Avyakt murli du dimanche 18 mai 1969

>

18-05-69 om shanti avyakt baapdaada madhuban

"roohaani gyaan-yog ki jyotishi"

aap sabhi ne bulaaya ya baapdaada ne aap sabhi ko bulaaya hai? kisne kisko bulaaya hai? jo bachche baap ke kantavya mein nimitta bane huye hain - unhon ko yeh baat har vakta yaad rakhni hai ki humein har samay har haalat mein ever ready aur all-round hona hai। agar yeh do baaten sabhi mein aa jaaye to service ka saboot shreshtha nikal sakta hai। lekin nambarvaar purushaartha anusaar yeh baaten hain। aap nimitta bane hue bachchon ko yeh salogan yaad rakhna chaahiye ki ham jo karma karenge mujhe dekh aur sabhi karenge। har samay apne ko aisa samjho। jaise drama ke stage par sabhi ke saamne ham part baja rahe hain। ek hota hai apne aap se rehearsal। ek hota hai stage par sabhi ke saamne part bajaana। to stage par act karne vaale ka apne oopar kitna dhyaan rehta hai। ek-ek act par har samay attention rehta hai। haathon par,paavon par,aankhon par sabhi par dhyaan rehta hai। agar koi bhi baat neeche oopar hoti hai to actor ke act mein shobha nahin deti। to aise apne ko samajhkar chalna hai।

