Mamma's Murli - gyan-sitar-12

३०.१२.५८

puraane karmabandhan ke hisaab - kitaab ko mitaakar poora baap ke havaale ho jaana hi shreshtha purushaartha hai

bhagwan ko kaalon ka kaal bhi kaha jaata hai। kyonki is samay unka part hi hai poorn vinaash karne ka। jabki unko poorn vinaash karna hai to jarur kaalon ka kaal banna pade । marte to aate hain, parantu us marne aur abhi ke marne mein bada pharka hai ! ab to maanon anek janmon ka maut hai। isliye anek janmon ke hisaab-kitaab ko bhagwan ke aage rakhna hai। kis tareeke rakhna hai, woh bhagwan khud hi aakar samjhaate hain। kehte hain - chaahe anek janmon ke dande khaakar hisaab-kitaab chuktu karo, chaahe mere dvaara mere saath sambandh jodkar jeete ji maro । aap sab jeete ji mar rahe ho ya mar bhi chuke ho ? ham sab purushaarthi hain। din-raat har second purushaartha karte hain। jabki unke saath hamko chalna hai to is puraane karmabandhan ke hisaab-kitaab ko poora chuktu kar dena hai। bhal god bhi li hai, to bhi apne hisaab-kitaab ko to jeete ji chuktu karna hai na। usmein successful kahaan tak rehte hain - woh baat aur hai parantu attention din-raat jarur hona chaahiye ।

to poorn vinaash ka matlab yeh nahin ki sirf duniya ka vinaash parantu unko aatmaon ke poorn hisaab-kitaab ko bhi chuktu karna hai। aatmaayen unke havaale hon tab to dharmaraaj hisaab-kitaab chuktu kare। vinaash ki bhi full taiyaariyaan ho rahi hain aur yahaan paramatma jeete ji aatmaon ko deh se alag karaake apne havaale karte hain। deh aur deh ke sambandhiyon se nikal unke havaale hona hai। us taraph paramatma ne woh taiyaariyaan bhi karaai hain, kyonki sabko le jaana hai। yeh bhi batlaate hain ki jeete ji hamaara hone se bahut bada pad praapta hoga। aise bhi nahin, sirf god li to mar chuke । yeh to aatmaon ka purushaartha bahut gahra hai। aatmaon ko apne poorn sanskaaron ko mitaae unke havaale karna hai। hisaab-kitaab poora dena hai। apni praalabdha lene ka bhi hisaab unke aage rakhna hai kyonki paramatma ko sthaapna, vinaash, paalna ka kaarya ab hi poora kar jaana hai। baap humein batlaate hain ki kalpa pahle is purushaartha se tum yeh bane the । parantu aise to nahin ban gaye। kehte hain- mere dvaara apna purushaartha karne se bane the । to bhavishya ka jod aur past ka minus karna hai। jeete ji yeh kaam karna - ismen mushkilaat aati hai। badi kathin manzil hai। maaya aisi hai jo bachche bankar phir badal jaate hain।

lakshya to bahut ooncha hai। sirf vaayda karna hai। bhal yeh batlaaya jaata hai ki mahaarthi, ghodesvaar, pyaade ke liye kya-kya purushaartha hai, lekin purushaartha ko to samajhna hai na ki kis purushaartha se poori praapti karen ? bhagwan dvaara samjhaaya to jaata hai ki gyaan bahut sahaj hai, purushaartha bahut gambheer hai। ismen poora hisaab-kitaab dena hota hai aur lena hota hai । parantu ismen bhi rukaavten aati hain। ham to aise daanv lagaane vaale ko dhanyavaad denge। baaki manzil kade se kadi bhi hai, meethe se meethi bhi hai, ati sahaj bhi hai, difficult bhi hai। sahaj isliye hai kyonki unka tareeka bahut sahaj hai, unko jaanna bhi sahaj hai। parantu phir bhoolte bhi jhat hain। yeh sab vighna noondhe hue hain। unko jaankar ant tak nibhaana hai। aise nibhaane vaale hi poora laabh le sakte hain। us duniya mein bhi sab kuchh chaahiye । raaja-raani mein bhi nambarvaar, praja mein bhi nambarvaar । sab ek sthiti mein nahin rah sakte। isliye jaankar, sambhalkar chalna hai।