Mamma's Murli - gyan-sitar-28

17.9.59

aatma apna hi mitra, apna hi shatru hai, jo karega woh paayega

geet:- mukhda dekh le praani…।

om shanti। knowledge ko darpan kaha jaata hai। yeh paramatma ki avinaashi knowledge darpan hai ! isse saara pata lagta hai ki manushya aatma ki kahaani athva karma - kahaani kya hai ? ab gyaan ke darpan mein kya dekhenge ? andar to bahut kaali, maili aatma baithi hai। woh samajhte paramatma baitha hai। lekin paramatma to andar nahin baitha hai। paramatma ko aana padta hai। isliye avatran gaaya hua hai। kehte hain- jab-jab dharma glaani hoti hai, tab-tab main aata hoon। baitha ho to yeh kah nahin sakte । jab aate hain to aakar roshni dete hain ki tum kitne svachchha the, ab kitne kaale bane ho ! kahaani bhi iski hai। ismen aadi-madhya-ant aa jaata hai। yeh ek jeevan ki baat nahin hai lekin jab se is stage par part shuru hua hai tab se ab tak ki kahaani chali aai hai। beech mein vaapas to gae nahin hain। to samjhaate hain ki shuru se aatma kaise part bajaati aai hai। yeh hai ab hamaare saamne darpan athva knowledge। is darpan mein niraakaari duniya se lekar aakaar-saakaar srishti ki saari samjhaani hai। manushya bhal ved - shaastra adhyayan karte hain lekin darpan to milta nahin jisse dekhen ki aatma kahaan se maili hui hai to saaf karen। yadi usse aatma saaph hoti to duniya ki yeh result nahin hoti ।

duniya vaale to kehte hain ki kaliyug abhi bachcha hai। aur bada hoga to kya haal hoga ? darpan hota to kyon maili hone dete, saaph kar dete। to apne ko darpan mila hai। isliye jaante hain ki paramatma ka ab aana zaruri hai। aate hain to zarur unka nivaas sthaan koi hai। woh door desh nivaasi hai। unka karttavya bhi hai lekin aise nahin, yeh vinaash-sthaapna ka kaarya sadaiv chalta rehta hai। yeh janma-maran to apne karmon se hota hai। isse to duhkhi ho rahe hain। agar paramatma ka yeh karttavya hai to paramatma duhkh dene vaala thahra। lekin paramatma ki mahima hai sukhdaata । duhkh dene vaale ko thode hi yaad kiya jaata hai। to zarur vinaash, sthaapna ka koi aur tareeka hai। to paramatma samjhaate hain -- "jisse duhkhi hue ho unka vinaash karne aata hoon। paapon ka vinaash karne vaala aur paapaatmaaon ka uddhaar karne vaala hoon।” ab to paapaatmaaon ki khoob vriddhi ho rahi hai। ab baap unhon ka uddhaar kar daivi srishti ki sthaapna karte hain। phir unki paalna ke liye hamaari bhi praalabdha banaate hain। phir to yeh kaarya karne ki darkaar nahin hai।

paramatma ka aana bhi ek time par hona chaahiye। jab jhaad bilkul puraana ho jaata hai tab baap kalam lagaate hain। to uska bhi time hai na। jab vriddhi ho rahi hai tab to kalam nahin lagaayenge। to paramatma ke karttavya ka bhi time hai। ab aave to woh bhi ek jagah aaega। kahaan aakar sthaapna kare - woh bhi hisaab-kitaab samjhaate hain। bhaarat hi hai jo satopradhaan tha, doosre dharma peechhe vriddhi hue hain। shuru se yeh bhaarat tha jahaan daivi dharma aur raajya tha। ab woh nahin hai। isliye paramatma ko usi ki sthaapna ke liye aana padta hai। aane ka time bhi ek hi baar hai। achha, aave to kismen aave ? manushya tan ka aadhaar lena pade। manushya aatmaon se purushaartha karaae praalabdha banaani pade।

manushya aatmaaen giri kahaan se hain? karmon se giri hain। to karmon ko sudhaarne, samjhaane liye manushya-tan ka aadhaar lena pade। aana bhi us manushya-tan mein pade jiski praalabdha shuru se pahla number ho, jisko Adam kaho, Adam kaho। yeh to unko banaayega na jo pahle devta hain, jo phir pahle hi maile bane hain, usmein hi aakar bataata hoon। to paramatma ke aane ke bhi circumstance hain। hisaab-kitaab se aaega na। khud to hua akarta, abhokta। woh aatmaon se karaayega na – jo shuru vaali aatmaayen hain, jinhon ka ८४vaan janma ho। sabke to ८४ janma nahin hain। peechhe vaalon ke kam janma hain। unhon mein to nahin aa sakta। naya kalam to shuru se lagega na।