teen minute ka record jab bharte hain to kitna dhyaan dete hain। aap sabhi bhi apne 21 janmon ka record bhar rahe ho to bharte samay bahut dhyaan rakhna hai। record mein jara bhi neeche-oopar ho jaata hai to woh record hamesha ke liye raddhi ho jaata hai। tumhaara bhi 21 janmon ke liye satayugi raaj- dhaani ka jo record bharta hai to woh radda na ho jaaye। radda hua to phir door ho jaate hain। to yeh sochna chaahiye - hamaare har karma ke oopar sabhi ki aankh hai। actors jab dekhte hain, hamko sabhi dekh rahe hain to khaas attention rehta hai। koi dekhne vaala nahin hota hai to albelaapan rehta hai। to hamesha samajhna chaahiye ham bhale akelepan mein kuchh karte, to bhi srishti ke saamne hain। saari srishti ki aatmaayen chaaron or se humein dekh rahi hain। agar ek-ek phool aisa sampoorn aur sundar ho jaaye to is bageeche ki khushbu kitni phail jaati! lekin kyon nahin phailti,uska kaaran kya? khushbu ke saath-saath kahaan-kahaan beech mein aur baat bhi aa jaati hai। bhale khushbu kitni ho lekin khushbu se bhi jaldi failne vaali badbu hoti hai, jo jara si baat saari khushbu ko samaapta kar deti hai। avinaashi khushbu jisko sada gulaab kehte hain। ek hota hai sada gulaab, doosra hota gulaab,teesra hota hai roohen gulaab। pahla number hai roohen gulaab। woh rooh ki sthiti mein rehta hai aur roohaani rooh ke hamensha najdeek hai। aise hai roohe gulaab। aur doosri quality jo hai woh phir service mein bahut achhe rehte hain baaki roohaani sthiti mein kami hai। service mein, dhaarna mein achhe hain,sanskaar sheetal hain। khud apne ko kya samajhte ho? kis number ka phool samajhte ho? kaante to yahaan ho bhi na sake। hain to sabhi gulaab। lekin gulaab mein bhi pharka hai। jo roohe gulaab honge unki nishaani kya hogi? aap logon ko mastak ki rekha parakhne aati hai?jyotishi bane ho va nahin? baapdaada jo gyaan aur yog ki jyotishi dikhaate hain unse kya dekhte ho? harek ke mukhde se,naynon se,mastak se maaloom padta hai। ismen bhi vishesh mastak aur naynon se maaloom padta hai। aap jyotish bankar harek ko parakh sakte ho?naynon mein aur mastak mein woh rekhaayen zaroor rehti hain। kisko parakhna yeh bhi jyotish vidya hai। to yeh jo vidya hai parakhne ki yeh kaeeyon mein kam hai। gyaan aur yog seekhte hain lekin yeh parakhne ki jyotish vidya bhi jaanni hai। koi bhi vyakti saamne aae to aap logon ko to ek second mein unke teenon kaalon ko parakh lena chaahiye। ek to past mein unki life kya thi aur vartamaan samay unki vritti,drishti aur bhavishya mein kahaan tak yeh apni praalabdha bana sakte hain। yeh jaanne ki practice chaahiye। yeh parakhne ki jo knowledge hai woh bahut kam hai। yeh kami abhi bharni chaahiye। vartamaan samay jo aane vaala hai usmein agar yeh gun nahin hoga, kami hogi to dhokhe mein aa jaayenge। kai aisi aatmaaen aap ke saamne aayengi jo andar ek aur baahar se doosri hogi। pareeksha ke liye aayengi। kyonki kai samajhte hain ki yeh sirf rate hue hain। to kai rang roop se aartipheesiyal roop mein bhi parakhne liye aayenge, bhinna-bhinna roop se। isliye yeh dhyaan rakhna hai ki yeh kisliye aaya hai? unki vritti kya hai? aur ashuddha aatmaon ki bhi badi sambhaal karni hai। aise-aise case bhi bahut honge din pratidin paap aatmaayen to bahut hote hain। aapdaayen,akaale mrityu, paap karma badhte jaate hain to unhon ki vaasnaayen jo rah jaati hain woh phir ashuddha aatmaon ke roop mein bhatakti hain। isliye yeh bhi bahut badi sambhaal rakhni hai। koi mein ashuddha aatma ki praveshta hoti hai to unko bhagaane liye ek to dhoop jalaate hain aur aag mein cheej ko tapaakar lagaate hain aur laal mirchi bhi khilaate hain। to aap sabhi ko phir yog ki agni se kaam lena hai। har karmendriyon ko yogaagni mein tapaana hai to phir koi vaar nahin kar sakenge। thoda bhi kahaan dheelaapan hua,koi bhi karmendriyaan dheeli hui to phir praveshta ho sakti hai। woh ashuddha aatmaaen bhi badi powerful hoti hain। woh maaya ki power bhi kam nahin hoti। yeh bahut dhyaan rakhna hai। aur kai praakritik aapdaayen bhi apna kantavya karegi। uska saamna karne liye apne mein eeshvareey shakti dhaaran karni hai। us samay sneh nahin rakhna hai। us samay shakti- roop ki aavashyakta hai। kis samay snehmoorta,kis samay shaktiroop banna hai yeh bhi sochna hai। in sabhi baaton mein shaktiroop ki aavashyakta hai। agar koi aisa aaya aur unko jyaada sneh dikhaaya to kahaan nuksaan bhi ho sakta hai। sneh baapdaada aur daivi parivaar se karna hai। baaki sabhi se shaktiroop se saamna karna hai। kai bachche gaphlat karte hain jo unhon ke sneh mein aa jaate hain। woh sneh vriddhi hokar kamjor kar deta hai, isliye ab shaktiroop ki aavashyakta hai। antim naara bhi bhaarat maata shakti avtaar ka gaayan hai। gopi maata thode hi kehte hain। ab shakti roop ka part hai। gopeekaaon ka roop saakaar mein tha। ab avyakt roop se shakti ka part hai। harek jab apne shaktiroop mein sthit honge to itne sabhi ki shakti milaakar kamaal kar dikhaayegi। yaadgaar roop mein antim chitra kaun sa dikhaaya hua hai?pahaad ko anguli dene ka। anguli,yeh shakti ki deni hai। isse hi kaliyugi pahaad khatma hoga। ismen harek ki anguli ki darkaar hai। abhi woh anguli puri reeti nahin hai। uthaate zaroor hain parantu koi ki kabhi seedhi koi ki kabhi tedhi ho jaati hai। jab poori anguli hogi tab prabhaav niklega। ek jaise anguli deni hai। is kaliyugi pahaad ko jaldi anguli dekar phir satayugi duniya ko laana hai।

saakaar ke saath sneh hai to jaldi-jaldi is puraani duniya se chalne ki taiyaari karo। aap kahenge abhi service kahaan hui hai lekin service bhi kiske liye ruki hai? agar aap harek shaktiroop mein sthit ho jaao to aap ke jo bhoole bhatke bhakta hain, na chaahte bhi chakmak (chumbak) ke aage aa jaayenge,deri nahin lagegi।

achha !