Mamma's Murli - gyan-sitar-27

12.9.59

ashareeri avastha hi sarvottam avastha hai

aatma pahle ashareeri hai jisko niraakaar kehte hain। shareer ko peechhe dhaaran karti hai। yeh hai apna lakshya। lekin kahne mein yeh bhi common hai। practical ashareeri hokar rahne ka abhyaas koi ko bhi nahin hai। jaise baba ashareeri hai vaise ham bhi baba ke saath vahaan baithe hain। to uthte-baithte yeh avastha rakhni hai। jaise baba aate hain, bolte hain athva karmendriyon ka aadhaar lete hain, phir ashareeri ho jaate hain – vaise ham aatmaon ko bhi abhyaas karna hai। yeh hai sarvottam avastha। kachhue misal shareer mein aakar kaam karke phir ashareeri hona hai। aise bhi kaam hote hain jo shareer mein aane ki darkaar nahin rehti hai। jitna ham baba ki yaad mein baba ke saath rahenge utni baba ki taakat milti rahegi। to yahi avastha dhaaran karne ka purushaartha karna hai। jaise baba abhi-abhi shareer mein, abhi-abhi ashareeri – vaise ham bhi quick udna seekhenge to pankh nikal aayenge। yeh nayon ke liye baat nahin hai। unke liye jaise French bhaasha hai । puraanon ke liye yeh dhaarna hai ।

yaad ke bhi tareeke hain na। apni avastha ko aisa halka banaana hai। yahi bahut saral meethi avastha hai । duty mein rehte athva ghar mein rehte jo anek baaten vismriti karaati hain, jisse chhote-chhote vikarma bante hain, usse safety ke liye hi yeh abhyaas kavach hai । phir maaya ki goli nahin lagegi। jaise baba samajhte yeh shareer loan par liya hai, vaise hamne bhi service arth yeh shareer liya hai to jitna us avastha mein rahenge utna ५ bhooton se safe rahenge । yeh hai ati sookshm। baahar se to koi tapasya ya dhyaan mein nahin jaate। woh dhyaan ki department alag hai । usko ham ashareeri avastha nahin kahenge। yeh point badi sookshm hai। iska abhyaas karna hai । apni safety ka sthaan hi hai ki baap ke paas chup kar ashareeri ho baith jaana । jaise bachche jab kisi baat se darte hain to maa-baap ki god mein chup kar baith jaate hain । humein to saari knowledge hai, sab actors hain। koi ulti reeti chalta hai yeh bhi unka part hai- usmein harsha va shok nahin aata । iski dhaarna bahut achhi chaahiye। jitna jaruri hai utna samay dhyaan dekar ke phir apni smriti mein raho । aise abhyaas karte baba ke paas baith jaayenge। phir to २१ janma - २५०० varsha safe ho jaate hain । karma bhi shreshtha rehte hain। paanch bhoot to rehte nahin। to jitna vahaan rahenge to dehi ke shuddh svabhaav-sanskaar jaagenge । yeh hai apne ko oopar uthaane ke liye। is prithvi se ooncha ja rahe hain । kehte hain na – devtaaon ke pair prithvi par nahin rehte hain। yaani vikaari prithvi par nahin aate । baaki prithvi to vahaan bhi hai। to ab hamko yahaan se paanv uthaana hai, lautna hai ।

guru ka kaam hai vaapas le jaana। purify kar lautaate hain arthaat durgati se sadgati mein le jaate hain । yeh hai purushaartha kar apne ko udaana। jaise chhote panchhi ko udna sikhaate hain, aise baba hamko bhi udna sikhaate hain । na saakaari duniya, na aakaari lekin niraakaari duniya mein ashareeri hokar rehna hai। hai saari buddhi ki saphaai । kaha hi jaata hai buddhiyog। haath-paanv ke yog-aasan to bahut sikhaate hain । lekin yeh hai buddhi ki saphaai jisse aatma saaph ho jaati hai। yeh hai abhi ka purushaartha, phir koi purushaartha nahin karna padta hai। daivi sambandh abhi banaate hain २१ janma - २५०० varsha ke liye। to saare anek janmon ke shuddh potaamel ko abhi banaana hai aur saare anek janmon ke ashuddha khaate ko khatma karna hai।

