaad mein yeh sab chitra diye hain। koi bhi dharma vaale ko dikhaaya jaae to samajh sakte hain। ham svarga mein to aa nahin sakenge। bhaarat jab praacheen hai to sirf devi-devtaayen hi the। baaki sab shantidham mein rehte hain।

tum beej aur jhaad donon ko jaante ho। beej oopar mein hai, jisko vrikshapti kehte hain। ab tum baap ke bane ho to tumhaare oopar brahspati ki dasha baithi hui hai। jo baap ke bante hain unke oopar brahspati ki dasha kahenge। phir hai shukra ki dasha, budh ki dasha। brahspati ki dasha vaale sooryavanshi bante hain। budh ki dasha vaale praja mein chale jaate hain, service nahin kar sakte। baap ko yaad nahin kar sakte hain to buddhu thahre, ismen bhi nambarvaar buddhu bante hain। koi oonch praja koi kam praja। kahaan saahookaar praja phir kahaan unke bhi naukar chaakar। saara padhaai par madaar hai। padhaai bhi satoguni, rajoguni, tamoguni hoti hai। raajdhaani sthaapan ho rahi hai। jo hoshiyaar hain woh baap ki yaad mein bhi rehte hain। saara jhaad buddhi mein rehta hai। padhaai se hi teacher, barrister bante hain। teacher phir doosre ko bhi padhaate hain। padhte to sab hain। ek hi padhaai hai phir koi to padhkar oonch chadh jaate hain, koi phir vahaan hi teacher ban jaate hain। jo seekhe hain woh padhaate hain। abhi tum bhi padhte ho। koi to padhte-padhte teacher ban jaate hain। khud kehte hain teacher ka kaam hai aapasmaan teacher banaana। teacher nahin banenge to auron ka kalyaan kaise karenge। time thoda hai, jab tak vinaash ho tab tak seekhte rahenge। phir to seekhna banda ho jaayega। phir baba 5 hajaar varsha baad aakar sikhlaayenge। yeh padhaai koi saikdon varsha nahin chalne vaali hai। yeh to hai hi is antim janma ke liye padhaai। padhna aur padhaana hai। sab to teacher nahin ban sakte hain। agar sab teacher ban jaaen phir to bahut oonch pad pa len। nambarvaar to hote hi hain। pahle-pahle koi ko bhi do baap ka parichay do। chitra hone se achha samjhenge। trimoorti ka chitra to zaroor saath hona chaahiye। yeh shivbaaba, yeh prajaapita brahma। sabhi ka great-great grand father। to zaroor pahle aaya hoga na। sabse aage hai brahma। abhi rachna rach rahe hain। abhi tum brahman bane ho phir brahman hi devta banenge। braahmanon ka jhaad chhota hai। devtaayen thode hote hain phir baad mein vriddhi ko paate jaate hain। yeh tumhaara naya jhaad sthaapan ho raha hai। woh aur dharma vaali aatmaayen to oopar se aati hain - part bajaane, girne ki baat nahin hai। yahaan to tumhaara naya jhaad sthaapan hota hai। maaya bhi saamne hai। tumko tamopradhaan se satopradhaan banna hi hai। transfer hona hai kyonki duniya badal rahi hai, isliye mehnat hoti hai। devi-devta dharma ki yahaan sangamayug par sthaapna hoti hai। tum yeh bhi batlaate ho ki satayug kitne varsha ka hai। satayug se phir kaliyug kaise banta hai। kaliyug mein tamopradhaan to hona hi hai। tamopradhaan hon tab to phir satopradhaan banen। tum satopradhaan the phir khaad padti gai hai। abhi bhal koi nai aatma 2-3 janma le to bhi jhat khaad pad jaati hai। unmein hi sukh, unmein hi duhkh bhogti hai। koi ka ek janma bhi hota hai। jab aana banda ho jaayega tab vinaash hoga। phir sabhi aatmaon ko vaapis jaana hoga। paap aatmaayen aur punya aatmaayen ikatthi jaati hain। phir punya aatmaayen neeche utarti hain। sangam par saari badli hoti hai। to bachchon ko saara drama buddhi mein rakhna chaahiye। baap ke paas yeh saari knowledge hai na। kehte hain main aakar srishti chakra ke aadi-madhya-ant ka saara raaz samjhaata hoon। bhakti maarga mein thode hi yeh gyaan sunaata hoon। bhagat yaad karte hain to unko saakshaatkaar karaata hoon। bhakti maarga shuru hota hai tab mera bhi part shuru hota hai। satayug treta mein main vaanaprastha mein rehta hoon। bachchon ko sukh mein bhej diya baaki kya! main vaanaprastha leta hoon। yeh vaanaprastha lene ki rasam bhaarat mein hi hai। behad ka baap kehte hain main vaanaprastha mein baith jaata hoon। behad ka baap hi aakar guru ke roop mein vaanaprastha mein le jaate hain। manushya gurooon ka sang lete hain - bhagwan se milne liye। shaastra padhenge, teerthon par jaayenge, ganga snaan karenge। parantu mila to kuchh bhi nahin hai। abhi tumko behad ka baap mila hai। duhkh se chhudaakar, raavan raajya se nikaal raamraajya mein le jaate hain। behad ka baap ek hi baar aakar raavan ke duhkh se chhudaate hain, isliye unko liberator kaha jaata hai। satayug mein hai hi raamraajya। baaki aatmaayen shantidham chali jaati hain। yeh bhi koi nahin jaante hain। mujh aatma ka svadharma hi hai - shant। yahaan part mein aane se ashaanta bane hain phir shanti yaad aati hai। asul mein rahvaasi shantidham ke hain। ab kehte hain mujhe shanti chaahiye। man ko shanti chaahiye। samjhaaya jaata hai - aatma man-buddhi sahit hai। aatma hai hi shant swaroop phir yahaan karma mein aati hai। yahaan shanti kaise milegi। yeh to hai hi ashaantidhaam। satayug mein sukh shanti donon hain। pavitrata bhi hai, dhan daulat bhi hai।