to paramatma baith saare plan ko samjhaate hain। aise kaarya karna padta hai। nahin to kaise karen ? koi raay deve। karaana to manushyon se hai। aise to nahin khud hi karta hai । phir to bhogna bhi usko pade । lekin kehte hain -- "aatma apna hi mitra hai, apna hi shatru hai । jo karega woh paaega।" to paramatma to nahin karta hai na । aatmaon se hi karaate hain । aur koi tareeka nahin । sab kaayde se karna hai । vikarmon ki sajaaen bhi bhogni padti hain । purushaarthiyon ko praalabdha deni padti hai । isliye kaise apna kaarya karte hain-- woh samjhaate hain । aakaari devtaaon se bhi madad lete hain । rachna dvaara hi nai rachna rachni padti hai । main to nyaara hoon । mujhe in baaton mein jaana nahin hai । karaana hai svachchha aatmaon se aur srishti phir ekdam paapaatma hai । to kitni difficulty hai ! to aisi yukti se karna padta hai । nahin to kaise karen jo sabhi kaayde mein kaayam rahen ? kehte – mere karttavya ko bhi woh jaan sakte jo mere saath is kaarya mein madadgaar hain । baaki to sabko vaapas muktidhaam mein jaana hai । unhon ka bhi apne-apne samay par golden ej hai । yeh baaten samajhne, samjhaane ki buddhi chaahiye । baaki yadi bhagwan hi karnakraavanhaar hai to phir ham purushaartha ka kyon sochen ? lekin karmon ki responsibility hamaare oopar hi hai । achhe-bure karmon ka phal bhi hamko milna hai । baap aakar achhe karmon ka gyaan dete hain । baba se jaise yeh varsa lete hain । lekin jab unse yog lagaayen ।

ham kehte hain - baba hai, daada hai, varsa dete hain । unse sambandh jodenge tab to milega na । ham bhi niraakaar aatmaayen, woh bhi niraakaar param aatma । param hai kyonki ajanma hai । yeh jo moonjhate hain ki paramatma ek tan mein had mein kaise aate, woh to behad mein rahne vaala sarvavyaapi, sarva tan mein viraajmaan hai ? lekin isko bhi samajhna hai । unka kaisa plan hai ? jaise government ke bhi plan bante hain, paramatma ka bhi plan hai । tab to kehte hain sadgati karne ki mat tum jaano । to jo jaante hain vahi bataate hain । sachcha mitra to woh thahra na jo hamaare vikarmo ko mitaae sarvada sukhi banaate hain । to kyon na unse sambandh joden aur sab duhkh ke sambandh toden । kehte hain - tumhaara sambandh phir bhi aatmaon ke saath judega lekin woh hai sukh ka sambandh । yeh hai duhkh ka sambandh, ise todo । bhagvaanuvaach - yeh kaam mahaashatru hai । manushya samajhte hain – pati-patni ka sambandh hai hi vikaar ke liye। lekin aisi vikaari pravritti paramatma ne nahin rachi। buddhi nahin maanti ki aisi gandagi se utpatti paramatma ne banaai ho। isliye sanyaasi brahmacharya mein rehte hain। zarur achha hai na। agar shaastron anusaar yeh vikaar karna hak hai to phir shaastra sunaane vaale sanyaasi kyon brahmacharya mein rehte hain? yeh vichaar nahin aata kyonki man-buddhi sahit aatma bhrashta ho gayi hai। ab baba samjhaate hain – meri rachna mein yeh baat ansh maatra nahin thi। isliye aise kabhi nahin samajhna hai ki yeh anaadi cheez hai, shuru se chali aati hai। nahin। baap ne srishti ki vriddhi ka tareeka bhi bada royal rakha hai। aadha kalpa patit hone se bacha dete hain। in baaton par buddhi kaam nahin karti hai to moonjhate hain। itni buddhi nahin hai tab to buddhivaanon ki buddhi baap kehte hain – ab chalo gandi chhi-chhi duniya se nai duniya mein।