log samajhte hain koi ko duhkh na dena, jhooth na bolna, gussa na karna - yahi purushaartha karna hai। lekin ham kehte - body-conscious mein aana hi ek do ko duhkh dena hai। isliye ashareeri hokar rehna hai। baahar se to kuchh karna nahin hai। dekho, devtaayen kitne fashionable hain, jad chitron ko kitna sajaate hain ! to jab woh honge unhon ke mahal kitne saje-sajaaye honge ! vishnu kitna saja sajaaya hai ! yahaan to an-natural sajaavat hai। vahaan lipstick, powder lagaane ki darkaar nahin rehti । vahaan koi apraapta vastu nahin rehti hai। doodh ki nadiyaan bahti hain। aise nahin, nadiyon mein koi doodh bahta hai, lekin athaah rehta hai। koi kami nahin। poorn sampatti hai। aise to nahin yeh koi kalpana hai। yeh knowledge to koi manushya de bhi nahin sakte। paramatma hi samjhaate hain। to aisa purushaartha karna hai jisse sab praapti ho jaayen। tab kaha hai sabhi yagyon mein sarvottam, kyonki ismen sab yagya svaaha ho jaate hain। sab baaton mein apne ko sarvottam rakha hai। tab kehte hain -- jahaan jeet, vahaan main। haar to maaya karaati hai। aise to nahin kehte jahaan haar vahaan main। yeh hai shreshtha yagya paramatma ka। ham dekh rahe hain ki vinaash ke aasaar aate jaate hain। ham bhi unnati ko paate jaate hain।

ashareeri bhi tab kehte hain jab shareer mein hain। ashreereepan ki avastha ko bhool gaye hain, isliye pakka karaate hain। woh bhi kaisa saral meetha tareeka hai ! paramatma baap ke saath baith jaao, bas। baaki bhagwan ko sarvavyaapi hone ki darkaar nahin। agar unke haajir hote duhkhi hoven to paramatma ki badnaami ho jaati hai। 'baba' kahne se hi kitna lav aa jaata hai ! unse sab kuchh lena hai। to apna yog kitna saral sahaj hai ! nashtomoha hona kathin nahin hai। mushkil hai anek janmon ke vikarmon ko yogbal se bhasma karna। ismen hi time lagta hai। baaki nashtomoha to jhat se ho sakte hain। uska pahla example brahma ka saamne khada hai, jismen baap ne pravesh kiya। usko deri nahin lagi aur maataayen bhi kaise aa gai ! masti aa gai- hamko milna hai । us samay itna gyaan bhi nahin tha। masti thi - bas, ab baikuntha jaana hai । is duniya mein kya sukh hai ? jaise sookha kaana (ganna) choosna hai । baba kehte – “ismen kya ras hai ? khaao to maal khaao" । baap to aisa banaate hain, tab to unko yaad karte hain । kaisa bhi naastik ho, yeh jarur kahenge -- koi power hai, koi nature hai । lekin woh kya hai, usmein kitni shakti hai - woh ham jaante hain । woh to kah dete hain- he raam ji, jagat bana nahin hai। phir to raam ji bhi bana nahin hai । lekin ham jaante hain-- kaise baba puraane jagat se ekdam naya banaate hain ।

to us baap se kitna lav hona chaahiye ! jo prem tukda-tukda ho sab taraph chala gaya tha woh ab ek se jutaate hain । sab kuchh vahi hai। isse yahaan hamaari kamaai ho rahi hai। woh kamaai to alpakaal jhanbhangur ki hai । ismen sachchi kamaai karna chaaho to us avastha mein raho। baba ka hokar rehna hai । paramatma ko samartha to sab gaate hain। ab woh hamaara baba practical bane hain । foundation mein taakat hai poore jhaad ko dhaaran karne ki । paramatma itna sarvashaktivaan hote bhi itna saadhaaran part bajaate hain। isko kehte hain incognito part । yeh bhi kalyaankaari hai । nahin to, bheed ho jaae, usko kahaan sambhaalenge ? abhi hi nahin pahunch sakte । kitne nimantran dete hain! hands nahin hain। taiyaar ho to karmabandhan bhi chhoote। tum kaho– karmabandhan se chhudaao to ham laayak banen, lekin baba kehte - in circumstance mein hi bankar dikhaao tab kahenge laayak hai । baba aate hain sadgati ke liye। lekin uske liye pahle gati karenge na । gati kaha jaata hai pure kar le jaana। le jaayega tab to nai duniya mein aayenge ।