baap samjhaate hain tumko kitna sukh-shanti, dhan daulat aadi sab kuchh tha। ab phir tumko auron ko samjhaana hai। jinhonne kalpa pahle varsa liya tha vahi achhi reeti samajhne ki koshish karenge। bhal deri se aate hain parantu puraanon se jhat aage chale jaate hain। deri se aane vaalon ko aur hi points achhi milti hain। din-pratidin sahaj hota jaata hai। yeh bhi samjhenge ab hamne samjha to sab hai phir tamopradhaan se satopradhaan banne ki mehnat bhi karni hai। uske liye teevra purushaartha karne lag padenge kyonki samajhte hain time thoda hai, jitna ho sake purushaartha mein lag jaayen। maut se pahle ham purushaartha kar leven। woh apna chart rakhte honge। padhaai to sahaj hai। baaki hai yaad ki baat। gaaya bhi hua hai - raam sumir prabhaat more man... aatma kehti hai he mere man, raam ka simran karo। bhakti maarga mein to yeh bhi kisko pata nahin hai ki raam kaun hai। woh raghupti raaghau raajaaraam kah dete hain। kitni gadbad kar di hai। sabka bhagwan woh raam kaun hai, manushya kuchh bhi samajhte nahin hain। vesta oph time, vesta oph mani karte rehte। tum bachchon ko hamne vishwa ka raajya bhaagya diya tha, phir kahaan kiya? 5 hajaar varsha pahle tumko svarga ki raajaai di thi, woh phir kaise ganvaai? ab tum samajhte ho - kaise ham neeche girte aaye hain। abhi phir chadhna hai। chadhti kala ek second mein, utarti kala 5 hajaar varsha mein। brahma so vishnu banne mein ek second, vishnu se brahma banne mein 5 hajaar varsha lagte hain। kitni points samjhaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ka namaste।

dhaarna ke liye mukhya saar:-

1) ab talkie se movie, movie se silence mein jaana hai, isliye talkie (baatcheet) bahut kam karni hai। royalty se bahut aahiste bolna hai।

2) knowledge samajhne ke baad teevra purushaartha kar satopradhaan banna hai। yaad ka chart rakhna hai।

vardaan:- is lok ke lagaav se mukta ban avyakt vatan ka sair karne vaale udta panchhi bhav

buddhi roopi vimaan se avyakt vatan va mool vatan ka sair karne ke liye udta panchhi bano। buddhi dvaara jab chaaho, jahaan chaaho pahunch jaao। yeh tab hoga jab bilkul is lok ke lagaav se pare rahenge। yeh asaar sansaar hai, is asaar sansaar se jab koi kaam nahin, koi praapti nahin to buddhi dvaara bhi jaana banda karo। yeh raurav narka hai ismen jaane ka sankalp aur svapna bhi na aaye।

slogan:- apne chehre aur chalan se satyata ki sabhyata ka anubhav karaana hi shreshthata hai।

ye avyakt ishaare - paropkaar ki bhaavna se sampanna ban apkaari par bhi upkaar karo

jo paropkaar ki bhaavna se sampanna hai, woh sada santushtamni ke samaan svayan bhi santushta hoga aur sarva ko bhi santushta karne vaala hoga। kamaal yeh hai jo hopeless mein hope paida kar dega, jiske prati sab niraasha dikhaayen, aise vyakti va aisi sthiti mein sada ke liye unki aasha ke deepak jaga dega। apne upkaar ki shubh bhaavna se, sneh se, shakti se, meethe bol se, utsaah-umang ke sahayog se dilshikasta ko shaktivaan bana dega arthaat bhikhaari ko baadshaah bana dega।